໑. ຘມ຺ມສງ຺ຄຓີມາຕິກາ

ຕິກມາຕິກາ

ກຸສລາ ຘມ຺ມາ (ຘ. ສ. ຕິກມາຕິກາ ໑-໒໒), ອກຸສລາ ຘມ຺ມາ, ອພ຺ຍາກຕາ ຘມ຺ມາ. ສຸຂາຍ ເວທນາຍ ສມ຺ປຍຸຕ຺ຕາ ຘມ຺ມາ, ທຸກ຺ຂາຍ ເວທນາຍ ສມ຺ປຍຸຕ຺ຕາ ຘມ຺ມາ, ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ ຘມ຺ມາ. ວິປາກາ ຘມ຺ມາ, ວິປາກຘມ຺ມຘມ຺ມາ, ເນວວິປາກນວິປາກຘມ຺ມຘມ຺ມາ. ອຸປາທິຓ຺ຓຸປາທານິຍາ ຘມ຺ມາ, ອນຸປາທິຓ຺ຓຸປາທານິຍາ ຘມ຺ມາ, ອນຸປາທິຓ຺ຓອນຸປາທານິຍາ ຘມ຺ມາ. ສໍກິລິຏ຺ຐສໍກິເລສິກາ ຘມ຺ມາ, ອສໍກິລິຏ຺ຐສໍກິເລສິກາ ຘມ຺ມາ, ອສໍກິລິຏ຺ຐອສໍກິເລສິກາ ຘມ຺ມາ. ສວິຕກ຺ກສວິຈາຣາ ຘມ຺ມາ, ອວິຕກ຺ກວິຈາຣມຕ຺ຕາ ຘມ຺ມາ, ອວິຕກ຺ກອວິຈາຣາ ຘມ຺ມາ. ປີຕິສຫຄຕາ ຘມ຺ມາ, ສຸຂສຫຄຕາ ຘມ຺ມາ, ອຸເປກ຺ຂາສຫຄຕາ ຘມ຺ມາ. ທສ຺ສເນນ ປຫາຕພ຺ພາ ຘມ຺ມາ, ຠາວນາຍ ປຫາຕພ຺ພາ ຘມ຺ມາ, ເນວ ທສ຺ສເນນ ນ ຠາວນາຍ ປຫາຕພ຺ພາ ຘມ຺ມາ. ທສ຺ສເນນ ປຫາຕພ຺ພເຫຕຸກາ ຘມ຺ມາ, ຠາວນາຍ ປຫາຕພ຺ພເຫຕຸກາ ຘມ຺ມາ, ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ ຘມ຺ມາ. ອາຈຍຄາມິໂນ ຘມ຺ມາ, ອປຈຍຄາມິໂນ ຘມ຺ມາ, ເນວາຈຍຄາມິນາປຈຍຄາມິໂນ ຘມ຺ມາ. ເສກ຺ຂາ ຘມ຺ມາ, ອເສກ຺ຂາ ຘມ຺ມາ, ເນວເສກ຺ຂນາເສກ຺ຂາ ຘມ຺ມາ. ປຣິຕ຺ຕາ ຘມ຺ມາ, ມຫຄ຺ຄຕາ ຘມ຺ມາ, ອປ຺ປມາຓາ ຘມ຺ມາ. ປຣິຕ຺ຕາຣມ຺ມຓາ ຘມ຺ມາ, ມຫຄ຺ຄຕາຣມ຺ມຓາ ຘມ຺ມາ, ອປ຺ປມາຓາຣມ຺ມຓາ ຘມ຺ມາ. ຫີນາ ຘມ຺ມາ, ມຊ຺ຌິມາ ຘມ຺ມາ, ປຓີຕາ ຘມ຺ມາ. ມິຈ຺ຉຕ຺ຕນິຍຕາ ຘມ຺ມາ, ສມ຺ມຕ຺ຕນິຍຕາ ຘມ຺ມາ, ອນິຍຕາ ຘມ຺ມາ. ມຄ຺ຄາຣມ຺ມຓາ ຘມ຺ມາ, ມຄ຺ຄເຫຕຸກາ ຘມ຺ມາ, ມຄ຺ຄາຘິປຕິໂນ ຘມ຺ມາ. ອຸປ຺ປນ຺ນາ ຘມ຺ມາ, ອນຸປ຺ປນ຺ນາ ຘມ຺ມາ, ອຸປ຺ປາທິໂນ ຘມ຺ມາ. ອຕີຕາ ຘມ຺ມາ, ອນາຄຕາ ຘມ຺ມາ, ປຈ຺ຈຸປ຺ປນ຺ນາ ຘມ຺ມາ. ອຕີຕາຣມ຺ມຓາ ຘມ຺ມາ, ອນາຄຕາຣມ຺ມຓາ ຘມ຺ມາ, ປຈ຺ຈຸປ຺ປນ຺ນາຣມ຺ມຓາ ຘມ຺ມາ. ອຊ຺ຌຕ຺ຕາ ຘມ຺ມາ, ພຫິທ຺ຘາ ຘມ຺ມາ, ອຊ຺ຌຕ຺ຕພຫິທ຺ຘາ ຘມ຺ມາ. ອຊ຺ຌຕ຺ຕາຣມ຺ມຓາ ຘມ຺ມາ, ພຫິທ຺ຘາຣມ຺ມຓາ ຘມ຺ມາ, ອຊ຺ຌຕ຺ຕພຫິທ຺ຘາຣມ຺ມຓາ ຘມ຺ມາ. ສນິທສ຺ສນສປ຺ປຏິຆາ ຘມ຺ມາ, ອນິທສ຺ສນສປ຺ປຏິຆາ ຘມ຺ມາ, ອນິທສ຺ສນອປ຺ປຏິຆາ ຘມ຺ມາ (ຘ. ສ. ຕິກມາຕິກາ ໑-໒໒).

