໘. ເຉຕ຺ວາວຄ຺ໂຄ

໑. ເຉຕ຺ວາສຸຕ຺ຕໍ

໗໑. ສາວຕ຺ຖິນິທານໍ. ເອກມນ຺ຕໍ ຐິຕາ ໂຂ ສາ ເທວຕາ ຠຄວນ຺ຕໍ ຄາຖາຍ ອຊ຺ຌຠາສິ –

‘‘ກິໍສຸ ເຉຕ຺ວາ [ຌຕ຺ວາ (ສີ.), ຆຕ຺ວາ (ສ຺ຍາ. ກໍ.) ເອວມຸປຣິປິ] ສຸຂໍ ເສຕິ, ກິໍສຸ ເຉຕ຺ວາ ນ ໂສຈຕິ;

ກິສ຺ສສ຺ສຸ ເອກຘມ຺ມສ຺ສ, ວຘໍ ໂຣເຈສິ ໂຄຕມາ’’ຕິ.

‘‘ໂກຘໍ ເຉຕ຺ວາ ສຸຂໍ ເສຕິ, ໂກຘໍ ເຉຕ຺ວາ ນ ໂສຈຕິ;

ໂກຘສ຺ສ ວິສມູລສ຺ສ, ມຘຸຣຄ຺ຄສ຺ສ ເທວເຕ;

ວຘໍ ອຣິຍາ ປສໍສນ຺ຕິ, ຕຎ຺ຫິ ເຉຕ຺ວາ ນ ໂສຈຕີ’’ຕິ.

໒. ຣຖສຸຕ຺ຕໍ

໗໒. ‘‘ກິໍສຸ ຣຖສ຺ສ ປຎ຺ຎາຓໍ, ກິໍສຸ ປຎ຺ຎາຓມຄ຺ຄິໂນ;

ກິໍສຸ ຣຏ຺ຐສ຺ສ ປຎ຺ຎາຓໍ, ກິໍສຸ ປຎ຺ຎາຓມິຕ຺ຖິຍາ’’ຕິ.

‘‘ຘໂຊ ຣຖສ຺ສ ປຎ຺ຎາຓໍ, ຘູໂມ ປຎ຺ຎາຓມຄ຺ຄິໂນ;

ຣາຊາ ຣຏ຺ຐສ຺ສ ປຎ຺ຎາຓໍ, ຠຕ຺ຕາ ປຎ຺ຎາຓມິຕ຺ຖິຍາ’’ຕິ.

໓. ວິຕ຺ຕສຸຕ຺ຕໍ

໗໓. ‘‘ກິໍສູຘ ວິຕ຺ຕໍ ປຸຣິສສ຺ສ ເສຏ຺ຐໍ, ກິໍສຸ ສຸຈິຓ຺ໂຓ ສຸຂມາວຫຕິ;

ກິໍສຸ ຫເວ ສາທຸຕຣໍ [ສາຘຸຕຣໍ (ກ.)] ຣສານໍ, ກຖໍຊີວິໍ [ກິໍສຸຊີວິໍ (ກ.)] ຊີວິຕມາຫຸ ເສຏ຺ຐ’’ນ຺ຕິ.

‘‘ສທ຺ຘີຘ ວິຕ຺ຕໍ ປຸຣິສສ຺ສ ເສຏ຺ຐໍ, ຘມ຺ໂມ ສຸຈິຓ຺ໂຓ ສຸຂມາວຫຕິ;

ສຈ຺ຈໍ ຫເວ ສາທຸຕຣໍ ຣສານໍ, ປຎ຺ຎາຊີວິໍ ຊີວິຕມາຫຸ ເສຏ຺ຐ’’ນ຺ຕິ.

໔. ວຸຏ຺ຐິສຸຕ຺ຕໍ

໗໔. ‘‘ກິໍສຸ ອຸປ຺ປຕຕໍ ເສຏ຺ຐໍ, ກິໍສຸ ນິປຕຕໍ ວຣໍ;

ກິໍສຸ ປວຊມານານໍ, ກິໍສຸ ປວທຕໍ ວຣ’’ນ຺ຕິ.

