໓. ສຕ຺ຕິວຄ຺ໂຄ

໑. ສຕ຺ຕິສຸຕ຺ຕໍ

໒໑. ສາວຕ຺ຖິນິທານໍ. ເອກມນ຺ຕໍ ຐິຕາ ໂຂ ສາ ເທວຕາ ຠຄວໂຕ ສນ຺ຕິເກ ອິມໍ ຄາຖໍ ອຠາສິ –

‘‘ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ [ຑຍ຺ຫມາເນວ (ສພ຺ພຕ຺ຖ)] ມຕ຺ຖເກ;

ກາມຣາຄປ຺ປຫານາຍ, ສໂຕ ຠິກ຺ຂຸ ປຣິພ຺ພເຊ’’ຕິ.

‘‘ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ ມຕ຺ຖເກ;

ສກ຺ກາຍທິຏ຺ຐິປ຺ປຫານາຍ, ສໂຕ ຠິກ຺ຂຸ ປຣິພ຺ພເຊ’’ຕິ.

໒. ຜຸສຕິສຸຕ຺ຕໍ

໒໒. ‘‘ນາຜຸສນ຺ຕໍ ຜຸສຕິ ຈ, ຜຸສນ຺ຕຎ຺ຈ ຕໂຕ ຜຸເສ;

ຕສ຺ມາ ຜຸສນ຺ຕໍ ຜຸສຕິ, ອປ຺ປທຸຏ຺ຐປໂທສິນ’’ນ຺ຕິ.

‘‘ໂຍ ອປ຺ປທຸຏ຺ຐສ຺ສ ນຣສ຺ສ ທຸສ຺ສຕິ,

ສຸທ຺ຘສ຺ສ ໂປສສ຺ສ ອນງ຺ຄຓສ຺ສ;

ຕເມວ ພາລໍ ປຈ຺ເຈຕິ ປາປໍ,

ສຸຂຸໂມ ຣໂຊ ປຏິວາຕໍວ ຂິຕ຺ໂຕ’’ຕິ.

໓. ຊຏາສຸຕ຺ຕໍ

໒໓. ‘‘ອນ຺ໂຕ ຊຏາ ພຫິ ຊຏາ, ຊຏາຍ ຊຏິຕາ ປຊາ;

ຕໍ ຕໍ ໂຄຕມ ປຸຈ຺ຉາມິ, ໂກ ອິມໍ ວິຊຏເຍ ຊຏ’’ນ຺ຕິ.

‘‘ສີເລ ປຕິຏ຺ຐາຍ ນໂຣ ສປຎ຺ໂຎ, ຈິຕ຺ຕໍ ປຎ຺ຎຎ຺ຈ ຠາວຍໍ;

ອາຕາປີ ນິປໂກ ຠິກ຺ຂຸ, ໂສ ອິມໍ ວິຊຏເຍ ຊຏໍ.

‘‘ເຍສໍ ຣາໂຄ ຈ ໂທໂສ ຈ, ອວິຊ຺ຊາ ຈ ວິຣາຊິຕາ;

ຂີຓາສວາ ອຣຫນ຺ໂຕ, ເຕສໍ ວິຊຏິຕາ ຊຏາ.

‘‘ຍຕ຺ຖ ນາມຎ຺ຈ ຣູປຎ຺ຈ, ອເສສໍ ອຸປຣຸຊ຺ຌຕິ;

ປຏິຆໍ ຣູປສຎ຺ຎາ ຈ, ເອຕ຺ເຖສາ ຉິຊ຺ຊເຕ [ວິຊເຏ (ກ.)] ຊຏາ’’ຕິ.

໔. ມໂນນິວາຣຓສຸຕ຺ຕໍ

໒໔. ‘‘ຍໂຕ ຍໂຕ ມໂນ ນິວາຣເຍ,

ນ ທຸກ຺ຂເມຕິ ນໍ ຕໂຕ ຕໂຕ;

ສ ສພ຺ພໂຕ ມໂນ ນິວາຣເຍ,

ສ ສພ຺ພໂຕ ທຸກ຺ຂາ ປມຸຈ຺ຈຕິ’’.

‘‘ນ ສພ຺ພໂຕ ມໂນ ນິວາຣເຍ,

ນ ມໂນ ສໍຍຕຕ຺ຕມາຄຕໍ;

ຍໂຕ ຍໂຕ ຈ ປາປກໍ,

ຕໂຕ ຕໂຕ ມໂນ ນິວາຣເຍ’’ຕິ.