ທ຺ວາວີສຕິຕິກໍ.

ທຸກມາຕິກາ

ເຫຕຸໂຄຈ຺ຉກໍ

ເຫຕູ ຘມ຺ມາ, ນ ເຫຕູ ຘມ຺ມາ. ສເຫຕຸກາ ຘມ຺ມາ, ອເຫຕຸກາ ຘມ຺ມາ. ເຫຕຸສມ຺ປຍຸຕ຺ຕາ ຘມ຺ມາ, ເຫຕຸວິປ຺ປຍຸຕ຺ຕາ ຘມ຺ມາ. ເຫຕູ ເຈວ ຘມ຺ມາ ສເຫຕຸກາ ຈ, ສເຫຕຸກາ ເຈວ ຘມ຺ມາ ນ ຈ ເຫຕູ. ເຫຕູ ເຈວ ຘມ຺ມາ ເຫຕຸສມ຺ປຍຸຕ຺ຕາ ຈ, ເຫຕຸສມ຺ປຍຸຕ຺ຕາ ເຈວ ຘມ຺ມາ ນ ຈ ເຫຕູ. ນ ເຫຕູ ໂຂ ປນ ຘມ຺ມາ ສເຫຕຸກາປິ, ອເຫຕຸກາປິ. ເຫຕຸໂຄຈ຺ຉກໍ.

ຈູຬນ຺ຕຣທຸກໍ

ສປ຺ປຈ຺ຈຍາ ຘມ຺ມາ, ອປ຺ປຈ຺ຈຍາ ຘມ຺ມາ. ສງ຺ຂຕາ ຘມ຺ມາ, ອສງ຺ຂຕາ ຘມ຺ມາ. ສນິທສ຺ສນາ ຘມ຺ມາ, ອນິທສ຺ສນາ ຘມ຺ມາ. ສປ຺ປຏິຆາ ຘມ຺ມາ, ອປ຺ປຏິຆາ ຘມ຺ມາ. ຣູປິໂນ ຘມ຺ມາ, ອຣູປິໂນ ຘມ຺ມາ. ໂລກິຍາ ຘມ຺ມາ, ໂລກຸຕ຺ຕຣາ ຘມ຺ມາ. ເກນຈິ ວິຎ຺ເຎຍ຺ຍາ ຘມ຺ມາ, ເກນຈິ ນ ວິຎ຺ເຎຍ຺ຍາ ຘມ຺ມາ. ຈູຬນ຺ຕຣທຸກໍ.