‘‘ພີຊໍ ອຸປ຺ປຕຕໍ ເສຏ຺ຐໍ, ວຸຏ຺ຐິ ນິປຕຕໍ ວຣາ;

ຄາໂວ ປວຊມານານໍ, ປຸຕ຺ໂຕ ປວທຕໍ ວໂຣຕິ.

‘‘ວິຊ຺ຊາ ອຸປ຺ປຕຕໍ ເສຏ຺ຐາ, ອວິຊ຺ຊາ ນິປຕຕໍ ວຣາ;

ສງ຺ໂຆ ປວຊມານານໍ, ພຸທ຺ໂຘ ປວທຕໍ ວໂຣ’’ຕິ.

໕. ຠີຕາສຸຕ຺ຕໍ

໗໕. ‘‘ກິໍສູຘ ຠີຕາ ຊນຕາ ອເນກາ,

ມຄ຺ໂຄ ຈເນກາຍຕນປ຺ປວຸຕ຺ໂຕ;

ປຸຈ຺ຉາມິ ຕໍ ໂຄຕມ ຠູຣິປຎ຺ຎ,

ກິສ຺ມິໍ ຐິໂຕ ປຣໂລກໍ ນ ຠາເຍ’’ຕິ.

‘‘ວາຈໍ ມນຎ຺ຈ ປຓິຘາຍ ສມ຺ມາ,

ກາເຍນ ປາປານິ ອກຸພ຺ພມາໂນ;

ພວ຺ຫນ຺ນປານໍ ຆຣມາວສນ຺ໂຕ,

ສທ຺ໂຘ ມຸທູ ສໍວິຠາຄີ ວທຎ຺ຎູ;

ເອເຕສຸ ຘມ຺ເມສຸ ຐິໂຕ ຈຕູສຸ,

ຘມ຺ເມ ຐິໂຕ ປຣໂລກໍ ນ ຠາເຍ’’ຕິ.

໖. ນຊີຣຕິສຸຕ຺ຕໍ

໗໖. ‘‘ກິໍ ຊີຣຕິ ກິໍ ນ ຊີຣຕິ, ກິໍສຸ ອຸປ຺ປໂຖຕິ ວຸຈ຺ຈຕິ;

ກິໍສຸ ຘມ຺ມານໍ ປຣິປນ຺ໂຖ, ກິໍສຸ ຣຕ຺ຕິນ຺ທິວກ຺ຂໂຍ;

ກິໍ ມລໍ ພ຺ຣຫ຺ມຈຣິຍສ຺ສ, ກິໍ ສິນານມໂນທກໍ.

‘‘ກຕິ ໂລກສ຺ມິໍ ຉິທ຺ທານິ, ຍຕ຺ຖ ວິຕ຺ຕໍ [ຈິຕ຺ຕໍ (ສີ. ສ຺ຍາ. ກໍ. ປີ.)] ນ ຕິຏ຺ຐຕິ;

ຠຄວນ຺ຕໍ ປຸຏ຺ຐຸມາຄມ຺ມ, ກຖໍ ຊາເນມຸ ຕໍ ມຍ’’ນ຺ຕິ.

‘‘ຣູປໍ ຊີຣຕິ ມຈ຺ຈານໍ, ນາມໂຄຕ຺ຕໍ ນ ຊີຣຕິ;

ຣາໂຄ ອຸປ຺ປໂຖຕິ ວຸຈ຺ຈຕິ.

‘‘ໂລໂຠ ຘມ຺ມານໍ ປຣິປນ຺ໂຖ, ວໂຍ ຣຕ຺ຕິນ຺ທິວກ຺ຂໂຍ;

ອິຕ຺ຖີ ມລໍ ພ຺ຣຫ຺ມຈຣິຍສ຺ສ, ເອຕ຺ຖາຍໍ ສຊ຺ຊເຕ ປຊາ;

ຕໂປ ຈ ພ຺ຣຫ຺ມຈຣິຍຎ຺ຈ, ຕໍ ສິນານມໂນທກໍ.

