໑໒. ອຕ຺ຕານຸທິຏ຺ຐິປຫານສຸຕ຺ຕໍ

໑໖໗. ອຖ ໂຂ ອຎ຺ຎຕໂຣ ຠິກ຺ຂຸ…ເປ… ເອຕທໂວຈ – ‘‘ກຖໍ ນຸ ໂຂ, ຠນ຺ເຕ, ຊານໂຕ ກຖໍ ປສ຺ສໂຕ ອຕ຺ຕານຸທິຏ຺ຐິ ປຫີຍຕີ’’ຕິ? ‘‘ຈກ຺ຂຸໍ ໂຂ, ຠິກ຺ຂຸ, ອນຕ຺ຕໂຕ ຊານໂຕ ປສ຺ສໂຕ ອຕ຺ຕານຸທິຏ຺ຐິ ປຫີຍຕິ. ຣູເປ ອນຕ຺ຕໂຕ ຊານໂຕ ປສ຺ສໂຕ ອຕ຺ຕານຸທິຏ຺ຐິ ປຫີຍຕິ. ຈກ຺ຂຸວິຎ຺ຎາຓໍ ອນຕ຺ຕໂຕ ຊານໂຕ ປສ຺ສໂຕ ອຕ຺ຕານຸທິຏ຺ຐິ ປຫີຍຕິ. ຈກ຺ຂຸສມ຺ຜສ຺ສໍ ອນຕ຺ຕໂຕ ຊານໂຕ ປສ຺ສໂຕ ອຕ຺ຕານຸທິຏ຺ຐິ ປຫີຍຕິ. ຍມ຺ປິທໍ ຈກ຺ຂຸສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ອນຕ຺ຕໂຕ ຊານໂຕ ປສ຺ສໂຕ ອຕ຺ຕານຸທິຏ຺ຐິ ປຫີຍຕິ…ເປ… ຊິວ຺ຫໍ ອນຕ຺ຕໂຕ ຊານໂຕ ປສ຺ສໂຕ ອຕ຺ຕານຸທິຏ຺ຐິ ປຫີຍຕິ…ເປ… ມນໍ ອນຕ຺ຕໂຕ ຊານໂຕ ປສ຺ສໂຕ ອຕ຺ຕານຸທິຏ຺ຐິ ປຫີຍຕິ. ຘມ຺ເມ… ມໂນວິຎ຺ຎາຓໍ… ມໂນສມ຺ຜສ຺ສໍ… ຍມ຺ປິທໍ ມໂນສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ອນຕ຺ຕໂຕ ຊານໂຕ ປສ຺ສໂຕ ອຕ຺ຕານຸທິຏ຺ຐິ ປຫີຍຕີ’’ຕິ. ທ຺ວາທສມໍ.

ນນ຺ທິກ຺ຂຍວຄ຺ໂຄ ໂສຬສໂມ.

ຕສ຺ສຸທ຺ທານໍ –

ນນ຺ທິກ຺ຂເຍນ ຈຕ຺ຕາໂຣ, ຊີວກມ຺ພວເນ ທຸເວ;

ໂກຏ຺ຐິເກນ ຕໂຍ ວຸຕ຺ຕາ, ມິຈ຺ຉາ ສກ຺ກາຍ ອຕ຺ຕໂນຕິ.