໑. ສຸເມຘາເຖຣີອປທານໍ

ອຖ ເຖຣິກາປທານານິ ສຸຓາຖ –

໑. ‘‘ຠຄວຕິ ໂກຓາຄມເນ, ສງ຺ຆາຣາມມ຺ຫິ ນວນິເວສນມ຺ຫິ [ນິເວສມ຺ຫິ (ສ຺ຍາ.)];

ສຂິໂຍ ຕິສ຺ໂສ ຊນິໂຍ, ວິຫາຣທານໍ ອທາສິມ຺ຫ.

໒. ‘‘ທສກ຺ຂຕ຺ຕຸໍ ສຕກ຺ຂຕ຺ຕຸໍ, ທສສຕກ຺ຂຕ຺ຕຸໍ ສຕານຎ຺ຈ ສຕກ຺ຂຕ຺ຕຸໍ [ສຕານິ ຈ ສຕ຺ຕກ຺ຂຕ຺ຕຸໍ (ສີ. ກ.)];

ເທເວສຸ ອຸປປຊ຺ຊິມ຺ຫ, ໂກ ວາໂທ ມານຸເສ ຠເວ.

໓. ‘‘ເທເວ ມຫິທ຺ຘິກາ ອຫຸມ຺ຫ, ມານຸສກມ຺ຫິ ໂກ ວາໂທ;

ສຕ຺ຕຣຕນມເຫສີ [ສຕ຺ຕຣຕນສ຺ສ ມເຫສີ (ສີ. ປີ.)], ອິຕ຺ຖິຣຕນໍ ອຫໍ ຠວິໍ.

໔. ‘‘ອິຘ ສຎ຺ຈິຕກຸສລາ [ຕຕ຺ຖ ສຎ຺ຈິຕໍ ກຸສລໍ (ສ຺ຍາ.)], ສຸສມິທ຺ຘກຸລປ຺ປຊາ;

ຘນຎ຺ຊານີ ຈ ເຂມາ ຈ, ອຫມ຺ປິ ຈ ຕໂຍ ຊນາ.

໕. ‘‘ອາຣາມໍ ສຸກຕໍ ກຕ຺ວາ, ສພ຺ພາວຍວມຓ຺ຑິຕໍ;

ພຸທ຺ຘປ຺ປມຸຂສງ຺ຆສ຺ສ, ນິຍ຺ຍາເທຕ຺ວາ ສໂມທິຕາ.

໖. ‘‘ຍຕ຺ຖ ຍຕ຺ຖູປປຊ຺ຊາມິ, ຕສ຺ສ ກມ຺ມສ຺ສ ວາຫສາ;

ເທເວສຸ ອຄ຺ຄຕໍ ປຕ຺ຕາ, ມນຸສ຺ເສສຸ ຕເຖວ ຈ.

໗. ‘‘ອິມສ຺ມິໍເຍວ ກປ຺ປມ຺ຫິ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໘. ‘‘ອຸປຏ຺ຐາໂກ ມເຫສິສ຺ສ, ຕທາ ອາສິ ນຣິສ຺ສໂຣ;

ກາສິຣາຊາ ກິກີ ນາມ, ພາຣາຓສິປຸຣຸຕ຺ຕເມ.

໙. ‘‘ຕສ຺ສາສຸໍ ສຕ຺ຕ ຘີຕໂຣ, ຣາຊກຎ຺ຎາ ສຸເຂຘິຕາ [ສຸເຂຖິຕາ (ສ຺ຍາ.)];

ພຸທ຺ໂຘປຏ຺ຐານນິຣຕາ, ພ຺ຣຫ຺ມຈຣິຍໍ ຈຣິໍສຸ ຕາ.

໑໐. ‘‘ຕາສໍ ສຫາຍິກາ ຫຸຕ຺ວາ, ສີເລສຸ ສຸສມາຫິຕາ;

ທຕ຺ວາ ທານານິ ສກ຺ກຈ຺ຈໍ, ອຄາເຣວ ວຕໍ [ອຄາເຣວ ວຕ຺ຕໍ (ສ຺ຍາ.)] ຈຣິໍ.

໑໑. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສູປຄາ ອຫໍ.

໑໒. ‘‘ຕໂຕ ຈຸຕາ ຍາມມຄໍ [ຍາມສຄ຺ຄໍ (ສ຺ຍາ.)], ຕໂຕຫໍ ຕຸສິຕໍ ຄຕາ;

ຕໂຕ ຈ ນິມ຺ມານຣຕິໍ, ວສວຕ຺ຕິປຸຣໍ ຕໂຕ.

໑໓. ‘‘ຍຕ຺ຖ ຍຕ຺ຖູປປຊ຺ຊາມິ, ປຸຎ຺ຎກມ຺ມສໂມຫິຕາ;

ຕຕ຺ຖ ຕຕ຺ເຖວ ຣາຊູນໍ, ມເຫສິຕ຺ຕມກາຣຍິໍ.

໑໔. ‘‘ຕໂຕ ຈຸຕາ ມນຸສ຺ສຕ຺ເຕ, ຣາຊູນໍ ຈກ຺ກວຕ຺ຕິນໍ;

ມຓ຺ຑລີນຎ຺ຈ ຣາຊູນໍ, ມເຫສິຕ຺ຕມກາຣຍິໍ.

໑໕. ‘‘ສມ຺ປຕ຺ຕິມນຸໂຠຕ຺ວານ, ເທເວສຸ ມານຸເສສຸ ຈ;

ສພ຺ພຕ຺ຖ ສຸຂິຕາ ຫຸຕ຺ວາ, ເນກຊາຕີສຸ ສໍສຣິໍ.

໑໖. ‘‘ໂສ ເຫຕຸ ຈ ໂສ ປຠໂວ, ຕມ຺ມູລໍ ສາສເນ ຂມໍ [ຕມ຺ມູລໍ ສາ ຈ ສາສເນ ຂນ຺ຕິ (ສີ. ປີ. ກ.)];

ປຐມໍ ຕໍ ສໂມຘານໍ, ຕໍ ຘມ຺ມຣຕາຍ ນິພ຺ພານໍ [ນິພ຺ພຸຕໍ (ສ຺ຍາ.)].

໑໗. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາຄີວ ພນ຺ຘນໍ ເຉຕ຺ວາ, ວິຫຣາມິ ອນາສວາ.

໑໘. ‘‘ສ຺ວາຄຕໍ ວຕ ເມ ອາສິ, ມມ ພຸທ຺ຘສ຺ສ [ພຸທ຺ຘເສຏ຺ຐສ຺ສ (ສີ. ສ຺ຍາ. ກ.)] ສນ຺ຕິເກ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໑໙. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ສຸເມຘາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ສຸເມຘາເຖຣິຍາປທານໍ ປຐມໍ.