໑໖. ປິງ຺ຄິຍມາຓວປຸຈ຺ຉາ

໑໑໒໖. ‘‘ຊິຓ຺ໂຓຫມສ຺ມິ ອພໂລ ວີຕວຓ຺ໂຓ, (ອິຈ຺ຈາຍສ຺ມາ ປິງ຺ຄິໂຍ)

ເນຕ຺ຕາ ນ ສຸທ຺ຘາ ສວນໍ ນ ຜາສຸ;

ມາຫໍ ນສ຺ສໍ ໂມມຸໂຫ ອນ຺ຕຣາວ

ອາຈິກ຺ຂ ຘມ຺ມໍ ຍມຫໍ ວິຊຎ຺ຎໍ;

ຊາຕິຊຣາຍ ອິຘ ວິປ຺ປຫານໍ’’.

໑໑໒໗. ‘‘ທິສ຺ວານ ຣູເປສຸ ວິຫຎ຺ຎມາເນ, (ປິງ຺ຄິຍາຕິ ຠຄວາ)

ຣຸປ຺ປນ຺ຕິ ຣູເປສຸ ຊນາ ປມຕ຺ຕາ;

ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕ,

ຊຫສ຺ສຸ ຣູປໍ ອປຸນພ຺ຠວາຍ’’.

໑໑໒໘. ‘‘ທິສາ ຈຕສ຺ໂສ ວິທິສາ ຈຕສ຺ໂສ, ອຸທ຺ຘໍ ອໂຘ ທສ ທິສາ ອິມາໂຍ;

ນ ຕຸຍ຺ຫໍ ອທິຏ຺ຐໍ ອສຸຕໍ ອມຸຕໍ [ອສຸຕໍ ອມຸຕໍ ວາ (ສີ.), ອສຸຕາມຸຕໍ ວາ (ສ຺ຍາ.), ອສຸຕໍ’ມຸຕໍ ວາ (ປີ.)], ອໂຖ ອວິຎ຺ຎາຕໍ ກິຎ຺ຈນມຕ຺ຖິ [ກິຎ຺ຈິ ມຕ຺ຖິ (ສ຺ຍາ.), ກິຎ຺ຈິ ນຕ຺ຖິ (ປີ.), ກິຎ຺ຈິນມຕ຺ຖິ (ກ.)] ໂລເກ;

ອາຈິກ຺ຂ ຘມ຺ມໍ ຍມຫໍ ວິຊຎ຺ຎໍ, ຊາຕິຊຣາຍ ອິຘ ວິປ຺ປຫານໍ’’.

໑໑໒໙. ‘‘ຕຓ຺ຫາຘິປນ຺ເນ ມນຸເຊ ເປກ຺ຂມາໂນ, (ປິງ຺ຄິຍາຕິ ຠຄວາ)

ສນ຺ຕາປຊາເຕ ຊຣສາ ປເຣເຕ;

ຕສ຺ມາ ຕຸວໍ ປິງ຺ຄິຍ ອປ຺ປມຕ຺ໂຕ, ຊຫສ຺ສຸ ຕຓ຺ຫໍ ອປຸນພ຺ຠວາຍາ’’ຕິ.

ປິງ຺ຄິຍມາຓວປຸຈ຺ຉາ ໂສຬສມາ ນິຏ຺ຐິຕາ.

ປາຣາຍນຕ຺ຖຸຕິຄາຖາ

ອິທມໂວຈ ຠຄວາ ມຄເຘສຸ ວິຫຣນ຺ໂຕ ປາສາຓເກ ເຈຕິເຍ, ປຣິຈາຣກໂສຬສານໍ [ປຣິຈາຣກໂສຬສນ຺ນໍ (ສ຺ຍາ. ກ.)] ພ຺ຣາຫ຺ມຓານໍ ອຊ຺ຌິຏ຺ໂຐ ປຸຏ຺ໂຐ ປຸຏ຺ໂຐ ປຎ຺ຫໍ [ປຎ຺ເຫ (ສີ. ປີ.)] ພ຺ຍາກາສິ. ເອກເມກສ຺ສ ເຈປິ ປຎ຺ຫສ຺ສ ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມໍ ປຏິປຊ຺ເຊຍ຺ຍ, ຄຈ຺ເຉຍ຺ເຍວ ຊຣາມຣຓສ຺ສ ປາຣໍ. ປາຣງ຺ຄມນີຍາ ອິເມ ຘມ຺ມາຕິ, ຕສ຺ມາ ອິມສ຺ສ ຘມ຺ມປຣິຍາຍສ຺ສ ປາຣາຍນນ຺ເຕວ [ປາຣາຍຓໍຕ຺ເວວ (ສີ. ອຏ຺ຐ.)] ອຘິວຈນໍ.