ອາສວໂຄຈ຺ຉກໍ

ອາສວາ ຘມ຺ມາ, ໂນ ອາສວາ ຘມ຺ມາ. ສາສວາ ຘມ຺ມາ, ອນາສວາ ຘມ຺ມາ. ອາສວສມ຺ປຍຸຕ຺ຕາ ຘມ຺ມາ, ອາສວວິປ຺ປຍຸຕ຺ຕາ ຘມ຺ມາ. ອາສວາ ເຈວ ຘມ຺ມາ ສາສວາ ຈ, ສາສວາ ເຈວ ຘມ຺ມາ ໂນ ຈ ອາສວາ. ອາສວາ ເຈວ ຘມ຺ມາ ອາສວສມ຺ປຍຸຕ຺ຕາ ຈ, ອາສວສມ຺ປຍຸຕ຺ຕາ ເຈວ ຘມ຺ມາ ໂນ ຈ ອາສວາ. ອາສວວິປ຺ປຍຸຕ຺ຕາ ໂຂ ປນ ຘມ຺ມາ ສາສວາປິ, ອນາສວາປິ. ອາສວໂຄຈ຺ຉກໍ.

ສຎ຺ໂຎຊນໂຄຈ຺ຉກໍ

ສຎ຺ໂຎຊນາ ຘມ຺ມາ, ໂນ ສຎ຺ໂຎຊນາ ຘມ຺ມາ. ສຎ຺ໂຎຊນິຍາ ຘມ຺ມາ, ອສຎ຺ໂຎຊນິຍາ ຘມ຺ມາ. ສຎ຺ໂຎຊນສມ຺ປຍຸຕ຺ຕາ ຘມ຺ມາ, ສຎ຺ໂຎຊນວິປ຺ປຍຸຕ຺ຕາ ຘມ຺ມາ. ສຎ຺ໂຎຊນາ ເຈວ ຘມ຺ມາ ສຎ຺ໂຎຊນິຍາ ຈ, ສຎ຺ໂຎຊນິຍາ ເຈວ ຘມ຺ມາ ໂນ ຈ ສຎ຺ໂຎຊນາ. ສຎ຺ໂຎຊນາ ເຈວ ຘມ຺ມາ ສຎ຺ໂຎຊນສມ຺ປຍຸຕ຺ຕາ ຈ, ສຎ຺ໂຎຊນສມ຺ປຍຸຕ຺ຕາ ເຈວ ຘມ຺ມາ ໂນ ຈ ສຎ຺ໂຎຊນາ. ສຎ຺ໂຎຊນວິປ຺ປຍຸຕ຺ຕາ ໂຂ ປນ ຘມ຺ມາ ສຎ຺ໂຎຊນິຍາປິ, ອສຎ຺ໂຎຊນິຍາປິ. ສຎ຺ໂຎຊນໂຄຈ຺ຉກໍ.

ຄນ຺ຖໂຄຈ຺ຉກໍ

ຄນ຺ຖາ ຘມ຺ມາ, ໂນ ຄນ຺ຖາ ຘມ຺ມາ. ຄນ຺ຖນິຍາ ຘມ຺ມາ, ອຄນ຺ຖນິຍາ ຘມ຺ມາ. ຄນ຺ຖສມ຺ປຍຸຕ຺ຕາ ຘມ຺ມາ, ຄນ຺ຖວິປ຺ປຍຸຕ຺ຕາ ຘມ຺ມາ. ຄນ຺ຖາ ເຈວ ຘມ຺ມາ ຄນ຺ຖນິຍາ ຈ, ຄນ຺ຖນິຍາ ເຈວ ຘມ຺ມາ ໂນ ຈ ຄນ຺ຖາ. ຄນ຺ຖາ ເຈວ ຘມ຺ມາ ຄນ຺ຖສມ຺ປຍຸຕ຺ຕາ ຈ, ຄນ຺ຖສມ຺ປຍຸຕ຺ຕາ ເຈວ ຘມ຺ມາ ໂນ ຈ ຄນ຺ຖາ. ຄນ຺ຖວິປ຺ປຍຸຕ຺ຕາ ໂຂ ປນ ຘມ຺ມາ ຄນ຺ຖນິຍາປິ, ອຄນ຺ຖນິຍາປິ. ຄນ຺ຖໂຄຈ຺ຉກໍ.

