໙. ກມ຺ມຏ຺ຐານປຣິຈ຺ເຉໂທ

໑. ສມຖວິປສ຺ສນານໍ, ຠາວນານມິໂຕ ປຣໍ.

ກມ຺ມຏ຺ຐານໍ ປວກ຺ຂາມິ, ທຸວິຘມ຺ປິ ຍຖາກ຺ກມໍ.

ສມຖກມ຺ມຏ຺ຐານໍ

໒. ຕຕ຺ຖ ສມຖສງ຺ຄເຫ ຕາວ ທສ ກສິຓານິ, ທສ ອສຸຠາ, ທສ ອນຸສ຺ສຕິໂຍ, ຈຕສ຺ໂສ ອປ຺ປມຎ຺ຎາໂຍ, ເອກາ ສຎ຺ຎາ, ເອກໍ ວວຕ຺ຖານໍ, ຈຕ຺ຕາໂຣ ອາຣຸປ຺ປາ ເຈຕິ ສຕ຺ຕວິເຘນ ສມຖກມ຺ມຏ຺ຐານສງ຺ຄໂຫ.

ຈຣິຕເຠໂທ

໓. ຣາຄຈຣິຕາ ໂທສຈຣິຕາ ໂມຫຈຣິຕາ ສທ຺ຘາຈຣິຕາ ພຸທ຺ຘິຈຣິຕາ ວິຕກ຺ກຈຣິຕາ ເຈຕິ ຉພ຺ພິເຘນ ຈຣິຕສງ຺ຄໂຫ.

ຠາວນາເຠໂທ

໔. ປຣິກມ຺ມຠາວນາ ອຸປຈາຣຠາວນາ ອປ຺ປນາຠາວນາ ເຈຕິ ຕິສ຺ໂສ ຠາວນາ.

ນິມິຕ຺ຕເຠໂທ

໕. ປຣິກມ຺ມນິມິຕ຺ຕໍ ອຸຄ຺ຄຫນິມິຕ຺ຕໍ ປຏິຠາຄນິມິຕ຺ຕຎ຺ເຈຕິ ຕີຓິ ນິມິຕ຺ຕານິ ຈ ເວທິຕພ຺ພານິ.

໖. ກຖໍ? ປຖວີກສິຓໍ ອາໂປກສິຓໍ ເຕໂຊກສິຓໍ ວາໂຍກສິຓໍ ນີລກສິຓໍ ປີຕກສິຓໍ ໂລຫິຕກສິຓໍ ໂອທາຕກສິຓໍ ອາກາສກສິຓໍ ອາໂລກກສິຓຎ຺ເຈຕິ ອິມານິ ທສ ກສິຓານິ ນາມ.

໗. ອຸທ຺ຘຸມາຕກໍ ວິນີລກໍ ວິປຸພ຺ພກໍ ວິຈ຺ຉິທ຺ທກໍ ວິກ຺ຂາຍິຕກໍ ວິກ຺ຂິຕ຺ຕກໍ ຫຕວິກ຺ຂິຕ຺ຕກໍ ໂລຫິຕກໍ ປຸຬວກໍ ອຏ຺ຐິກຎ຺ເຈຕິ ອິເມ ທສ ອສຸຠາ ນາມ.

໘. ພຸທ຺ຘານຸສ຺ສຕິ ຘມ຺ມານຸສ຺ສຕິ ສໍຆານຸສ຺ສຕິ ສີລານຸສ຺ສຕິ ຈາຄານຸສ຺ສຕິ ເທວຕານຸສ຺ສຕິ ອຸປສມານຸສ຺ສຕິ ມຣຓານຸສ຺ສຕິ ກາຍຄຕາສຕິ ອານາປານສ຺ສຕິ ເຈຕິ ອິມາ ທສ ອນຸສ຺ສຕິໂຍ ນາມ.

໙. ເມຕ຺ຕາ ກຣຸຓາ ມຸທິຕາ ອຸເປກ຺ຂາ ເຈຕິ ອິມາ ຈຕສ຺ໂສ ອປ຺ປມຎ຺ຎາໂຍ ນາມ, ພ຺ຣຫ຺ມວິຫາໂຣຕິ ຈ ປວຸຈ຺ຈຕິ.

໑໐. ອາຫາເຣປຏິກູລສຎ຺ຎາ ເອກາ ສຎ຺ຎາ ນາມ.

໑໑. ຈຕຸຘາຕຸວວຕ຺ຖານໍ ເອກໍ ວວຕ຺ຖານໍ ນາມ.

