໙. ອນິມິຕ຺ຕປຎ຺ຫາສຸຕ຺ຕໍ

໓໔໐. ‘‘‘ອນິມິຕ຺ໂຕ ເຈໂຕສມາຘິ, ອນິມິຕ຺ໂຕ ເຈໂຕສມາຘີ’ຕິ ວຸຈ຺ຈຕິ. ກຕໂມ ນຸ ໂຂ ອນິມິຕ຺ໂຕ ເຈໂຕສມາຘີຕິ? ຕສ຺ສ ມຍ຺ຫໍ, ອາວຸໂສ, ເອຕທໂຫສິ – ‘ອິຘ ຠິກ຺ຂຸ ສພ຺ພນິມິຕ຺ຕານໍ ອມນສິກາຣາ ອນິມິຕ຺ຕໍ ເຈໂຕສມາຘິໍ ອຸປສມ຺ປຊ຺ຊ ວິຫຣຕິ. ອຍໍ ວຸຈ຺ຈຕິ ອນິມິຕ຺ໂຕ ເຈໂຕສມາຘີ’ຕິ. ໂສ ຂ຺ວາຫໍ, ອາວຸໂສ, ສພ຺ພນິມິຕ຺ຕານໍ ອມນສິກາຣາ ອນິມິຕ຺ຕໍ ເຈໂຕສມາຘິໍ ອຸປສມ຺ປຊ຺ຊ ວິຫຣາມິ. ຕສ຺ສ ມຍ຺ຫໍ, ອາວຸໂສ, ອິມິນາ ວິຫາເຣນ ວິຫຣໂຕ ນິມິຕ຺ຕານຸສາຣິ ວິຎ຺ຎາຓໍ ໂຫຕິ.

‘‘ອຖ ໂຂ ມໍ, ອາວຸໂສ, ຠຄວາ ອິທ຺ຘິຍາ ອຸປສງ຺ກມິຕ຺ວາ ເອຕທໂວຈ – ‘ໂມຄ຺ຄລ຺ລານ, ໂມຄ຺ຄລ຺ລານ! ມາ, ພ຺ຣາຫ຺ມຓ, ອນິມິຕ຺ຕໍ ເຈໂຕສມາຘິໍ ປມາໂທ, ອນິມິຕ຺ເຕ ເຈໂຕສມາຘິສ຺ມິໍ ຈິຕ຺ຕໍ ສຓ຺ຐເປຫິ, ອນິມິຕ຺ເຕ ເຈໂຕສມາຘິສ຺ມິໍ ຈິຕ຺ຕໍ ເອໂກທິໍ ກໂຣຫິ, ອນິມິຕ຺ເຕ ເຈໂຕສມາຘິສ຺ມິໍ ຈິຕ຺ຕໍ ສມາທຫາ’ຕິ. ໂສ ຂ຺ວາຫໍ, ອາວຸໂສ, ອປເຣນ ສມເຍນ ສພ຺ພນິມິຕ຺ຕານໍ ອມນສິກາຣາ ອນິມິຕ຺ຕໍ ເຈໂຕສມາຘິໍ ອຸປສມ຺ປຊ຺ຊ ວິຫາສິໍ. ຍຎ຺ຫິ ຕໍ, ອາວຸໂສ, ສມ຺ມາ ວທມາໂນ ວເທຍ຺ຍ – ‘ສຕ຺ຖາຣານຸຄ຺ຄຫິໂຕ ສາວໂກ ມຫາຠິຎ຺ຎຕໍ ປຕ຺ໂຕ’ຕິ, ມມໍ ຕໍ ສມ຺ມາ ວທມາໂນ ວເທຍ຺ຍ – ‘ສຕ຺ຖາຣານຸຄ຺ຄຫິໂຕ ສາວໂກ ມຫາຠິຎ຺ຎຕໍ ປຕ຺ໂຕ’’’ຕິ. ນວມໍ.