໑໖. ໂສຬສໂມ ປຣິຈ຺ເຉໂທ

ອຠິຎ຺ຎານິທ຺ເທສວຓ຺ຓນາ

໑໐໔໕. ສຕາຕິ ສຕິສມ຺ປນ຺ເນນ. ອນຸໂຍຄນ຺ຕິ ວີຣິຍໍ.

໑໐໔໗. ໂຍຄາວຈຣຠິກ຺ຂຸນາ ນິພ຺ພຕ຺ຕິຕາສຸ ອຠິຎ຺ຎາສຸ ອສ຺ສ ໂຍຄາວຈຣສ຺ສ ຠິກ຺ຂຸໂນ ສມາຘິຠາວນາ ນິຏ຺ຐໍ ປຣິໂຍສານໍ ຄຕາ ສິຍາ.

໑໐໕໐. ທນ຺ເຕຕິ ທນ຺ເຕ ຐິເຕ. ອຈເລຕິ ອຈເລ ຐິເຕ.

໑໐໕໒-໔. ອຠິຎ຺ຎາຍ ປາທກໍ ກາຣຓໍ ອຠິຎ຺ຎາປາທກໍ ໂຍຄີ ສຕໍ ວາປິ ສຫສ຺ສໍ ວາປິ ຍທິ ສເຈ ອິຈ຺ຉຕິ, ອຠິຎ຺ຎາປາທກໍ ຌານໍ ສມາປຊ຺ຊິຕ຺ວາ ຕໂຕ ອຠິຎ຺ຎາປາທກຌານໂຕ ວຸຏ຺ຐາຍ ວຸຏ຺ຐຫິຕ຺ວາ ‘‘ສຕໍ ໂຫມິ, ສຕໍ ໂຫມິ’’ ອິຕິ ເອວໍ ກາມາວຈຣປຣິກມ຺ມມານສໍ ກຕ຺ວາ ອຠິຎ຺ຎາຍ ປາທກໍ ກາຣຓຠູຕໍ ຌານໍ ປຸນາຘິຏ຺ຐາຕິ ປຸນ ອາປຊ຺ຊິຕ຺ວາ ຕໂຕ ຌານໂຕ ວຸຏ຺ຐາຍ ປຸນ ອຘິຏ຺ຐາຕິ, ສຫາຘິຏ຺ຐາເນນ ເຈຕສາ ອຘິຏ຺ຐານສງ຺ຂາເຕນ ຈຕຸຕ຺ຖຊ຺ຌານຈິຕ຺ເຕນ ສຫ ໂສ ໂຍຄີ ສຕໍ ໂຫຕິ. ອິທ຺ຘິວິຘຎາຓໍ.

໑໐໖໗-໘. ເອໂສ ອຘິຄຕາຠິຎ຺ໂຎ ໂຍຄີ ປາທກາຣມ຺ມເຓນ ຈຕຸຕ຺ຖຊ຺ຌານສ຺ສ ປຏິຠາຄນິມິຕ຺ຕສງ຺ຂາເຕນ ອາຣມ຺ມເຓນ ຜຸຏ຺ເຐ ໂອກາເສ ຄເຕ ປວຕ຺ເຕ ປນ ສທ຺ເທ ສຸຓາຕິ. ທິພ຺ພໂສຕຎາຓໍ.

໑໐໖໙. ປຣສ຺ສ ຈິຕ຺ຕໍ ປຣິຍຕິ ປຣິຈ຺ຉິຊ຺ຊຕີຕິ ເຈໂຕປຣິຍໍ, ຕເມວ ມານສໍ ເຈໂຕປຣິຍມານສໍ.

໑໐໗໐. ຫທຍໍ ປນ ນິສ຺ສາຍາຕິ ຫທຍວຕ຺ຖຸໍ ນິສ຺ສາຍ ປວຕ຺ຕມານໂລຫິຕໍ, ຫທຍໂກເສ ປວຕ຺ຕໍ ຣຸຫິຣນ຺ຕິ ອຕ຺ໂຖ.

໑໐໗໕. ກາມາວຈຣຈິຕ຺ຕຎ຺ຈາຕິ ກາມາວຈຣສຕ຺ຕານໍ ກາມາວຈຣຈິຕ຺ຕຎ຺ຈ. ຣູປາຣູເປສຸ ຣູປຠວາຣູປຠເວສຸ ສຕ຺ຕານໍ ມານສຎ຺ຈ. ກິໍ ຠູຕໍ? ສຣາຄາທິປ຺ປເຠທກໍ ມານສໍ ສພ຺ພໍ ເຈໂຕປຣິຍຎາຓໍ ຊານາຕິ. ເຈໂຕປຣິຍຎາຓໍ.