໑໒. ອາກາສານຎ຺ຈາຍຕນາທໂຍ ຈຕ຺ຕາໂຣ ອາຣຸປ຺ປາ ນາມາຕິ ສພ຺ພຖາປິ ສມຖນິທ຺ເທເສ ຈຕ຺ຕາລີສ ກມ຺ມຏ຺ຐານານິ ຠວນ຺ຕິ.

ສປ຺ປາຍເຠໂທ

໑໓. ຈຣິຕາສຸ ປນ ທສ ອສຸຠາ ກາຍຄຕາສຕິສງ຺ຂາຕາ ໂກຏ຺ຐາສຠາວນາ ຈ ຣາຄຈຣິຕສ຺ສ ສປ຺ປາຍາ.

໑໔. ຈຕສ຺ໂສ ອປ຺ປມຎ຺ຎາໂຍ ນີລາທີນິ ຈ ຈຕ຺ຕາຣິ ກສິຓານິ ໂທສຈຣິຕສ຺ສ.

໑໕. ອານາປານໍ ໂມຫຈຣິຕສ຺ສ ວິຕກ຺ກຈຣິຕສ຺ສ ຈ,

໑໖. ພຸທ຺ຘານຸສ຺ສຕິອາທໂຍ ຉ ສທ຺ຘາຈຣິຕສ຺ສ.

໑໗. ມຣຓອຸປສມສຎ຺ຎາວວຕ຺ຖານານິ ພຸທ຺ຘິຈຣິຕສ຺ສ.

໑໘. ເສສານິ ປນ ສພ຺ພານິປິ ກມ຺ມຏ຺ຐານານິ ສພ຺ເພສມ຺ປິ ສປ຺ປາຍານິ, ຕຕ຺ຖາປິ ກສິເຓສຸ ປຸຖຸລໍ ໂມຫຈຣິຕສ຺ສ, ຂຸທ຺ທກໍ ວິຕກ຺ກຈຣິຕສ຺ເສວາຕິ.

ອຍເມຕ຺ຖ ສປ຺ປາຍເຠໂທ.

ຠາວນາເຠໂທ

໑໙. ຠາວນາສຸ ສພ຺ພຕ຺ຖາປິ ປຣິກມ຺ມຠາວນາ ລພ຺ຠເຕວ, ພຸທ຺ຘານຸສ຺ສຕິອາທີສຸ ອຏ຺ຐສຸ ສຎ຺ຎາວວຕ຺ຖາເນສຸ ຈາຕິ ທສສຸກມ຺ມຏ຺ຐາເນສຸ ອຸປຈາຣຠາວນາວ ສມ຺ປຊ຺ຊຕິ, ນຕ຺ຖິ ອປ຺ປນາ.

໒໐. ເສເສສຸ ປນ ສມຕິໍສກມ຺ມຏ຺ຐາເນສຸ ອປ຺ປນາຠາວນາປິ ສມ຺ປຊ຺ຊຕິ.

໒໑. ຕຕ຺ຖາປິ ທສ ກສິຓານິ ອານາປານຎ຺ຈ ປຎ຺ຈກຊ຺ຌານິການິ.

໒໒. ທສ ອສຸຠາ ກາຍຄຕາສຕິ ຈ ປຐມຊ຺ຌານິກາ.

໒໓. ເມຕ຺ຕາທໂຍ ຕໂຍ ຈຕຸກ຺ກຊ຺ຌານິກາ.

໒໔. ອຸເປກ຺ຂາ ປຎ຺ຈມຊ຺ຌານິກາຕິ ຉພ຺ພີສຕິ ຣູປາວຈຣຊ຺ຌານິການິ ກມ຺ມຏ຺ຐານານິ.

໒໕. ຈຕ຺ຕາໂຣ ປນ ອາຣຸປ຺ປາ ອາຣຸປ຺ປຊ຺ຌານິກາຕິ.

ອຍເມຕ຺ຖ ຠາວນາເຠໂທ.

ໂຄຈຣເຠໂທ

໒໖. ນິມິຕ຺ເຕສຸ ປນ ປຣິກມ຺ມນິມິຕ຺ຕໍ ອຸຄ຺ຄຫນິມິຕ຺ຕຎ຺ຈ ສພ຺ພຕ຺ຖາປິ ຍຖາຣຫໍ ປຣິຍາເຍນ ລພ຺ຠນ຺ເຕວ.

໒໗. ປຏິຠາຄນິມິຕ຺ຕໍ ປນ ກສິຓາສຸຠໂກຏ຺ຐາສອານາປາເນສ຺ເວວ ລພ຺ຠຕິ, ຕຕ຺ຖ ຫິ ປຏິຠາຄນິມິຕ຺ຕມາຣພ຺ຠ ອຸປຈາຣສມາຘິ ອປ຺ປນາສມາຘິ ຈ ປວຕ຺ຕນ຺ຕິ.

