໘. ສຸຕ຺ຕເວຠງ຺ຄິຍໍ

໑໑໘. ປຸພ຺ພາ ໂກຏິ ນ ປຎ຺ຎາຍຕິ ອວິຊ຺ຊາຍ ຈ ຠວຕຓ຺ຫາຍ ຈ. ຕຕ຺ຖ ອວິຊ຺ຊານີວຣຓານໍ ຕຓ຺ຫາສໍໂຍຊນານໍ ສຕ຺ຕານໍ ປຸພ຺ພໂກຏິ ນ ປຎ຺ຎາຍຕິ. ຕຕ຺ຖ ເຍ ສຕ຺ຕາ ຕຓ຺ຫາສໍໂຍຊນາ, ເຕ ອຊ຺ໂຌສານພຫຸລາ ມນ຺ທວິປສ຺ສກາ. ເຍ ປນ ອຸສ຺ສນ຺ນທິຏ຺ຐິກາ ສຕ຺ຕາ, ເຕ ວິປສ຺ສນາພຫຸລາ ມນ຺ທຊ຺ໂຌສານາ.

ຕຕ຺ຖ ຕຓ຺ຫາຈຣິຕາ ສຕ຺ຕາ ສຕ຺ຕສຎ຺ຎາຠິນິວິຏ຺ຐາ ອນຸປ຺ປາທວຍທສ຺ສິໂນ. ເຕ ປຎ຺ຈສຸ ຂນ຺ເຘສຸ ອຕ຺ຕານໍ ສມນຸປສ຺ສນ຺ຕິ ‘‘ຣູປວນ຺ຕໍ ວາ ອຕ຺ຕານໍ, ອຕ຺ຕນິ ວາ ຣູປໍ, ຣູປສ຺ມິໍ ວາ ອຕ຺ຕານ’’ນ຺ຕິ. ເອວໍ ປຎ຺ຈກ຺ຂນ຺ຘາ. ອຎ຺ເຎຫິ ຂນ຺ເຘຫິ ອຕ຺ຕານໍ ສມນຸປສ຺ສນ຺ຕິ ຕສ຺ສ ອຸສ຺ສນ຺ນທິຏ຺ຐິກາ ສຕ຺ຕາ ວິປສ຺ສມານາ ຂນ຺ເຘ ອຸຊຸໍ ອຕ຺ຕໂຕ ສມນຸປສ຺ສນ຺ຕິ. ເຕ ຣູປໍ ອຕ຺ຕໂກ ສມນຸປສ຺ສນ຺ຕິ. ຍໍ ຣູປໍ, ໂສ ອຕ຺ຕາ. ໂຍ ອຫໍ, ຕໍ ຣູປໍ. ໂສ ຣູປວິນາສໍ ປສ຺ສຕິ, ອຍໍ ອຸຈ຺ເຉທວາທີ. ອິຕິ ປຎ຺ຈນ຺ນໍ ຂນ຺ຘານໍ ປຐມາຠິນິປາຕາ ສກ຺ກາຍທິຏ຺ຐິໂຍ ປຎ຺ຈ ອຸຈ຺ເຉທໍ ຠຊນ຺ຕິ ‘‘ຕໍ ຊີວໍ ຕໍ ສຣີຣ’’ນ຺ຕິ. ເອກເມກມ຺ຫິ ຂນ຺ເຘ ຕີຫິ ປເທຫິ ປຈ຺ຉິມເກຫິ ສສ຺ສຕໍ ຠຊຕິ ‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ. ອິໂຕ ພຫິທ຺ຘາເຕ ປພ຺ພຊິຕາ ຕຓ຺ຫາຈຣິຕາ ກາມສຸຂລ຺ລິການຸໂຍຄມນຸຍຸຕ຺ຕາ ວິຫຣນ຺ຕິ. ເຕນ ເຍ ຈ ນິສ຺ສນ຺ເທນ ທິຏ຺ຐິຈຣິຕາ ອຕ຺ຕກິລມຖານຸໂຍຄມນຸຍຸຕ຺ຕາ ວິຫຣນ຺ຕິ. ເຕນ ເຍວ ທິຏ຺ຐິສຸເຂນ ເອຕ຺ຕາວຕາ ພາຫິຣໂກ ປໂຍໂຄ.

