໑. ອຸປ຺ປລວຓ຺ຓາເຖຣີຄາຖາ

໒໒໔. ‘‘ອຸໂຠ ມາຕາ ຈ ຘີຕາ ຈ, ມຍໍ ອາສຸໍ [ອາຠຸໍ (ສີ.)] ສປຕ຺ຕິໂຍ;

ຕສ຺ສາ ເມ ອຫຸ ສໍເວໂຄ, ອພ຺ຠຸໂຕ ໂລມຫໍສໂນ.

໒໒໕. ‘‘ຘິຣຕ຺ຖຸ ກາມາ ອສຸຈີ, ທຸຄ຺ຄນ຺ຘາ ພຫຸກຓ຺ຏກາ;

ຍຕ຺ຖ ມາຕາ ຈ ຘີຕາ ຈ, ສຠຣິຍາ ມຍໍ ອຫຸໍ.

໒໒໖. ‘‘ກາເມສ຺ວາທີນວໍ ທິສ຺ວາ, ເນກ຺ຂມ຺ມໍ ທຏ຺ຐຸ ເຂມໂຕ;

ສາ ປພ຺ພຊ຺ຊິໍ ຣາຊຄເຫ, ອຄາຣສ຺ມານຄາຣິຍໍ.

໒໒໗. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸໍ ວິໂສຘິຕໍ;

ເຈໂຕປຣິຈ຺ຈຎາຓຎ຺ຈ, ໂສຕຘາຕຸ ວິໂສຘິຕາ.

໒໒໘. ‘‘ອິທ຺ຘີປິ ເມ ສຈ຺ຉິກຕາ, ປຕ຺ໂຕ ເມ ອາສວກ຺ຂໂຍ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ.

໒໒໙. ‘‘ອິທ຺ຘິຍາ ອຠິນິມ຺ມິຕ຺ວາ, ຈຕຸຣສ຺ສໍ ຣຖໍ ອຫໍ;

ພຸທ຺ຘສ຺ສ ປາເທ ວນ຺ທິຕ຺ວາ, ໂລກນາຖສ຺ສ ຕາທິໂນ’’ [ສິຣີມໂຕ (ສ຺ຍາ. ກ.)].

໒໓໐. ‘‘ສຸປຸປ຺ຜິຕຄ຺ຄໍ ອຸປຄມ຺ມ ປາທປໍ, ເອກາ ຕຸວໍ ຕິຏ຺ຐສິ ສາລມູເລ [ຣຸກ຺ຂມູເລ (ສ຺ຍາ. ກ.)];

ນ ຈາປິ ເຕ ທຸຕິໂຍ ອຕ຺ຖິ ໂກຈິ, ນ ຕ຺ວໍ ພາເລ ຠາຍສິ ຘຸຕ຺ຕການໍ’’.

໒໓໑. ‘‘ສຕໍ ສຫສ຺ສານິປິ ຘຸຕ຺ຕການໍ, ສມາຄຕາ ເອທິສກາ ຠເວຍ຺ຍຸໍ;

ໂລມໍ ນ ອິຎ຺ເຊ ນປິ ສມ຺ປເວເຘ, ກິໍ ເມ ຕຸວໍ ມາຣ ກຣິສ຺ສເສໂກ.

໒໓໒. ‘‘ເອສາ ອນ຺ຕຣຘາຍາມິ, ກຸຈ຺ຉິໍ ວາ ປວິສາມິ ເຕ;

ຠມຸກນ຺ຕເຣ ຕິຏ຺ຐາມິ, ຕິຏ຺ຐນ຺ຕິໍ ມໍ ນ ທກ຺ຂສິ.

໒໓໓. ‘‘ຈິຕ຺ຕມ຺ຫິ ວສີຠູຕາຫໍ, ອິທ຺ຘິປາທາ ສຸຠາວິຕາ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ.

໒໓໔. ‘‘ສຕ຺ຕິສູລູປມາ ກາມາ, ຂນ຺ຘາສໍ ອຘິກຸຏ຺ຏນາ;

ຍໍ ຕ຺ວໍ ‘ກາມຣຕິໍ’ ພ຺ຣູສິ, ‘ອຣຕີ’ ທານິ ສາ ມມ.

໒໓໕. ‘‘ສພ຺ພຕ຺ຖ ວິຫຕາ ນນ຺ທີ, ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກາ’’ຕິ.

… ອຸປ຺ປລວຓ຺ຓາ ເຖຣີ….

ທ຺ວາທສນິປາໂຕ ນິຏ຺ຐິໂຕ.