໗. ຘນປາລເສຏ຺ຐິເປຕວຕ຺ຖຸ

໒໒໗. ‘‘ນຄ຺ໂຄ ທຸພ຺ພຓ຺ຓຣູໂປສິ, ກິໂສ ຘມນິສນ຺ຖໂຕ;

ອຸປ຺ຜາສຸລິໂກ ກິສິໂກ, ໂກ ນຸ ຕ຺ວມສິ ມາຣິສ’’.

໒໒໘. ‘‘ອຫໍ ຠທນ຺ເຕ ເປໂຕມ຺ຫິ, ທຸຄ຺ຄໂຕ ຍມໂລກິໂກ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄໂຕ’’.

໒໒໙. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສ ກມ຺ມວິປາເກນ, ເປຕໂລກໍ ອິໂຕ ຄໂຕ’’.

໒໓໐. ‘‘ນຄຣໍ ອຕ຺ຖິ ປຓ຺ຓານໍ [ທສນ຺ນານໍ (ສີ. ສ຺ຍາ. ປີ.)], ເອຣກຈ຺ຉນ຺ຕິ ວິສ຺ສຸຕໍ;

ຕຕ຺ຖ ເສຏ຺ຐິ ປຸເຣ ອາສິໍ, ຘນປາໂລຕິ ມໍ ວິທູ.

໒໓໑. ‘‘ອສີຕິ ສກຏວາຫານໍ, ຫິຣຎ຺ຎສ຺ສ ອໂຫສິ ເມ;

ປຫູຕໍ ເມ ຊາຕຣູປໍ, ມຸຕ຺ຕາ ເວຬຸຣິຍາ ພຫູ.

໒໓໒. ‘‘ຕາວ ມຫທ຺ຘນສ຺ສາປິ, ນ ເມ ທາຕຸໍ ປິຍໍ ອຫຸ;

ປິທຫິຕ຺ວາ ທ຺ວາຣໍ ຠຸຎ຺ຊິໍ [ຠຸຎ຺ຊາມິ (ສີ. ສ຺ຍາ.)], ມາ ມໍ ຍາຈນກາທ຺ທສຸໍ.

໒໓໓. ‘‘ອສ຺ສທ຺ໂຘ ມຈ຺ຉຣີ ຈາສິໍ, ກທຣິໂຍ ປຣິຠາສໂກ;

ທທນ຺ຕານໍ ກໂຣນ຺ຕານໍ, ວາຣຍິສ຺ສໍ ພຫຸ ຊເນ [ພຫຸຊ຺ຊນໍ (ສີ. ສ຺ຍາ.)].

໒໓໔. ‘‘ວິປາໂກ ນຕ຺ຖິ ທານສ຺ສ, ສໍຍມສ຺ສ ກຸໂຕ ຜລໍ;

ໂປກ຺ຂຣຎ຺ໂຎທປານານິ, ອາຣາມານິ ຈ ໂຣປິເຕ;

ປປາໂຍ ຈ ວິນາເສສິໍ, ທຸຄ຺ເຄ ສງ຺ກມນານິ ຈ.

໒໓໕. ‘‘ສ຺ວາຫໍ ອກຕກລ຺ຍາໂຓ, ກຕປາໂປ ຕໂຕ ຈຸໂຕ;

ອຸປປນ຺ໂນ ເປຕ຺ຕິວິສຍໍ, ຂຸປ຺ປິປາສສມປ຺ປິໂຕ.

໒໓໖. ‘‘ປຎ຺ຈປຓ຺ຓາສວສ຺ສານິ, ຍໂຕ ກາລງ຺ກໂຕ ອຫໍ;

ນາຠິຊານາມິ ຠຸຕ຺ຕໍ ວາ, ປີຕໍ ວາ ປນ ປານິຍໍ.

