໑໓. ອຸທຍມາຓວປຸຈ຺ຉາ

໑໑໑໑. ‘‘ຌາຍິໍ ວິຣຊມາສີນໍ, (ອິຈ຺ຈາຍສ຺ມາ ອຸທໂຍ) ກຕກິຈ຺ຈໍ ອນາສວໍ;

ປາຣຄຸໍ ສພ຺ພຘມ຺ມານໍ, ອຕ຺ຖິ ປຎ຺ເຫນ ອາຄມໍ;

ອຎ຺ຎາວິໂມກ຺ຂໍ ປພ຺ຣູຫິ, ອວິຊ຺ຊາຍ ປເຠທນໍ’’.

໑໑໑໒. ‘‘ປຫານໍ ກາມຈ຺ຉນ຺ທານໍ, (ອຸທຍາຕິ ຠຄວາ) ໂທມນສ຺ສານ ຈູຠຍໍ;

ຖິນສ຺ສ ຈ ປນູທນໍ, ກຸກ຺ກຸຈ຺ຈານໍ ນິວາຣຓໍ.

໑໑໑໓. ‘‘ອຸເປກ຺ຂາສຕິສໍສຸທ຺ຘໍ, ຘມ຺ມຕກ຺ກປຸເຣຊວໍ;

ອຎ຺ຎາວິໂມກ຺ຂໍ ປພ຺ຣູມິ, ອວິຊ຺ຊາຍ ປເຠທນໍ’’.

໑໑໑໔. ‘‘ກິໍສຸ ສໍໂຍຊໂນ ໂລໂກ, ກິໍສຸ ຕສ຺ສ ວິຈາຣຓໍ;

ກິສ຺ສສ຺ສ ວິປ຺ປຫາເນນ, ນິພ຺ພານໍ ອິຕິ ວຸຈ຺ຈຕິ’’.

໑໑໑໕. ‘‘ນນ຺ທິສໍໂຍຊໂນ ໂລໂກ, ວິຕກ຺ກສ຺ສ ວິຈາຣຓໍ;

ຕຓ຺ຫາຍ ວິປ຺ປຫາເນນ, ນິພ຺ພານໍ ອິຕິ ວຸຈ຺ຈຕິ’’.

໑໑໑໖. ‘‘ກຖໍ ສຕສ຺ສ ຈຣໂຕ, ວິຎ຺ຎາຓໍ ອຸປຣຸຊ຺ຌຕິ;

ຠຄວນ຺ຕໍ ປຸຏ຺ຐຸມາຄມ຺ມ, ຕໍ ສຸໂຓມ ວໂຈ ຕວ’’.

໑໑໑໗. ‘‘ອຊ຺ຌຕ຺ຕຎ຺ຈ ພຫິທ຺ຘາ ຈ, ເວທນໍ ນາຠິນນ຺ທໂຕ;

ເອວໍ ສຕສ຺ສ ຈຣໂຕ, ວິຎ຺ຎາຓໍ ອຸປຣຸຊ຺ຌຕີ’’ຕິ.

ອຸທຍມາຓວປຸຈ຺ຉາ ເຕຣສມາ ນິຏ຺ຐິຕາ.