໑. ສຸຠາຊີວກມ຺ພວນິກາເຖຣີຄາຖາ

໓໖໘. ຊີວກມ຺ພວນໍ ຣມ຺ມໍ, ຄຈ຺ຉນ຺ຕິໍ ຠິກ຺ຂຸນິໍ ສຸຠໍ;

ຘຸຕ຺ຕໂກ ສນ຺ນິວາເຣສິ [ຕໍ ນິວາເຣສິ (ກ.)], ຕເມນໍ ອພ຺ຣວີ ສຸຠາ.

໓໖໙. ‘‘ກິໍ ເຕ ອປຣາຘິຕໍ ມຍາ, ຍໍ ມໍ ໂອວຣິຍານ ຕິຏ຺ຐສິ;

ນ ຫິ ປພ຺ພຊິຕາຍ ອາວຸໂສ, ປຸຣິໂສ ສມ຺ຜຸສນາຍ ກປ຺ປຕິ.

໓໗໐. ‘‘ຄຣຸເກ ມມ ສຕ຺ຖຸສາສເນ, ຍາ ສິກ຺ຂາ ສຸຄເຕນ ເທສິຕາ;

ປຣິສຸທ຺ຘປທໍ ອນງ຺ຄຓໍ, ກິໍ ມໍ ໂອວຣິຍານ ຕິຏ຺ຐສິ.

໓໗໑. ‘‘ອາວິລຈິຕ຺ໂຕ ອນາວິລໍ, ສຣໂຊ ວີຕຣຊໍ ອນງ຺ຄຓໍ;

ສພ຺ພຕ຺ຖ ວິມຸຕ຺ຕມານສໍ, ກິໍ ມໍ ໂອວຣິຍານ ຕິຏ຺ຐສິ’’.

໓໗໒. ‘‘ທຫຣາ ຈ ອປາປິກາ ຈສິ, ກິໍ ເຕ ປພ຺ພຊ຺ຊາ ກຣິສ຺ສຕິ;

ນິກ຺ຂິປ ກາສາຍຈີວຣໍ, ເອຫິ ຣມາມ ສຸປຸປ຺ຜິເຕ [ຣມາມເສ ປຸປ຺ຜິເຕ (ສີ. ສ຺ຍາ.)] ວເນ.

໓໗໓. ‘‘ມຘຸຣຎ຺ຈ ປວນ຺ຕິ ສພ຺ພໂສ, ກຸສຸມຣເຊນ ສມຸຏ຺ຐິຕາ ທຸມາ;

ປຐມວສນ຺ໂຕ ສຸໂຂ ອຸຕຸ, ເອຫິ ຣມາມ ສຸປຸປ຺ຜິເຕ ວເນ.

໓໗໔. ‘‘ກຸສຸມິຕສິຂຣາ ຈ ປາທປາ, ອຠິຄຊ຺ຊນ຺ຕິວ ມາລຸເຕຣິຕາ;

ກາ ຕຸຍ຺ຫໍ ຣຕິ ຠວິສ຺ສຕິ, ຍທິ ເອກາ ວນໂມຄຫິສ຺ສສິ [ວນໂມຕຣິສ຺ສສິ (ສີ.), ວນໂມຄາຫິສ຺ສສິ (ສ຺ຍາ. ກ.)].

໓໗໕. ‘‘ວາຬມິຄສງ຺ຆເສວິຕໍ, ກຸຎ຺ຊຣມຕ຺ຕກເຣຓຸໂລຬິຕໍ;

ອສຫາຍິກາ ຄນ຺ຕຸມິຈ຺ຉສິ, ຣຫິຕໍ ຠິໍສນກໍ ມຫາວນໍ.

໓໗໖. ‘‘ຕປນີຍກຕາວ ຘີຕິກາ, ວິຈຣສິ ຈິຕ຺ຕລເຕວ ອຈ຺ຉຣາ;

ກາສິກສຸຂຸເມຫິ ວຄ຺ຄຸຠິ, ໂສຠສີ ສຸວສເນຫິ ນູປເມ.

