໑. ເອກກນິປາໂຕ

໑. ອຎ຺ຎຕຣາເຖຣີຄາຖາ

໑. ‘‘ສຸຂໍ ສຸປາຫິ ເຖຣິເກ, ກຕ຺ວາ ໂຈເຬນ ປາຣຸຕາ;

ອຸປສນ຺ໂຕ ຫິ ເຕ ຣາໂຄ, ສຸກ຺ຂຑາກໍ ວ ກຸມ຺ຠິຍ’’ນ຺ຕິ.

ອິຕ຺ຖໍ ສຸທໍ ອຎ຺ຎຕຣາ ເຖຣີ ອປຎ຺ຎາຕາ ຠິກ຺ຂຸນີ ຄາຖໍ ອຠາສິຕ຺ຖາຕິ.

໒. ມຸຕ຺ຕາເຖຣີຄາຖາ

໒. ‘‘ມຸຕ຺ເຕ ມຸຈ຺ຈສ຺ສຸ ໂຍເຄຫິ, ຈນ຺ໂທ ຣາຫຸຄ຺ຄຫາ ອິວ;

ວິປ຺ປມຸຕ຺ເຕນ ຈິຕ຺ເຕນ, ອນຓາ ຠຸຎ຺ຊ ປິຓ຺ຑກ’’ນ຺ຕິ.

ອິຕ຺ຖໍ ສຸທໍ ຠຄວາ ມຸຕ຺ຕໍ ສິກ຺ຂມານໍ ອິມາຍ ຄາຖາຍ ອຠິຓ຺ຫໍ ໂອວທຕີຕິ.

໓. ປຸຓ຺ຓາເຖຣີຄາຖາ

໓. ‘‘ປຸຓ຺ເຓ ປູຣສ຺ສຸ ຘມ຺ເມຫິ, ຈນ຺ໂທ ປນ຺ນຣເສຣິວ;

ປຣິປຸຓ຺ຓາຍ ປຎ຺ຎາຍ, ຕໂມຂນ຺ຘໍ [ຕໂມກ຺ຂນ຺ຘໍ (ສີ. ສ຺ຍາ.)] ປທາລຍາ’’ຕິ.

ອິຕ຺ຖໍ ສຸທໍ ປຸຓ຺ຓາ ເຖຣີ ຄາຖໍ ອຠາສິຕ຺ຖາຕິ.

໔. ຕິສ຺ສາເຖຣີຄາຖາ

໔. ‘‘ຕິສ຺ເສ ສິກ຺ຂສ຺ສຸ ສິກ຺ຂາຍ, ມາ ຕໍ ໂຍຄາ ອຸປຈ຺ຈຄຸໍ;

ສພ຺ພໂຍຄວິສໍຍຸຕ຺ຕາ, ຈຣ ໂລເກ ອນາສວາ’’ຕິ.

… ຕິສ຺ສາ ເຖຣີ….

໕. ອຎ຺ຎຕຣາຕິສ຺ສາເຖຣີຄາຖາ

໕. ‘‘ຕິສ຺ເສ ຍຸຎ຺ຊສ຺ສຸ ຘມ຺ເມຫິ, ຂໂຓ ຕໍ ມາ ອຸປຈ຺ຈຄາ;

ຂຓາຕີຕາ ຫິ ໂສຈນ຺ຕິ, ນິຣຍມ຺ຫິ ສມປ຺ປິຕາ’’ຕິ.

… ອຎ຺ຎຕຣາ ຕິສ຺ສາ ເຖຣີ….

໖. ຘີຣາເຖຣີຄາຖາ

໖. ‘‘ຘີເຣ ນິໂຣຘໍ ຜຸເສຫິ [ຜຸສ຺ເສຫິ (ສີ.)], ສຎ຺ຎາວູປສມໍ ສຸຂໍ;

ອາຣາຘຍາຫິ ນິພ຺ພານໍ, ໂຍຄກ຺ເຂມມນຸຕ຺ຕຣ’’ນ຺ຕິ [ໂຍຄກ຺ເຂມໍ ອນຸຕ຺ຕຣນ຺ຕິ (ສີ. ສ຺ຍາ.)].