ໂອຆໂຄຈ຺ຉກໍ

ໂອຆາ ຘມ຺ມາ, ໂນ ໂອຆາ ຘມ຺ມາ. ໂອຆນິຍາ ຘມ຺ມາ, ອໂນຆນິຍາ ຘມ຺ມາ. ໂອຆສມ຺ປຍຸຕ຺ຕາ ຘມ຺ມາ, ໂອຆວິປ຺ປຍຸຕ຺ຕາ ຘມ຺ມາ. ໂອຆາ ເຈວ ຘມ຺ມາ ໂອຆນິຍາ ຈ, ໂອຆນິຍາ ເຈວ ຘມ຺ມາ ໂນ ຈ ໂອຆາ. ໂອຆາ ເຈວ ຘມ຺ມາ ໂອຆສມ຺ປຍຸຕ຺ຕາ ຈ, ໂອຆສມ຺ປຍຸຕ຺ຕາ ເຈວ ຘມ຺ມາ ໂນ ຈ ໂອຆາ. ໂອຆວິປ຺ປຍຸຕ຺ຕາ ໂຂ ປນ ຘມ຺ມາ ໂອຆນິຍາປິ, ອໂນຆນິຍາປິ. ໂອຆໂຄຈ຺ຉກໍ.

ໂຍຄໂຄຈ຺ຉກໍ

ໂຍຄາ ຘມ຺ມາ, ໂນ ໂຍຄາ ຘມ຺ມາ. ໂຍຄນິຍາ ຘມ຺ມາ, ອໂຍຄນິຍາ ຘມ຺ມາ. ໂຍຄສມ຺ປຍຸຕ຺ຕາ ຘມ຺ມາ, ໂຍຄວິປ຺ປຍຸຕ຺ຕາ ຘມ຺ມາ. ໂຍຄາ ເຈວ ຘມ຺ມາ ໂຍຄນິຍາ ຈ, ໂຍຄນິຍາ ເຈວ ຘມ຺ມາ ໂນ ຈ ໂຍຄາ. ໂຍຄາ ເຈວ ຘມ຺ມາ ໂຍຄສມ຺ປຍຸຕ຺ຕາ ຈ, ໂຍຄສມ຺ປຍຸຕ຺ຕາ ເຈວ ຘມ຺ມາ ໂນ ຈ ໂຍຄາ. ໂຍຄວິປ຺ປຍຸຕ຺ຕາ ໂຂ ປນ ຘມ຺ມາ ໂຍຄນິຍາປິ, ອໂຍຄນິຍາປິ. ໂຍຄໂຄຈ຺ຉກໍ.

ນີວຣຓໂຄຈ຺ຉກໍ

ນີວຣຓາ ຘມ຺ມາ, ໂນ ນີວຣຓາ ຘມ຺ມາ. ນີວຣຓິຍາ ຘມ຺ມາ, ອນີວຣຓິຍາ ຘມ຺ມາ. ນີວຣຓສມ຺ປຍຸຕ຺ຕາ ຘມ຺ມາ, ນີວຣຓວິປ຺ປຍຸຕ຺ຕາ ຘມ຺ມາ. ນີວຣຓາ ເຈວ ຘມ຺ມາ ນີວຣຓິຍາ ຈ, ນີວຣຓິຍາ ເຈວ ຘມ຺ມາ ໂນ ຈ ນີວຣຓາ. ນີວຣຓາ ເຈວ ຘມ຺ມາ ນີວຣຓສມ຺ປຍຸຕ຺ຕາ ຈ, ນີວຣຓສມ຺ປຍຸຕ຺ຕາ ເຈວ ຘມ຺ມາ ໂນ ຈ ນີວຣຓາ. ນີວຣຓວິປ຺ປຍຸຕ຺ຕາ ໂຂ ປນ ຘມ຺ມາ ນີວຣຓິຍາປິ, ອນີວຣຓິຍາປິ. ນີວຣຓໂຄຈ຺ຉກໍ.