໓໗໗. ‘‘ອຫໍ ຕວ ວສານຸໂຄ ສິຍໍ, ຍທິ ວິຫເຣມເສ [ຍທິປິ ວິຫເຣສິ (ກ.)] ການນນ຺ຕເຣ;

ນ ຫິ ມຕ຺ຖິ ຕຍາ ປິຍຕ຺ຕໂຣ, ປາໂຓ ກິນ຺ນຣິມນ຺ທໂລຈເນ.

໓໗໘. ‘‘ຍທິ ເມ ວຈນໍ ກຣິສ຺ສສິ, ສຸຂິຕາ ເອຫິ ອຄາຣມາວສ;

ປາສາທນິວາຕວາສິນີ, ປຣິກມ຺ມໍ ເຕ ກໂຣນ຺ຕຸ ນາຣິໂຍ.

໓໗໙. ‘‘ກາສິກສຸຂຸມານິ ຘາຣຍ, ອຠິໂຣເປຫິ [ອຠິໂຣເຫຫິ (ສີ.)] ຈ ມາລວຓ຺ຓກໍ;

ກຎ຺ຈນມຓິມຸຕ຺ຕກໍ ພຫຸໍ, ວິວິຘໍ ອາຠຣຓໍ ກໂຣມິ ເຕ.

໓໘໐. ‘‘ສຸໂຘຕຣຊປຈ຺ຉທໍ ສຸຠໍ, ໂຄຓກຕູລິກສນ຺ຖຕໍ ນວໍ;

ອຠິຣຸຫ ສຍນໍ ມຫາຣຫໍ, ຈນ຺ທນມຓ຺ຑິຕສາຣຄນ຺ຘິກໍ;

໓໘໑. ‘‘ອຸປ຺ປລໍ ຈຸທກາ ສມຸຄ຺ຄຕໍ, ຍຖາ ຕໍ ອມນຸສ຺ສເສວິຕໍ;

ເອວໍ ຕ຺ວໍ ພ຺ຣຫ຺ມຈາຣິນີ, ສເກສງ຺ເຄສຸ ຊຣໍ ຄມິສ຺ສສິ’’.

໓໘໒. ‘‘ກິໍ ເຕ ອິຘ ສາຣສມ຺ມຕໍ, ກຸຓປປູຣມ຺ຫິ ສຸສານວຑ຺ຒເນ;

ເຠທນຘມ຺ເມ ກເຬວເຣ [ກເລວເຣ (ສີ. ກ.)], ຍໍ ທິສ຺ວາ ວິມໂນ ອຸທິກ຺ຂສິ’’.

໓໘໓. ‘‘ອກ຺ຂີນິ ຈ ຕຸຣິຍາຣິວ, ກິນ຺ນຣິຍາຣິວ ປພ຺ພຕນ຺ຕເຣ;

ຕວ ເມ ນຍນານິ ທກ຺ຂິຍ, ຠິຍ຺ໂຍ ກາມຣຕີ ປວຑ຺ຒຕິ.

໓໘໔. ‘‘ອຸປ຺ປລສິຂໂຣປມານິ ເຕ, ວິມເລ ຫາຏກສນ຺ນິເຠ ມຸເຂ;

ຕວ ເມ ນຍນານິ ທກ຺ຂິຍ [ນຍນານຸທິກ຺ຂິຍ (ສີ.)], ຠິຍ຺ໂຍ ກາມຄຸໂຓ ປວຑ຺ຒຕິ.

໓໘໕. ‘‘ອປິ ທູຣຄຕາ ສຣມ຺ຫເສ, ອາຍຕປມ຺ເຫ ວິສຸທ຺ຘທສ຺ສເນ;

ນ ຫິ ມຕ຺ຖິ ຕຍາ ປິຍຕ຺ຕຣາ, ນຍນາ ກິນ຺ນຣິມນ຺ທໂລຈເນ’’.

