໓. ອຠິຎ຺ຎາປຣິຎ຺ຎາປຫານສຸຕ຺ຕໍ

໒໕. ‘‘ສພ຺ພໍ ອຠິຎ຺ຎາ ປຣິຎ຺ຎາ ປຫານາຍ ໂວ, ຠິກ຺ຂເວ, ຘມ຺ມໍ ເທເສສ຺ສາມິ. ຕໍ ສຸຓາຖ. ກຕໂມ ຈ, ຠິກ຺ຂເວ, ສພ຺ພໍ ອຠິຎ຺ຎາ ປຣິຎ຺ຎາ ປຫານາຍ ຘມ຺ໂມ? ຈກ຺ຂຸໍ, ຠິກ຺ຂເວ, ອຠິຎ຺ຎາ ປຣິຎ຺ຎາ ປຫາຕພ຺ພໍ, ຣູປາ ອຠິຎ຺ຎາ ປຣິຎ຺ຎາ ປຫາຕພ຺ພາ, ຈກ຺ຂຸວິຎ຺ຎາຓໍ ອຠິຎ຺ຎາ ປຣິຎ຺ຎາ ປຫາຕພ຺ພໍ, ຈກ຺ຂຸສມ຺ຜສ຺ໂສ ອຠິຎ຺ຎາ ປຣິຎ຺ຎາ ປຫາຕພ຺ໂພ, ຍມ຺ປິທໍ ຈກ຺ຂຸສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ອຠິຎ຺ຎາ ປຣິຎ຺ຎາ ປຫາຕພ຺ພໍ…ເປ… ຊິວ຺ຫາ ອຠິຎ຺ຎາ ປຣິຎ຺ຎາ ປຫາຕພ຺ພາ, ຣສາ ອຠິຎ຺ຎາ ປຣິຎ຺ຎາ ປຫາຕພ຺ພາ, ຊິວ຺ຫາວິຎ຺ຎາຓໍ ອຠິຎ຺ຎາ ປຣິຎ຺ຎາ ປຫາຕພ຺ພໍ, ຊິວ຺ຫາສມ຺ຜສ຺ໂສ ອຠິຎ຺ຎາ ປຣິຎ຺ຎາ ປຫາຕພ຺ໂພ, ຍມ຺ປິທໍ ຊິວ຺ຫາສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ອຠິຎ຺ຎາ ປຣິຎ຺ຎາ ປຫາຕພ຺ພໍ. ກາໂຍ ອຠິຎ຺ຎາ ປຣິຎ຺ຎາ ປຫາຕພ຺ໂພ… ມໂນ ອຠິຎ຺ຎາ ປຣິຎ຺ຎາ ປຫາຕພ຺ໂພ, ຘມ຺ມາ ອຠິຎ຺ຎາ ປຣິຎ຺ຎາ ປຫາຕພ຺ພາ, ມໂນວິຎ຺ຎາຓໍ ອຠິຎ຺ຎາ ປຣິຎ຺ຎາ ປຫາຕພ຺ພໍ, ມໂນສມ຺ຜສ຺ໂສ ອຠິຎ຺ຎາ ປຣິຎ຺ຎາ ປຫາຕພ຺ໂພ, ຍມ຺ປິທໍ ມໂນສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ອຠິຎ຺ຎາ ປຣິຎ຺ຎາ ປຫາຕພ຺ພໍ. ອຍໍ ໂຂ, ຠິກ຺ຂເວ, ສພ຺ພໍ ອຠິຎ຺ຎາ ປຣິຎ຺ຎາ ປຫານາຍ ຘມ຺ໂມ’’ຕິ. ຕຕິຍໍ.