໕. ຊີວກມ຺ພວນສມາຘິສຸຕ຺ຕໍ

໑໖໐. ເອກໍ ສມຍໍ ຠຄວາ ຣາຊຄເຫ ວິຫຣຕິ ຊີວກມ຺ພວເນ. ຕຕ຺ຣ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ຠິກ຺ຂໂວ’’ຕິ…ເປ… ‘‘ສມາຘິໍ, ຠິກ຺ຂເວ, ຠາເວຖ. ສມາຫິຕສ຺ສ, ຠິກ຺ຂເວ, ຠິກ຺ຂຸໂນ ຍຖາຠູຕໍ ໂອກ຺ຂາຍຕິ. ກິຎ຺ຈ ຍຖາຠູຕໍ ໂອກ຺ຂາຍຕິ? ຈກ຺ຂຸໍ ອນິຈ຺ຈນ຺ຕິ ຍຖາຠູຕໍ ໂອກ຺ຂາຍຕິ, ຣູປາ ອນິຈ຺ຈາຕິ ຍຖາຠູຕໍ ໂອກ຺ຂາຍຕິ, ຈກ຺ຂຸວິຎ຺ຎາຓໍ ອນິຈ຺ຈນ຺ຕິ ຍຖາຠູຕໍ ໂອກ຺ຂາຍຕິ, ຈກ຺ຂຸສມ຺ຜສ຺ໂສ ອນິຈ຺ໂຈຕິ ຍຖາຠູຕໍ ໂອກ຺ຂາຍຕິ, ຍມ຺ປິທໍ ຈກ຺ຂຸສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ອນິຈ຺ຈນ຺ຕິ ຍຖາຠູຕໍ ໂອກ຺ຂາຍຕິ…ເປ… ຊິວ຺ຫາ ອນິຈ຺ຈາຕິ ຍຖາຠູຕໍ ໂອກ຺ຂາຍຕິ…ເປ… ມໂນ ອນິຈ຺ໂຈຕິ ຍຖາຠູຕໍ ໂອກ຺ຂາຍຕິ, ຘມ຺ມາ ອນິຈ຺ຈາຕິ ຍຖາຠູຕໍ ໂອກ຺ຂາຍຕິ…ເປ… ຍມ຺ປິທໍ ມໂນສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ອນິຈ຺ຈນ຺ຕິ ຍຖາຠູຕໍ ໂອກ຺ຂາຍຕິ. ສມາຘິໍ, ຠິກ຺ຂເວ, ຠາເວຖ. ສມາຫິຕສ຺ສ, ຠິກ຺ຂເວ, ຠິກ຺ຂຸໂນ ຍຖາຠູຕໍ ໂອກ຺ຂາຍຕີ’’ຕິ. ປຎ຺ຈມໍ.