ຕຕ຺ຖ ທິຏ຺ຐິຈຣິຕາ ສຕ຺ຕາ ເຍ ອຣິຍຘມ຺ມວິນຍໍ ໂອຕຣນ຺ຕິ, ເຕ ຘມ຺ມານຸສາຣິໂນ ໂຫນ຺ຕິ. ເຍ ຕຓ຺ຫາຈຣິຕາ ສຕ຺ຕາ ອຣິຍໍ ຘມ຺ມວິນຍໍ ໂອຕຣນ຺ຕິ, ເຕ ສທ຺ຘານຸສາຣິໂນ ໂຫນ຺ຕິ.

ຕຕ຺ຖ ເຍ ທິຏ຺ຐິຈຣິຕາ ສຕ຺ຕາ, ເຕ ກາເມສຸ ໂທສທິຏ຺ຐີ, ນ ຈ ເຍ ກາເມສຸ ອນຸສຍາ ສມູຫຕາ, ເຕ ອຕ຺ຕກິລມຖານຸໂຍຄມນຸຍຸຕ຺ຕາ ວິຫຣນ຺ຕິ. ເຕສໍ ສຕ຺ຖາ ຘມ຺ມໍ ເທເສຕິ. ອຎ຺ໂຎ ວາ ສາວໂກ ກາເມຫິ ນຕ຺ຖິ ອຕ຺ໂຖຕິ ເຕ ຈ ປຸພ຺ເພເຍວ ກາເມຫິ ອນຕ຺ຖິກາ ອິຕິ ກາເມ ອປ຺ປກສິເຣນ ປຏິນິສ຺ສຊ຺ຊນ຺ຕິ. ເຕ ເຈຕສິເກນ ທຸກ຺ເຂນ ອນຊ຺ໂຌສິຕາ. ເຕນ ວຸຈ຺ຈຕິ ‘‘ສຸຂາ ປຏິປທາ’’ຕິ. ເຍ ປນ ຕຓ຺ຫາຈຣິຕາ ສຕ຺ຕາ, ເຕ ກາເມສຸ ອຊ຺ໂຌສິຕາ, ເຕສໍ ສຕ຺ຖາ ວາ ຘມ຺ມໍ ເທເສຕິ. ອຎ຺ຎຕໂຣ ວາ ຠິກ຺ຂຸ ກາເມຫິ ນຕ຺ຖິ ອຕ຺ໂຖຕິ, ເຕ ປິຍຣູປໍ ທຸກ຺ເຂນ ປຏິນິສ຺ສຊ຺ຊນ຺ຕິ. ເຕນ ວຸຈ຺ຈຕິ ‘‘ທຸກ຺ຂາ ປຏິປທາ’’ຕິ. ອິຕິ ອິເມ ສພ຺ພສຕ຺ຕາ ທ຺ວີສຸ ປຏິປທາສຸ ສໂມສຣຓໍ ຄຈ຺ຉນ຺ຕິ ທຸກ຺ຂາຍຎ຺ຈ ສຸຂາຍຎ຺ຈ.