ປຣາມາສໂຄຈ຺ຉກໍ

ປຣາມາສາ ຘມ຺ມາ, ໂນ ປຣາມາສາ ຘມ຺ມາ. ປຣາມຏ຺ຐາ ຘມ຺ມາ, ອປຣາມຏ຺ຐາ ຘມ຺ມາ. ປຣາມາສສມ຺ປຍຸຕ຺ຕາ ຘມ຺ມາ, ປຣາມາສວິປ຺ປຍຸຕ຺ຕາ ຘມ຺ມາ. ປຣາມາສາ ເຈວ ຘມ຺ມາ ປຣາມຏ຺ຐາ ຈ, ປຣາມຏ຺ຐາເຈວ ຘມ຺ມາ ໂນ ຈ ປຣາມາສາ. ປຣາມາສວິປ຺ປຍຸຕ຺ຕາ ໂຂ ປນ ຘມ຺ມາ ປຣາມຏ຺ຐາປິ, ອປຣາມຏ຺ຐາປິ. ປຣາມາສໂຄຈ຺ຉກໍ.

ມຫນ຺ຕຣທຸກໍ

ສາຣມ຺ມຓາ ຘມ຺ມາ, ອນາຣມ຺ມຓາ ຘມ຺ມາ. ຈິຕ຺ຕາ ຘມ຺ມາ, ໂນ ຈິຕ຺ຕາ ຘມ຺ມາ. ເຈຕສິກາ ຘມ຺ມາ, ອເຈຕສິກາ ຘມ຺ມາ. ຈິຕ຺ຕສມ຺ປຍຸຕ຺ຕາ ຘມ຺ມາ, ຈິຕ຺ຕວິປ຺ປຍຸຕ຺ຕາ ຘມ຺ມາ. ຈິຕ຺ຕສໍສຏ຺ຐາ ຘມ຺ມາ, ຈິຕ຺ຕວິສໍສຏ຺ຐາ ຘມ຺ມາ. ຈິຕ຺ຕສມຸຏ຺ຐານາ ຘມ຺ມາ, ໂນ ຈິຕ຺ຕສມຸຏ຺ຐານາ ຘມ຺ມາ. ຈິຕ຺ຕສຫຠຸໂນ ຘມ຺ມາ, ໂນ ຈິຕ຺ຕສຫຠຸໂນ ຘມ຺ມາ. ຈິຕ຺ຕານຸປຣິວຕ຺ຕິໂນ ຘມ຺ມາ, ໂນ ຈິຕ຺ຕານຸປຣິວຕ຺ຕິໂນ ຘມ຺ມາ. ຈິຕ຺ຕສໍສຏ຺ຐສມຸຏ຺ຐານາ ຘມ຺ມາ, ໂນ ຈິຕ຺ຕສໍສຏ຺ຐສມຸຏ຺ຐານາ ຘມ຺ມາ. ຈິຕ຺ຕສໍສຏ຺ຐສມຸຏ຺ຐານສຫຠຸໂນ ຘມ຺ມາ, ໂນ ຈິຕ຺ຕສໍສຏ຺ຐສມຸຏ຺ຐານສຫຠຸໂນ ຘມ຺ມາ. ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ ຘມ຺ມາ, ໂນ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ ຘມ຺ມາ. ອຊ຺ຌຕ຺ຕິກາ ຘມ຺ມາ, ພາຫິຣາ ຘມ຺ມາ. ອຸປາທາ ຘມ຺ມາ, ໂນ ອຸປາທາ ຘມ຺ມາ. ອຸປາທິຓ຺ຓາ ຘມ຺ມາ, ອນຸປາທິຓ຺ຓາ ຘມ຺ມາ. ມຫນ຺ຕຣທຸກໍ.