… ຘີຣາ ເຖຣີ….

໗. ວີຣາເຖຣີຄາຖາ

໗. ‘‘ວີຣາ ວີເຣຫິ [ຘີຣາ ຘີເຣຫິ (ກ.)] ຘມ຺ເມຫິ, ຠິກ຺ຂຸນີ ຠາວິຕິນ຺ທ຺ຣິຍາ;

ຘາເຣຫິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫິນິ’’ນ຺ຕິ [ສວາຫນນ຺ຕິ (ກ.)].

… ວີຣາ ເຖຣີ….

໘. ມິຕ຺ຕາເຖຣີຄາຖາ

໘. ‘‘ສທ຺ຘາຍ ປພ຺ພຊິຕ຺ວານ, ມິຕ຺ເຕ ມິຕ຺ຕຣຕາ ຠວ;

ຠາເວຫິ ກຸສເລ ຘມ຺ເມ, ໂຍຄກ຺ເຂມສ຺ສ ປຕ຺ຕິຍາ’’ຕິ.

… ມິຕ຺ຕາ ເຖຣີ….

໙. ຠທ຺ຣາເຖຣີຄາຖາ

໙. ‘‘ສທ຺ຘາຍ ປພ຺ພຊິຕ຺ວານ, ຠທ຺ເຣ ຠທ຺ຣຣຕາ ຠວ;

ຠາເວຫິ ກຸສເລ ຘມ຺ເມ, ໂຍຄກ຺ເຂມມນຸຕ຺ຕຣ’’ນ຺ຕິ.

… ຠທ຺ຣາ ເຖຣີ….

໑໐. ອຸປສມາເຖຣີຄາຖາ

໑໐. ‘‘ອຸປສເມ ຕເຣ ໂອຆໍ, ມຈ຺ຈຸເຘຍ຺ຍໍ ສຸທຸຕ຺ຕຣໍ;

ຘາເຣຫິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນ’’ນ຺ຕິ.

… ອຸປສມາ ເຖຣີ….

໑໑. ມຸຕ຺ຕາເຖຣີຄາຖາ

໑໑. ‘‘ສຸມຸຕ຺ຕາ ສາຘຸມຸຕ຺ຕາມ຺ຫິ, ຕີຫິ ຂຸຊ຺ເຊຫິ ມຸຕ຺ຕິຍາ;

ອຸທຸກ຺ຂເລນ ມຸສເລນ, ປຕິນາ ຂຸຊ຺ຊເກນ ຈ;

ມຸຕ຺ຕາມ຺ຫິ ຊາຕິມຣຓາ, ຠວເນຕ຺ຕິ ສມູຫຕາ’’ຕິ.

… ມຸຕ຺ຕາ ເຖຣີ….

໑໒. ຘມ຺ມທິນ຺ນາເຖຣີຄາຖາ

໑໒. ‘‘ຉນ຺ທຊາຕາ ອວສາຍີ, ມນສາ ຈ ຜຸຏາ [ຜຸຏ຺ຐາ (ສ຺ຍາ.), ຜຸຐາ (ສີ. ອຏ຺ຐ.)] ສິຍາ;

ກາເມສຸ ອປ຺ປຏິພທ຺ຘຈິຕ຺ຕາ [ອປ຺ປຏິພນ຺ຘຈິຕ຺ຕາ (ກ.)], ອຸທ຺ຘໍໂສຕາຕິ ວຸຈ຺ຈຕີ’’ຕິ [ອຸທ຺ຘໍໂສຕາ ວິມຸຈ຺ຈຕີຕິ (ສີ. ປີ.)].