໓໘໖. ‘‘ອປເຖນ ປຍາຕຸມິຈ຺ຉສິ, ຈນ຺ທໍ ກີຬນກໍ ຄເວສສິ;

ເມຣຸໍ ລງ຺ເຆຕຸມິຈ຺ຉສິ, ໂຍ ຕ຺ວໍ ພຸທ຺ຘສຸຕໍ ມຄ຺ຄຍສິ.

໓໘໗. ‘‘ນຕ຺ຖິ ຫິ ໂລເກ ສເທວເກ, ຣາໂຄ ຍຕ຺ຖປິ ທານິ ເມ ສິຍາ;

ນປິ ນໍ ຊານາມິ ກີຣິໂສ, ອຖ ມຄ຺ເຄນ ຫໂຕ ສມູລໂກ.

໓໘໘. ‘‘ອິງ຺ຄາລກຸຍາວ [ອິງ຺ຆາຬຂຸຍາວ (ສ຺ຍາ.)] ອຸຊ຺ຌິໂຕ, ວິສປຕ຺ໂຕຣິວ ອຄ຺ຄິໂຕ ກໂຕ [ອຄ຺ຆໂຕ ຫໂຕ (ສີ.)];

ນປິ ນໍ ປສ຺ສາມິ ກີຣິໂສ, ອຖ ມຄ຺ເຄນ ຫໂຕ ສມູລໂກ.

໓໘໙. ‘‘ຍສ຺ສາ ສິຍາ ອປຈ຺ຈເວກ຺ຂິຕໍ, ສຕ຺ຖາ ວາ ອນຸປາສິໂຕ ສິຍາ;

ຕ຺ວໍ ຕາທິສິກໍ ປໂລຠຍ, ຊານນ຺ຕິໍ ໂສ ອິມໍ ວິຫຎ຺ຎສິ.

໓໙໐. ‘‘ມຍ຺ຫຎ຺ຫິ ອກ຺ກຸຏ຺ຐວນ຺ທິເຕ, ສຸຂທຸກ຺ເຂ ຈ ສຕີ ອຸປຏ຺ຐິຕາ;

ສງ຺ຂຕມສຸຠນ຺ຕິ ຊານິຍ, ສພ຺ພຕ຺ເຖວ ມໂນ ນ ລິມ຺ປຕິ.

໓໙໑. ‘‘ສາຫໍ ສຸຄຕສ຺ສ ສາວິກາ, ມຄ຺ຄຏ຺ຐງ຺ຄິກຍານຍາຍິນີ;

ອຸທ຺ຘຏສລ຺ລາ ອນາສວາ, ສຸຎ຺ຎາຄາຣຄຕາ ຣມາມຫໍ.

໓໙໒. ‘‘ທິຏ຺ຐາ ຫິ ມຍາ ສຸຈິຕ຺ຕິຕາ, ໂສມ຺ຠາ ທາຣຸກປິລ຺ລການິ ວາ;

ຕນ຺ຕີຫິ ຈ ຂີລເກຫິ ຈ, ວິນິພທ຺ຘາ ວິວິຘໍ ປນຈ຺ຈກາ.

໓໙໓. ‘‘ຕມ຺ຫຸທ຺ຘເຏ ຕນ຺ຕິຂີລເກ, ວິສ຺ສຏ຺ເຐ ວິກເລ ປຣິກ຺ຣິເຕ [ປຣິປກ຺ຂີເຕ (ສີ.), ປຣິປກ຺ກເຕ (ສ຺ຍາ.)];

ນ ວິນ຺ເທຍ຺ຍ ຂຓ຺ຑໂສ ກເຕ, ກິມ຺ຫິ ຕຕ຺ຖ ມນໍ ນິເວສເຍ.

