໑໒. ກຓ຺ຓມຸຓ຺ຑເປຕິວຕ຺ຖຸ

໓໔໘. ‘‘ໂສຓ຺ຓໂສປານຜລກາ, ໂສຓ຺ຓວາລຸກສນ຺ຖຕາ;

ຕຕ຺ຖ ໂສຄນ຺ຘິຍາ ວຄ຺ຄູ, ສຸຈິຄນ຺ຘາ ມໂນຣມາ.

໓໔໙. ‘‘ນານາຣຸກ຺ເຂຫິ ສຎ຺ຉນ຺ນາ, ນານາຄນ຺ຘສເມຣິຕາ;

ນານາປທຸມສຎ຺ຉນ຺ນາ, ປຸຓ຺ຑຣີກສໂມຕຕາ [ສໂມຫຕາ (ກ.)].

໓໕໐. ‘‘ສຸຣຠິໍ ສມ຺ປວາຍນ຺ຕິ, ມນຸຎ຺ຎາ ມາລຸເຕຣິຕາ;

ຫໍສໂກຎ຺ຈາຠິຣຸທາ ຈ, ຈກ຺ກວກ຺ກາຠິກູຊິຕາ.

໓໕໑. ‘‘ນານາທິຊຄຓາກິຓ຺ຓາ, ນານາສຣຄຓາຍຸຕາ;

ນານາຜລຘຣາ ຣຸກ຺ຂາ, ນານາປຸປ຺ຜຘຣາ ວນາ.

໓໕໒. ‘‘ນ ມນຸສ຺ເສສຸ ອີທິສໍ, ນຄຣໍ ຍາທິສໍ ອິທໍ;

ປາສາທາ ພຫຸກາ ຕຸຍ຺ຫໍ, ໂສວຓ຺ຓຣູປິຍາມຍາ;

ທທ຺ທລ຺ລມານາ ອາເຠນ຺ຕິ [ອາຠນ຺ຕິ (ກ.)], ສມນ຺ຕາ ຈຕຸໂຣ ທິສາ.

໓໕໓. ‘‘ປຎ຺ຈ ທາສິສຕາ ຕຸຍ຺ຫໍ, ຍາ ເຕມາ ປຣິຈາຣິກາ;

ຕາ [ກາ (ກ.)] ກມ຺ພຸກາຍູຣຘຣາ [ກມ຺ພຸເກຍູຣຘຣາ (ສີ.)], ກຎ຺ຈນາເວຬຠູສິຕາ.

໓໕໔. ‘‘ປລ຺ລງ຺ກາ ພຫຸກາ ຕຸຍ຺ຫໍ, ໂສວຓ຺ຓຣູປິຍາມຍາ;

ກທລິມິຄສຎ຺ຉນ຺ນາ [ກາທລິມິຄສຎ຺ຉນ຺ນາ (ສີ.)], ສຊ຺ຊາ ໂຄນກສນ຺ຖຕາ.

໓໕໕. ‘‘ຍຕ຺ຖ ຕ຺ວໍ ວາສູປຄຕາ, ສພ຺ພກາມສມິທ຺ຘິນີ;

ສມ຺ປຕ຺ຕາຍຑ຺ຒຣຕ຺ຕາຍ [… ຣຕ຺ຕິຍາ (ກ.)], ຕໂຕ ອຸຏ຺ຐາຍ ຄຈ຺ຉສິ.

໓໕໖. ‘‘ອຸຍ຺ຍານຠູມິໍ ຄນ຺ຕ຺ວານ, ໂປກ຺ຂຣຎ຺ຎາ ສມນ຺ຕໂຕ;

ຕສ຺ສາ ຕີເຣ ຕຸວໍ ຐາສິ, ຫຣິເຕ ສທ຺ທເລ ສຸເຠ.

໓໕໗. ‘‘ຕໂຕ ເຕ ກຓ຺ຓມຸຓ຺ໂຑ ສຸນໂຂ, ອງ຺ຄມງ຺ຄານິ ຂາທຕິ;

ຍທາ ຈ ຂາຍິຕາ ອາສິ, ອຏ຺ຐິສງ຺ຂລິກາ ກຕາ;

ໂອຄາຫສິ ໂປກ຺ຂຣຓິໍ, ໂຫຕິ ກາໂຍ ຍຖາ ປຸເຣ.

໓໕໘. ‘‘ຕໂຕ ຕ຺ວໍ ອງ຺ຄປຈ຺ຈງ຺ຄີ [ອງ຺ຄປຈ຺ຈງ຺ຄາ (ກ.)], ສຸຈາຣຸ ປິຍທສ຺ສນາ;

ວຕ຺ເຖນ ປາຣຸປິຕ຺ວານ, ອາຍາສິ ມມ ສນ຺ຕິກໍ.

໓໕໙. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສ ກມ຺ມວິປາເກນ, ກຓ຺ຓມຸຓ຺ໂຑ ສຸນໂຂ ຕວອງ຺ຄມງ຺ຄານິ ຂາທຕີ’’ຕິ.

໓໖໐. ‘‘ກິມິລາຍໍ [ກິມ຺ພິລາຍໍ (ສີ. ສ຺ຍາ.)] ຄຫປຕິ, ສທ຺ໂຘ ອາສິ ອຸປາສໂກ;

ຕສ຺ສາຫໍ ຠຣິຍາ ອາສິໍ, ທຸສ຺ສີລາ ອຕິຈາຣິນີ.

໓໖໑. ‘‘ໂສ ມໍ ອຕິຈຣມານາຍ [ເອວມາຕິຈຣມານາຍ (ສ຺ຍາ. ປີ.)], ສາມິໂກ ເອຕທພ຺ຣວິ;

‘ເນຕໍ ຉນ຺ນໍ [ເນຕໍ ຉນ຺ນໍ ນ (ສີ.), ເນຕໍ ຉນ຺ນໍ ເນຕໍ (ກ.)] ປຕິຣູປໍ, ຍໍ ຕ຺ວໍ ອຕິຈຣາສິ ມໍ’.

໓໖໒. ‘‘ສາຫໍ ໂຆຣຎ຺ຈ ສປຖໍ, ມຸສາວາທຎ຺ຈ ຠາສິສໍ;

‘ນາຫໍ ຕໍ ອຕິຈຣາມິ, ກາເຍນ ອຸທ ເຈຕສາ.

໓໖໓. ‘‘‘ສຈາຫໍ ຕໍ ອຕິຈຣາມິ, ກາເຍນ ອຸທ ເຈຕສາ;

ກຓ຺ຓມຸຓ຺ໂຑ ຍໍ ສຸນໂຂ, ອງ຺ຄມງ຺ຄານິ ຂາທຕຸ’.

໓໖໔. ‘‘ຕສ຺ສ ກມ຺ມສ຺ສ ວິປາກໍ, ມຸສາວາທສ຺ສ ຈູຠຍໍ;

ສຕ຺ເຕວ ວສ຺ສສຕານິ, ອນຸຠູຕໍ ຍໂຕ ຫິ ເມ;

ກຓ຺ຓມຸຓ຺ໂຑ ຈ ສຸນໂຂ, ອງ຺ຄມງ຺ຄານິ ຂາທຕິ.

໓໖໕. ‘‘ຕ຺ວຎ຺ຈ ເທວ ພຫຸກາໂຣ, ອຕ຺ຖາຍ ເມ ອິຘາຄໂຕ;

ສຸມຸຕ຺ຕາຫໍ ກຓ຺ຓມຸຓ຺ຑສ຺ສ, ອໂສກາ ອກຸໂຕຠຍາ.

໓໖໖. ‘‘ຕາຫໍ ເທວ ນມສ຺ສາມິ, ຍາຈາມິ ປຎ຺ຊລີກຕາ;

ຠຸຎ຺ຊ ອມານຸເສ ກາເມ, ຣມ ເທວ ມຍາ ສຫາ’’ຕິ.

໓໖໗. ‘‘ຠຸຕ຺ຕາ ອມານຸສາ ກາມາ, ຣມິໂຕມ຺ຫິ ຕຍາ ສຫ;

ຕາຫໍ ສຸຠເຄ ຍາຈາມິ, ຂິປ຺ປໍ ປຏິນຍາຫິ ມ’’ນ຺ຕິ.

ກຓ຺ຓມຸຓ຺ຑເປຕິວຕ຺ຖຸ ທ຺ວາທສມໍ.