… ຘມ຺ມທິນ຺ນາ ເຖຣີ….

໑໓.ວິສາຂາເຖຣີຄາຖາ

໑໓. ‘‘ກໂຣຖ ພຸທ຺ຘສາສນໍ, ຍໍ ກຕ຺ວາ ນານຸຕປ຺ປຕິ;

ຂິປ຺ປໍ ປາທານິ ໂຘວິຕ຺ວາ, ເອກມນ຺ເຕ ນິສີທຖາ’’ຕິ.

… ວິສາຂາ ເຖຣີ….

໑໔.ສຸມນາເຖຣີຄາຖາ

໑໔. ‘‘ຘາຕຸໂຍ ທຸກ຺ຂໂຕ ທິສ຺ວາ, ມາ ຊາຕິໍ ປຸນຣາຄມິ;

ຠເວ ຉນ຺ທໍ ວິຣາເຊຕ຺ວາ, ອຸປສນ຺ຕາ ຈຣິສ຺ສສີ’’ຕິ.

… ສຸມນາ ເຖຣີ….

໑໕. ອຸຕ຺ຕຣາເຖຣີຄາຖາ

໑໕. ‘‘ກາເຍນ ສໍວຸຕາ ອາສິໍ, ວາຈາຍ ອຸທ ເຈຕສາ;

ສມູລໍ ຕຓ຺ຫມພ຺ພຸຍ຺ຫ, ສີຕິຠູຕາມ຺ຫິ ນິພ຺ພຸຕາ’’ຕິ.

… ອຸຕ຺ຕຣາ ເຖຣີ….

໑໖. ວຸຑ຺ຒປພ຺ພຊິຕສຸມນາເຖຣີຄາຖາ

໑໖. ‘‘ສຸຂໍ ຕ຺ວໍ ວຸຑ຺ຒິເກ ເສຫິ, ກຕ຺ວາ ໂຈເຬນ ປາຣູຕາ;

ອຸປສນ຺ໂຕ ຫິ ເຕ ຣາໂຄ, ສີຕິຠູຕາສິ ນິພ຺ພຸຕາ’’ຕິ.

… ສຸມນາ ວຸຑ຺ຒປພ຺ພຊິຕາ ເຖຣີ….

໑໗. ຘມ຺ມາເຖຣີຄາຖາ

໑໗. ‘‘ປິຓ຺ຑປາຕໍ ຈຣິຕ຺ວານ, ທຓ຺ຑໂມລຸພ຺ຠ ທຸພ຺ພລາ;

ເວຘມາເນຫິ ຄຕ຺ເຕຫິ, ຕຕ຺ເຖວ ນິປຕິໍ ຉມາ;

ທິສ຺ວາ ອາທີນວໍ ກາເຍ, ອຖ ຈິຕ຺ຕໍ ວິມຸຈ຺ຈິ ເມ’’ຕິ.

… ຘມ຺ມາ ເຖຣີ….

໑໘. ສງ຺ຆາເຖຣີຄາຖາ

໑໘. ‘‘ຫິຕ຺ວາ ຆເຣ ປພ຺ພຊິຕ຺ວາ [ປພ຺ພຊິຕາ (ສີ. ອຏ຺ຐ.)], ຫິຕ຺ວາ ປຸຕ຺ຕໍ ປສຸໍ ປິຍໍ;

ຫິຕ຺ວາ ຣາຄຎ຺ຈ ໂທສຎ຺ຈ, ອວິຊ຺ຊຎ຺ຈ ວິຣາຊິຍ;

ສມູລໍ ຕຓ຺ຫມພ຺ພຸຍ຺ຫ, ອຸປສນ຺ຕາມ຺ຫິ ນິພ຺ພຸຕາ’’ຕິ.

… ສງ຺ຆາ ເຖຣີ….

ເອກກນິປາໂຕ ນິຏ຺ຐິໂຕ.