໒໘. ກຖໍ? ອາທິກມ຺ມິກສ຺ສ ຫິ ປຖວີມຓ຺ຑລາທີສຸ ນິມິຕ຺ຕໍ ອຸຄ຺ຄຓ຺ຫນ຺ຕສ຺ສ ຕມາຣມ຺ມຓໍ ປຣິກມ຺ມນິມິຕ຺ຕນ຺ຕິ ປວຸຈ຺ຈຕິ, ສາ ຈ ຠາວນາ ປຣິກມ຺ມຠາວນາ ນາມ.

໒໙. ຍທາ ປນ ຕໍ ນິມິຕ຺ຕໍ ຈິຕ຺ເຕນ ສມຸຄ຺ຄຫິຕໍ ໂຫຕິ, ຈກ຺ຂຸນາ ປສ຺ສນ຺ຕສ຺ເສວ ມໂນທ຺ວາຣສ຺ສ ອາປາຖມາຄຕໍ, ຕທາ ຕເມວາຣມ຺ມຓໍ ອຸຄ຺ຄຫນິມິຕ຺ຕໍ ນາມ, ສາ ຈ ຠາວນາ ສມາຘິຍຕິ.

໓໐. ຕຖາ ສມາຫິຕສ຺ສ ປເນຕສ຺ສ ຕໂຕ ປຣໍ ຕສ຺ມິໍ ອຸຄ຺ຄຫນິມິຕ຺ເຕ ປຣິກມ຺ມສມາຘິນາ ຠາວນມນຸຍຸຎ຺ຊນ຺ຕສ຺ສ ຍທາ ຕປ຺ປຏິຠາຄໍ ວຕ຺ຖຸຘມ຺ມວິມຸຈ຺ຈິຕໍ ປຎ຺ຎຕ຺ຕິສງ຺ຂາຕໍ ຠາວນາມຍມາຣມ຺ມຓໍ ຈິຕ຺ເຕ ສນ຺ນິສນ຺ນໍ ສມປ຺ປິຕໍ ໂຫຕິ, ຕທາ ຕໍ ປຏິຠາຄນິມິຕ຺ຕໍ ສມຸປ຺ປນ຺ນນ຺ຕິ ປວຸຈ຺ຈຕິ.

໓໑. ຕໂຕ ປຏ຺ຐາຍ ປຣິປນ຺ຖວິປ຺ປຫີນາ ກາມາວຈຣສມາຘິສງ຺ຂາຕາ ອຸປຈາຣຠາວນາ ນິປ຺ຜນ຺ນາ ນາມ ໂຫຕິ.

໓໒. ຕໂຕ ປຣໍ ຕເມວ ປຣິຠາຄນິມິຕ຺ຕໍ ອຸປຈາຣສມາຘິນາ ສມາເສວນ຺ຕສ຺ສ ຣູປາວຈຣປຐມຊ຺ຌານມປ຺ເປຕິ.

໓໓. ຕໂຕ ປຣໍ ຕເມວ ປຐມຊ຺ຌານໍ ອາວຊ຺ຊນໍ ສມາປຊ຺ຊນໍ ອຘິຏ຺ຐານໍ ວຸຏ຺ຐານໍ ປຈ຺ຈເວກ຺ຂຓາ ເຈຕິ ອິມາຫິ ປຎ຺ຈຫິ ວສິຕາຫິ ວສີຠູຕໍ ກຕ຺ວາ ວິຕກ຺ກາທິກໂມຬາຣິກງ຺ຄໍ ປຫານາຍ ວິຈາຣາທິສຸຂຸມງ຺ຄຸປຕ຺ຕິຍາ ປທຫໂຕ ຍຖາກ຺ກມໍ ທຸຕິຍຊ຺ຌານາທໂຍ ຍຖາຣຫມປ຺ເປນ຺ຕິ.

໓໔. ອິຈ຺ເຈວໍ ປຖວີກສິຓາທີສຸ ທ຺ວາວີສຕິກມ຺ມຏ຺ຐາເນສຸ ປຏິຠາຄນິມິຕ຺ຕມຸປລພ຺ຠຕິ.

໓໕. ອວເສເສສຸ ປນ ອປ຺ປມຎ຺ຎາ ສຕ຺ຕປຎ຺ຎຕ຺ຕິຍໍ ປວຕ຺ຕນ຺ຕິ.

