໙. ປຐມສມຸຄ຺ຆາຕສປ຺ປາຍສຸຕ຺ຕໍ

໓໑. ‘‘ສພ຺ພມຎ຺ຎິຕສມຸຄ຺ຆາຕສປ຺ປາຍໍ ໂວ, ຠິກ຺ຂເວ, ປຏິປທໍ ເທເສສ຺ສາມິ. ຕໍ ສຸຓາຖ. ກຕມາ ຈ ສາ, ຠິກ຺ຂເວ, ສພ຺ພມຎ຺ຎິຕສມຸຄ຺ຆາຕສປ຺ປາຍາ ປຏິປທາ? ອິຘ, ຠິກ຺ຂເວ, ຠິກ຺ຂຸ ຈກ຺ຂຸໍ ນ ມຎ຺ຎຕິ, ຈກ຺ຂຸສ຺ມິໍ ນ ມຎ຺ຎຕິ, ຈກ຺ຂຸໂຕ ນ ມຎ຺ຎຕິ, ຈກ຺ຂຸໍ ເມຕິ ນ ມຎ຺ຎຕິ. ຣູເປ ນ ມຎ຺ຎຕິ…ເປ… ຈກ຺ຂຸວິຎ຺ຎາຓໍ ນ ມຎ຺ຎຕິ, ຈກ຺ຂຸສມ຺ຜສ຺ສໍ ນ ມຎ຺ຎຕິ, ຍມ຺ປິທໍ ຈກ຺ຂຸສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ນ ມຎ຺ຎຕິ, ຕສ຺ມິມ຺ປິ ນ ມຎ຺ຎຕິ, ຕໂຕປິ ນ ມຎ຺ຎຕິ, ຕໍ ເມຕິ ນ ມຎ຺ຎຕິ. ຍຎ຺ຫິ, ຠິກ຺ຂເວ, ມຎ຺ຎຕິ, ຍສ຺ມິໍ ມຎ຺ຎຕິ, ຍໂຕ ມຎ຺ຎຕິ, ຍໍ ເມຕິ ມຎ຺ຎຕິ, ຕໂຕ ຕໍ ໂຫຕິ ອຎ຺ຎຖາ. ອຎ຺ຎຖາຠາວີ ຠວສຕ຺ໂຕ ໂລໂກ ຠວເມວາຠິນນ຺ທຕິ…ເປ… ຊິວ຺ຫໍ ນ ມຎ຺ຎຕິ, ຊິວ຺ຫາຍ ນ ມຎ຺ຎຕິ, ຊິວ຺ຫາໂຕ ນ ມຎ຺ຎຕິ, ຊິວ຺ຫາ ເມຕິ ນ ມຎ຺ຎຕິ. ຣເສ ນ ມຎ຺ຎຕິ…ເປ… ຊິວ຺ຫາວິຎ຺ຎາຓໍ ນ ມຎ຺ຎຕິ, ຊິວ຺ຫາສມ຺ຜສ຺ສໍ ນ ມຎ຺ຎຕິ. ຍມ຺ປິທໍ ຊິວ຺ຫາສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ນ ມຎ຺ຎຕິ, ຕສ຺ມິມ຺ປິ ນ ມຎ຺ຎຕິ, ຕໂຕປິ ນ ມຎ຺ຎຕິ, ຕໍ ເມຕິ ນ ມຎ຺ຎຕິ. ຍຎ຺ຫິ, ຠິກ຺ຂເວ, ມຎ຺ຎຕິ, ຍສ຺ມິໍ ມຎ຺ຎຕິ, ຍໂຕ ມຎ຺ຎຕິ, ຍໍ ເມຕິ ມຎ຺ຎຕິ, ຕໂຕ ຕໍ ໂຫຕິ ອຎ຺ຎຖາ. ອຎ຺ຎຖາຠາວີ ຠວສຕ຺ໂຕ ໂລໂກ ຠວເມວາຠິນນ຺ທຕິ…ເປ… ມນໍ ນ ມຎ຺ຎຕິ, ມນສ຺ມິໍ ນ ມຎ຺ຎຕິ, ມນໂຕ ນ ມຎ຺ຎຕິ, ມໂນ ເມຕິ ນ ມຎ຺ຎຕິ. ຘມ຺ເມ ນ ມຎ຺ຎຕິ…ເປ… ມໂນວິຎ຺ຎາຓໍ ນ ມຎ຺ຎຕິ, ມໂນສມ຺ຜສ຺ສໍ ນ ມຎ຺ຎຕິ. ຍມ຺ປິທໍ ມໂນສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ນ ມຎ຺ຎຕິ, ຕສ຺ມິມ຺ປິ ນ ມຎ຺ຎຕິ, ຕໂຕປິ ນ ມຎ຺ຎຕິ, ຕໍ ເມຕິ ນ ມຎ຺ຎຕິ. ຍຎ຺ຫິ, ຠິກ຺ຂເວ, ມຎ຺ຎຕິ, ຍສ຺ມິໍ ມຎ຺ຎຕິ, ຍໂຕ ມຎ຺ຎຕິ, ຍໍ ເມຕິ ມຎ຺ຎຕິ, ຕໂຕ ຕໍ ໂຫຕິ ອຎ຺ຎຖາ. ອຎ຺ຎຖາຠາວີ ຠວສຕ຺ໂຕ ໂລໂກ ຠວເມວາຠິນນ຺ທຕິ. ຍາວຕາ, ຠິກ຺ຂເວ, ຂນ຺ຘຘາຕຸອາຍຕນໍ ຕມ຺ປິ ນ ມຎ຺ຎຕິ, ຕສ຺ມິມ຺ປິ ນ ມຎ຺ຎຕິ, ຕໂຕປິ ນ ມຎ຺ຎຕິ, ຕໍ ເມຕິ ນ ມຎ຺ຎຕິ. ໂສ ເອວໍ ອມຎ຺ຎມາໂນ ນ ຈ ກິຎ຺ຈິ ໂລເກ ອຸປາທິຍຕິ. ອນຸປາທິຍໍ ນ ປຣິຕສ຺ສຕິ. ອປຣິຕສ຺ສໍ ປຈ຺ຈຕ຺ຕຎ຺ເຎວ ປຣິນິພ຺ພາຍຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕິ. ອຍໍ ໂຂ ສາ, ຠິກ຺ຂເວ, ສພ຺ພມຎ຺ຎິຕສມຸຄ຺ຆາຕສປ຺ປາຍາ ປຏິປທາ’’ຕິ. ນວມໍ.