໗. ຣາຫຸລສໍຍຸຕ຺ຕໍ

໑. ປຐມວຄ຺ໂຄ

໑. ຈກ຺ຂຸສຸຕ຺ຕໍ

໑໘໘. ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ອຖ ໂຂ ອາຍສ຺ມາ ຣາຫຸໂລ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ຣາຫຸໂລ ຠຄວນ຺ຕໍ ເອຕທໂວຈ – ‘‘ສາຘຸ ເມ, ຠນ຺ເຕ, ຠຄວາ ສໍຂິຕ຺ເຕນ ຘມ຺ມໍ ເທເສຕຸ, ຍມຫໍ ຠຄວໂຕ ຘມ຺ມໍ ສຸຕ຺ວາ ເອໂກ ວູປກຏ຺ໂຐ ອປ຺ປມຕ຺ໂຕ ອາຕາປີ ປຫິຕຕ຺ໂຕ ວິຫເຣຍ຺ຍ’’ນ຺ຕິ.

‘‘ຕໍ ກິໍ ມຎ຺ຎສິ, ຣາຫຸລ, ຈກ຺ຂຸໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’. ‘‘ຍໍ ປນານິຈ຺ຈໍ ທຸກ຺ຂໍ ວາ ຕໍ ສຸຂໍ ວາ’’ຕິ? ‘‘ທຸກ຺ຂໍ, ຠນ຺ເຕ’’. ‘‘ຍໍ ປນານິຈ຺ຈໍ ທຸກ຺ຂໍ ວິປຣິຓາມຘມ຺ມໍ, ກລ຺ລໍ ນຸ ຕໍ ສມນຸປສ຺ສິຕຸໍ – ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’’’ຕິ? ‘‘ໂນ ເຫຕໍ, ຠນ຺ເຕ’’. ‘‘ໂສຕໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’…ເປ…. ‘‘ຆານໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’…ເປ… ‘‘ຊິວ຺ຫາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ກາໂຍ ນິຈ຺ໂຈ ວາ ອນິຈ຺ໂຈ ວາ’’ຕິ? ‘‘ອນິຈ຺ໂຈ, ຠນ຺ເຕ’’ …ເປ… ‘‘ມໂນ ນິຈ຺ໂຈ ວາ ອນິຈ຺ໂຈ ວາ’’ຕິ? ‘‘ອນິຈ຺ໂຈ, ຠນ຺ເຕ’’. ‘‘ຍໍ ປນານິຈ຺ຈໍ ທຸກ຺ຂໍ ວາ ຕໍ ສຸຂໍ ວາ’’ຕິ? ‘‘ທຸກ຺ຂໍ, ຠນ຺ເຕ’’. ‘‘ຍໍ ປນານິຈ຺ຈໍ ທຸກ຺ຂໍ ວິປຣິຓາມຘມ຺ມໍ, ກລ຺ລໍ ນຸ ຕໍ ສມນຸປສ຺ສິຕຸໍ – ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’’’ຕິ? ‘‘ໂນ ເຫຕໍ, ຠນ຺ເຕ’’.

‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຈກ຺ຂຸສ຺ມິມ຺ປິ ນິພ຺ພິນ຺ທຕິ …ເປ… ໂສຕສ຺ມິມ຺ປິ ນິພ຺ພິນ຺ທຕິ… ຆານສ຺ມິມ຺ປິ ນິພ຺ພິນ຺ທຕິ… ຊິວ຺ຫາຍປິ ນິພ຺ພິນ຺ທຕິ… ກາຍສ຺ມິມ຺ປິ ນິພ຺ພິນ຺ທຕິ… ມນສ຺ມິມ຺ປິ ນິພ຺ພິນ຺ທຕິ; ນິພ຺ພິນ຺ທໍ ວິຣຊ຺ຊຕິ; ວິຣາຄາ ວິມຸຈ຺ຈຕິ; ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓໍ ໂຫຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕີ’’ຕິ. ປຐມໍ.