໓໖. ອາກາສວຊ຺ຊິຕກສິເຓສຸ ປນ ຍໍ ກິຎ຺ຈິ ກສິຓໍ ອຸຄ຺ຆາເຏຕ຺ວາ ລທ຺ຘມາກາສໍ ອນນ຺ຕວເສນ ປຣິກມ຺ມໍ ກໂຣນ຺ຕສ຺ສ ປຐມາຣຸປ຺ປມປ຺ເປຕິ.

໓໗. ຕເມວ ປຐມາຣຸປ຺ປວິຎ຺ຎາຓໍ ອນນ຺ຕວເສນ ປຣິກມ຺ມໍ ກໂຣນ຺ຕສ຺ສ ທຸຕິຍາຣຸປ຺ປມປ຺ເປຕິ.

໓໘. ຕເມວ ປຐມາຣຸປ຺ປວິຎ຺ຎາຓາຠາວໍ ປນ ‘‘ນຕ຺ຖິ ກິຎ຺ຈີ’’ຕິ ປຣິກມ຺ມໍ ກໂຣນ຺ຕສ຺ສ ຕຕິຍາຣຸປ຺ປມປ຺ເປຕິ.

໓໙. ຕຕິຍາຣຸປ຺ປໍ ‘‘ສນ຺ຕເມຕໍ, ປຓີຕເມຕ’’ນ຺ຕິ ປຣິກມ຺ມໍ ກໂຣນ຺ຕສ຺ສ ຈຕຸຕ຺ຖາຣຸປ຺ປມປ຺ເປຕິ.

໔໐. ອວເສເສສຸ ຈ ທສສຸ ກມ຺ມຏ຺ຐາເນສຸ ພຸທ຺ຘຄຸຓາທິກມາຣມ຺ມຓມາຣພ຺ຠ ປຣິກມ຺ມໍ ກຕ຺ວາ ຕສ຺ມິໍ ນິມິຕ຺ເຕ ສາຘຸກມຸຄ຺ຄຫິເຕ ຕຕ຺ເຖວ ປຣິກມ຺ມຎ຺ຈ ສມາຘິຍຕິ, ອຸປຈາໂຣ ຈ ສມ຺ປຊ຺ຊຕິ.

໔໑. ອຠິຎ຺ຎາວເສນ ປວຕ຺ຕມານໍ ປນ ຣູປາວຈຣປຎ຺ຈມຊ຺ຌານໍ ອຠິຎ຺ຎາປາທກປຎ຺ຈມຊ຺ຌານາ ວຸຏ຺ຐຫິຕ຺ວາ ອຘິຏ຺ເຐຍ຺ຍາທິກມາວຊ຺ເຊຕ຺ວາ ປຣິກມ຺ມໍ ກໂຣນ຺ຕສ຺ສ ຣູປາທີສຸ ອາຣມ຺ມເຓສຸ ຍຖາຣຫມປ຺ເປຕິ.

໔໒. ອຠິຎ຺ຎາ ຈ ນາມ –

ອິທ຺ຘິວິຘໍ ທິພ຺ພໂສຕໍ, ປຣຈິຕ຺ຕວິຊານນາ;

ປຸພ຺ເພນິວາສານຸສ຺ສຕິ, ທິພ຺ພຈກ຺ຂູຕິ ປຎ຺ຈຘາ.

ອຍເມຕ຺ຖ ໂຄຈຣເຠໂທ.

ນິຏ຺ຐິໂຕ ຈ ສມຖກມ຺ມຏ຺ຐານນໂຍ.

ວິປສ຺ສນາກມ຺ມຏ຺ຐານໍ

ວິສຸທ຺ຘິເຠໂທ

໔໓. ວິປສ຺ສນາກມ຺ມຏ຺ຐາເນ ປນ ສີລວິສຸທ຺ຘິ ຈິຕ຺ຕວິສຸທ຺ຘິ ທິຏ຺ຐິວິສຸທ຺ຘິ ກງ຺ຂາວິຕຣຓວິສຸທ຺ຘິ ມຄ຺ຄາມຄ຺ຄຎາຓທສ຺ສນວິສຸທ຺ຘິ ປຏິປທາຎາຓທສ຺ສນວິສຸທ຺ຘິ ຎາຓທສ຺ສນວິສຸທ຺ຘິ ເຈຕິ ສຕ຺ຕວິເຘນ ວິສຸທ຺ຘິສງ຺ຄໂຫ.

໔໔. ອນິຈ຺ຈລກ຺ຂຓໍ ທຸກ຺ຂລກ຺ຂຓໍ ອນຕ຺ຕລກ຺ຂຓຎ຺ເຈຕິ ຕີຓິ ລກ຺ຂຓານິ.

໔໕. ອນິຈ຺ຈານຸປສ຺ສນາ ທຸກ຺ຂານຸປສ຺ສນາ ອນຕ຺ຕານຸປສ຺ສນາ ເຈຕິ ຕິສ຺ໂສ ອນຸປສ຺ສນາ.

