໓. ຕຕິຍຌານປຎ຺ຫາສຸຕ຺ຕໍ

໓໓໔. ‘‘‘ຕຕິຍໍ ຌານໍ, ຕຕິຍໍ ຌານ’ນ຺ຕິ ວຸຈ຺ຈຕິ. ກຕມໍ ນຸ ໂຂ ຕຕິຍໍ ຌານນ຺ຕິ? ຕສ຺ສ ມຍ຺ຫໍ, ອາວຸໂສ, ເອຕທໂຫສິ – ອິຘ ຠິກ຺ຂຸ ປີຕິຍາ ຈ ວິຣາຄາ ອຸເປກ຺ຂໂກ ຈ ວິຫຣຕິ ສໂຕ ຈ ສມ຺ປຊາໂນ ສຸຂຎ຺ຈ ກາເຍນ ປຏິສໍເວເທຕິ, ຍໍ ຕໍ ອຣິຍາ ອາຈິກ຺ຂນ຺ຕິ – ‘ອຸເປກ຺ຂໂກ ສຕິມາ ສຸຂວິຫາຣີ’ຕິ ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ. ອິທໍ ວຸຈ຺ຈຕິ ຕຕິຍໍ ຌານນ຺ຕິ. ໂສ ຂ຺ວາຫໍ, ອາວຸໂສ, ປີຕິຍາ ຈ ວິຣາຄາ ອຸເປກ຺ຂໂກ ຈ ວິຫຣາມິ ສໂຕ ຈ ສມ຺ປຊາໂນ ສຸຂຎ຺ຈ ກາເຍນ ປຏິສໍເວເທມິ. ຍໍ ຕໍ ອຣິຍາ ອາຈິກ຺ຂນ຺ຕິ – ‘ອຸເປກ຺ຂໂກ ສຕິມາ ສຸຂວິຫາຣີ’ຕິ ຕຕິຍໍ ຌານໍ ອຸປສມ຺ປຊ຺ຊ ວິຫຣາມິ. ຕສ຺ສ ມຍ຺ຫໍ, ອາວຸໂສ, ອິມິນາ ວິຫາເຣນ ວິຫຣໂຕ ປີຕິສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ.

‘‘ອຖ ໂຂ ມໍ, ອາວຸໂສ, ຠຄວາ ອິທ຺ຘິຍາ ອຸປສງ຺ກມິຕ຺ວາ ເອຕທໂວຈ – ‘ໂມຄ຺ຄລ຺ລານ, ໂມຄ຺ຄລ຺ລານ! ມາ, ພ຺ຣາຫ຺ມຓ, ຕຕິຍໍ ຌານໍ ປມາໂທ, ຕຕິເຍ ຌາເນ ຈິຕ຺ຕໍ ສຓ຺ຐເປຫິ, ຕຕິເຍ ຌາເນ ຈິຕ຺ຕໍ ເອໂກທິໍ ກໂຣຫິ, ຕຕິເຍ ຌາເນ ຈິຕ຺ຕໍ ສມາທຫາ’ຕິ. ໂສ ຂ຺ວາຫໍ, ອາວຸໂສ, ອປເຣນ ສມເຍນ ປີຕິຍາ ຈ ວິຣາຄາ ອຸເປກ຺ຂໂກ ຈ ວິຫຣາມິ ສໂຕ ຈ ສມ຺ປຊາໂນ ສຸຂຎ຺ຈ ກາເຍນ ປຏິສໍເວເທມິ, ຍໍ ຕໍ ອຣິຍາ ອາຈິກ຺ຂນ຺ຕິ – ‘ອຸເປກ຺ຂໂກ ສຕິມາ ສຸຂວິຫາຣີ’ຕິ ຕຕິຍໍ ຌານໍ ອຸປສມ຺ປຊ຺ຊ ວິຫາສິໍ. ຍຎ຺ຫິ ຕໍ ອາວຸໂສ ສມ຺ມາ ວທມາໂນ ວເທຍ຺ຍ…ເປ… ມຫາຠິຎ຺ຎຕໍ ປຕ຺ໂຕ’’ຕິ. ຕຕິຍໍ.