໒໓໗. ‘‘ໂຍ ສໍຍໂມ ໂສ ວິນາໂສ,ໂຍ ວິນາໂສ ໂສ ສໍຍໂມ;

ເປຕາ ຫິ ກິຣ ຊານນ຺ຕິ, ໂຍ ສໍຍໂມ ໂສ ວິນາໂສ.

໒໓໘. ‘‘ອຫໍ ປຸເຣ ສໍຍມິສ຺ສໍ, ນາທາສິໍ ພຫຸເກ ຘເນ;

ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກາສິມຕ຺ຕໂນ;

ສ຺ວາຫໍ ປຈ຺ຉານຸຕປ຺ປາມິ, ອຕ຺ຕກມ຺ມຜລູປໂຄ.

໒໓໙. [ເປ. ວ. ໖໙] ‘‘ອຸທ຺ຘໍ ຈຕູຫິ ມາເສຫິ, ກາລໍກິຣິຍາ ຠວິສ຺ສຕິ;

ເອກນ຺ຕກຏຸກໍ ໂຆຣໍ, ນິຣຍໍ ປປຕິສ຺ສຫໍ.

໒໔໐. [ເປ. ວ. ໗໐] ‘‘ຈຕຸກ຺ກຓ຺ຓໍ ຈຕຸທ຺ວາຣໍ, ວິຠຕ຺ຕໍ ຠາຄໂສ ມິຕໍ;

ອໂຍປາກາຣປຣິຍນ຺ຕໍ, ອຍສາ ປຏິກຸຊ຺ຊິຕໍ.

໒໔໑. [ເປ. ວ. ໗໑] ‘‘ຕສ຺ສ ອໂຍມຍາ ຠູມິ, ຊລິຕາ ເຕຊສາ ຍຸຕາ;

ສມນ຺ຕາ ໂຍຊນສຕໍ, ຜຣິຕ຺ວາ ຕິຏ຺ຐຕິ ສພ຺ພທາ.

໒໔໒. [ເປ. ວ. ໗໒] ‘‘ຕຕ຺ຖາຫໍ ທີຆມທ຺ຘານໍ, ທຸກ຺ຂໍ ເວທິສ຺ສ ເວທນໍ;

ຜລໍ ປາປສ຺ສ ກມ຺ມສ຺ສ, ຕສ຺ມາ ໂສຈາມຫໍ ຠຸສໍ.

໒໔໓. ‘‘ຕໍ ໂວ ວທາມິ ຠທ຺ທໍ ໂວ, ຍາວນ຺ເຕຕ຺ຖ ສມາຄຕາ;

ມາກຕ຺ຖ ປາປກໍ ກມ຺ມໍ, ອາວິ ວາ ຍທິ ວາ ຣໂຫ.

໒໔໔. ‘‘ສເຈ ຕໍ ປາປກໍ ກມ຺ມໍ, ກຣິສ຺ສຖ ກໂຣຖ ວາ;

ນ ໂວ ທຸກ຺ຂາ ປມຸຕ຺ຍຕ຺ຖິ [ປມຸຕ຺ຕຕ຺ຖິ (ສພ຺ພຕ຺ຖ) ອຸທາ. ໔໔ ປສ຺ສິຕພ຺ພໍ], ອຸປ຺ປຈ຺ຈາປິ [ອຸເປຈ຺ຈາປິ (ສ຺ຍາ. ກ.)] ປລາຍຕໍ.

໒໔໕. ‘‘ມຕ຺ເຕຍ຺ຍາ ໂຫຖ ເປຕ຺ເຕຍ຺ຍາ, ກຸເລ ເຊຏ຺ຐາປຈາຍິກາ;

ສາມຎ຺ຎາ ໂຫຖ ພ຺ຣຫ຺ມຎ຺ຎາ, ເອວໍ ສຄ຺ຄໍ ຄມິສ຺ສຖາ’’ຕິ.

ຘນປາລເສຏ຺ຐິເປຕວຕ຺ຖຸ ສຕ຺ຕມໍ.