໒. ທຸຕິຍປີຐວິມານວຕ຺ຖຸ

໘. ‘‘ປີຐໍ ເຕ ເວຬຸຣິຍມຍໍ ອຸຬາຣໍ, ມໂນຊວໍ ຄຈ຺ຉຕິ ເຍນກາມໍ;

ອລງ຺ກເຕ ມລ຺ຍຘເຣ ສຸວຕ຺ເຖ, ໂອຠາສສິ ວິຊ຺ຊຸຣິວພ຺ຠກູຏໍ.

໙. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໐. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໑໒. ‘‘ອຫໍ ມນຸສ຺ເສສຸ ມນຸສ຺ສຠູຕາ, ອພ຺ຠາຄຕານາສນກໍ ອທາສິໍ;

ອຠິວາທຍິໍ ອຎ຺ຊລິກໍ ອກາສິໍ, ຍຖານຸຠາວຎ຺ຈ ອທາສິ ທານໍ.

໑໓. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໑໔. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ທຸຕິຍປີຐວິມານໍ ທຸຕິຍໍ.