໔໖. ສມ຺ມສນຎາຓໍ ອຸທຍພ຺ພຍຎາຓໍ ຠງ຺ຄຎາຓໍ ຠຍຎາຓໍ ອາທີນວຎາຓໍ ນິພ຺ພິທາຎາຓໍ ມຸຈ຺ຈິຕຸກມ຺ຍຕາຎາຓໍ ປຏິສງ຺ຂາຎາຓໍ ສງ຺ຂາຣຸເປກ຺ຂາຎາຓໍ ອນຸໂລມຎາຓຎ຺ເຈຕິ ທສ ວິປສ຺ສນາຎາຓານິ.

໔໗. ສຸຎ຺ຎໂຕ ວິໂມກ຺ໂຂ, ອນິມິຕ຺ໂຕ ວິໂມກ຺ໂຂ, ອປ຺ປຓິຫິໂຕ ວິໂມກ຺ໂຂ ເຈຕິ ຕໂຍ ວິໂມກ຺ຂາ.

໔໘. ສຸຎ຺ຎຕານຸປສ຺ສນາ ອນິມິຕ຺ຕານຸປສ຺ສນາ ອປ຺ປຓິຫິຕານຸປສ຺ສານາ ເຈຕິ ຕີຓິ ວິໂມກ຺ຂມຸຂານິ ຈ ເວທິຕພ຺ພານິ.

໔໙. ກຖໍ? ປາຕິໂມກ຺ຂສໍວຣສີລໍ ອິນ຺ທ຺ຣິຍສໍວຣສີລໍ ອາຊີວປາຣິສຸທ຺ຘິສີລໍ ປຈ຺ຈຍສນ຺ນິສ຺ສິຕສີລຎ຺ເຈຕິ ຈຕຸປາຣິສຸທ຺ຘິສີລໍ ສີລວິສຸທ຺ຘິ ນາມ.

໕໐. ອຸປຈາຣສມາຘິ ອປ຺ປນາສມາຘິ ເຈຕິ ທຸວິໂຘປິ ສມາຘິ ຈິຕ຺ຕວິສຸທ຺ຘິ ນາມ.

໕໑. ລກ຺ຂຓຣສປຈ຺ຈຸປຏ຺ຐານປທຏ຺ຐານວເສນ ນາມຣູປ ປຣິຄ຺ຄໂຫ ທິຏ຺ຐິວິສຸທ຺ຘິ ນາມ.

໕໒. ເຕສເມວ ຈ ນາມຣູປານໍ ປຈ຺ຈຍປຣິຄ຺ຄໂຫ ກງ຺ຂາວິຕຣຓວິສຸທ຺ຘິ ນາມ.

໕໓. ຕໂຕ ປຣໍ ປນ ຕຖາປຣິຄ຺ຄຫິເຕສຸ ສປ຺ປຈ຺ຈເຍສຸ ເຕຠູມກສງ຺ຂາເຣສຸ ອຕີຕາທິເຠທຠິນ຺ເນສຸ ຂນ຺ຘາທິນຍມາຣພ຺ຠ ກລາປວເສນ ສງ຺ຂິປິຕ຺ວາ ‘‘ອນິຈ຺ຈໍ ຂຍຏ຺ເຐນ, ທຸກ຺ຂໍ ຠຍຏ຺ເຐນ, ອນຕ຺ຕາ ອສາຣກຏ຺ເຐນາ’’ຕິ ອທ຺ຘານວເສນ ສນ຺ຕຕິວເສນ ຂຓວເສນ ວາ ສມ຺ມສນຎາເຓນ ລກ຺ຂຓຕ຺ຕຍໍ ສມ຺ມສນ຺ຕສ຺ສ ເຕສ຺ເວວ ປຈ຺ຈຍວເສນ ຂຓວເສນ ຈ ອຸທຍພ຺ພຍຎາເຓນ ອຸທຍພ຺ພຍໍ ສມນຸປສ຺ສນ຺ຕສ຺ສ ຈ –

‘‘ໂອຠາໂສ ປີຕິ ປສ຺ສທ຺ຘິ, ອຘິໂມກ຺ໂຂ ຈ ປຄ຺ຄໂຫ;

ສຸຂໍ ຎາຓມຸປຏ຺ຐານມຸເປກ຺ຂາ ຈ ນິກນ຺ຕິ ເຈ’’ຕິ. –

ໂອຠາສາທິວິປສ຺ສນຸປກ຺ກິເລສປຣິປນ຺ຖປຣິຄ຺ຄຫວເສນ ມຄ຺ຄາມຄ຺ຄລກ຺ຂຓວວຕ຺ຖານໍ ມຄ຺ຄາມຄ຺ຄຎາຓທສ຺ສນວິສຸທ຺ຘິ ນາມ.