ອຸປາທານໂຄຈ຺ຉກໍ

ອຸປາທານາ ຘມ຺ມາ, ໂນ ອຸປາທານາ ຘມ຺ມາ. ອຸປາທານິຍາ ຘມ຺ມາ, ອນຸປາທານິຍາ ຘມ຺ມາ. ອຸປາທານສມ຺ປຍຸຕ຺ຕາ ຘມ຺ມາ, ອຸປາທານວິປ຺ປຍຸຕ຺ຕາ ຘມ຺ມາ. ອຸປາທານາ ເຈວ ຘມ຺ມາ ອຸປາທານິຍາ ຈ, ອຸປາທານິຍາ ເຈວ ຘມ຺ມາ ໂນ ຈ ອຸປາທານາ. ອຸປາທານາ ເຈວ ຘມ຺ມາ ອຸປາທານສມ຺ປຍຸຕ຺ຕາ ຈ, ອຸປາທານສມ຺ປຍຸຕ຺ຕາ ເຈວ ຘມ຺ມາ ໂນ ຈ ອຸປາທານາ. ອຸປາທານວິປ຺ປຍຸຕ຺ຕາ ໂຂ ປນ ຘມ຺ມາ ອຸປາທານິຍາປິ, ອນຸປາທານິຍາປິ. ອຸປາທານໂຄຈ຺ຉກໍ.

ກິເລສໂຄຈ຺ຉກໍ

ກິເລສາ ຘມ຺ມາ, ໂນ ກິເລສາ ຘມ຺ມາ. ສໍກິເລສິກາ ຘມ຺ມາ, ອສໍກິເລສິກາ ຘມ຺ມາ. ສໍກິລິຏ຺ຐາ ຘມ຺ມາ, ອສໍກິລິຏ຺ຐາ ຘມ຺ມາ. ກິເລສສມ຺ປຍຸຕ຺ຕາ ຘມ຺ມາ, ກິເລສວິປ຺ປຍຸຕ຺ຕາ ຘມ຺ມາ. ກິເລສາ ເຈວ ຘມ຺ມາ ສໍກິເລສິກາ ຈ, ສໍກິເລສິກາ ເຈວ ຘມ຺ມາ ໂນ ຈ ກິເລສາ. ກິເລສາ ເຈວ ຘມ຺ມາ ສໍກິລິຏ຺ຐາ ຈ, ສໍກິລິຏ຺ຐາ ເຈວ ຘມ຺ມາ ໂນ ຈ ກິເລສາ. ກິເລສາ ເຈວ ຘມ຺ມາ ກິເລສສມ຺ປຍຸຕ຺ຕາ ຈ, ກິເລສສມ຺ປຍຸຕ຺ຕາ ເຈວ ຘມ຺ມາ ໂນ ຈ ກິເລສາ. ກິເລສວິປ຺ປຍຸຕ຺ຕາ ໂຂ ປນ ຘມ຺ມາ ສໍກິເລສິກາປິ, ອສໍກິເລສິກາປິ. ກິເລສໂຄຈ຺ຉກໍ.