ຕຕ຺ຖ ເຍ ທິຏ຺ຐິຈຣິຕາ ສຕ຺ຕາ, ເຕ ທ຺ວິຘາ ມຸທິນ຺ທ຺ຣິຍາ ຈ ຕິກ຺ຂິນ຺ທ຺ຣິຍາ ຈ. ຕຕ຺ຖ ເຍ ທິຏ຺ຐິຈຣິຕາ ສຕ຺ຕາ ຕິກ຺ຂິນ຺ທ຺ຣິຍາ ສຸເຂນ ປຏິນິສ຺ສຊ຺ຊນ຺ຕິ, ຂິປ຺ປຎ຺ຈ ອຠິສເມນ຺ຕິ, ເຕນ ວຸຈ຺ຈຕິ ‘‘ຂິປ຺ປາຠິຎ຺ຎາ ສຸຂາ ປຏິປທາ’’ຕິ. ຕຕ຺ຖ ເຍ ທິຏ຺ຐິຈຣິຕາ ສຕ຺ຕາ ມຸທິນ຺ທ຺ຣິຍາ ປຐມໍ ຕິກ຺ຂິນ຺ທ຺ຣິຍໍ ອຸປາທາຍ ທນ຺ຘຕຣໍ ອຠິສເມນ຺ຕິ, ເຕ ສຸເຂນ ປຏິນິສ຺ສຊ຺ຊນ຺ຕິ, ທນ຺ຘຎ຺ຈ ອຠິສເມນ຺ຕິ. ເຕນ ວຸຈ຺ຈຕິ ‘‘ສຸຂາ ປຏິປທາ ທນ຺ຘາຠິຎ຺ຎາ’’ຕິ. ຕຕ຺ຖ ຕຓ຺ຫາຈຣິຕາ ສຕ຺ຕາ ທ຺ວິຘາ ຕິກ຺ຂິນ຺ທ຺ຣິຍາ ຈ ມຸທິນ຺ທ຺ຣິຍາ ຈ. ຕຕ຺ຖ ເຍ ຕຓ຺ຫາຈຣິຕາ ສຕ຺ຕາ ຕິກ຺ຂິນ຺ທ຺ຣິຍາ ທຸກ຺ເຂນ ປຏິນິສ຺ສຊ຺ຊນ຺ຕິ, ຂິປ຺ປຎ຺ຈ ອຠິສເມນ຺ຕິ. ເຕນ ວຸຈ຺ຈຕິ ‘‘ທຸກ຺ຂາ ປຏິປທາ ຂິປ຺ປາຠິຎ຺ຎາ’’ຕິ. ຕຕ຺ຖ ເຍ ຕຓ຺ຫາຈຣິຕາ ສຕ຺ຕາ ມຸທິນ຺ທ຺ຣິຍາ ປຐມໍ ຕິກ຺ຂິນ຺ທ຺ຣິຍໍ ອຸປາທາຍ ທນ຺ຘຕຣໍ ອຠິສເມນ຺ຕິ, ເຕ ທຸກ຺ເຂນ ປຏິນິສ຺ສຊ຺ຊນ຺ຕິ, ທນ຺ຘຎ຺ຈ ອຠິສເມນ຺ຕິ. ເຕນ ວຸຈ຺ຈຕິ ‘‘ທຸກ຺ຂາ ປຏິປທາ ທນ຺ຘາຠິຎ຺ຎາ’’ຕິ. ອິມາ ຈຕສ຺ໂສ ປຏິປທາໂຍ ອປຎ຺ຈມາ ອຉຏ຺ຐາ. ເຍ ຫິ ເກຈິ ນິພ຺ພຸຕາ ນິພ຺ພາຍິສ຺ສນ຺ຕິ ວາ ອິມາຫິ ຈຕູຫິ ປຏິປທາຫິ ອນຎ຺ຎາຫິ ອຍໍ ປຏິປທາຈຕຸກ຺ເກນ ກິເລເສ ນິທ຺ທິສຕິ. ຍາ ຈຕຸກ຺ກມຄ຺ເຄນ ອຣິຍຘມ຺ເມສຸ ນິທ຺ທິສິຕພ຺ພາ, ອຍໍ ວຸຈ຺ຈຕິ ສີຫວິກ຺ກີຬິໂຕ ນາມ ນໂຍ.