໑໑໓໐. ອຊິໂຕ ຕິສ຺ສເມຕ຺ເຕຍ຺ໂຍ, ປຸຓ຺ຓໂກ ອຖ ເມຕ຺ຕຄູ;

ໂຘຕໂກ ອຸປສີໂວ ຈ, ນນ຺ໂທ ຈ ອຖ ເຫມໂກ.

໑໑໓໑. ໂຕເທຍ຺ຍ-ກປ຺ປາ ທຸຠໂຍ, ຊຕຸກຓ຺ຓີ ຈ ປຓ຺ຑິໂຕ;

ຠທ຺ຣາວຸໂຘ ອຸທໂຍ ຈ, ໂປສາໂລ ຈາປິ ພ຺ຣາຫ຺ມໂຓ;

ໂມຆຣາຊາ ຈ ເມຘາວີ, ປິງ຺ຄິໂຍ ຈ ມຫາອິສິ.

໑໑໓໒. ເອເຕ ພຸທ຺ຘໍ ອຸປາຄຈ຺ຉຸໍ, ສມ຺ປນ຺ນຈຣຓໍ ອິສິໍ;

ປຸຈ຺ຉນ຺ຕາ ນິປຸເຓ ປຎ຺ເຫ, ພຸທ຺ຘເສຏ຺ຐໍ ອຸປາຄມຸໍ.

໑໑໓໓. ເຕສໍ ພຸທ຺ໂຘ ປພ຺ຍາກາສິ, ປຎ຺ເຫ ປຸຏ຺ໂຐ ຍຖາຕຖໍ;

ປຎ຺ຫານໍ ເວຍ຺ຍາກຣເຓນ, ໂຕເສສິ ພ຺ຣາຫ຺ມເຓ ມຸນິ.

໑໑໓໔. ເຕ ໂຕສິຕາ ຈກ຺ຂຸມຕາ, ພຸທ຺ເຘນາທິຈ຺ຈພນ຺ຘຸນາ;

ພ຺ຣຫ຺ມຈຣິຍມຈຣິໍສຸ, ວຣປຎ຺ຎສ຺ສ ສນ຺ຕິເກ.

໑໑໓໕. ເອກເມກສ຺ສ ປຎ຺ຫສ຺ສ, ຍຖາ ພຸທ຺ເຘນ ເທສິຕໍ;

ຕຖາ ໂຍ ປຏິປຊ຺ເຊຍ຺ຍ, ຄຈ຺ເຉ ປາຣໍ ອປາຣໂຕ.

໑໑໓໖. ອປາຣາ ປາຣໍ ຄຈ຺ເຉຍ຺ຍ, ຠາເວນ຺ໂຕ ມຄ຺ຄມຸຕ຺ຕມໍ;

ມຄ຺ໂຄ ໂສ ປາຣໍ ຄມນາຍ, ຕສ຺ມາ ປາຣາຍນໍ ອິຕິ.

ປາຣາຍນານຸຄີຕິຄາຖາ

໑໑໓໗. ‘‘ປາຣາຍນມນຸຄາຍິສ຺ສໍ, (ອິຈ຺ຈາຍສ຺ມາ ປິງ຺ຄິໂຍ)

ຍຖາທ຺ທກ຺ຂິ ຕຖາກ຺ຂາສິ, ວິມໂລ ຠູຣິເມຘໂສ;

ນິກ຺ກາໂມ ນິພ຺ພໂນ [ນິພ຺ພຸໂຕ (ສ຺ຍາ.)] ນາໂຄ, ກິສ຺ສ ເຫຕຸ ມຸສາ ຠເຓ.

