໘. ວິສາຂາສຸຕ຺ຕໍ

໗໘. ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ປຸພ຺ພາຣາເມ ມິຄາຣມາຕຸປາສາເທ. ເຕນ ໂຂ ປນ ສມເຍນ ວິສາຂາຍ ມິຄາຣມາຕຸຍາ ນຕ຺ຕາ ກາລງ຺ກຕາ ໂຫຕິ ປິຍາ ມນາປາ. ອຖ ໂຂ ວິສາຂາ ມິຄາຣມາຕາ ອລ຺ລວຕ຺ຖາ ອລ຺ລເກສາ ທິວາ ທິວສ຺ສ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ວິສາຂໍ ມິຄາຣມາຕຣໍ ຠຄວາ ເອຕທໂວຈ –

‘‘ຫນ຺ທ ກຸໂຕ ນຸ ຕ຺ວໍ, ວິສາເຂ, ອາຄຈ຺ຉສິ ອລ຺ລວຕ຺ຖາ ອລ຺ລເກສາ ອິຘູປສງ຺ກນ຺ຕາ ທິວາ ທິວສ຺ສາ’’ຕິ? ‘‘ນຕ຺ຕາ ເມ, ຠນ຺ເຕ, ປິຍາ ມນາປາ ກາລງ຺ກຕາ. ເຕນາຫໍ ອລ຺ລວຕ຺ຖາ ອລ຺ລເກສາ ອິຘູປສງ຺ກນ຺ຕາ ທິວາ ທິວສ຺ສາ’’ຕິ. ‘‘ອິຈ຺ເຉຍ຺ຍາສິ ຕ຺ວໍ, ວິສາເຂ, ຍາວຕິກາ [ຍາວຕກາ (?)] ສາວຕ຺ຖິຍາ ມນຸສ຺ສາ ຕາວຕິເກ [ຕາວຕເກ (?)] ປຸຕ຺ເຕ ຈ ນຕ຺ຕາໂຣ ຈາ’’ຕິ? ‘‘ອິຈ຺ເຉຍ຺ຍາຫໍ, ຠຄວາ [ອິຈ຺ເຉຍ຺ຍາຫໍ ຠນ຺ເຕ ຠຄວາ (ສ຺ຍາ.)] ຍາວຕິກາ ສາວຕ຺ຖິຍາ ມນຸສ຺ສາ ຕາວຕິເກ ປຸຕ຺ເຕ ຈ ນຕ຺ຕາໂຣ ຈາ’’ຕິ.

‘‘ກີວພຫຸກາ ປນ, ວິສາເຂ, ສາວຕ຺ຖິຍາ ມນຸສ຺ສາ ເທວສິກໍ ກາລໍ ກໂຣນ຺ຕີ’’ຕິ? ‘‘ທສປິ, ຠນ຺ເຕ, ສາວຕ຺ຖິຍາ ມນຸສ຺ສາ ເທວສິກໍ ກາລໍ ກໂຣນ຺ຕິ; ນວປິ, ຠນ຺ເຕ… ອຏ຺ຐປິ, ຠນ຺ເຕ… ສຕ຺ຕປິ, ຠນ຺ເຕ… ຉປິ, ຠນ຺ເຕ… ປຎ຺ຈປິ, ຠນ຺ເຕ… ຈຕ຺ຕາໂຣປິ, ຠນ຺ເຕ… ຕີຓິປິ, ຠນ຺ເຕ… ທ຺ເວປິ, ຠນ຺ເຕ, ສາວຕ຺ຖິຍາ ມນຸສ຺ສາ ເທວສິກໍ ກາລໍ ກໂຣນ຺ຕິ. ເອໂກປິ, ຠນ຺ເຕ, ສາວຕ຺ຖິຍາ ມນຸສ຺ໂສ ເທວສິກໍ ກາລໍ ກໂຣຕິ. ອວິວິຕ຺ຕາ, ຠນ຺ເຕ, ສາວຕ຺ຖິ ມນຸສ຺ເສຫິ ກາລໍ ກໂຣນ຺ເຕຫີ’’ຕິ.

‘‘ຕໍ ກິໍ ມຎ຺ຎສິ, ວິສາເຂ, ອປິ ນຸ ຕ຺ວໍ ກທາຈິ ກຣຫຈິ ອນລ຺ລວຕ຺ຖາ ວາ ຠເວຍ຺ຍາສິ ອນລ຺ລເກສາ ວາ’’ຕິ? ‘‘ໂນ ເຫຕໍ, ຠນ຺ເຕ. ອລໍ ເມ, ຠນ຺ເຕ, ຕາວ ພຫຸເກຫິ ປຸຕ຺ເຕຫິ ຈ ນຕ຺ຕາເຣຫິ ຈາ’’ຕິ.