໒. ຣູປສຸຕ຺ຕໍ

໑໘໙. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຣູປາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ສທ຺ທາ… ຄນ຺ຘາ… ຣສາ… ໂຜຏ຺ຐພ຺ພາ… ຘມ຺ມາ ນິຈ຺ຈາ ວາ ອນິຈ຺ຈາ ວາຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຣູເປສຸປິ ນິພ຺ພິນ຺ທຕິ… ສທ຺ເທສຸປິ ນິພ຺ພິນ຺ທຕິ… ຄນ຺ເຘສຸປິ ນິພ຺ພິນ຺ທຕິ… ຣເສສຸປິ ນິພ຺ພິນ຺ທຕິ… ໂຜຏ຺ຐພ຺ເພສຸປິ ນິພ຺ພິນ຺ທຕິ… ຘມ຺ເມສຸປິ ນິພ຺ພິນ຺ທຕິ; ນິພ຺ພິນ຺ທໍ ວິຣຊ຺ຊຕິ…ເປ… ປຊານາຕີ’’ຕິ. ທຸຕິຍໍ.

໓. ວິຎ຺ຎາຓສຸຕ຺ຕໍ

໑໙໐. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຈກ຺ຂຸວິຎ຺ຎາຓໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’…ເປ… ‘‘ໂສຕວິຎ຺ຎາຓໍ…ເປ… ຆານວິຎ຺ຎາຓໍ… ຊິວ຺ຫາວິຎ຺ຎາຓໍ… ກາຍວິຎ຺ຎາຓໍ… ມໂນວິຎ຺ຎາຓໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’ …ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຈກ຺ຂຸວິຎ຺ຎາຓສ຺ມິມ຺ປິ ນິພ຺ພິນ຺ທຕິ…ເປ… ໂສຕວິຎ຺ຎາຓສ຺ມິມ຺ປິ ນິພ຺ພິນ຺ທຕິ… ຆານວິຎ຺ຎາຓສ຺ມິມ຺ປິ ນິພ຺ພິນ຺ທຕິ… ຊິວ຺ຫາວິຎ຺ຎາຓສ຺ມິມ຺ປິ ນິພ຺ພິນ຺ທຕິ… ກາຍວິຎ຺ຎາຓສ຺ມິມ຺ປິ ນິພ຺ພິນ຺ທຕິ… ມໂນວິຎ຺ຎາຓສ຺ມິມ຺ປິ ນິພ຺ພິນ຺ທຕິ; ນິພ຺ພິນ຺ທໍ ວິຣຊ຺ຊຕິ…ເປ… ປຊານາຕີ’’ຕິ. ຕຕິຍໍ.

໔. ສມ຺ຜສ຺ສສຸຕ຺ຕໍ

໑໙໑. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຈກ຺ຂຸສມ຺ຜສ຺ໂສ ນິຈ຺ໂຈ ວາ ອນິຈ຺ໂຈ ວາ’’ຕິ? ‘‘ອນິຈ຺ໂຈ, ຠນ຺ເຕ’’…ເປ… ‘‘ໂສຕສມ຺ຜສ຺ໂສ…ເປ… ຆານສມ຺ຜສ຺ໂສ… ຊິວ຺ຫາສມ຺ຜສ຺ໂສ… ກາຍສມ຺ຜສ຺ໂສ… ມໂນສມ຺ຜສ຺ໂສ ນິຈ຺ໂຈ ວາ ອນິຈ຺ໂຈ ວາ’’ຕິ? ‘‘ອນິຈ຺ໂຈ, ຠນ຺ເຕ’’…ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຈກ຺ຂຸສມ຺ຜສ຺ສສ຺ມິມ຺ປິ ນິພ຺ພິນ຺ທຕິ…ເປ… ໂສຕສມ຺ຜສ຺ສສ຺ມິມ຺ປິ ນິພ຺ພິນ຺ທຕິ… ຆານສມ຺ຜສ຺ສສ຺ມິມ຺ປິ ນິພ຺ພິນ຺ທຕິ… ຊິວ຺ຫາສມ຺ຜສ຺ສສ຺ມິມ຺ປິ ນິພ຺ພິນ຺ທຕິ… ກາຍສມ຺ຜສ຺ສສ຺ມິມ຺ປິ ນິພ຺ພິນ຺ທຕິ… ມໂນສມ຺ຜສ຺ສສ຺ມິມ຺ປິ ນິພ຺ພິນ຺ທຕິ; ນິພ຺ພິນ຺ທໍ ວິຣຊ຺ຊຕິ…ເປ… ປຊານາຕີ’’ຕິ. ຈຕຸຕ຺ຖໍ.