‘‘ຉ ໂລກສ຺ມິໍ ຉິທ຺ທານິ, ຍຕ຺ຖ ວິຕ຺ຕໍ ນ ຕິຏ຺ຐຕິ;

ອາລສ຺ຍຎ຺ຈ [ອາລສ຺ສຎ຺ຈ (ສີ. ປີ.)] ປມາໂທ ຈ, ອນຸຏ຺ຐານໍ ອສໍຍໂມ;

ນິທ຺ທາ ຕນ຺ທີ [ຕນ຺ທິ (ສີ.)] ຈ ເຕ ຉິທ຺ເທ, ສພ຺ພໂສ ຕໍ ວິວຊ຺ຊເຍ’’ຕິ.

໗. ອິສ຺ສຣິຍສຸຕ຺ຕໍ

໗໗. ‘‘ກິໍສຸ ອິສ຺ສຣິຍໍ ໂລເກ, ກິໍສຸ ຠຓ຺ຑານມຸຕ຺ຕມໍ;

ກິໍສຸ ສຕ຺ຖມລໍ ໂລເກ, ກິໍສຸ ໂລກສ຺ມິມພ຺ພຸທໍ.

‘‘ກິໍສຸ ຫຣນ຺ຕໍ ວາເຣນ຺ຕິ, ຫຣນ຺ໂຕ ປນ ໂກ ປິໂຍ;

ກິໍສຸ ປຸນປ຺ປຸນາຍນ຺ຕໍ, ອຠິນນ຺ທນ຺ຕິ ປຓ຺ຑິຕາ’’ຕິ.

‘‘ວໂສ ອິສ຺ສຣິຍໍ ໂລເກ, ອິຕ຺ຖີ ຠຓ຺ຑານມຸຕ຺ຕມໍ;

ໂກໂຘ ສຕ຺ຖມລໍ ໂລເກ, ໂຈຣາ ໂລກສ຺ມິມພ຺ພຸທາ.

‘‘ໂຈຣໍ ຫຣນ຺ຕໍ ວາເຣນ຺ຕິ, ຫຣນ຺ໂຕ ສມໂຓ ປິໂຍ;

ສມຓໍ ປຸນປ຺ປຸນາຍນ຺ຕໍ, ອຠິນນ຺ທນ຺ຕິ ປຓ຺ຑິຕາ’’ຕິ.

໘. ກາມສຸຕ຺ຕໍ

໗໘. ‘‘ກິມຕ຺ຖກາໂມ ນ ທເທ, ກິໍ ມຈ຺ໂຈ ນ ປຣິຈ຺ຈເຊ;

ກິໍສຸ ມຸຎ຺ເຈຍ຺ຍ ກລ຺ຍາຓໍ, ປາປິກໍ ນ ຈ ໂມຈເຍ’’ຕິ.

‘‘ອຕ຺ຕານໍ ນ ທເທ ໂປໂສ, ອຕ຺ຕານໍ ນ ປຣິຈ຺ຈເຊ;

ວາຈໍ ມຸຎ຺ເຈຍ຺ຍ ກລ຺ຍາຓໍ, ປາປິກຎ຺ຈ ນ ໂມຈເຍ’’ຕິ.

໙. ປາເຖຍ຺ຍສຸຕ຺ຕໍ

໗໙. ‘‘ກິໍສຸ ພນ຺ຘຕິ ປາເຖຍ຺ຍໍ, ກິໍສຸ ໂຠຄານມາສໂຍ;

ກິໍສຸ ນຣໍ ປຣິກສ຺ສຕິ, ກິໍສຸ ໂລກສ຺ມິ ທຸຊ຺ຊຫໍ;

ກິສ຺ມິໍ ພທ຺ຘາ ປຸຖູ ສຕ຺ຕາ, ປາເສນ ສກຸຓີ ຍຖາ’’ຕິ.

‘‘ສທ຺ຘາ ພນ຺ຘຕິ ປາເຖຍ຺ຍໍ, ສິຣີ ໂຠຄານມາສໂຍ;

ອິຈ຺ຉາ ນຣໍ ປຣິກສ຺ສຕິ, ອິຈ຺ຉາ ໂລກສ຺ມິ ທຸຊ຺ຊຫາ;

ອິຈ຺ຉາພທ຺ຘາ ປຸຖູ ສຕ຺ຕາ, ປາເສນ ສກຸຓີ ຍຖາ’’ຕິ.