‘‘ເຍສໍ ໂຂ, ວິສາເຂ, ສຕໍ ປິຍານິ, ສຕໍ ເຕສໍ ທຸກ຺ຂານິ; ເຍສໍ ນວຸຕິ ປິຍານິ, ນວຸຕິ ເຕສໍ ທຸກ຺ຂານິ; ເຍສໍ ອສີຕິ ປິຍານິ, ອສີຕິ ເຕສໍ ທຸກ຺ຂານິ; ເຍສໍ ສຕ຺ຕຕິ ປິຍານິ, ສຕ຺ຕຕິ ເຕສໍ ທຸກ຺ຂານິ; ເຍສໍ ສຏ຺ຐິ ປິຍານິ, ສຏ຺ຐິ ເຕສໍ ທຸກ຺ຂານິ; ເຍສໍ ປຎ຺ຎາສໍ ປິຍານິ, ປຎ຺ຎາສໍ ເຕສໍ ທຸກ຺ຂານິ; ເຍສໍ ຈຕ຺ຕາຣີສໍ ປິຍານິ, ຈຕ຺ຕາຣີສໍ ເຕສໍ ທຸກ຺ຂານິ, ເຍສໍ ຕິໍສໍ ປິຍານິ, ຕິໍສໍ ເຕສໍ ທຸກ຺ຂານິ; ເຍສໍ ວີສຕິ ປິຍານິ, ວີສຕິ ເຕສໍ ທຸກ຺ຂານິ, ເຍສໍ ທສ ປິຍານິ, ທສ ເຕສໍ ທຸກ຺ຂານິ; ເຍສໍ ນວ ປິຍານິ, ນວ ເຕສໍ ທຸກ຺ຂານິ; ເຍສໍ ອຏ຺ຐ ປິຍານິ, ອຏ຺ຐ ເຕສໍ ທຸກ຺ຂານິ; ເຍສໍ ສຕ຺ຕ ປິຍານິ, ສຕ຺ຕ ເຕສໍ ທຸກ຺ຂານິ; ເຍສໍ ຉ ປິຍານິ, ຉ ເຕສໍ ທຸກ຺ຂານິ; ເຍສໍ ປຎ຺ຈ ປິຍານິ, ປຎ຺ຈ ເຕສໍ ທຸກ຺ຂານິ; ເຍສໍ ຈຕ຺ຕາຣິ ປິຍານິ, ຈຕ຺ຕາຣິ ເຕສໍ ທຸກ຺ຂານິ; ເຍສໍ ຕີຓິ ປິຍານິ, ຕີຓິ ເຕສໍ ທຸກ຺ຂານິ; ເຍສໍ ທ຺ເວ ປິຍານິ, ທ຺ເວ ເຕສໍ ທຸກ຺ຂານິ; ເຍສໍ ເອກໍ ປິຍໍ, ເອກໍ ເຕສໍ ທຸກ຺ຂໍ; ເຍສໍ ນຕ຺ຖິ ປິຍໍ, ນຕ຺ຖິ ເຕສໍ ທຸກ຺ຂໍ, ອໂສກາ ເຕ ວິຣຊາ ອນຸປາຍາສາຕິ ວທາມີ’’ຕິ.

ອຖ ໂຂ ຠຄວາ ເອຕມຕ຺ຖໍ ວິທິຕ຺ວາ ຕາຍໍ ເວລາຍໍ ອິມໍ ອຸທານໍ ອຸທາເນສິ –

‘‘ເຍ ເກຈິ ໂສກາ ປຣິເທວິຕາ ວາ,

ທຸກ຺ຂາ ຈ [ທຸກ຺ຂາ ວ (ອຏ຺ຐ.)] ໂລກສ຺ມິມເນກຣູປາ;

ປິຍໍ ປຏິຈ຺ຈປ຺ປຠວນ຺ຕິ ເອເຕ,

ປິເຍ ອສນ຺ເຕ ນ ຠວນ຺ຕິ ເອເຕ.

‘‘ຕສ຺ມາ ຫິ ເຕ ສຸຂິໂນ ວີຕໂສກາ,

ເຍສໍ ປິຍໍ ນຕ຺ຖິ ກຸຫິຎ຺ຈິ ໂລເກ;

ຕສ຺ມາ ອໂສກໍ ວິຣຊໍ ປຕ຺ຖຍາໂນ,

ປິຍໍ ນ ກຍິຣາຖ ກຸຫິຎ຺ຈິ ໂລເກ’’ຕິ. ອຏ຺ຐມໍ;