໕. ເວທນາສຸຕ຺ຕໍ

໑໙໒. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຈກ຺ຂຸສມ຺ຜສ຺ສຊາ ເວທນາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ໂສຕສມ຺ຜສ຺ສຊາ ເວທນາ…ເປ… ຆານສມ຺ຜສ຺ສຊາ ເວທນາ… ຊິວ຺ຫາສມ຺ຜສ຺ສຊາ ເວທນາ… ກາຍສມ຺ຜສ຺ສຊາ ເວທນາ… ມໂນສມ຺ຜສ຺ສຊາ ເວທນາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຈກ຺ຂຸສມ຺ຜສ຺ສຊາຍ ເວທນາຍປິ ນິພ຺ພິນ຺ທຕິ…ເປ… ໂສຕ… ຆານ… ຊິວ຺ຫາ… ກາຍ… ມໂນສມ຺ຜສ຺ສຊາຍ ເວທນາຍປິ ນິພ຺ພິນ຺ທຕິ…ເປ… ປຊານາຕີ’’ຕິ. ປຎ຺ຈມໍ.

໖. ສຎ຺ຎາສຸຕ຺ຕໍ

໑໙໓. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຣູປສຎ຺ຎາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ສທ຺ທສຎ຺ຎາ…ເປ… ຄນ຺ຘສຎ຺ຎາ… ຣສສຎ຺ຎາ… ໂຜຏ຺ຐພ຺ພສຎ຺ຎາ… ຘມ຺ມສຎ຺ຎາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຣູປສຎ຺ຎາຍປິ ນິພ຺ພິນ຺ທຕິ…ເປ… ສທ຺ທສຎ຺ຎາຍປິ ນິພ຺ພິນ຺ທຕິ… ຄນ຺ຘສຎ຺ຎາຍປິ ນິພ຺ພິນ຺ທຕິ… ຣສສຎ຺ຎາຍປິ ນິພ຺ພິນ຺ທຕິ… ໂຜຏ຺ຐພ຺ພສຎ຺ຎາຍປິ ນິພ຺ພິນ຺ທຕິ… ຘມ຺ມສຎ຺ຎາຍປິ ນິພ຺ພິນ຺ທຕິ…ເປ… ປຊານາຕີ’’ຕິ. ຉຏ຺ຐໍ.

໗. ສຎ຺ເຈຕນາສຸຕ຺ຕໍ

໑໙໔. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຣູປສຎ຺ເຈຕນາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ສທ຺ທສຎ຺ເຈຕນາ…ເປ… ຄນ຺ຘສຎ຺ເຈຕນາ… ຣສສຎ຺ເຈຕນາ … ໂຜຏ຺ຐພ຺ພສຎ຺ເຈຕນາ… ຘມ຺ມສຎ຺ເຈຕນາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຣູປສຎ຺ເຈຕນາຍປິ ນິພ຺ພິນ຺ທຕິ…ເປ… ສທ຺ທສຎ຺ເຈຕນາຍປິ ນິພ຺ພິນ຺ທຕິ… ຄນ຺ຘສຎ຺ເຈຕນາຍປິ ນິພ຺ພິນ຺ທຕິ… ຣສສຎ຺ເຈຕນາຍປິ ນິພ຺ພິນ຺ທຕິ… ໂຜຏ຺ຐພ຺ພສຎ຺ເຈຕນາຍປິ ນິພ຺ພິນ຺ທຕິ… ຘມ຺ມສຎ຺ເຈຕນາຍປິ ນິພ຺ພິນ຺ທຕິ…ເປ… ປຊານາຕີ’’ຕິ. ສຕ຺ຕມໍ.

