໖. ອຸປສີວມາຓວປຸຈ຺ຉາ

໑໐໗໕. ‘‘ເອໂກ ອຫໍ ສກ຺ກ ມຫນ຺ຕໂມຆໍ, (ອິຈ຺ຈາຍສ຺ມາ ອຸປສີໂວ)

ອນິສ຺ສິໂຕ ໂນ ວິສຫາມິ ຕາຣິຕຸໍ;

ອາຣມ຺ມຓໍ ພ຺ຣູຫິ ສມນ຺ຕຈກ຺ຂຸ, ຍໍ ນິສ຺ສິໂຕ ໂອຆມິມໍ ຕເຣຍ຺ຍໍ’’.

໑໐໗໖. ‘‘ອາກິຎ຺ຈຎ຺ຎໍ ເປກ຺ຂມາໂນ ສຕິມາ, (ອຸປສີວາຕິ ຠຄວາ)

ນຕ຺ຖີຕິ ນິສ຺ສາຍ ຕຣສ຺ສຸ ໂອຆໍ;

ກາເມ ປຫາຍ ວິຣໂຕ ກຖາຫິ, ຕຓ຺ຫກ຺ຂຍໍ ນຕ຺ຕມຫາຠິປສ຺ສ’’ [ຣຕ຺ຕມຫາຠິປສ຺ສ (ສ຺ຍາ.), ຣຕ຺ຕມຫໍ ວິປສ຺ສ (ກ.)].

໑໐໗໗. ‘‘ສພ຺ເພສຸ ກາເມສຸ ໂຍ ວີຕຣາໂຄ, (ອິຈ຺ຈາຍສ຺ມາ ອຸປສີໂວ)

ອາກິຎ຺ຈຎ຺ຎໍ ນິສ຺ສິໂຕ ຫິຕ຺ວາ ມຎ຺ຎໍ;

ສຎ຺ຎາວິໂມກ຺ເຂ ປຣເມ ວິມຸຕ຺ໂຕ [ຘິມຸຕ຺ໂຕ (ກ.)], ຕິຏ຺ເຐ ນຸ ໂສ ຕຕ຺ຖ ອນານຸຍາຍີ’’ [ອນານຸວາຍີ (ສ຺ຍາ. ກ.)].

໑໐໗໘. ‘‘ສພ຺ເພສຸ ກາເມສຸ ໂຍ ວີຕຣາໂຄ, (ອຸປສີວາຕິ ຠຄວາ)

ອາກິຎ຺ຈຎ຺ຎໍ ນິສ຺ສິໂຕ ຫິຕ຺ວາ ມຎ຺ຎໍ;

ສຎ຺ຎາວິໂມກ຺ເຂ ປຣເມ ວິມຸຕ຺ໂຕ, ຕິຏ຺ເຐຍ຺ຍ ໂສ ຕຕ຺ຖ ອນານຸຍາຍີ’’.

໑໐໗໙. ‘‘ຕິຏ຺ເຐ ເຈ ໂສ ຕຕ຺ຖ ອນານຸຍາຍີ, ປູຄມ຺ປິ ວສ຺ສານໍ ສມນ຺ຕຈກ຺ຂຸ;

ຕຕ຺ເຖວ ໂສ ສີຕິສິຍາ ວິມຸຕ຺ໂຕ, ຈເວຖ ວິຎ຺ຎາຓໍ ຕຖາວິຘສ຺ສ’’.

໑໐໘໐. ‘‘ອຈ຺ຈີ ຍຖາ ວາຕເວເຄນ ຂິຕ຺ຕາ [ຂິຕ຺ຕໍ (ສ຺ຍາ.), ຂິຕ຺ໂຕ (ປີ.)], (ອຸປສີວາຕິ ຠຄວາ)

ອຕ຺ຖໍ ປເລຕິ ນ ອຸເປຕິ ສງ຺ຂໍ;

ເອວໍ ມຸນີ ນາມກາຍາ ວິມຸຕ຺ໂຕ, ອຕ຺ຖໍ ປເລຕິ ນ ອຸເປຕິ ສງ຺ຂໍ’’.

໑໐໘໑. ‘‘ອຕ຺ຖງ຺ຄໂຕ ໂສ ອຸທ ວາ ໂສ ນຕ຺ຖິ, ອຸທາຫຸ ເວ ສສ຺ສຕິຍາ ອໂຣໂຄ;

ຕໍ ເມ ມຸນີ ສາຘຸ ວິຍາກໂຣຫິ, ຕຖາ ຫິ ເຕ ວິທິໂຕ ເອສ ຘມ຺ໂມ’’.

໑໐໘໒. ‘‘ອຕ຺ຖງ຺ຄຕສ຺ສ ນ ປມາຓມຕ຺ຖິ, (ອຸປສີວາຕິ ຠຄວາ)

ເຍນ ນໍ ວຊ຺ຊຸໍ ຕໍ ຕສ຺ສ ນຕ຺ຖິ;

ສພ຺ເພສຸ ຘມ຺ເມສຸ ສມູຫເຕສຸ, ສມູຫຕາ ວາທປຖາປິ ສພ຺ເພ’’ຕິ.

ອຸປສີວມາຓວປຸຈ຺ຉາ ຉຏ຺ຐີ ນິຏ຺ຐິຕາ.