໑໑໙. ຕຕ຺ຣິເມ ຈຕ຺ຕາໂຣ ອາຫາຣາ. ຈຕ຺ຕາໂຣ ວິປລ຺ລາສາ ອຸປາທານາ ໂຍຄາ ຄນ຺ຖາ ອາສວາ ໂອຆາ ສລ຺ລາ ວິຎ຺ຎາຓຏ຺ຐິຕິໂຍ ອຄຕິຄມນາຕິ, ເອວໍ ອິມານິ ສພ຺ພານິ ທສ ປທານິ. ອຍໍ ສຸຕ຺ຕສ຺ສ ສໍສນ຺ທນາ.

ຈຕ຺ຕາໂຣ ອາຫາຣາ. ຕຕ຺ຖ ໂຍ ຈ ກພຬີກາໂຣ ອາຫາໂຣ ໂຍ ຈ ຜສ຺ໂສ ອາຫາໂຣ, ອິເມ ຕຓ຺ຫາຈຣິເຕນ ປຫາຕພ຺ພາ. ຕຕ຺ຖ ໂຍ ຈ ມໂນສຎ຺ເຈຕນາຫາໂຣ ໂຍ ຈ ວິຎ຺ຎາຓາຫາໂຣ, ອິເມ ທິຏ຺ຐິຈຣິເຕນ ປຫາຕພ຺ພາ.

ປຐໂມ ອາຫາໂຣ ປຐໂມ ວິປລ຺ລາໂສ, ທຸຕິໂຍ ອາຫາໂຣ ທຸຕິໂຍ ວິປລ຺ລາໂສ, ຕຕິໂຍ ອາຫາໂຣ ຕຕິໂຍ ວິປລ຺ລາໂສ, ຈຕຸຕ຺ໂຖ ອາຫາໂຣ ຈຕຸຕ຺ໂຖ ວິປລ຺ລາໂສ. ອິເມ ຈຕ຺ຕາໂຣ ວິປລ຺ລາສາ ອປຎ຺ຈມາ ອຉຏ຺ຐາ. ອິທຎ຺ຈ ປມາຓາ ຈຕ຺ຕາໂຣ ອາຫາຣາ.

ຕຕ຺ຖ ປຐເມ ວິປລ຺ລາເສ ຐິໂຕ ກາເມ ອຸປາທິຍຕິ, ອິທໍ ກາມຸປາທານໍ. ທຸຕິເຍ ວິປລ຺ລາເສ ຐິໂຕ ອນາຄຕໍ ຠວໍ ອຸປາທິຍຕິ, ອິທໍ ສີລພ຺ພຕຸປາທານໍ. ຕຕິເຍ ວິປລ຺ລາເສ ຐິໂຕ ວິປຣີໂຕ ທິຏ຺ຐິໍ ອຸປາທິຍຕິ, ອິທໍ ທິຏ຺ຐຸປາທານໍ. ຈຕຸຕ຺ເຖ ວິປລ຺ລາເສ ຐິໂຕ ຂນ຺ເຘ ອຕ຺ຕໂຕ ອຸປາທິຍຕິ, ອິທໍ ອຕ຺ຕວາທຸປາທານໍ.

ຕຕ຺ຖ ກາມຸປາທາເນ ຐິໂຕ ກາເມ ອຠິຊ຺ຌາຍຕິ ຄນ຺ຖຕິ, ອຍໍ ອຠິຊ຺ຌາກາຍຄນ຺ໂຖ. ສີລພ຺ພຕຸປາທາເນ ຐິໂຕ ພ຺ຍາປາທໍ ຄນ຺ຖຕິ, ອຍໍ ພ຺ຍາປາທກາຍຄນ຺ໂຖ. ທິຏ຺ຐຸປາທາເນ ຐິໂຕ ປຣາມາສໍ ຄນ຺ຖຕິ, ອຍໍ ປຣາມາສກາຍຄນ຺ໂຖ. ອຕ຺ຕວາທຸປາທາເນ ຐິໂຕ ປປຎ຺ຈນ຺ໂຕ ຄນ຺ຖຕິ, ອຍໍ ອິທໍສຈ຺ຈາຠິນິເວໂສ ກາຍຄນ຺ໂຖ.