໕. ອຣຫນ຺ຕສຸຕ຺ຕໍ

໒໕. ‘‘ໂຍ ໂຫຕິ ຠິກ຺ຂຸ ອຣຫໍ ກຕາວີ,

ຂີຓາສໂວ ອນ຺ຕິມເທຫຘາຣີ;

ອຫໍ ວທາມີຕິປິ ໂສ ວເທຍ຺ຍ,

ມມໍ ວທນ຺ຕີຕິປິ ໂສ ວເທຍ຺ຍາ’’ຕິ.

‘‘ໂຍ ໂຫຕິ ຠິກ຺ຂຸ ອຣຫໍ ກຕາວີ,

ຂີຓາສໂວ ອນ຺ຕິມເທຫຘາຣີ;

ອຫໍ ວທາມີຕິປິ ໂສ ວເທຍ຺ຍ,

ມມໍ ວທນ຺ຕີຕິປິ ໂສ ວເທຍ຺ຍ;

ໂລເກ ສມຎ຺ຎໍ ກຸສໂລ ວິທິຕ຺ວາ,

ໂວຫາຣມຕ຺ເຕນ ໂສ [ສ (?)] ໂວຫເຣຍ຺ຍາ’’ຕິ.

‘‘ໂຍ ໂຫຕິ ຠິກ຺ຂຸ ອຣຫໍ ກຕາວີ,

ຂີຓາສໂວ ອນ຺ຕິມເທຫຘາຣີ;

ມານໍ ນຸ ໂຂ ໂສ ອຸປຄມ຺ມ ຠິກ຺ຂຸ,

ອຫໍ ວທາມີຕິປິ ໂສ ວເທຍ຺ຍ;

ມມໍ ວທນ຺ຕີຕິປິ ໂສ ວເທຍ຺ຍາ’’ຕິ.

‘‘ປຫີນມານສ຺ສ ນ ສນ຺ຕິ ຄນ຺ຖາ,

ວິຘູປິຕາ ມານຄນ຺ຖສ຺ສ ສພ຺ເພ;

ສ ວີຕິວຕ຺ໂຕ ມຎ຺ຎຕໍ [ມານນໍ (ສີ.), ມຎ຺ຎີຕໍ (?)] ສຸເມໂຘ,

ອຫໍ ວທາມີຕິປິ ໂສ ວເທຍ຺ຍ.

‘‘ມມໍ ວທນ຺ຕີຕິປິ ໂສ ວເທຍ຺ຍ;

ໂລເກ ສມຎ຺ຎໍ ກຸສໂລ ວິທິຕ຺ວາ;

ໂວຫາຣມຕ຺ເຕນ ໂສ ໂວຫເຣຍ຺ຍາ’’ຕິ.

໖. ປຊ຺ໂຊຕສຸຕ຺ຕໍ

໒໖. ‘‘ກຕິ ໂລກສ຺ມິໍ ປຊ຺ໂຊຕາ, ເຍຫິ ໂລໂກ ປກາສຕິ [ປຠາສຕິ (ກ. ສີ.)];

ຠຄວນ຺ຕໍ [ຠວນ຺ຕໍ (ກ.)] ປຸຏ຺ຐຸມາຄມ຺ມ, ກຖໍ ຊາເນມຸ ຕໍ ມຍ’’ນ຺ຕິ.

‘‘ຈຕ຺ຕາໂຣ ໂລເກ ປຊ຺ໂຊຕາ, ປຎ຺ຈເມຕ຺ຖ ນ ວິຊ຺ຊຕິ;

ທິວາ ຕປຕິ ອາທິຈ຺ໂຈ, ຣຕ຺ຕິມາຠາຕິ ຈນ຺ທິມາ.

‘‘ອຖ ອຄ຺ຄິ ທິວາຣຕ຺ຕິໍ, ຕຕ຺ຖ ຕຕ຺ຖ ປກາສຕິ;

ສມ຺ພຸທ຺ໂຘ ຕປຕໍ ເສຏ຺ໂຐ, ເອສາ ອາຠາ ອນຸຕ຺ຕຣາ’’ຕິ.

໗. ສຣສຸຕ຺ຕໍ

໒໗. ‘‘ກຸໂຕ ສຣາ ນິວຕ຺ຕນ຺ຕິ, ກຕ຺ຖ ວຏ຺ຏໍ ນ ວຕ຺ຕຕິ;

ກຕ຺ຖ ນາມຎ຺ຈ ຣູປຎ຺ຈ, ອເສສໍ ອຸປຣຸຊ຺ຌຕີ’’ຕິ.