໕໔. ຕຖາ ປຣິປນ຺ຖວິມຸຕ຺ຕສ຺ສ ປນ ຕສ຺ສ ອຸທຍພ຺ພຍຎາຓໂຕ ປຏ຺ຐາຍ ຍາ ວານຸໂລມາ ຕິລກ຺ຂຓໍ ວິປສ຺ສນາປຣມ຺ປຣາຍ ປຏິປຊ຺ຊນ຺ຕສ຺ສ ນວ ວິປສ຺ສນາຎາຓານິ ປຏິປທາຎາຓທສ຺ສນວິສຸທ຺ຘິ ນາມ.

໕໕. ຕສ຺ເສວໍ ປຏິປຊ຺ຊນ຺ຕສ຺ສ ປນ ວິປສ຺ສນາປຣິປາກມາຄມ຺ມ ‘‘ອິທານິ ອປ຺ປນາ ອຸປ຺ປຊ຺ຊິສ຺ສຕີ’’ຕິ ຠວງ຺ຄໍ ໂວຈ຺ຉິຊ຺ຊິຕ຺ວາ ອຸປ຺ປນ຺ນມໂນທ຺ວາຣາວຊ຺ຊນານນ຺ຕຣໍ ທ຺ເວ ຕີຓິ ວິປສ຺ສນາຈິຕ຺ຕານິ ຍໍ ກິຎ຺ຈິ ອນິຈ຺ຈາທິລກ຺ຂຓມາຣພ຺ຠ ປຣິກມ຺ໂມປຈາຣານຸໂລມນາເມນ ປວຕ຺ຕນ຺ຕິ.

໕໖. ຍາ ສິຂາປ຺ປຕ຺ຕາ, ສາ ສານຸໂລມາ ສງ຺ຂາຣຸເປກ຺ຂາ ວຸຏ຺ຐານຄາມິນິວິປສ຺ສນາຕິ ຈ ປວຸຈ຺ຈຕິ.

໕໗. ຕໂຕ ປຣໍ ໂຄຕ຺ຣຠຸຈິຕ຺ຕໍ ນິພ຺ພານມາລມ຺ພິຕ຺ວາ ປຸຖຸຊ຺ຊນໂຄຕ຺ຕມຠິຠວນ຺ຕໍ, ອຣິຍໂຄຕ຺ຕມຠິສມ຺ໂຠນ຺ຕຎ຺ຈ ປວຕ຺ຕຕິ.

໕໘. ຕສ຺ສານນ຺ຕຣເມວ ມຄ຺ໂຄ ທຸກ຺ຂສຈ຺ຈໍ ປຣິຊານນ຺ໂຕ ສມຸທຍສຈ຺ຈໍ ປຊຫນ຺ໂຕ, ນິໂຣຘສຈ຺ຈໍ ສຈ຺ຉິກໂຣນ຺ໂຕ, ມຄ຺ຄສຈ຺ຈໍ ຠາວນາວເສນ ອປ຺ປນາວີຖິໂມຕຣຕິ.

໕໙. ຕໂຕ ປຣໍ ທ຺ເວ ຕີຓິ ຜລຈິຕ຺ຕານິ ປວຕ຺ຕິຕ຺ວາ ຠວງ຺ຄປາໂຕວ ໂຫຕິ, ປຸນ ຠວງ຺ຄໍ ໂວຈ຺ຉິນ຺ທິຕ຺ວາ ປຈ຺ຈເວກ຺ຂຓຎາຓານິ ປວຕ຺ຕນ຺ຕິ.

໖໐. ມຄ຺ຄໍ ຜລຎ຺ຈ ນິພ຺ພານໍ, ປຈ຺ຈເວກ຺ຂຕິ ປຓ຺ຑິໂຕ.

ຫີເນ ກິເລເສ ເສເສ ຈ, ປຈ຺ຈເວກ຺ຂຕິ ວານ ວາ.

ຉພ຺ພິສຸທ຺ຘິກເມເນວໍ, ຠາເວຕພ຺ໂພ ຈຕຸພ຺ພິໂຘ;

ຎາຓທສ຺ສນວິສຸທ຺ຘິ, ນາມ ມຄ຺ໂຄ ປວຸຈ຺ຈຕິ.

ອຍເມຕ຺ຖ ວິສຸທ຺ຘິເຠໂທ.