໘. ຕຓ຺ຫາສຸຕ຺ຕໍ

໑໙໕. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຣູປຕຓ຺ຫາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ສທ຺ທຕຓ຺ຫາ…ເປ… ຄນ຺ຘຕຓ຺ຫາ… ຣສຕຓ຺ຫາ… ໂຜຏ຺ຐພ຺ພຕຓ຺ຫາ… ຘມ຺ມຕຓ຺ຫາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຣູປຕຓ຺ຫາຍປິ ນິພ຺ພິນ຺ທຕິ…ເປ… ສທ຺ທຕຓ຺ຫາຍປິ ນິພ຺ພິນ຺ທຕິ… ຄນ຺ຘຕຓ຺ຫາຍປິ ນິພ຺ພິນ຺ທຕິ… ຣສຕຓ຺ຫາຍປິ ນິພ຺ພິນ຺ທຕິ… ໂຜຏ຺ຐພ຺ພຕຓ຺ຫາຍ ນິພ຺ພິນ຺ທຕິ… ຘມ຺ມຕຓ຺ຫາຍປິ ນິພ຺ພິນ຺ທຕິ …ເປ… ປຊານາຕີ’’ຕິ. ອຏ຺ຐມໍ.

໙. ຘາຕຸສຸຕ຺ຕໍ

໑໙໖. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ປຖວີຘາຕຸ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ອາໂປຘາຕຸ…ເປ… ເຕໂຊຘາຕຸ… ວາໂຍຘາຕຸ… ອາກາສຘາຕຸ… ວິຎ຺ຎາຓຘາຕຸ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ປຖວີຘາຕຸຍາປິ ນິພ຺ພິນ຺ທຕິ…ເປ… ອາໂປຘາຕຸຍາປິ ນິພ຺ພິນ຺ທຕິ… ເຕໂຊຘາຕຸຍາປິ ນິພ຺ພິນ຺ທຕິ… ວາໂຍຘາຕຸຍາປິ ນິພ຺ພິນ຺ທຕິ… ອາກາສຘາຕຸຍາປິ ນິພ຺ພິນ຺ທຕິ… ວິຎ຺ຎາຓຘາຕຸຍາປິ ນິພ຺ພິນ຺ທຕິ…ເປ… ປຊານາຕີ’’ຕິ. ນວມໍ.

໑໐. ຂນ຺ຘສຸຕ຺ຕໍ

໑໙໗. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຣູປໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’…ເປ… ‘‘ເວທນາ…ເປ… ສຎ຺ຎາ… ສງ຺ຂາຣາ… ວິຎ຺ຎາຓໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’…ເປ… ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຣູປສ຺ມິມ຺ປິ ນິພ຺ພິນ຺ທຕິ…ເປ… ເວທນາຍປິ ນິພ຺ພິນ຺ທຕິ… ສຎ຺ຎາຍປິ ນິພ຺ພິນ຺ທຕິ… ສງ຺ຂາເຣສຸປິ ນິພ຺ພິນ຺ທຕິ… ວິຎ຺ຎາຓສ຺ມິມ຺ປິ ນິພ຺ພິນ຺ທຕິ; ນິພ຺ພິນ຺ທໍ ວິຣຊ຺ຊຕິ; ວິຣາຄາ ວິມຸຈ຺ຈຕິ; ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓໍ ໂຫຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕີ’’ຕິ. ທສມໍ.

ປຐໂມ ວຄ຺ໂຄ.

ຕສ຺ສຸທ຺ທານໍ –

ຈກ຺ຂຸ ຣູປຎ຺ຈ ວິຎ຺ຎາຓໍ, ສມ຺ຜສ຺ໂສ ເວທນາຍ ຈ;

ສຎ຺ຎາ ສຎ຺ເຈຕນາ ຕຓ຺ຫາ, ຘາຕຸ ຂນ຺ເຘນ ເຕ ທສາຕິ.