໑໐. ປຊ຺ໂຊຕສຸຕ຺ຕໍ

໘໐. ‘‘ກິໍສຸ ໂລກສ຺ມິ ປຊ຺ໂຊໂຕ, ກິໍສຸ ໂລກສ຺ມິ ຊາຄໂຣ;

ກິໍສຸ ກມ຺ເມ ສຊີວານໍ, ກິມສ຺ສ ອິຣິຍາປໂຖ.

‘‘ກິໍສຸ ອລສໍ ອນລສຎ຺ຈ [ກິໍ ອາລສ຺ຍານາລສ຺ຍຎ຺ຈ (ກ.)], ມາຕາ ປຸຕ຺ຕໍວ ໂປສຕິ;

ກິໍ ຠູຕາ ອຸປຊີວນ຺ຕິ, ເຍ ປາຓາ ປຖວິສ຺ສິຕາ’’ຕິ.

‘‘ປຎ຺ຎາ ໂລກສ຺ມິ ປຊ຺ໂຊໂຕ, ສຕິ ໂລກສ຺ມິ ຊາຄໂຣ;

ຄາໂວ ກມ຺ເມ ສຊີວານໍ, ສີຕສ຺ສ ອິຣິຍາປໂຖ.

‘‘ວຸຏ຺ຐິ ອລສໍ ອນລສຎ຺ຈ, ມາຕາ ປຸຕ຺ຕໍວ ໂປສຕິ;

ວຸຏ຺ຐິໍ ຠູຕາ ອຸປຊີວນ຺ຕິ, ເຍ ປາຓາ ປຖວິສ຺ສິຕາ’’ຕິ.

໑໑. ອຣຓສຸຕ຺ຕໍ

໘໑. ‘‘ເກສູຘ ອຣຓາ ໂລເກ, ເກສໍ ວຸສິຕໍ ນ ນສ຺ສຕິ;

ເກຘ ອິຈ຺ຉໍ ປຣິຊານນ຺ຕິ, ເກສໍ ໂຠຊິສ຺ສິຍໍ ສທາ.

‘‘ກິໍສຸ ມາຕາ ປິຕາ ຠາຕາ, ວນ຺ທນ຺ຕິ ນໍ ປຕິຏ຺ຐິຕໍ;

ກິໍສຸ ອິຘ ຊາຕິຫີນໍ, ອຠິວາເທນ຺ຕິ ຂຕ຺ຕິຍາ’’ຕິ.

‘‘ສມຓີຘ ອຣຓາ ໂລເກ, ສມຓານໍ ວຸສິຕໍ ນ ນສ຺ສຕິ;

ສມຓາ ອິຈ຺ຉໍ ປຣິຊານນ຺ຕິ, ສມຓານໍ ໂຠຊິສ຺ສິຍໍ ສທາ.

‘‘ສມຓໍ ມາຕາ ປິຕາ ຠາຕາ, ວນ຺ທນ຺ຕິ ນໍ ປຕິຏ຺ຐິຕໍ;

ສມຓີຘ ຊາຕິຫີນໍ, ອຠິວາເທນ຺ຕິ ຂຕ຺ຕິຍາ’’ຕິ.

ເຉຕ຺ວາວຄ຺ໂຄ ອຏ຺ຐໂມ.

ຕສ຺ສຸທ຺ທານໍ –

ເຉຕ຺ວາ ຣຖຎ຺ຈ ຈິຕ຺ຕຎ຺ຈ, ວຸຏ຺ຐິ ຠີຕາ ນຊີຣຕິ;

ອິສ຺ສຣໍ ກາມໍ ປາເຖຍ຺ຍໍ, ປຊ຺ໂຊໂຕ ອຣເຓນ ຈາຕິ.

ເທວຕາສໍຍຸຕ຺ຕໍ ສມຕ຺ຕໍ.