໗. ກຏຈ຺ຉຸຠິກ຺ຂາທາຍິກາເຖຣີອປທານໍ

໖໐. ‘‘ປິຓ຺ຑຈາຣໍ ຈຣນ຺ຕສ຺ສ, ຕິສ຺ສນາມສ຺ສ ສຕ຺ຖຸໂນ;

ກຏຈ຺ຉຸຠິກ຺ຂໍ ປຄ຺ຄຍ຺ຫ, ພຸທ຺ຘເສຏ຺ຐສ຺ສ ທາສຫໍ.

໖໑. ‘‘ປຏິຄ຺ຄເຫຕ຺ວາ ສມ຺ພຸທ຺ໂຘ, ຕິສ຺ໂສ ໂລກຄ຺ຄນາຍໂກ;

ວີຖິຍາ ສຓ຺ຐິໂຕ ສຕ຺ຖາ, ອກາ ເມ ອນຸໂມທນໍ.

໖໒. ‘‘‘ກຏຈ຺ຉຸຠິກ຺ຂໍ ທຕ຺ວານ, ຕາວຕິໍສໍ ຄມິສ຺ສສິ;

ຉຕ຺ຕິໍສເທວຣາຊູນໍ, ມເຫສິຕ຺ຕໍ ກຣິສ຺ສສິ.

໖໓. ‘‘‘ປຎ຺ຎາສໍ ຈກ຺ກວຕ຺ຕີນໍ, ມເຫສິຕ຺ຕໍ ກຣິສ຺ສສິ;

ມນສາ ປຕ຺ຖິຕໍ ສພ຺ພໍ, ປຏິລຈ຺ຉສິ ສພ຺ພທາ.

໖໔. ‘‘‘ສມ຺ປຕ຺ຕິໍ ອນຸໂຠຕ຺ວານ, ປພ຺ພຊິສ຺ສສິກິຎ຺ຈນາ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສສິນາສວາ’.

໖໕. ‘‘ອິທໍ ວຕ຺ວານ ສມ຺ພຸທ຺ໂຘ, ຕິສ຺ໂສ ໂລກຄ຺ຄນາຍໂກ;

ນຠໍ ອພ຺ຠຸຄ຺ຄມີ ວີໂຣ, ຫໍສຣາຊາວ ອມ຺ພເຣ.

໖໖. ‘‘ສຸທິນ຺ນໍ ເມ ທານວຣໍ [ສຸທິນ຺ນເມວ ເມ ທານໍ (ສ຺ຍາ.)], ສຸຍິຏ຺ຐາ ຍາຄສມ຺ປທາ;

ກຏຈ຺ຉຸຠິກ຺ຂໍ ທຕ຺ວານ, ປຕ຺ຕາຫໍ ອຈລໍ ປທໍ.

໖໗. ‘‘ທ຺ເວນວຸເຕ ອິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ຠິກ຺ຂາທານສ຺ສິທໍ ຜລໍ.

໖໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໖໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໗໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ກຏຈ຺ຉຸຠິກ຺ຂາທາຍິກາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ກຏຈ຺ຉຸຠິກ຺ຂາທາຍິກາເຖຣິຍາປທານໍ ສຕ຺ຕມໍ.