໒. ທຸຕິຍວຄ຺ໂຄ

໑. ຈກ຺ຂຸສຸຕ຺ຕໍ

໑໙໘. ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ. ອຖ ໂຂ ອາຍສ຺ມາ ຣາຫຸໂລ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ຣາຫຸລໍ ຠຄວາ ເອຕທໂວຈ – ‘‘ຕໍ ກິໍ ມຎ຺ຎສິ, ຣາຫຸລ, ຈກ຺ຂຸໍ ນິຈ຺ຈໍ ວາ ອນິຈ຺ຈໍ ວາ’’ຕິ? ‘‘ອນິຈ຺ຈໍ, ຠນ຺ເຕ’’. ‘‘ຍໍ ປນານິຈ຺ຈໍ, ທຸກ຺ຂໍ ວາ ຕໍ ສຸຂໍ ວາ’’ຕິ? ‘‘ທຸກ຺ຂໍ, ຠນ຺ເຕ’’. ‘‘ຍໍ ປນານິຈ຺ຈໍ ທຸກ຺ຂໍ ວິປຣິຓາມຘມ຺ມໍ, ກລ຺ລໍ ນຸ ຕໍ ສມນຸປສ຺ສິຕຸໍ – ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’’’ຕິ? ‘‘ໂນ ເຫຕໍ, ຠນ຺ເຕ’’. ‘‘ໂສຕໍ…ເປ… ຆານໍ… ຊິວ຺ຫາ… ກາໂຍ… ມໂນ ນິຈ຺ໂຈ ວາ ອນິຈ຺ໂຈ ວາ’’ຕິ? ‘‘ອນິຈ຺ໂຈ, ຠນ຺ເຕ’’. ‘‘ຍໍ ປນານິຈ຺ຈໍ, ທຸກ຺ຂໍ ວາ ຕໍ ສຸຂໍ ວາ’’ຕິ? ‘‘ທຸກ຺ຂໍ, ຠນ຺ເຕ’’. ‘‘ຍໍ ປນານິຈ຺ຈໍ ທຸກ຺ຂໍ ວິປຣິຓາມຘມ຺ມໍ, ກລ຺ລໍ ນຸ ຕໍ ສມນຸປສ຺ສິຕຸໍ – ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’’’ຕິ? ‘‘ໂນ ເຫຕໍ, ຠນ຺ເຕ’’. ‘‘ເອວໍ ປສ຺ສໍ, ຣາຫຸລ, ສຸຕວາ ອຣິຍສາວໂກ ຈກ຺ຂຸສ຺ມິມ຺ປິ ນິພ຺ພິນ຺ທຕິ…ເປ… ໂສຕສ຺ມິມ຺ປິ ນິພ຺ພິນ຺ທຕິ… ຆານສ຺ມິມ຺ປິ ນິພ຺ພິນ຺ທຕິ … ຊິວ຺ຫາຍປິ ນິພ຺ພິນ຺ທຕິ… ກາຍສ຺ມິມ຺ປິ ນິພ຺ພິນ຺ທຕິ… ມນສ຺ມິມ຺ປິ ນິພ຺ພິນ຺ທຕິ; ນິພ຺ພິນ຺ທໍ ວິຣຊ຺ຊຕິ; ວິຣາຄາ ວິມຸຈ຺ຈຕິ; ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓໍ ໂຫຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕີ’’ຕິ. ເອເຕນ ເປຍ຺ຍາເລນ ທສ ສຸຕ຺ຕນ຺ຕາ ກາຕພ຺ພາ. ປຐມໍ.

໒-໑໐. ຣູປາທິສຸຕ຺ຕນວກໍ

໑໙໙. ສາວຕ຺ຖິຍໍ ວິຫຣຕິ…ເປ… ‘‘ຕໍ ກິໍ ມຎ຺ຎສິ, ຣາຫຸລ, ຣູປາ ນິຈ຺ຈາ ວາ ອນິຈ຺ຈາ ວາ’’ຕິ? ‘‘ອນິຈ຺ຈາ, ຠນ຺ເຕ’’…ເປ… ສທ຺ທາ… ຄນ຺ຘາ… ຣສາ… ໂຜຏ຺ຐພ຺ພາ… ຘມ຺ມາ….

‘‘ຈກ຺ຂຸວິຎ຺ຎາຓໍ…ເປ… ໂສຕວິຎ຺ຎາຓໍ… ຆານວິຎ຺ຎາຓໍ… ຊິວ຺ຫາວິຎ຺ຎາຓໍ… ກາຍວິຎ຺ຎາຓໍ… ມໂນວິຎ຺ຎາຓໍ….

