໒໐. ວີສຕິໂມ ປຣິຈ຺ເຉໂທ

ມຄ຺ຄາມຄ຺ຄຎາຓທສ຺ສນວິສຸທ຺ຘິນິທ຺ເທສວຓ຺ຓນາ

໑໒໖໔. ປຈ຺ຈຸປ຺ປນ຺ນສ຺ສ ຘມ຺ມສ຺ສາຕິ ປຈ຺ຈຸປ຺ປນ຺ນສ຺ສ ນາມຣູປຘມ຺ມສ຺ສ.

໑໒໖໖-໘. ອຸປ຺ປຊ຺ຊໂຕ ອຸປ຺ປຊ຺ຊນ຺ຕສ຺ສ ນາມຣູປຘມ຺ມສ຺ສ ຣາສິໂຕ ນິຈຍໂຕ ອາຄມນຎ຺ຈ ນຕ຺ຖິ. ທິສາຄມນນ຺ຕິ ທິສາຍ ຄມນໍ. ນິຣຸທ຺ຘສ຺ສາປິ ນາມຣູປຘມ຺ມສ຺ສ ເອກສ຺ມິໍ ຐາເນ ນິຈໂຍຕິ ຈ ນຕ຺ຖິ.

໑໒໗໐-໑. ອວິຊ຺ຊາສມຸທຍາ ຣູປສມຸທໂຍ, ອວິຊ຺ຊານິໂຣຘາ ຣູປນິໂຣໂຘ. ຕຓ຺ຫາສມຸທຍາ ຣູປສມຸທໂຍ, ຕຓ຺ຫານິໂຣຘາ ຣູປນິໂຣໂຘ. ກມ຺ມສມຸທຍາ ຣູປສມຸທໂຍ, ກມ຺ມນິໂຣຘາ ຣູປນິໂຣໂຘ. ອາຫາຣນິໂຣຘາ ຣູປນິໂຣໂຘ. ຘມ຺ເມຕິ ສງ຺ຂາຣຘມ຺ເມ.

໑໒໘໐. ສມ຺ປຕ຺ຕປຏິເວຘສ຺ສາຕິ ສມ຺ປຕ຺ຕໂລກຸຕ຺ຕຣສງ຺ຂາຕມຄ຺ຄຜລສ຺ສ ໂສຕາປນ຺ນາທິປຸຄ຺ຄລສ຺ສ. ວິປ຺ປຏິປນ຺ນສ຺ສາຕິ ປຏິປຕ຺ຕິຍໍ ອປ຺ປຏິປນ຺ນສ຺ສ, ວິຣຸທ຺ຘວເສນ ປຏິປນ຺ນສ຺ສ ວາ.

໑໒໘໖. ກາຍຈິຕ຺ຕານີຕິ ກາຍາຕິ ເວທນາສຎ຺ຎາສງ຺ຂາຣາ. ຈິຕ຺ຕນ຺ຕິ ວິຎ຺ຎາຓໍ.

໑໒໙໐. ຍໂຕ ຍໂຕ ປຈ຺ຈຍາທິໂຕ. ຍໍ ອມຕໍ ນິພ຺ພານໍ ວິຊານຕໍ ວິຊານນ຺ຕານໍ ປີຕິປາໂມຊ຺ຊໍ, ເຕຫິ ລຠິຕພ຺ພໍ ອມຕໍ, ອມຕໍ ວິຍ ປີຕິປາໂມຊ຺ຊໍ ວາ.

໑໒໙໓. ອປ຺ປຕ຺ເຕຕິ ອຕ຺ຕນິ ມຄ຺ຄຜລສ຺ມິໍ ອປ຺ປຕ຺ເຕ. ປຕ຺ຕສຎ຺ຎີຕິ ມຄ຺ຄຜເລ ອຫໍ ປຕ຺ໂຕ ອສ຺ມິ ອິຕິ ສຎ຺ຎິໂຕ ໂຫຕິ.

໑໒໙໗. ສາຣເວທິໂນຕິ ສາຣຊານນສີລາ. ຕນ຺ຕິ ຕໍ ມຄ຺ຄາມຄ຺ຄຎາຓທສ຺ສນໍ. ອິທໍ ຎາຓໍ ມຄ຺ຄາມຄ຺ຄຎາຓທສ຺ສນນ຺ຕິ ມຄ຺ຄາມຄ຺ຄຎາຓທສ຺ສນໍ ນາມ.

ອິຕິ ອຠິຘມ຺ມາວຕາຣຏີກາຍ

ມຄ຺ຄາມຄ຺ຄຎາຓທສ຺ສນວິສຸທ຺ຘິນິທ຺ເທສວຓ຺ຓນາ ນິຏ຺ຐິຕາ.

ວີສຕິໂມ ປຣິຈ຺ເຉໂທ.