ວິໂມກ຺ຂເຠໂທ

໖໑. ຕຕ຺ຖ ອນຕ຺ຕານຸປສ຺ສນາ ອຕ຺ຕາຠິນິເວສໍ ມຸຎ຺ຈນ຺ຕີ ສຸຎ຺ຎຕານຸປສ຺ສນາ ນາມ ວິໂມກ຺ຂມຸຂໍ ໂຫຕິ.

໖໒. ອນິຈ຺ຈານຸປສ຺ສນາ ວິປລ຺ລາສນິມິຕ຺ຕໍ ມຸຎ຺ຈນ຺ຕີ ອນິມິຕ຺ຕານຸປສ຺ສນາ ນາມ.

໖໓. ທຸກ຺ຂານຸປສ຺ສນາ ຕຓ຺ຫາປຓິຘິໍ ມຸຎ຺ຈນ຺ຕີ ອປ຺ປຓິຫິຕານຸປສ຺ສນາ ນາມ.

໖໔. ຕສ຺ມາ ຍທິ ວຸຏ຺ຐານຄາມິນິວິປສ຺ສນາ ອນຕ຺ຕໂຕ ວິປສ຺ສຕິ, ສຸຎ຺ຎໂຕ ວິໂມກ຺ໂຂ ນາມ ໂຫຕິ ມຄ຺ໂຄ.

໖໕. ຍທິ ອນິຈ຺ຈໂຕ ວິປສ຺ສຕິ, ອນິມິຕ຺ໂຕ ວິໂມກ຺ໂຂ ນາມ.

໖໖. ຍທິ ທຸກ຺ຂໂຕ ວິປສ຺ສຕິ, ອປ຺ປຓິຫິໂຕ ວິໂມກ຺ໂຂ ນາມາຕິ ຈ ມຄ຺ໂຄ ວິປສ຺ສນາຄມນວເສນ ຕີຓິ ນາມານິ ລຠຕິ, ຕຖາ ຜລຎ຺ຈ ມຄ຺ຄາຄມນວເສນ ມຄ຺ຄວີຖິຍໍ.

໖໗. ຜລສມາປຕ຺ຕິວີຖິຍໍ ປນ ຍຖາວຸຕ຺ຕນເຍນ ວິປສ຺ສນ຺ຕານໍ ຍຖາສກຜລມຸປ຺ປຊ຺ຊມານມ຺ປິ ວິປສ຺ສນາຄມນວເສເນວ ສຸຎ຺ຎຕາທິວິໂມກ຺ໂຂຕິ ຈ ປວຸຈ຺ຈຕິ, ອາຣມ຺ມຓວເສນ ປນ ສຣສວເສນ ຈ ນາມຕ຺ຕຍໍ ສພ຺ພຕ຺ຖ ສພ຺ເພສມ຺ປິ ສມເມວ ຈ.

ອຍເມຕ຺ຖ ວິໂມກ຺ຂເຠໂທ.

ປຸຄ຺ຄລເຠໂທ

໖໘. ເອຕ຺ຖ ປນ ໂສຕາປຕ຺ຕິມຄ຺ຄໍ ຠາເວຕ຺ວາ ທິຏ຺ຐິວິຈິກິຈ຺ຉາປຫາເນນ ປຫີນາປາຍຄມໂນ ສຕ຺ຕກ຺ຂຕ຺ຕຸປຣໂມ ໂສຕາປນ຺ໂນ ນາມ ໂຫຕິ.

໖໙. ສກທາຄາມິມຄ຺ຄໍ ຠາເວຕ຺ວາ ຣາຄໂທສໂມຫານໍ ຕນຸກຣຕ຺ຕາ ສກທາຄາມີ ນາມ ໂຫຕິ ສກິເທວ ອິມໍ ໂລກໍ ອາຄນ຺ຕ຺ວາ.

໗໐. ອນາຄາມິມຄ຺ຄໍ ຠາເວຕ຺ວາ ກາມຣາຄພ຺ຍາປາທານມນວເສສປ຺ປຫາເນນ ອນາຄາມີ ນາມ ໂຫຕິ ອນາຄນ຺ຕ຺ວາ ອິຕ຺ຖຕ຺ຕໍ.

໗໑. ອຣຫຕ຺ຕມຄ຺ຄໍ ຠາເວຕ຺ວາ ອນວເສສກິເລສປ຺ປຫາເນນ ອຣຫາ ນາມ ໂຫຕິ ຂີຓາສໂວ ໂລເກ ອຄ຺ຄທກ຺ຂິເຓຍ຺ໂຍຕິ.

ອຍເມຕ຺ຖ ປຸຄ຺ຄລເຠໂທ.