໑໑໓໘. ‘‘ປຫີນມລໂມຫສ຺ສ, ມານມກ຺ຂປ຺ປຫາຍິໂນ;

ຫນ຺ທາຫໍ ກິຕ຺ຕຍິສ຺ສາມິ, ຄິຣໍ ວຓ຺ຓູປສຎ຺ຫິຕໍ.

໑໑໓໙. ‘‘ຕໂມນຸໂທ ພຸທ຺ໂຘ ສມນ຺ຕຈກ຺ຂຸ, ໂລກນ຺ຕຄູ ສພ຺ພຠວາຕິວຕ຺ໂຕ;

ອນາສໂວ ສພ຺ພທຸກ຺ຂປຫີໂນ, ສຈ຺ຈວ຺ຫໂຍ ພ຺ຣຫ຺ເມ ອຸປາສິໂຕ ເມ.

໑໑໔໐. ‘‘ທິໂຊ ຍຖາ ກຸພ຺ພນກໍ ປຫາຍ, ພຫຸປ຺ຜລໍ ການນມາວເສຍ຺ຍ;

ເອວໍ ປຫໍ ອປ຺ປທສ຺ເສ ປຫາຍ, ມໂຫທຘິໍ ຫໍໂສຣິວ ອຊ຺ຌປຕ຺ໂຕ.

໑໑໔໑. ‘‘ເຍເມ ປຸພ຺ເພ ວິຍາກໍສຸ, ຫຸຣໍ ໂຄຕມສາສນາ;

ອິຈ຺ຈາສິ ອິຕິ ຠວິສ຺ສຕິ;

ສພ຺ພໍ ຕໍ ອິຕິຫິຕິຫໍ, ສພ຺ພໍ ຕໍ ຕກ຺ກວຑ຺ຒນໍ.

໑໑໔໒. ‘‘ເອໂກ ຕມນຸທາສິໂນ, ຊຸຕິມາ ໂສ ປຠງ຺ກໂຣ;

ໂຄຕໂມ ຠູຣິປຎ຺ຎາໂຓ, ໂຄຕໂມ ຠູຣິເມຘໂສ.

໑໑໔໓. ‘‘ໂຍ ເມ ຘມ຺ມມເທເສສິ, ສນ຺ທິຏ຺ຐິກມກາລິກໍ;

ຕຓ຺ຫກ຺ຂຍມນີຕິກໍ, ຍສ຺ສ ນຕ຺ຖິ ອຸປມາ ກ຺ວຈິ’’.

໑໑໔໔. ‘‘ກິໍນຸ ຕມ຺ຫາ ວິປ຺ປວສສິ, ມຸຫຸຕ຺ຕມປິ ປິງ຺ຄິຍ;

ໂຄຕມາ ຠູຣິປຎ຺ຎາຓາ, ໂຄຕມາ ຠູຣິເມຘສາ.

໑໑໔໕. ‘‘ໂຍ ເຕ ຘມ຺ມມເທເສສິ, ສນ຺ທິຏ຺ຐິກມກາລິກໍ;

ຕຓ຺ຫກ຺ຂຍມນີຕິກໍ, ຍສ຺ສ ນຕ຺ຖິ ອຸປມາ ກ຺ວຈິ’’.

໑໑໔໖. ‘‘ນາຫໍ ຕມ຺ຫາ ວິປ຺ປວສາມິ, ມຸຫຸຕ຺ຕມປິ ພ຺ຣາຫ຺ມຓ;

ໂຄຕມາ ຠູຣິປຎ຺ຎາຓາ, ໂຄຕມາ ຠູຣິເມຘສາ.

໑໑໔໗. ‘‘ໂຍ ເມ ຘມ຺ມມເທເສສິ, ສນ຺ທິຏ຺ຐິກມກາລິກໍ;

ຕຓ຺ຫກ຺ຂຍມນີຕິກໍ, ຍສ຺ສ ນຕ຺ຖິ ອຸປມາ ກ຺ວຈິ.

