໔. ນນ຺ທາເປຕິວຕ຺ຖຸ

໑໖໘. ‘‘ກາຬີ ທຸພ຺ພຓ຺ຓຣູປາສິ, ຜຣຸສາ ຠີຣຸທສ຺ສນາ;

ປິງ຺ຄລາສິ ກຬາຣາສິ, ນ ຕໍ ມຎ຺ຎາມິ ມານຸສິ’’ນ຺ຕິ.

໑໖໙. ‘‘ອຫໍ ນນ຺ທາ ນນ຺ທິເສນ, ຠຣິຍາ ເຕ ປຸເຣ ອຫຸໍ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ’’ຕິ.

໑໗໐. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສ ກມ຺ມວິປາເກນ, ເປຕໂລກໍ ອິໂຕ ຄຕາ’’ຕິ.

໑໗໑. ‘‘ຈຓ຺ຑີ ຈ ຜຣຸສາ ຈາສິໍ [ຈຓ຺ຑີ ຜຣຸສວາຈາ ຈ (ສີ.)], ຕຍິ ຈາປິ ອຄາຣວາ;

ຕາຫໍ ທຸຣຸຕ຺ຕໍ ວຕ຺ວານ, ເປຕໂລກໍ ອິໂຕ ຄຕາ’’ຕິ.

໑໗໒. ‘‘ຫນ຺ທຸຕ຺ຕຣີຍໍ ທທາມິ ເຕ, ອິມໍ [ອິທໍ (ສີ. ອຏ຺ຐ.)] ທຸສ຺ສໍ ນິວາສຍ;

ອິມໍ ທຸສ຺ສໍ ນິວາເສຕ຺ວາ, ເອຫິ ເນສ຺ສາມິ ຕໍ ຆຣໍ.

໑໗໓. ‘‘ວຕ຺ຖຎ຺ຈ ອນ຺ນປານຎ຺ຈ, ລຈ຺ຉສິ ຕ຺ວໍ ຆຣໍ ຄຕາ;

ປຸຕ຺ເຕ ຈ ເຕ ປສ຺ສິສ຺ສສິ, ສຸຓິສາໂຍ ຈ ທກ຺ຂສີ’’ຕິ.

໑໗໔. ‘‘ຫຕ຺ເຖນ ຫຕ຺ເຖ ເຕ ທິນ຺ນໍ, ນ ມຍ຺ຫໍ ອຸປກປ຺ປຕິ;

ຠິກ຺ຂູ ຈ ສີລສມ຺ປນ຺ເນ, ວີຕຣາເຄ ພຫຸສ຺ສຸເຕ.

໑໗໕. ‘‘ຕປ຺ເປຫິ ອນ຺ນປາເນນ, ມມ ທກ຺ຂິຓມາທິສ;

ຕທາຫໍ ສຸຂິຕາ ເຫສ຺ສໍ, ສພ຺ພກາມສມິທ຺ຘິນີ’’ຕິ.

໑໗໖. ສາຘູຕິ ໂສ ປຏິສ຺ສຸຕ຺ວາ, ທານໍ ວິປຸລມາກິຣິ;

ອນ຺ນໍ ປານໍ ຂາທນີຍໍ, ວຕ຺ຖເສນາສນານິ ຈ;

ຉຕ຺ຕໍ ຄນ຺ຘຎ຺ຈ ມາລຎ຺ຈ, ວິວິຘາ ຈ ອຸປາຫນາ.

໑໗໗. ຠິກ຺ຂູ ຈ ສີລສມ຺ປນ຺ເນ, ວີຕຣາເຄ ພຫຸສ຺ສຸເຕ;

ຕປ຺ເປຕ຺ວາ ອນ຺ນປາເນນ, ຕສ຺ສາ ທກ຺ຂິຓມາທິສີ.

໑໗໘. ສມນນ຺ຕຣານຸທ຺ທິຏ຺ເຐ, ວິປາໂກ ອຸທປຊ຺ຊຖ;

ໂຠຊນຈ຺ຉາທນປານີຍໍ, ທກ຺ຂິຓາຍ ອິທໍ ຜລໍ.

໑໗໙. ຕໂຕ ສຸທ຺ຘາ ສຸຈິວສນາ, ກາສິກຸຕ຺ຕມຘາຣິນີ;

ວິຈິຕ຺ຕວຕ຺ຖາຠຣຓາ, ສາມິກໍ ອຸປສງ຺ກມິ.

໑໘໐. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໘໑. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໘໒. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໘໓. ‘‘ອຫໍ ນນ຺ທາ ນນ຺ທິເສນ, ຠຣິຍາ ເຕ ປຸເຣ ອຫຸໍ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ.

໑໘໔. ‘‘ຕວ ທິນ຺ເນນ ທາເນນ, ໂມທາມິ ອກຸໂຕຠຍາ;

ຈິຣໍ ຊີວ ຄຫປຕິ, ສຫ ສພ຺ເພຫິ ຎາຕິຠິ;

ອໂສກໍ ວິຣຊໍ ເຂມໍ, ອາວາສໍ ວສວຕ຺ຕິນໍ.

໑໘໕. ‘‘ອິຘ ຘມ຺ມໍ ຈຣິຕ຺ວານ, ທານໍ ທຕ຺ວາ ຄຫປຕິ;

ວິເນຍ຺ຍ ມຈ຺ເຉຣມລໍ ສມູລໍ, ອນິນ຺ທິໂຕ ສຄ຺ຄມຸເປຫິ ຐານ’’ນ຺ຕິ.

ນນ຺ທາເປຕິວຕ຺ຖຸ ຈຕຸຕ຺ຖໍ.