໕. ກຸຎ຺ຊຣວິມານວຕ຺ຖຸ

໓໑. ‘‘ກຸຎ຺ຊໂຣ ເຕ ວຣາໂຣໂຫ, ນານາຣຕນກປ຺ປໂນ;

ຣຸຈິໂຣ ຖາມວາ ຊວສມ຺ປນ຺ໂນ, ອາກາສມ຺ຫິ ສມີຫຕິ.

໓໒. ‘‘ປທຸມິ ປທ຺ມ [ປທຸມ… (ສີ. ສ຺ຍາ.) ເອວມຸປຣິປິ] ປຕ຺ຕກ຺ຂິ, ປທ຺ມຸປ຺ປລຊຸຕິນ຺ຘໂຣ;

ປທ຺ມຈຸຓ຺ຓາຠິກິຓ຺ຓງ຺ໂຄ, ໂສຓ຺ຓໂປກ຺ຂຣມາລຘາ [… ມາລວາ (ສີ. ສ຺ຍາ.)].

໓໓. ‘‘ປທຸມານຸສຏໍ ມຄ຺ຄໍ, ປທ຺ມປຕ຺ຕວິຠູສິຕໍ.

ຐິຕໍ ວຄ຺ຄຸມນຸຄ຺ຆາຕີ, ມິຕໍ ຄຈ຺ຉຕິ ວາຣໂຓ.

໓໔. ‘‘ຕສ຺ສ ປກ຺ກມມານສ຺ສ, ໂສຓ຺ຓກໍສາ ຣຕິສ຺ສຣາ;

ເຕສໍ ສຸຍ຺ຍຕິ ນິຄ຺ໂຆໂສ, ຕຸຣິເຍ ປຎ຺ຈງ຺ຄິເກ ຍຖາ.

໓໕. ‘‘ຕສ຺ສ ນາຄສ຺ສ ຂນ຺ຘມ຺ຫິ, ສຸຈິວຕ຺ຖາ ອລງ຺ກຕາ;

ມຫນ຺ຕໍ ອຈ຺ຉຣາສງ຺ຆໍ, ວຓ຺ເຓນ ອຕິໂຣຈສິ.

໓໖. ‘‘ທານສ຺ສ ເຕ ອິທໍ ຜລໍ, ອໂຖ ສີລສ຺ສ ວາ ປນ;

ອໂຖ ອຎ຺ຊລິກມ຺ມສ຺ສ, ຕໍ ເມ ອກ຺ຂາຫິ ປຸຈ຺ຉິຕາ’’ຕິ;

໓໗. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໓໘. ‘‘ທິສ຺ວານ ຄຸຓສມ຺ປນ຺ນໍ, ຌາຍິໍ ຌານຣຕໍ ສຕໍ;

ອທາສິໍ ປຸປ຺ຜາຠິກິຓ຺ຓໍ, ອາສນໍ ທຸສ຺ສສນ຺ຖຕໍ.

໓໙. ‘‘ອຸປຑ຺ຒໍ ປທ຺ມມາລາຫໍ, ອາສນສ຺ສ ສມນ຺ຕໂຕ;

ອພ຺ໂຠກິຣິສ຺ສໍ ປຕ຺ເຕຫິ, ປສນ຺ນາ ເສຫິ ປາຓິຠິ.

໔໐. ‘‘ຕສ຺ສ ກມ຺ມກຸສລສ຺ສ [ກມ຺ມສ຺ສ ກຸສລສ຺ສ (ສີ. ປີ.)], ອິທໍ ເມ ອີທິສໍ ຜລໍ;

ສກ຺ກາໂຣ ຄຣຸກາໂຣ ຈ, ເທວານໍ ອປຈິຕາ ອຫໍ.

໔໑. ‘‘ໂຍ ເວ ສມ຺ມາວິມຸຕ຺ຕານໍ, ສນ຺ຕານໍ ພ຺ຣຫ຺ມຈາຣິນໍ;

ປສນ຺ໂນ ອາສນໍ ທຊ຺ຊາ, ເອວໍ ນນ຺ເທ ຍຖາ ອຫໍ.

໔໒. ‘‘ຕສ຺ມາ ຫິ ອຕ຺ຕກາເມນ [ອຕ຺ຖກາເມນ (ກ.)], ມຫຕ຺ຕມຠິກງ຺ຂຕາ;

ອາສນໍ ທາຕພ຺ພໍ ໂຫຕິ, ສຣີຣນ຺ຕິມຘາຣິນ’’ນ຺ຕິ.

ກຸຎ຺ຊຣວິມານໍ ປຎ຺ຈມໍ.