໓໙໔. ‘‘ຕຖູປມາ ເທຫການິ ມໍ, ເຕຫິ ຘມ຺ເມຫິ ວິນາ ນ ວຕ຺ຕນ຺ຕິ;

ຘມ຺ເມຫິ ວິນາ ນ ວຕ຺ຕຕິ, ກິມ຺ຫິ ຕຕ຺ຖ ມນໍ ນິເວສເຍ.

໓໙໕. ‘‘ຍຖາ ຫຣິຕາເລນ ມກ຺ຂິຕໍ, ອທ຺ທສ ຈິຕ຺ຕິກໍ ຠິຕ຺ຕິຍາ ກຕໍ;

ຕມ຺ຫິ ເຕ ວິປຣີຕທສ຺ສນໍ, ສຎ຺ຎາ ມານຸສິກາ ນິຣຕ຺ຖິກາ.

໓໙໖. ‘‘ມາຍໍ ວິຍ ອຄ຺ຄໂຕ ກຕໍ, ສຸປິນນ຺ເຕວ ສຸວຓ຺ຓປາທປໍ;

ອຸປຄຈ຺ຉສິ ອນ຺ຘ ຣິຕ຺ຕກໍ, ຊນມຊ຺ເຌຣິວ ຣຸປ຺ປຣູປກໍ [ຣູປຣູປກໍ (ກ.)].

໓໙໗. ‘‘ວຏ຺ຏນິຣິວ ໂກຏໂຣຫິຕາ, ມຊ຺ເຌ ປຸພ຺ພຸຬກາ ສອສ຺ສຸກາ;

ປີຬໂກຬິກາ ເຈຕ຺ຖ ຊາຍຕິ, ວິວິຘາ ຈກ຺ຂຸວິຘາ ຈ ປິຓ຺ຑິຕາ’’.

໓໙໘. ອຸປ຺ປາຏິຍ ຈາຣຸທສ຺ສນາ, ນ ຈ ປຊ຺ຊິຕ຺ຖ ອສງ຺ຄມານສາ;

‘‘ຫນ຺ທ ເຕ ຈກ຺ຂຸໍ ຫຣສ຺ສຸ ຕໍ’’, ຕສ຺ສ ນຣສ຺ສ ອທາສິ ຕາວເທ.

໓໙໙. ຕສ຺ສ ຈ ວິຣມາສິ ຕາວເທ, ຣາໂຄ ຕຕ຺ຖ ຂມາປຍີ ຈ ນໍ;

‘‘ໂສຕ຺ຖິ ສິຍາ ພ຺ຣຫ຺ມຈາຣິນີ, ນ ປຸໂນ ເອທິສກໍ ຠວິສ຺ສຕິ’’.

໔໐໐. ‘‘ອາສາທິຍ [ອາຫນິຍ (ສ຺ຍາ. ກ.)] ເອທິສໍ ຊນໍ, ອຄ຺ຄິໍ ປຊ຺ຊລິຕໍ ວ ລິງ຺ຄິຍ;

ຄຓ຺ຫິຍ ອາສີວິສໍ ວິຍ, ອປິ ນຸ ໂສຕ຺ຖິ ສິຍາ ຂເມຫິ ໂນ’’.

໔໐໑. ມຸຕ຺ຕາ ຈ ຕໂຕ ສາ ຠິກ຺ຂຸນີ, ອຄມີ ພຸທ຺ຘວຣສ຺ສ ສນ຺ຕິກໍ;

ປສ຺ສິຍ ວຣປຸຎ຺ຎລກ຺ຂຓໍ, ຈກ຺ຂຸ ອາສິ ຍຖາ ປຸຣາຓກນ຺ຕິ.

… ສຸຠາ ຊີວກມ຺ພວນິກາ ເຖຣີ….

ຕິໍສນິປາໂຕ ນິຏ຺ຐິໂຕ.