໑. ວຑ຺ຒມາຕຸເຖຣີຄາຖາ

໒໐໔. ‘‘ມາ ສຸ ເຕ ວຑ຺ຒ ໂລກມ຺ຫິ, ວນໂຖ ອາຫຸ ກຸທາຈນໍ;

ມາ ປຸຕ຺ຕກ ປຸນປ຺ປຸນໍ, ອຫຸ ທຸກ຺ຂສ຺ສ ຠາຄິມາ.

໒໐໕. ‘‘ສຸຂຎ຺ຫິ ວຑ຺ຒ ມຸນໂຍ, ອເນຊາ ຉິນ຺ນສໍສຍາ;

ສີຕິຠູຕາ ທມປ຺ປຕ຺ຕາ, ວິຫຣນ຺ຕິ ອນາສວາ.

໒໐໖. ‘‘ເຕຫານຸຈິຓ຺ຓໍ ອິສີຠິ, ມຄ຺ຄໍ ທສ຺ສນປຕ຺ຕິຍາ;

ທຸກ຺ຂສ຺ສນ຺ຕກິຣິຍາຍ, ຕ຺ວໍ ວຑ຺ຒ ອນຸພ຺ຣູຫຍ’’.

໒໐໗. ‘‘ວິສາຣທາວ ຠຓສິ, ເອຕມຕ຺ຖໍ ຊເນຕ຺ຕິ ເມ;

ມຎ຺ຎາມິ ນູນ ມາມິເກ, ວນໂຖ ເຕ ນ ວິຊ຺ຊຕິ’’.

໒໐໘. ‘‘ເຍ ເກຈິ ວຑ຺ຒ ສງ຺ຂາຣາ, ຫີນາ ອຸກ຺ກຏ຺ຐມຊ຺ຌິມາ;

ອຓູປິ ອຓຸມຕ຺ໂຕປິ, ວນໂຖ ເມ ນ ວິຊ຺ຊຕິ.

໒໐໙. ‘‘ສພ຺ເພ ເມ ອາສວາ ຂີຓາ, ອປ຺ປມຕ຺ຕສ຺ສ ຌາຍໂຕ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ’’.

໒໑໐. ‘‘ອຸຬາຣໍ ວຕ ເມ ມາຕາ, ປໂຕທໍ ສມວສ຺ສຣິ;

ປຣມຕ຺ຖສຎ຺ຫິຕາ ຄາຖາ, ຍຖາປິ ອນຸກມ຺ປິກາ.

໒໑໑. ‘‘ຕສ຺ສາຫໍ ວຈນໍ ສຸຕ຺ວາ, ອນຸສິຏ຺ຐິໍ ຊເນຕ຺ຕິຍາ;

ຘມ຺ມສໍເວຄມາປາທິໍ, ໂຍຄກ຺ເຂມສ຺ສ ປຕ຺ຕິຍາ.

໒໑໒. ‘‘ໂສຫໍ ປຘານປຫິຕຕ຺ໂຕ, ຣຕ຺ຕິນ຺ທິວມຕນ຺ທິໂຕ;

ມາຕຣາ ໂຈທິໂຕ ສນ຺ໂຕ, ອຜຸສິໍ ສນ຺ຕິມຸຕ຺ຕມໍ’’.

… ວຑ຺ຒມາຕາ ເຖຣີ….

ນວກນິປາໂຕ ນິຏ຺ຐິໂຕ.