ຕສ຺ສ ຄນ຺ຖິຕາ ກິເລສາ ອາສວນ຺ຕິ. ກິຎ຺ຈິ ປນ ວຸຈ຺ຈຕິ ວິປ຺ປຏິສາໂຣ. ເຍ ວິປ຺ປຏິສາຣາ [ໂຍ ວິປ຺ປຏິສາໂຣ (ປີ. ກ.)] ເຕ ອນຸສຍາ. ຕຕ຺ຖ ອຠິຊ຺ຌາກາຍຄນ຺ເຖນ ກາມາສໂວ, ພ຺ຍາປາທກາຍຄນ຺ເຖນ ຠວາສໂວ, ປຣາມາສກາຍຄນ຺ເຖນ ທິຏ຺ຐາສໂວ, ອິທໍ ສຈ຺ຈາຠິນິເວສກາຍຄນ຺ເຖນ ອວິຊ຺ຊາສໂວ.

ເຕ ຈຕ຺ຕາໂຣ ອາສວາ ເວປຸລ຺ລຠາວໍ ຄຕາ ໂອຆາ ໂຫນ຺ຕິ, ເຕນ ວຸຈ຺ຈນ຺ຕິ ‘‘ໂອຆາ’’ຕິ. ຕຕ຺ຖ ກາມາສໂວ ກາໂມໂຆ, ຠວາສໂວ ຠໂວໂຆ, ອວິຊ຺ຊາສໂວ ອວິຊ຺ໂຊໂຆ, ທິຏ຺ຐາສໂວ ທິຏ຺ໂຐໂຆ.

ເຕ ຈຕ຺ຕາໂຣ ໂອຆາ ອາສຍມນຸປວິຏ຺ຐາ ອນຸສຍສຫຄຕາ ວຸຈ຺ຈນ຺ຕິ. ສລ຺ລາຕິ ຫທຍມາຫຈ຺ຈ ຕິຏ຺ຐນ຺ຕາ. ຕຕ຺ຖ ກາໂມໂຆ ຣາຄສລ຺ລໍ, ຠໂວໂຆ ໂທສສລ຺ລໍ, ອວິຊ຺ໂຊໂຆ ໂມຫສລ຺ລໍ, ທິຏ຺ໂຐໂຆ ທິຏ຺ຐິສລ຺ລໍ.

ອິເມຫິ ຈຕູຫິ ສລ຺ເລຫິ ປຣິຍາທິນ຺ນໍ ວິຎ຺ຎາຓໍ ຈຕູສຸ ຘມ຺ເມສຸ ຕິຏ຺ຐຕິ ຣູເປ ເວທນາຍ ສຎ຺ຎາຍ ສງ຺ຂາເຣສຸ. ອິມາ ຈຕສ຺ໂສ ວິຎ຺ຎາຓຏ຺ຐິຕິໂຍ. ຕຕ຺ຖ ຣາຄສລ຺ເລນ ນນ຺ທູປເສຈນໍ ຣູປູປຄໍ ວິຎ຺ຎາຓໍ ຕິຏ຺ຐຕິ. ໂທສສລ຺ເລນ ເວທນູປຄໍ ໂມຫສລ຺ເລນ ສຎ຺ຎູປຄໍ ທິຏ຺ຐິສລ຺ເລນ ນນ຺ທູປເສຈນໍ ສງ຺ຂາຣູປຄໍ ວິຎ຺ຎາຓໍ ຕິຏ຺ຐຕິ.