ປິຏ຺ຐິທຸກໍ

ທສ຺ສເນນ ປຫາຕພ຺ພາ ຘມ຺ມາ, ນ ທສ຺ສເນນ ປຫາຕພ຺ພາ ຘມ຺ມາ. ຠາວນາຍ ປຫາຕພ຺ພາ ຘມ຺ມາ, ນ ຠາວນາຍ ປຫາຕພ຺ພາ ຘມ຺ມາ. ທສ຺ສເນນ ປຫາຕພ຺ພເຫຕຸກາ ຘມ຺ມາ, ນ ທສ຺ສເນນ ປຫາຕພ຺ພເຫຕຸກາ ຘມ຺ມາ. ຠາວນາຍ ປຫາຕພ຺ພເຫຕຸກາ ຘມ຺ມາ, ນ ຠາວນາຍ ປຫາຕພ຺ພເຫຕຸກາ ຘມ຺ມາ. ສວິຕກ຺ກາ ຘມ຺ມາ, ອວິຕກ຺ກາ ຘມ຺ມາ. ສວິຈາຣາ ຘມ຺ມາ, ອວິຈາຣາ ຘມ຺ມາ. ສປ຺ປີຕິກາ ຘມ຺ມາ, ອປ຺ປີຕິກາ ຘມ຺ມາ. ປີຕິສຫຄຕາ ຘມ຺ມາ, ນ ປີຕິສຫຄຕາ ຘມ຺ມາ. ສຸຂສຫຄຕາ ຘມ຺ມາ, ນ ສຸຂສຫຄຕາ ຘມ຺ມາ. ອຸເປກ຺ຂາສຫຄຕາ ຘມ຺ມາ, ນ ອຸເປກ຺ຂາສຫຄຕາ ຘມ຺ມາ. ກາມາວຈຣາ ຘມ຺ມາ, ນ ກາມາວຈຣາ ຘມ຺ມາ. ຣູປາວຈຣາ ຘມ຺ມາ, ນ ຣູປາວຈຣາ ຘມ຺ມາ. ອຣູປາວຈຣາ ຘມ຺ມາ, ນ ອຣູປາວຈຣາ ຘມ຺ມາ. ປຣິຍາປນ຺ນາ ຘມ຺ມາ, ອປຣິຍາປນ຺ນາ ຘມ຺ມາ. ນິຍ຺ຍານິກາ ຘມ຺ມາ, ອນິຍ຺ຍານິກາ ຘມ຺ມາ. ນິຍຕາ ຘມ຺ມາ, ອນິຍຕາ ຘມ຺ມາ. ສອຸຕ຺ຕຣາ ຘມ຺ມາ, ອນຸຕ຺ຕຣາ ຘມ຺ມາ. ສຣຓາ ຘມ຺ມາ, ອຣຓາ ຘມ຺ມາ. ປິຏ຺ຐິທຸກໍ.

ອຠິຘມ຺ມທຸກມາຕິກາ.