‘‘ຍຕ຺ຖ ອາໂປ ຈ ປຖວີ, ເຕໂຊ ວາໂຍ ນ ຄາຘຕິ;

ອໂຕ ສຣາ ນິວຕ຺ຕນ຺ຕິ, ເອຕ຺ຖ ວຏ຺ຏໍ ນ ວຕ຺ຕຕິ;

ເອຕ຺ຖ ນາມຎ຺ຈ ຣູປຎ຺ຈ, ອເສສໍ ອຸປຣຸຊ຺ຌຕີ’’ຕິ.

໘. ມຫທ຺ຘນສຸຕ຺ຕໍ

໒໘. ‘‘ມຫທ຺ຘນາ ມຫາໂຠຄາ, ຣຏ຺ຐວນ຺ໂຕປິ ຂຕ຺ຕິຍາ;

ອຎ຺ຎມຎ຺ຎາຠິຄິຊ຺ຌນ຺ຕິ, ກາເມສຸ ອນລງ຺ກຕາ.

‘‘ເຕສຸ ອຸສ຺ສຸກ຺ກຊາເຕສຸ, ຠວໂສຕານຸສາຣິສຸ;

ເກຘ ຕຓ຺ຫໍ [ໂຣຘຕຓ຺ຫໍ (ສ຺ຍາ. ກໍ.), ເຄຘຕຓ຺ຫໍ (ກ.)] ປຊຫິໍສຸ [ປວາຫິໍສຸ (ສ຺ຍາ. ກໍ. ກ.)], ເກ ໂລກສ຺ມິໍ ອນຸສ຺ສຸກາ’’ຕິ.

‘‘ຫິຕ຺ວາ ອຄາຣໍ ປພ຺ພຊິຕາ, ຫິຕ຺ວາ ປຸຕ຺ຕໍ ປສຸໍ ວິຍໍ;

ຫິຕ຺ວາ ຣາຄຎ຺ຈ ໂທສຎ຺ຈ, ອວິຊ຺ຊຎ຺ຈ ວິຣາຊິຍ;

ຂີຓາສວາ ອຣຫນ຺ໂຕ, ເຕ ໂລກສ຺ມິໍ ອນຸສ຺ສຸກາ’’ຕິ.

໙. ຈຕຸຈກ຺ກສຸຕ຺ຕໍ

໒໙. ‘‘ຈຕຸຈກ຺ກໍ ນວທ຺ວາຣໍ, ປຸຓ຺ຓໍ ໂລເຠນ ສໍຍຸຕໍ;

ປງ຺ກຊາຕໍ ມຫາວີຣ, ກຖໍ ຍາຕ຺ຣາ ຠວິສ຺ສຕີ’’ຕິ.

‘‘ເຉຕ຺ວາ ນທ຺ຘິໍ ວຣຕ຺ຕຎ຺ຈ, ອິຈ຺ຉາ ໂລຠຎ຺ຈ ປາປກໍ;

ສມູລໍ ຕຓ຺ຫມພ຺ພຸຍ຺ຫ, ເອວໍ ຍາຕ຺ຣາ ຠວິສ຺ສຕີ’’ຕິ.

໑໐. ເອຓິຊງ຺ຆສຸຕ຺ຕໍ

໓໐. ‘‘ເອຓິຊງ຺ຆໍ ກິສໍ ວີຣໍ, ອປ຺ປາຫາຣໍ ອໂລລຸປໍ;

ສີຫໍ ເວກຈຣໍ ນາຄໍ, ກາເມສຸ ອນເປກ຺ຂິນໍ;

ອຸປສງ຺ກມ຺ມ ປຸຈ຺ຉາມ, ກຖໍ ທຸກ຺ຂາ ປມຸຈ຺ຈຕີ’’ຕິ.

‘‘ປຎ຺ຈ ກາມຄຸຓາ ໂລເກ, ມໂນຉຏ຺ຐາ ປເວທິຕາ;

ເອຕ຺ຖ ຉນ຺ທໍ ວິຣາເຊຕ຺ວາ, ເອວໍ ທຸກ຺ຂາ ປມຸຈ຺ຈຕີ’’ຕິ.

ສຕ຺ຕິວຄ຺ໂຄ ຕຕິໂຍ.

ຕສ຺ສຸທ຺ທານໍ –

ສຕ຺ຕິຍາ ຜຸສຕິ ເຈວ, ຊຏາ ມໂນນິວາຣຓາ;

ອຣຫນ຺ເຕນ ປຊ຺ໂຊໂຕ, ສຣາ ມຫທ຺ຘເນນ ຈ;

ຈຕຸຈກ຺ເກນ ນວມໍ, ເອຓິຊງ຺ເຆນ ເຕ ທສາຕິ.