‘‘ຈກ຺ຂຸສມ຺ຜສ຺ໂສ…ເປ… ໂສຕສມ຺ຜສ຺ໂສ… ຆານສມ຺ຜສ຺ໂສ… ຊິວ຺ຫາສມ຺ຜສ຺ໂສ… ກາຍສມ຺ຜສ຺ໂສ… ມໂນສມ຺ຜສ຺ໂສ….

‘‘ຈກ຺ຂຸສມ຺ຜສ຺ສຊາ ເວທນາ…ເປ… ໂສຕສມ຺ຜສ຺ສຊາ ເວທນາ… ຆານສມ຺ຜສ຺ສຊາ ເວທນາ… ຊິວ຺ຫາສມ຺ຜສ຺ສຊາ ເວທນາ… ກາຍສມ຺ຜສ຺ສຊາ ເວທນາ… ມໂນສມ຺ຜສ຺ສຊາ ເວທນາ….

‘‘ຣູປສຎ຺ຎາ…ເປ… ສທ຺ທສຎ຺ຎາ… ຄນ຺ຘສຎ຺ຎາ… ຣສສຎ຺ຎາ… ໂຜຏ຺ຐພ຺ພສຎ຺ຎາ… ຘມ຺ມສຎ຺ຎາ….

‘‘ຣູປສຎ຺ເຈຕນາ…ເປ… ສທ຺ທສຎ຺ເຈຕນາ… ຄນ຺ຘສຎ຺ເຈຕນາ… ຣສສຎ຺ເຈຕນາ… ໂຜຏ຺ຐພ຺ພສຎ຺ເຈຕນາ… ຘມ຺ມສຎ຺ເຈຕນາ….

‘‘ຣູປຕຓ຺ຫາ …ເປ… ສທ຺ທຕຓ຺ຫາ… ຄນ຺ຘຕຓ຺ຫາ… ຣສຕຓ຺ຫາ… ໂຜຏ຺ຐພ຺ພຕຓ຺ຫາ… ຘມ຺ມຕຓ຺ຫາ….

‘‘ປຖວີຘາຕຸ…ເປ… ອາໂປຘາຕຸ… ເຕໂຊຘາຕຸ… ວາໂຍຘາຕຸ… ອາກາສຘາຕຸ … ວິຎ຺ຎາຓຘາຕຸ….

‘‘ຣູປໍ …ເປ… ເວທນາ… ສຎ຺ຎາ… ສງ຺ຂາຣາ… ວິຎ຺ຎາຓໍ ນິຈ຺ຈໍ ວາ ອນິຈ຺ຈໍ ວາ’’ຕິ? ອນິຈ຺ຈໍ, ຠນ຺ເຕ…ເປ… ເອວໍ ປສ຺ສໍ ຣາຫຸລ…ເປ… ນາປຣໍ ອິຕ຺ຖຕ຺ຕາຍາຕິ ປຊານາຕີຕິ. ທສມໍ.

໑໑. ອນຸສຍສຸຕ຺ຕໍ

໒໐໐. ສາວຕ຺ຖິຍໍ ວິຫຣຕິ. ອຖ ໂຂ ອາຍສ຺ມາ ຣາຫຸໂລ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ຣາຫຸໂລ ຠຄວນ຺ຕໍ ເອຕທໂວຈ – ‘‘ກຖໍ ນຸ ໂຂ, ຠນ຺ເຕ, ຊານໂຕ ກຖໍ ປສ຺ສໂຕ ອິມສ຺ມິຎ຺ຈ ສວິຎ຺ຎາຓເກ ກາເຍ ພຫິທ຺ຘາ ຈ ສພ຺ພນິມິຕ຺ເຕສຸ ອຫງ຺ກາຣມມງ຺ກາຣມານານຸສຍາ ນ ໂຫນ຺ຕີ’’ຕິ? ‘‘ຍໍ ກິຎ຺ຈິ, ຣາຫຸລ, ຣູປໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ສພ຺ພໍ ຣູປໍ ‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’ຕິ ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ປສ຺ສຕິ. ຍາ ກາຈິ ເວທນາ…ເປ… ຍາ ກາຈິ ສຎ຺ຎາ… ເຍ ເກຈິ ສງ຺ຂາຣາ… ຍໍ ກິຎ຺ຈິ ວິຎ຺ຎາຓໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ສພ຺ພໍ ວິຎ຺ຎາຓໍ ‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’ຕິ ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ປສ຺ສຕິ. ເອວໍ ໂຂ, ຣາຫຸລ, ຊານໂຕ ເອວໍ ປສ຺ສໂຕ ອິມສ຺ມິຎ຺ຈ ສວິຎ຺ຎາຓເກ ກາເຍ ພຫິທ຺ຘາ ຈ ສພ຺ພນິມິຕ຺ເຕສຸ ອຫງ຺ກາຣມມງ຺ກາຣມານານຸສຍາ ນ ໂຫນ຺ຕີ’’ຕິ. ເອກາທສມໍ.