ສຸຕ຺ຕນ຺ຕິກທຸກມາຕິກາ

ວິຊ຺ຊາຠາຄິໂນ ຘມ຺ມາ, ອວິຊ຺ຊາຠາຄິໂນ ຘມ຺ມາ. ວິຊ຺ຊູປມາ ຘມ຺ມາ, ວຊິຣູປມາ ຘມ຺ມາ. ພາລາ ຘມ຺ມາ, ປຓ຺ຑິຕາ ຘມ຺ມາ. ກຓ຺ຫາ ຘມ຺ມາ, ສຸກ຺ກາ ຘມ຺ມາ. ຕປນີຍາ ຘມ຺ມາ, ອຕປນີຍາ ຘມ຺ມາ. ອຘິວຈນາ ຘມ຺ມາ, ອຘິວຈນປຖາ ຘມ຺ມາ. ນິຣຸຕ຺ຕິ ຘມ຺ມາ, ນິຣຸຕ຺ຕິປຖາ ຘມ຺ມາ. ປຎ຺ຎຕ຺ຕິ ຘມ຺ມາ, ປຎ຺ຎຕ຺ຕິປຖາ ຘມ຺ມາ. ນາມຎ຺ຈ, ຣູປຎ຺ຈ. ອວິຊ຺ຊາ ຈ, ຠວຕຓ຺ຫາ ຈ. ຠວທິຏ຺ຐິ ຈ, ວິຠວທິຏ຺ຐິ ຈ. ສສ຺ສຕທິຏ຺ຐິ ຈ, ອຸຈ຺ເຉທທິຏ຺ຐິ ຈ. ອນ຺ຕວາ ທິຏ຺ຐິ ຈ, ອນນ຺ຕວາ ທິຏ຺ຐິ ຈ. ປຸພ຺ພນ຺ຕານຸທິຏ຺ຐິ ຈ, ອປຣນ຺ຕານຸທິຏ຺ຐິ ຈ. ອຫິຣິກຎ຺ຈ, ອໂນຕ຺ຕປ຺ປຎ຺ຈ. ຫິຣີ ຈ, ໂອຕ຺ຕປ຺ປຎ຺ຈ. ໂທວຈສ຺ສຕາ ຈ, ປາປມິຕ຺ຕຕາ ຈ. ໂສວຈສ຺ສຕາ ຈ, ກລ຺ຍາຓມິຕ຺ຕຕາ ຈ. ອາປຕ຺ຕິກຸສລຕາ ຈ, ອາປຕ຺ຕິວຸຏ຺ຐານກຸສລຕາ ຈ. ສມາປຕ຺ຕິກຸສລຕາ ຈ, ສມາປຕ຺ຕິວຸຏ຺ຐານກຸສລຕາ ຈ. ຘາຕຸກຸສລຕາ ຈ, ມນສິກາຣກຸສລຕາ ຈ. ອາຍຕນກຸສລຕາ ຈ, ປຏິຈ຺ຈສມຸປ຺ປາທກຸສລຕາ ຈ. ຐານກຸສລຕາ ຈ, ອຏ຺ຐານກຸສລຕາ ຈ. ອຊ຺ຊໂວ ຈ, ມທ຺ທໂວ ຈ. ຂນ຺ຕິ ຈ, ໂສຣຈ຺ຈຎ຺ຈ. ສາຂລ຺ຍຎ຺ຈ, ປຏິສນ຺ຖາໂຣ ຈ. ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ ຈ, ໂຠຊເນ ອມຕ຺ຕຎ຺ຎຸຕາ ຈ. ອິນ຺ທ຺ຣິເຍສຸ ຄຸຕ຺ຕທ຺ວາຣຕາ ຈ, ໂຠຊເນ ມຕ຺ຕຎ຺ຎຸຕາ ຈ. ມຸຏ຺ຐສ຺ສຈ຺ຈຎ຺ຈ, ອສມ຺ປຊຎ຺ຎຎ຺ຈ. ສຕິ ຈ, ສມ຺ປຊຎ຺ຎຎ຺ຈ. ປຏິສງ຺ຂານພລຎ຺ຈ, ຠາວນາພລຎ຺ຈ. ສມໂຖ ຈ, ວິປສ຺ສນາ ຈ. ສມຖນິມິຕ຺ຕຎ຺ຈ, ປຄ຺ຄາຫນິມິຕ຺ຕຎ຺ຈ. ປຄ຺ຄາໂຫ ຈ, ອວິກ຺ເຂໂປ ຈ. ສີລວິປຕ຺ຕິ ຈ, ທິຏ຺ຐິວິປຕ຺ຕິ ຈ. ສີລສມ຺ປທາ ຈ, ທິຏ຺ຐິສມ຺ປທາ ຈ. ສີລວິສຸທ຺ຘິ ຈ, ທິຏ຺ຐິວິສຸທ຺ຘິ ຈ. ທິຏ຺ຐິວິສຸທ຺ຘິ ໂຂ ປນ, ຍຖາທິຏ຺ຐິສ຺ສ ຈ ປຘານໍ. ສໍເວໂຄ ຈ ສໍເວຊນິເຍສຸ ຐາເນສຸ, ສໍວິຄ຺ຄສ຺ສ ຈ ໂຍນິໂສ ປຘານໍ. ອສນ຺ຕຸຏ຺ຐິຕາ ຈ ກຸສເລສຸ ຘມ຺ເມສຸ, ອປ຺ປຏິວານິຕາ ຈ ປຘານສ຺ມິໍ. ວິຊ຺ຊາ ຈ, ວິມຸຕ຺ຕິ ຈ. ຂເຍ ຎາຓໍ, ອນຸປ຺ປາເທ ຎາຓນ຺ຕິ.

ສຸຕ຺ຕນ຺ຕິກທຸກມາຕິກາ.

ຘມ຺ມສງ຺ຄຓີມາຕິກາ ນິຏ຺ຐິຕາ.