໒. ທຸພ຺ພຓ຺ຓິຍສຸຕ຺ຕໍ

໒໖໘. ສາວຕ຺ຖິຍໍ ເຊຕວເນ. ຕຕ຺ຣ ໂຂ…ເປ… ເອຕທໂວຈ – ‘‘ຠູຕປຸພ຺ພໍ, ຠິກ຺ຂເວ, ອຎ຺ຎຕໂຣ ຍກ຺ໂຂ ທຸພ຺ພຓ຺ໂຓ ໂອໂກຏິມໂກ ສກ຺ກສ຺ສ ເທວານມິນ຺ທສ຺ສ ອາສເນ ນິສິນ຺ໂນ ອໂຫສິ. ຕຕ຺ຣ ສຸທໍ, ຠິກ຺ຂເວ, ເທວາ ຕາວຕິໍສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘ອຈ຺ຉຣິຍໍ ວຕ ໂຠ, ອພ຺ຠຸຕໍ ວຕ, ໂຠ! ອຍໍ ຍກ຺ໂຂ ທຸພ຺ພຓ຺ໂຓ ໂອໂກຏິມໂກ ສກ຺ກສ຺ສ ເທວານມິນ຺ທສ຺ສ ອາສເນ ນິສິນ຺ໂນ’’’ຕິ! ຍຖາ ຍຖາ ໂຂ, ຠິກ຺ຂເວ, ເທວາ ຕາວຕິໍສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ, ຕຖາ ຕຖາ ໂສ ຍກ຺ໂຂ ອຠິຣູປຕໂຣ ເຈວ ໂຫຕິ ທສ຺ສນີຍຕໂຣ ຈ ປາສາທິກຕໂຣ ຈ.

‘‘ອຖ ໂຂ, ຠິກ຺ຂເວ, ເທວາ ຕາວຕິໍສາ ເຍນ ສກ຺ໂກ ເທວານມິນ຺ໂທ ເຕນຸປສງ຺ກມິໍສຸ; ອຸປສງ຺ກມິຕ຺ວາ ສກ຺ກໍ ເທວານມິນ຺ທໍ ເອຕທໂວຈຸໍ – ‘ອິຘ ເຕ, ມາຣິສ, ອຎ຺ຎຕໂຣ ຍກ຺ໂຂ ທຸພ຺ພຓ຺ໂຓ ໂອໂກຏິມໂກ ສກ຺ກສ຺ສ ເທວານມິນ຺ທສ຺ສ ອາສເນ ນິສິນ຺ໂນ. ຕຕ຺ຣ ສຸທໍ, ມາຣິສ, ເທວາ ຕາວຕິໍສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ອຈ຺ຉຣິຍໍ ວຕ, ໂຠ, ອພ຺ຠຸຕໍ ວຕ, ໂຠ! ອຍໍ ຍກ຺ໂຂ ທຸພ຺ພຓ຺ໂຓ ໂອໂກຏິມໂກ ສກ຺ກສ຺ສ ເທວານມິນ຺ທສ຺ສ ອາສເນ ນິສິນ຺ໂນຕິ. ຍຖາ ຍຖາ ໂຂ, ມາຣິສ, ເທວາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ, ຕຖາ ຕຖາ ໂສ ຍກ຺ໂຂ ອຠິຣູປຕໂຣ ເຈວ ໂຫຕິ ທສ຺ສນີຍຕໂຣ ຈ ປາສາທິກຕໂຣ ຈາຕິ. ໂສ ຫິ ນູນ, ມາຣິສ, ໂກຘຠກ຺ໂຂ ຍກ຺ໂຂ ຠວິສ຺ສຕີ’’’ຕິ.

‘‘ອຖ ໂຂ, ຠິກ຺ຂເວ, ສກ຺ໂກ ເທວານມິນ຺ໂທ ເຍນ ໂສ ໂກຘຠກ຺ໂຂ ຍກ຺ໂຂ ເຕນຸປສງ຺ກມິ; ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ທກ຺ຂິຓຊາຓຸມຓ຺ຑລໍ ປຖວິຍໍ ນິຫນ຺ຕ຺ວາ ເຍນ ໂສ ໂກຘຠກ຺ໂຂ ຍກ຺ໂຂ ເຕນຎ຺ຊລິໍ ປຓາເມຕ຺ວາ ຕິກ຺ຂຕ຺ຕຸໍ ນາມໍ ສາເວຕິ – ‘ສກ຺ໂກຫໍ ມາຣິສ, ເທວານມິນ຺ໂທ, ສກ຺ໂກຫໍ, ມາຣິສ, ເທວານມິນ຺ໂທ’ຕິ. ຍຖາ ຍຖາ ໂຂ, ຠິກ຺ຂເວ, ສກ຺ໂກ ເທວານມິນ຺ໂທ ນາມໍ ສາເວສິ, ຕຖາ ຕຖາ ໂສ ຍກ຺ໂຂ ທຸພ຺ພຓ຺ຓຕໂຣ ເຈວ ອໂຫສິ ໂອໂກຏິມກຕໂຣ ຈ. ທຸພ຺ພຓ຺ຓຕໂຣ ເຈວ ຫຸຕ຺ວາ ໂອໂກຏິມກຕໂຣ ຈ ຕຕ຺ເຖວນ຺ຕຣຘາຍີ’’ຕິ. ອຖ ໂຂ, ຠິກ຺ຂເວ, ສກ຺ໂກ ເທວານມິນ຺ໂທ ສເກ ອາສເນ ນິສີທິຕ຺ວາ ເທເວ ຕາວຕິໍເສ ອນຸນຍມາໂນ ຕາຍໍ ເວລາຍໍ ອິມາ ຄາຖາໂຍ ອຠາສິ –

‘‘ນ ສູປຫຕຈິຕ຺ໂຕມ຺ຫິ, ນາວຕ຺ເຕນ ສຸວານໂຍ;

ນ ໂວ ຈິຣາຫໍ ກຸຊ຺ຌາມິ, ໂກໂຘ ມຍິ ນາວຕິຏ຺ຐຕິ.

‘‘ກຸທ຺ຘາຫໍ ນ ຜຣຸສໍ ພ຺ຣູມິ, ນ ຈ ຘມ຺ມານິ ກິຕ຺ຕເຍ;

ສນ຺ນິຄ຺ຄຓ຺ຫາມິ ອຕ຺ຕານໍ, ສມ຺ປສ຺ສໍ ອຕ຺ຖມຕ຺ຕໂນ’’ຕິ.