໑໐໗໗-໘໒. ນິສຊ຺ຊາ ສພ຺ພປຈ຺ຉິມາຕິ ສພ຺ເພສໍ ອິຣິຍາປຖານໍ ປຈ຺ຉາ ຊາຕາ ນິສຊ຺ຊາ ຠິກ຺ຂຸນາ ອາວຊ຺ຊິຕພ຺ພາ. ຕໂຕ ປຠຸຕິ ຕໂຕ ສພ຺ພປຈ຺ຉິມໂຕ ນິສຊ຺ຊາໂຕ ປຠຸຕິ ຕໍ ສພ຺ພໍ ປຈ຺ຉິມນິສຊ຺ຊໍ ອາທິໍ ກຕ຺ວາ ປຏິໂລມກ຺ກມາ ປຏິໂລມກ຺ກເມນ ສພ຺ພໍ ອຕ຺ຕນາ ກຕໍ ອາວຊ຺ຊິຕພ຺ພໍ. ອສ຺ມິໍ ຠເວ ຍາວ ຍຕ຺ຕກໍ ກາລໍ ສນ຺ຘິ ປຏິສນ຺ຘິ ໂຫຕິ, ຕາວ ຕຕ຺ຕກໍ ກາລໍ ກຕໍ ກິຣິຍໍ ເຕນ ຠິກ຺ຂຸນາ ອາວຊ຺ຊິຕພ຺ພໍ. ປຸຣິມສ຺ມິໍ ຠເວປິ ຈຸຕິກ຺ຂເຓປິ ນິພ຺ພຕ຺ຕໍ ນາມຣູປຎ຺ຈ ສາຘຸກໍ ອາວຊ຺ຊິຕພ຺ພໍ. ຈຸຕິກ຺ຂເຓ ນິພ຺ພຕ຺ເຕ ຕສ຺ມິໍ ນາມຣູເປ ເອວໍ ຠິກ຺ຂຸນາ ອາວຊ຺ຊິຕພ຺ເພ ຍທາ ຕເທວ ຕເມວ ນາມຣູປໍ ອາຣມ຺ມຓໍ ກຕ຺ວາ ຈຸຕິກ຺ຂເຓ ມໂນທ຺ວາເຣ ມນກ຺ກາໂຣ ມໂນທ຺ວາຣາວຊ຺ຊນຈິຕ຺ຕໍ ອຸປ຺ປຊ຺ຊຕິ. ປຸພ຺ເພນິວາສານຸສ຺ສຕິຎາຓໍ.

໑໐໘໖-໙໖. ອຠິຎ຺ຎາປາທກໍ ກສິຓາຣມ຺ມຓໍ ຌານໍ ອຠິນີຫາຣກ຺ຂມໍ ກຕ຺ວາ ອິເມສຸ ຕີສຸ ກສິເຓສຸ ກຕປຸຎ຺ເຎຫິ. ຕສ຺ມາ ຕມິຕຣໍ ວາປີຕິ ອາໂລກກສິຓໍ ວາ ອິຕຣໍ ວາປິ ກສິຓທ຺ວຍໍ ຍຖາກ຺ກມໍ ອຸປ຺ປາເທຕ຺ວາ ອຸປຈາຣຠູມິຍໍເຍວ ຐຕ຺ວາ ຕໍ ອາໂລກກສິຓໍ ຐເປຕພ຺ພໍ. ອປ຺ປນໍ ປຓ຺ຑິໂຕ ນ ອຸປ຺ປາເທຍ຺ຍ, ສເຈ ອຸປ຺ປາເທຕິ, ຕໍ ອາໂລກກສິຓໍ ປາທກຊ຺ຌານນິສ຺ສິຕໍ ປາທກຊ຺ຌານສ຺ສ ອາຣມ຺ມຓໍ ໂຫຕິ. ວຑ຺ຒິຕສ຺ສ ຌານສ຺ສ ອນ຺ໂຕຄຘໍ ຣູປໍ ເຕນ ໂຍຄິນາ ປສ຺ສິຕພ຺ພໍ ຠເວ ຠເວຍ຺ຍ. ຕໍ ຣູປໍ ປສ຺ສໂຕ ປສ຺ສນ຺ຕສ຺ສ ຕສ຺ສ ໂຍຄິໂນ ປຣິກມ຺ມສ຺ສ ວາໂຣ ອຕິກ຺ກມຕິ, ຕາວເທ ຕສ຺ມິໍເຍວ ຂເຓ ອາໂລໂກປິ ຕສ຺ສ ໂຍຄິໂນ ອາໂລໂກປິ ຂິປ຺ປໍ ອນ຺ຕຣຘາຍຕິ. ຕສ຺ມິໍ ອາໂລເກ ອນ຺ຕຣຫິເຕ ຣູປຄຕໍ ຣູປໍ ນ ທິສ຺ສຕິ. ທິວສມ຺ປິ ນິສີທິຕ຺ວາ ປສ຺ສໂຕ ຣູປທສ຺ສນໍ ໂຫຕິ.

໑໑໐໐-໑. ຕໍຈິຕ຺ຕສໍຍຸຕນ຺ຕິ ເຕນ ຈຕຸຕ຺ຖຊ຺ຌາເນນ ຍຸຕ຺ຕໍ ຈິຕ຺ຕໍ. ອນາຄຕໍສຎາຓສ຺ສ ປຣິກມ຺ມໍ, ຍຖາກມ຺ມູປຄສ຺ສ ຎາຓສ຺ສ ຈ ປຣິກມ຺ມໍ. ທິພ຺ພຈກ຺ຂຸຎາຓໍ.

໑໑໐໓. ໂຍ ຠິກ຺ຂຸ ອິຘ ອິມສ຺ມິໍ ສາສເນ ອິມໍ ປນ ຄນ຺ຖໍ ສຸຓາຕິ, ຈິຕ຺ເຕ ກໂຣຕິ ຈ, ໂສ ຠິກ຺ຂຸ ອເນນ ຕເຣນ ອິມິນາ ຄນ຺ເຖນ ຕຣິຕ຺ວາ ອຠິຘມ຺ມມຫຓ຺ຓວປາຣໍ ຍາຕິ ປາປຸຓາຕິ, ຊານາຕີຕິ ອຕ຺ໂຖ.

ອິຕິ ອຠິຘມ຺ມາວຕາຣຏີກາຍ

ອຠິຎ຺ຎານິທ຺ເທສວຓ຺ຓນາ ນິຏ຺ຐິຕາ.

ໂສຬສໂມ ປຣິຈ຺ເຉໂທ.