໘. ຕຕິຍນາວາວິມານວຕ຺ຖຸ

໖໓. ‘‘ສຸວຓ຺ຓຈ຺ຉທນໍ ນາວໍ, ນາຣິ ອາຣຸຍ຺ຫ ຕິຏ຺ຐສິ;

ໂອຄາຫສິ ໂປກ຺ຂຣຓິໍ, ປທ຺ມໍ ຉິນ຺ທສິ ປາຓິນາ.

໖໔. ‘‘ກູຏາຄາຣາ ນິເວສາ ເຕ, ວິຠຕ຺ຕາ ຠາຄໂສ ມິຕາ;

ທທ຺ທລ຺ລມານາ [ທທ຺ທຬ຺ຫມານາ (ກ.)] ອາຠນ຺ຕິ, ສມນ຺ຕາ ຈຕຸໂຣ ທິສາ.

໖໕. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໖໖. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໖໗. ສາ ເທວຕາ ອຕ຺ຕມນາ, ສມ຺ພຸທ຺ເຘເນວ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໖໘. ‘‘ອຫໍ ມນຸສ຺ເສສຸ ມນຸສ຺ສຠູຕາ, ປຸຣິມາຍ ຊາຕິຍາ ມນຸສ຺ສໂລເກ;

ທິສ຺ວານ ຠິກ຺ຂູ ຕສິເຕ ກິລນ຺ເຕ, ອຸຏ຺ຐາຍ ປາຕຸໍ ອຸທກໍ ອທາສິໍ.

໖໙. ‘‘ໂຍ ເວ ກິລນ຺ຕານ ປິປາສິຕານໍ, ອຸຏ຺ຐາຍ ປາຕຸໍ ອຸທກໍ ທທາຕິ;

ສີໂຕທກາ ຕສ຺ສ ຠວນ຺ຕິ ນຊ຺ໂຊ, ປຫູຕມລ຺ຍາ ພຫຸປຸຓ຺ຑຣີກາ.

໗໐. ‘‘ຕໍ ອາປຄາ ອນຸປຣິຍນ຺ຕິ ສພ຺ພທາ, ສີໂຕທກາ ວາລຸກສນ຺ຖຕາ ນທີ;

ອມ຺ພາ ຈ ສາລາ ຕິລກາ ຈ ຊມ຺ພຸໂຍ, ອຸທ຺ທາລກາ ປາຏລິໂຍ ຈ ຜຸລ຺ລາ.

໗໑. ‘‘ຕໍ ຠູມິຠາເຄຫິ ອຸເປຕຣູປໍ, ວິມານເສຏ຺ຐໍ ຠຸສໂສຠມານໍ;

ຕສ຺ສີຘ ກມ຺ມສ຺ສ ອຍໍ ວິປາໂກ, ເອຕາທິສໍ ປຸຎ຺ຎກຕາ ລຠນ຺ຕິ.

໗໒. ‘‘ກູຏາຄາຣາ ນິເວສາ ເມ, ວິຠຕ຺ຕາ ຠາຄໂສ ມິຕາ;

ທທ຺ທລ຺ລມານາ ອາຠນ຺ຕິ, ສມນ຺ຕາ ຈຕຸໂຣ ທິສາ.

໗໓. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໗໔. ‘‘ອກ຺ຂາມິ ເຕ ພຸທ຺ຘ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕິ;

ເອຕສ຺ສ ກມ຺ມສ຺ສ ຜລໍ ມເມທໍ, ອຕ຺ຖາຍ ພຸທ຺ໂຘ ອຸທກໍ ອປາຍີ’’ຕິ [ອປາສີຕິ (ສີ. ສ຺ຍາ. ປີ.)].

ຕຕິຍນາວາວິມານໍ ອຏ຺ຐມໍ.