ຈຕູຫິ ວິຎ຺ຎາຓຏ຺ຐິຕີຫິ ຈຕຸພ຺ພິຘໍ ອຄຕິໍ ຄຈ຺ຉນ຺ຕິ ຉນ຺ທາ ໂທສາ ຠຍາ ໂມຫາ. ຣາເຄນ ຉນ຺ທາ ອຄຕິໍ ຄຈ຺ຉຕິ, ໂທເສນ ໂທສາ ອຄຕິໍ ຄຈ຺ຉຕິ, ໂມເຫນ ໂມຫາ ອຄຕິໍ ຄຈ຺ຉຕິ, ທິຏ຺ຐິຍາ ຠຍາ ອຄຕິໍ ຄຈ຺ຉຕິ. ອິຕິ ອິທຎ຺ຈ ກມ຺ມໍ ອິເມ ຈ ກິເລສາ. ອຍໍ ສໍສາຣສ຺ສ ເຫຕຸ.

໑໒໐. ຕຕ຺ຖິມາ ຈຕສ຺ໂສ ທິສາ ກພຬີກາຣາຫາໂຣ ‘‘ອສຸເຠ ສຸຠ’’ນ຺ຕິ ວິປລ຺ລາໂສ ກາມຸປາທານໍ ກາມໂຍໂຄ ອຠິຊ຺ຌາກາຍຄນ຺ໂຖ ກາມາສໂວ ກາໂມໂຆ ຣາຄສລ຺ລໍ ຣູປູປຄາ ວິຎ຺ຎາຓຏ຺ຐິຕິ ຉນ຺ທາ ອຄຕິຄມນໍ. ອຍໍ ປຐມາ ທິສາ.

ຜສ຺ໂສ ອາຫາໂຣ ‘‘ທຸກ຺ເຂ ສຸຂ’’ນ຺ຕິ ວິປລ຺ລາໂສ ສີລພ຺ພຕຸປາທານໍ ຠວໂຍໂຄພ຺ຍາປາໂທ ກາຍຄນ຺ໂຖ ຠວາສໂວ ຠໂວໂຆ ໂທສສລ຺ລໍ ເວທນູປຄາ ວິຎ຺ຎາຓຏ຺ຐິຕິ ໂທສາ ອຄຕິຄມນໍ, ອຍໍ ທຸຕິຍາ ທິສາ.

ມໂນສຎ຺ເຈຕນາຫາໂຣ ‘‘ອນຕ຺ຕນິ ອຕ຺ຕາ’’ຕິ ວິປລ຺ລາໂສ ທິຏ຺ຐຸປາທານໍ ທິຏ຺ຐິໂຍໂຄ ປຣາມາສກາຍຄນ຺ໂຖ ທິຏ຺ຐາສໂວ ທິຏ຺ໂຐໂຆ ທິຏ຺ຐິສລ຺ລໍ ສຎ຺ຎູປຄາ ວິຎ຺ຎາຓຏ຺ຐິຕິ ຠຍາ ອຄຕິຄມນໍ. ອຍໍ ຕຕິຍາ ທິສາ.

ວິຎ຺ຎາຓາຫາໂຣ ‘‘ອນິຈ຺ເຈ ນິຈ຺ຈ’’ນ຺ຕິ ວິປລ຺ລາໂສ ອຕ຺ຕວາທຸປາທານໍ ອວິຊ຺ຊາໂຍໂຄ ອິທໍສຈ຺ຈາຠິນິເວໂສ ກາຍຄນ຺ໂຖ ອວິຊ຺ຊາສໂວ ອວິຊ຺ໂຊໂຆ ໂມຫສລ຺ລໍ ສງ຺ຂາຣູປຄາ ວິຎ຺ຎາຓຏ຺ຐິຕິ ໂມຫາ ອຄຕິຄມນໍ, ອຍໍ ຈຕຸຕ຺ຖີ ທິສາ. ອິຕິ ອິເມສໍ ທສນ຺ນໍ ສຸຕ຺ຕານໍ ປຐເມນ ປເທນ ປຐມາຍ ທິສາຍ ອາໂລກນໍ. ອຍໍ ວຸຈ຺ຈຕິ ທິສາໂລກນາ.

