໒. ໂປກ຺ຂຣຓີສຸຕ຺ຕໍ

໗໕. ສາວຕ຺ຖິຍໍ ວິຫຣຕິ…ເປ… ‘‘ເສຍ຺ຍຖາປິ, ຠິກ຺ຂເວ, ໂປກ຺ຂຣຓີ ປຎ຺ຎາສໂຍຊນານິ ອາຍາເມນ ປຎ຺ຎາສໂຍຊນານິ ວິຕ຺ຖາເຣນ ປຎ຺ຎາສໂຍຊນານິ ອຸພ຺ເພເຘນ, ປຸຓ຺ຓາ ອຸທກສ຺ສ ສມຕິຕ຺ຕິກາ ກາກເປຍ຺ຍາ. ຕໂຕ ປຸຣິໂສ ກຸສຄ຺ເຄນ ອຸທກໍ ອຸທ຺ຘເຣຍ຺ຍ. ຕໍ ກິໍ ມຎ຺ຎຖ, ຠິກ຺ຂເວ, ກຕມໍ ນຸ ໂຂ ພຫຸຕຣໍ, ຍໍ ວາ ກຸສຄ຺ເຄນ ອຸທກໍ ອຸພ຺ຠຕໍ ຍໍ ວາ ໂປກ຺ຂຣຓິຍາ ອຸທກ’’ນ຺ຕິ?

‘‘ເອຕເທວ, ຠນ຺ເຕ, ພຫຸຕຣໍ, ຍທິທໍ ໂປກ຺ຂຣຓິຍາ ອຸທກໍ. ອປ຺ປມຕ຺ຕກໍ ກຸສຄ຺ເຄນ ອຸທກໍ ອຸພ຺ຠຕໍ. ເນວ ສຕິມໍ ກລໍ ອຸເປຕິ ນ ສຫສ຺ສິມໍ ກລໍ ອຸເປຕິ ນ ສຕສຫສ຺ສິມໍ ກລໍ ອຸເປຕິ ໂປກ຺ຂຣຓິຍາ ອຸທກໍ ອຸປນິຘາຍ ກຸສຄ຺ເຄນ ອຸທກໍ ອຸພ຺ຠຕ’’ນ຺ຕິ. ‘‘ເອວເມວ ໂຂ, ຠິກ຺ຂເວ, ອຣິຍສາວກສ຺ສ ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ອຠິສເມຕາວິໂນ ເອຕເທວ ພຫຸຕຣໍ ທຸກ຺ຂໍ ຍທິທໍ ປຣິກ຺ຂີຓໍ ປຣິຍາທິຓ຺ຓໍ; ອປ຺ປມຕ຺ຕກໍ ອວສິຏ຺ຐໍ. ເນວ ສຕິມໍ ກລໍ ອຸເປຕິ ນ ສຫສ຺ສິມໍ ກລໍ ອຸເປຕິ ນ ສຕສຫສ຺ສິມໍ ກລໍ ອຸເປຕິ ປຸຣິມໍ ທຸກ຺ຂກ຺ຂນ຺ຘໍ ປຣິກ຺ຂີຓໍ ປຣິຍາທິຓ຺ຓໍ ອຸປນິຘາຍ, ຍທິທໍ ສຕ຺ຕກ຺ຂຕ຺ຕຸໍປຣມຕາ. ເອວໍ ມຫຕ຺ຖິໂຍ ໂຂ, ຠິກ຺ຂເວ, ຘມ຺ມາຠິສມໂຍ; ເອວໍ ມຫຕ຺ຖິໂຍ ຘມ຺ມຈກ຺ຂຸປຏິລາໂຠ’’ຕິ. ທຸຕິຍໍ.