໗. ອຊ຺ຌຕ຺ຕານິຈ຺ຈເຫຕຸສຸຕ຺ຕໍ

໑໔໐. ‘‘ຈກ຺ຂຸໍ, ຠິກ຺ຂເວ, ອນິຈ຺ຈໍ. ໂຍປິ ເຫຕຸ, ໂຍປິ ປຈ຺ຈໂຍ ຈກ຺ຂຸສ຺ສ ອຸປ຺ປາທາຍ, ໂສປິ ອນິຈ຺ໂຈ. ອນິຈ຺ຈສມ຺ຠູຕໍ, ຠິກ຺ຂເວ, ຈກ຺ຂຸ ກຸໂຕ ນິຈ຺ຈໍ ຠວິສ຺ສຕິ…ເປ… ຊິວ຺ຫາ ອນິຈ຺ຈາ. ໂຍປິ ເຫຕຸ, ໂຍປິ ປຈ຺ຈໂຍ ຊິວ຺ຫາຍ ອຸປ຺ປາທາຍ ໂສປິ ອນິຈ຺ໂຈ. ອນິຈ຺ຈສມ຺ຠູຕາ, ຠິກ຺ຂເວ, ຊິວ຺ຫາ ກຸໂຕ ນິຈ຺ຈາ ຠວິສ຺ສຕິ…ເປ… ມໂນ ອນິຈ຺ໂຈ. ໂຍປິ, ຠິກ຺ຂເວ, ເຫຕຸ ໂຍປິ ປຈ຺ຈໂຍ ມນສ຺ສ ອຸປ຺ປາທາຍ, ໂສປິ ອນິຈ຺ໂຈ. ອນິຈ຺ຈສມ຺ຠູໂຕ, ຠິກ຺ຂເວ, ມໂນ ກຸໂຕ ນິຈ຺ໂຈ ຠວິສ຺ສຕິ! ເອວໍ ປສ຺ສໍ, ຠິກ຺ຂເວ, ສຸຕວາ ອຣິຍສາວໂກ ຈກ຺ຂຸສ຺ມິມ຺ປິ ນິພ຺ພິນ຺ທຕິ…ເປ… ຊິວ຺ຫາຍປິ ນິພ຺ພິນ຺ທຕິ…ເປ… ນິພ຺ພິນ຺ທໍ ວິຣຊ຺ຊຕິ; ວິຣາຄາ ວິມຸຈ຺ຈຕິ; ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓໍ ໂຫຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕີ’’ຕິ. ສຕ຺ຕມໍ.