໑໑໔໘. ‘‘ປສ຺ສາມິ ນໍ ມນສາ ຈກ຺ຂຸນາວ, ຣຕ຺ຕິນ຺ທິວໍ ພ຺ຣາຫ຺ມຓ ອປ຺ປມຕ຺ໂຕ;

ນມສ຺ສມາໂນ ວິວເສມິ ຣຕ຺ຕິໍ, ເຕເນວ ມຎ຺ຎາມິ ອວິປ຺ປວາສໍ.

໑໑໔໙. ‘‘ສທ຺ຘາ ຈ ປີຕິ ຈ ມໂນ ສຕິ ຈ, ນາເປນ຺ຕິ ເມ ໂຄຕມສາສນມ຺ຫາ;

ຍໍ ຍໍ ທິສໍ ວຊຕິ ຠູຣິປຎ຺ໂຎ, ສ ເຕນ ເຕເນວ ນໂຕຫມສ຺ມິ.

໑໑໕໐. ‘‘ຊິຓ຺ຓສ຺ສ ເມ ທຸພ຺ພລຖາມກສ຺ສ, ເຕເນວ ກາໂຍ ນ ປເລຕິ ຕຕ຺ຖ;

ສໍກປ຺ປຍນ຺ຕາຍ [ສໍກປ຺ປຍຕ຺ຕາຍ (ສີ.)] ວຊາມິ ນິຈ຺ຈໍ, ມໂນ ຫິ ເມ ພ຺ຣາຫ຺ມຓ ເຕນ ຍຸຕ຺ໂຕ.

໑໑໕໑. ‘‘ປງ຺ເກ ສຍາໂນ ປຣິຜນ຺ທມາໂນ, ທີປາ ທີປໍ ອຸປປ຺ລວິໍ [ອຸປລ຺ລວິໍ (ສ຺ຍາ. ນິທ຺ເທສ)];

ອຖທ຺ທສາສິໍ ສມ຺ພຸທ຺ຘໍ, ໂອຆຕິຓ຺ຓມນາສວໍ’’.

໑໑໕໒. ‘‘ຍຖາ ອຫູ ວກ຺ກລິ ມຸຕ຺ຕສທ຺ໂຘ, ຠທ຺ຣາວຸໂຘ ອາຬວິ ໂຄຕໂມ ຈ;

ເອວເມວ ຕ຺ວມ຺ປິ ປມຸຎ຺ຈສ຺ສຸ ສທ຺ຘໍ,

ຄມິສ຺ສສິ ຕ຺ວໍ ປິງ຺ຄິຍ ມຈ຺ຈຸເຘຍ຺ຍສ຺ສ ປາຣໍ’’ [ມຈ຺ຈຸເຘຍ຺ຍປາຣໍ (ສີ.)].

໑໑໕໓. ‘‘ເອສ ຠິຍ຺ໂຍ ປສີທາມິ, ສຸຕ຺ວານ ມຸນິໂນ ວໂຈ;

ວິວຏ຺ຏຈ຺ຉໂທ ສມ຺ພຸທ຺ໂຘ, ອຂິໂລ ປຏິຠານວາ.

໑໑໕໔. ‘‘ອຘິເທເວ ອຠິຎ຺ຎາຍ, ສພ຺ພໍ ເວທິ ວໂຣວຣໍ [ປໂຣ ວຣໍ (ສີ. ສ຺ຍາ.), ປໂຣ ປຣໍ (ນິທ຺ເທສ)];

ປຎ຺ຫານນ຺ຕກໂຣ ສຕ຺ຖາ, ກງ຺ຂີນໍ ປຏິຊານຕໍ.

໑໑໕໕. ‘‘ອສໍຫີຣໍ ອສງ຺ກຸປ຺ປໍ, ຍສ຺ສ ນຕ຺ຖິ ອຸປມາ ກ຺ວຈິ;

ອທ຺ຘາ ຄມິສ຺ສາມິ ນ ເມຕ຺ຖ ກງ຺ຂາ, ເອວໍ ມໍ ຘາເຣຫິ ອຘິມຸຕ຺ຕຈິຕ຺ຕ’’ນ຺ຕິ.

ປາຣາຍນວຄ຺ໂຄ ປຎ຺ຈໂມ ນິຏ຺ຐິໂຕ.