ສມາປຕ຺ຕິເຠໂທ

໗໒. ຜລສມາປຕ຺ຕິວີຖິຍໍ ປເນຕ຺ຖ ສພ຺ເພສມ຺ປິ ຍຖາສກຜລວເສນ ສາຘາຣຓາວ.

໗໓. ນິໂຣຘສມາປຕ຺ຕິສມາປຊ຺ຊນໍ ປນ ອນາຄາມີນຎ຺ເຈວ ອຣຫນ຺ຕານຎ຺ຈ ລພ຺ຠຕິ, ຕຕ຺ຖ ຍຖາກ຺ກມໍ ປຐມຊ຺ຌານາທິມຫຄ຺ຄຕສມາປຕ຺ຕິໍ ສມາປຊ຺ຊິຕ຺ວາ ວຸຏ຺ຐາຍ ຕຕ຺ຖ ຄເຕ ສງ຺ຂາຣຘມ຺ເມ ຕຕ຺ຖ ຕຕ຺ເຖວ ວິປສ຺ສນ຺ໂຕ ຍາວ ອາກິຎ຺ຈຎ຺ຎາຍຕນໍ ຄນ຺ຕ຺ວາ ຕໂຕ ປຣໍ ອຘິຏ຺ເຐຍ຺ຍາທິກໍ ປຸພ຺ພກິຈ຺ຈໍ ກຕ຺ວາ ເນວສຎ຺ຎານາສຎ຺ຎາຍຕນໍ ສມາປຊ຺ຊຕິ, ຕສ຺ສ ທ຺ວິນ຺ນໍ ອປ຺ປນາຊວນານໍ ປຣໂຕ ໂວຈ຺ຉິຊ຺ຊຕິ ຈິຕ຺ຕສນ຺ຕຕິ, ຕໂຕ ນິໂຣຘສມາປນ຺ໂນ ນາມ ໂຫຕິ.

໗໔. ວຸຏ຺ຐານກາເລ ປນ ອນາຄາມິໂນ ອນາຄາມິຜລຈິຕ຺ຕໍ, ອຣຫໂຕ ອຣຫຕ຺ຕຜລຈິຕ຺ຕໍ ເອກວາຣເມວ ປວຕ຺ຕິຕ຺ວາ ຠວງ຺ຄປາໂຕ ໂຫຕິ, ຕໂຕ ປຣໍ ປຈ຺ຈເວກ຺ຂຓຎາຓໍ ປວຕ຺ຕຕິ.

ອຍເມຕ຺ຖ ສມາປຕ຺ຕິເຠໂທ.

ນິຏ຺ຐິໂຕ ຈ ວິປສ຺ສນາກມ຺ມຏ຺ຐານນໂຍ.

ອຸຍ຺ໂຍຊນໍ

໗໕. ຠາເວຕພ຺ພໍ ປນິຈ຺ເຈວໍ, ຠາວນາທ຺ວຍມຸຕ຺ຕມໍ.

ປຏິປຕ຺ຕິຣສສ຺ສາທໍ, ປຕ຺ຖຍນ຺ເຕນ ສາສເນຕິ.

ອິຕິ ອຠິຘມ຺ມຕ຺ຖສງ຺ຄເຫ ກມ຺ມຏ຺ຐານສງ຺ຄຫວິຠາໂຄ ນາມ

ນວໂມ ປຣິຈ຺ເຉໂທ.

ນິຄມນໍ

(ກ) ຈາຣິຕ຺ຕໂສຠິຕວິສາລກຸໂລທເຍນ,

ສທ຺ຘາຠິວຸຑ຺ຒປຣິສຸທ຺ຘຄຸໂຓທເຍນ;

ນມ຺ປວ຺ຫເຍນ ປຓິຘາຍ ປຣານຸກມ຺ປໍ,

ຍໍ ປຕ຺ຖິຕໍ ປກຣຓໍ ປຣິນິຏ຺ຐິຕໍ ຕໍ.

(ຂ) ປຸຎ຺ເຎນ ເຕນ ວິປຸເລນ ຕຸ ມູລໂສມໍ;

ຘຎ຺ຎາຘິວາສມຸທິໂຕທິຕມາຍຸກນ຺ຕໍ;

ປຎ຺ຎາວທາຕຄຸຓໂສຠິຕລຊ຺ຊິຠິກ຺ຂູ,

ມຎ຺ຎນ຺ຕຸ ປຸຎ຺ຎວິຠໂວທຍມງ຺ຄລາຍ.

ອິຕິ ອນຸຣຸທ຺ຘາຈຣິເຍນ ຣຈິຕໍ

ອຠິຘມ຺ມຕ຺ຖສງ຺ຄຫໍ ນາມ ປກຣຓໍ.

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ.