໖. ປຎ຺ຈປຸຕ຺ຕຂາທເປຕິວຕ຺ຖຸ

໒໖. ‘‘ນຄ຺ຄາ ທຸພ຺ພຓ຺ຓຣູປາສິ, ທຸຄ຺ຄນ຺ຘາ ປູຕິ ວາຍສິ;

ມກ຺ຂິກາຫິ ປຣິກິຓ຺ຓາ [ມກ຺ຂິກາປຣິກິຓ຺ຓາ ຈ (ສີ.)], ກາ ນຸ ຕ຺ວໍ ອິຘ ຕິຏ຺ຐສີ’’ຕິ.

໒໗. ‘‘ອຫໍ ຠທນ຺ເຕ [ຠທ຺ທນ຺ເຕ (ກ.)] ເປຕີມ຺ຫິ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ.

໒໘. ‘‘ກາເລນ ປຎ຺ຈ ປຸຕ຺ຕານິ, ສາຍໍ ປຎ຺ຈ ປຸນາປເຣ;

ວິຊາຍິຕ຺ວານ ຂາທາມິ, ເຕປິ ນາ ໂຫນ຺ຕິ ເມ ອລໍ.

໒໙. ‘‘ປຣິຑຍ຺ຫຕິ ຘູມາຍຕິ, ຂຸທາຍ [ຂຸທ຺ທາຍ (ກ.)] ຫທຍໍ ມມ;

ປານີຍໍ ນ ລເຠ ປາຕຸໍ, ປສ຺ສ ມໍ ພ຺ຍສນໍ ຄຕ’’ນ຺ຕິ.

໓໐. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສ ກມ຺ມວິປາເກນ, ປຸຕ຺ຕມໍສານິ ຂາທສີ’’ຕິ.

໓໑. ‘‘ສປຕີ [ສປຕ຺ຕີ (ສີ.)] ເມ ຄພ຺ຠິນີ ອາສິ, ຕສ຺ສາ ປາປໍ ອເຈຕຍິໍ;

ສາຫໍ ປທຸຏ຺ຐມນສາ, ອກຣິໍ ຄພ຺ຠປາຕນໍ.

໓໒. ‘‘ຕສ຺ສາ ທ຺ເວມາສິໂກ ຄພ຺ໂຠ, ໂລຫິຕຎ຺ເຎວ ປຄ຺ຆຣິ;

ຕທສ຺ສາ ມາຕາ ກຸປິຕາ, ມຍ຺ຫໍ ຎາຕີ ສມານຍິ;

ສປຖຎ຺ຈ ມໍ ກາເຣສິ, ປຣິຠາສາປຍີ ຈ ມໍ.

໓໓. ‘‘ສາຫໍ ໂຆຣຎ຺ຈ ສປຖໍ, ມຸສາວາທໍ ອຠາສິສໍ;

ປຸຕ຺ຕມໍສານິ ຂາທາມິ, ສເຈ ຕໍ ປກຕໍ ມຍາ.

໓໔. ‘‘ຕສ຺ສ ກມ຺ມສ຺ສ ວິປາເກນ [ວິປາກໍ (ສ຺ຍາ. ກ.)], ມຸສາວາທສ຺ສ ຈູຠຍໍ;

ປຸຕ຺ຕມໍສານິ ຂາທາມິ, ປຸພ຺ພໂລຫິຕມກ຺ຂິຕາ’’ຕິ.

ປຎ຺ຈປຸຕ຺ຕຂາທເປຕິວຕ຺ຖຸ [ປຎ຺ຈປຸຕ຺ຕຂາທເປຕວຕ຺ຖຸ (ສີ. ສ຺ຍາ. ປີ.) ເອວມຸປຣິປິ] ຉຏ຺ຐໍ.