໑໒. ອປຄຕສຸຕ຺ຕໍ

໒໐໑. ສາວຕ຺ຖິນິທານໍ. ອຖ ໂຂ ອາຍສ຺ມາ ຣາຫຸໂລ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ຣາຫຸໂລ ຠຄວນ຺ຕໍ ເອຕທໂວຈ – ‘‘ກຖໍ ນຸ ໂຂ, ຠນ຺ເຕ, ຊານໂຕ ກຖໍ ປສ຺ສໂຕ ອິມສ຺ມິໍ ຈ ສວິຎ຺ຎາຓເກ ກາເຍ ພຫິທ຺ຘາ ຈ ສພ຺ພນິມິຕ຺ເຕສຸ ອຫງ຺ກາຣມມງ຺ກາຣມານາປຄຕໍ ມານສໍ ໂຫຕິ ວິຘາ ສມຕິກ຺ກນ຺ຕໍ ສນ຺ຕໍ ສຸວິມຸຕ຺ຕ’’ນ຺ຕິ? ‘‘ຍໍ ກິຎ຺ຈິ, ຣາຫຸລ, ຣູປໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ ສພ຺ພໍ ຣູປໍ ‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’ຕິ ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ທິສ຺ວາ ອນຸປາທາ ວິມຸຕ຺ໂຕ ໂຫຕິ’’.

‘‘ຍາ ກາຈິ ເວທນາ…ເປ… ຍາ ກາຈິ ສຎ຺ຎາ… ເຍ ເກຈິ ສງ຺ຂາຣາ… ຍໍ ກິຎ຺ຈິ ວິຎ຺ຎາຓໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ສພ຺ພໍ ວິຎ຺ຎາຓໍ ‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’ຕິ ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ທິສ຺ວາ ອນຸປາທາ ວິມຸຕ຺ໂຕ ໂຫຕິ. ເອວໍ ໂຂ, ຣາຫຸລ, ຊານໂຕ ເອວໍ ປສ຺ສໂຕ ອິມສ຺ມິຎ຺ຈ ສວິຎ຺ຎາຓເກ ກາເຍ ພຫິທ຺ຘາ ຈ ສພ຺ພນິມິຕ຺ເຕສຸ ອຫງ຺ກາຣມມງ຺ກາຣມານາປຄຕໍ ມານສໍ ໂຫຕິ ວິຘາ ສມຕິກ຺ກນ຺ຕໍ ສນ຺ຕໍ ສຸວິມຸຕ຺ຕ’’ນ຺ຕິ. ທ຺ວາທສມໍ.

ທຸຕິໂຍ ວຄ຺ໂຄ.

ຕສ຺ສຸທ຺ທານໍ –

ຈກ຺ຂຸ ຣູປຎ຺ຈ ວິຎ຺ຎາຓໍ, ສມ຺ຜສ຺ໂສ ເວທນາຍ ຈ;

ສຎ຺ຎາ ສຎ຺ເຈຕນາ ຕຓ຺ຫາ, ຘາຕຸ ຂນ຺ເຘນ ເຕ ທສ;

ອນຸສຍໍ ອປຄຕຎ຺ເຈວ, ວຄ຺ໂຄ ເຕນ ປວຸຈ຺ຈຕີຕິ.

ຣາຫຸລສໍຍຸຕ຺ຕໍ ສມຕ຺ຕໍ.