໔. ເມຕ຺ຕຄູມາຓວປຸຈ຺ຉາ

໑໐໕໕. ‘‘ປຸຈ຺ຉາມິ ຕໍ ຠຄວາ ພ຺ຣູຫິ ເມ ຕໍ, (ອິຈ຺ຈາຍສ຺ມາ ເມຕ຺ຕຄູ)

ມຎ຺ຎາມິ ຕໍ ເວທຄຸໍ ຠາວິຕຕ຺ຕໍ;

ກຸໂຕ ນຸ ທຸກ຺ຂາ ສມຸທາຄຕາ ອິເມ, ເຍ ເກຈິ ໂລກສ຺ມິມເນກຣູປາ’’.

໑໐໕໖. ‘‘ທຸກ຺ຂສ຺ສ ເວ ມໍ ປຠວໍ ອປຸຈ຺ຉສິ, (ເມຕ຺ຕຄູຕິ ຠຄວາ)

ຕໍ ເຕ ປວກ຺ຂາມິ ຍຖາ ປຊານໍ;

ອຸປຘິນິທານາ ປຠວນ຺ຕິ ທຸກ຺ຂາ, ເຍ ເກຈິ ໂລກສ຺ມິມເນກຣູປາ.

໑໐໕໗. ‘‘ໂຍ ເວ ອວິທ຺ວາ ອຸປຘິໍ ກໂຣຕິ, ປຸນປ຺ປຸນໍ ທຸກ຺ຂມຸເປຕິ ມນ຺ໂທ;

ຕສ຺ມາ ປຊານໍ ອຸປຘິໍ ນ ກຍິຣາ, ທຸກ຺ຂສ຺ສ ຊາຕິປ຺ປຠວານຸປສ຺ສີ’’.

໑໐໕໘. ‘‘ຍໍ ຕໍ ອປຸຈ຺ຉິມ຺ຫ ອກິຕ຺ຕຍີ ໂນ, ອຎ຺ຎໍ ຕໍ ປຸຈ຺ຉາມ [ປຸຈ຺ຉາມິ (ສີ. ປີ.)] ຕທິງ຺ຆ ພ຺ຣູຫິ;

ກຖໍ ນຸ ຘີຣາ ວິຕຣນ຺ຕິ ໂອຆໍ, ຊາຕິໍ ຊຣໍ ໂສກປຣິທ຺ທວຎ຺ຈ;

ຕໍ ເມ ມຸນິ ສາຘຸ ວິຍາກໂຣຫິ, ຕຖາ ຫິ ເຕ ວິທິໂຕ ເອສ ຘມ຺ໂມ’’.

໑໐໕໙. ‘‘ກິຕ຺ຕຍິສ຺ສາມິ ເຕ ຘມ຺ມໍ, (ເມຕ຺ຕຄູຕິ ຠຄວາ)

ທິຏ຺ເຐ ຘມ຺ເມ ອນີຕິຫໍ;

ຍໍ ວິທິຕ຺ວາ ສໂຕ ຈຣໍ, ຕເຣ ໂລເກ ວິສຕ຺ຕິກໍ’’.

໑໐໖໐. ‘‘ຕຎ຺ຈາຫໍ ອຠິນນ຺ທາມິ, ມເຫສິ ຘມ຺ມມຸຕ຺ຕມໍ;

ຍໍ ວິທິຕ຺ວາ ສໂຕ ຈຣໍ, ຕເຣ ໂລເກ ວິສຕ຺ຕິກໍ’’.

໑໐໖໑. ‘‘ຍໍ ກິຎ຺ຈິ ສມ຺ປຊານາສິ, (ເມຕ຺ຕຄູຕິ ຠຄວາ)

ອຸທ຺ຘໍ ອໂຘ ຕິຣິຍຎ຺ຈາປິ ມຊ຺ເຌ;

ເອເຕສຸ ນນ຺ທິຎ຺ຈ ນິເວສນຎ຺ຈ, ປນຸຊ຺ຊ ວິຎ຺ຎາຓໍ ຠເວ ນ ຕິຏ຺ເຐ.

໑໐໖໒. ‘‘ເອວໍວິຫາຣີ ສໂຕ ອປ຺ປມຕ຺ໂຕ, ຠິກ຺ຂຸ ຈຣໍ ຫິຕ຺ວາ ມມາຍິຕານິ;

ຊາຕິໍ ຊຣໍ ໂສກປຣິທ຺ທວຎ຺ຈ, ອິເຘວ ວິທ຺ວາ ປຊເຫຍ຺ຍ ທຸກ຺ຂໍ’’.

໑໐໖໓. ‘‘ເອຕາຠິນນ຺ທາມິ ວໂຈ ມເຫສິໂນ, ສຸກິຕ຺ຕິຕໍ ໂຄຕມນູປຘີກໍ;

ອທ຺ຘາ ຫິ ຠຄວາ ປຫາສິ ທຸກ຺ຂໍ, ຕຖາ ຫິ ເຕ ວິທິໂຕ ເອສ ຘມ຺ໂມ.

໑໐໖໔. ‘‘ເຕ ຈາປິ ນູນປ຺ປຊເຫຍ຺ຍຸ ທຸກ຺ຂໍ, ເຍ ຕ຺ວໍ ມຸນິ ອຏ຺ຐິຕໍ ໂອວເທຍ຺ຍ;

ຕໍ ຕໍ ນມສ຺ສາມິ ສເມຈ຺ຈ ນາຄ, ອປ຺ເປວ ມໍ ຠຄວາ ອຏ຺ຐິຕໍ ໂອວເທຍ຺ຍ’’.

໑໐໖໕. ‘‘ຍໍ ພ຺ຣາຫ຺ມຓໍ ເວທຄຸມາຠິຊຎ຺ຎາ, ອກິຎ຺ຈນໍ ກາມຠເວ ອສຕ຺ຕໍ;

ອທ຺ຘາ ຫິ ໂສ ໂອຆມິມໍ ອຕາຣິ, ຕິຓ຺ໂຓ ຈ ປາຣໍ ອຂິໂລ ອກງ຺ໂຂ.

໑໐໖໖. ‘‘ວິທ຺ວາ ຈ ໂຍ [ໂສ (ສີ. ສ຺ຍາ. ປີ.)] ເວທຄູ ນໂຣ ອິຘ, ຠວາຠເວ ສງ຺ຄມິມໍ ວິສຊ຺ຊ;

ໂສ ວີຕຕຓ຺ໂຫ ອນີໂຆ ນິຣາໂສ, ອຕາຣິ ໂສ ຊາຕິຊຣນ຺ຕິ ພ຺ຣູມີ’’ຕິ.

ເມຕ຺ຕຄູມາຓວປຸຈ຺ຉາ ຈຕຸຕ຺ຖີ ນິຏ຺ຐິຕາ.