ຈຕູຫິ ວິປລ຺ລາເສຫິ ອກຸສລປກ຺ເຂ ທິສາວິໂລກນາ ກິເລສໍ ສໍໂຍເຊຕ຺ວາ ອຍໍ ອກຸສລປກ຺ເຂ ທິສາວິໂລກນາຍ ຠູມິ ປຎ຺ຈນ຺ນໍ ທສນ຺ນໍ ສຸຕ຺ຕານໍ ຍານິ ປຐມານິ ປທານິ ອິເມສໍ ຘມ຺ມານໍ ໂກ ອຕ຺ໂຖ? ເອໂກ ອຕ຺ໂຖ, ພ຺ຍຎ຺ຊນເມວ ນານໍ. ເອວໍ ທຸຕິຍາ ເອວໍ ຕຕິຍາ ເອວໍ ຈຕຸຕ຺ຖີ. ອຍໍ ປຐມາ ສໍສນ຺ທນາ.

ອິມິນາ ເປຍ຺ຍາເລນ ສພ຺ເພ ກິເລສາ ຈຕູສຸ ປເທສຸ ປກ຺ຂິປິຕພ຺ພາ. ຕໂຕ ກຸສລປກ຺ເຂ ຈຕສ຺ໂສ ປຏິປທາ ຈຕ຺ຕາຣິ ຌານານິ ຈຕ຺ຕາໂຣ ສຕິປຏ຺ຐານາ ຈຕ຺ຕາໂຣ ວິຫາຣາ ທິພ຺ໂພ ພ຺ຣຫ຺ມາ ອຣິໂຍ ອາເນຎ຺ໂຊ ຈຕ຺ຕາໂຣ ສມ຺ມປ຺ປຘານາ ຈຕ຺ຕາໂຣ ອຈ຺ຉຣິຍາ ອພ຺ຠຸຕຘມ຺ມາ ຈຕ຺ຕາໂຣ ອຘິຏ຺ຐານາ ຈຕ຺ຕາໂຣ ສມາຘໂຍ ຉນ຺ທສມາຘິ ວີຣິຍສມາຘິ ຈິຕ຺ຕສມາຘິ ວີມໍສາສມາຘິ. ຈຕ຺ຕາໂຣ ຘມ຺ມາ ສຸຂຠາຄິຍາ ນາຎ຺ຎຕ຺ຣ ໂພຊ຺ຌງ຺ຄາ ນາຎ຺ຎຕ຺ຣ ຕປສາ ນາຎ຺ຎຕິນ຺ທ຺ຣິຍສໍວຣາ ນາຎ຺ຎຕ຺ຣ ສພ຺ພນິສ຺ສຄ຺ຄາ ຈຕ຺ຕາຣິ ອປ຺ປມາຓານິ.

ຕຕ຺ຖ ທຸກ຺ຂາ ປຏິປທາ ທນ຺ຘາຠິຎ຺ຎາ ຠາວິຍມານາ ພຫຸລີກຣິຍມານາ ປຐມໍ ຌານໍ ປຣິປູເຣຕິ, ປຐມໍ ຌານໍ ປຣິປຸຓ຺ຓໍ ປຐມໍ ສຕິປຏ຺ຐານໍ ປຣິປູເຣຕິ, ປຐມໍ ສຕິປຏ຺ຐານໍ ປຣິປຸຓ຺ຓໍ ປຐມໍ ວິຫາຣໍ ປຣິປູເຣຕິ, ປຐໂມ ວິຫາໂຣ ປຣິປຸຓ຺ໂຓ ປຐມໍ ສມ຺ມປ຺ປຘານໍ ປຣິປູເຣຕິ, ປຐມໍ ສມ຺ມປ຺ປຘານໍ ປຣິປຸຓ຺ຓໍ ປຐມໍ ອຈ຺ຉຣິຍໍ ອພ຺ຠຸຕຘມ຺ມໍ ປຣິປູເຣຕິ, ປຐໂມ ອຈ຺ຉຣິໂຍ ອພ຺ຠຸໂຕ ຘມ຺ໂມ ປຣິປຸຓ຺ໂຓ ປຐມໍ ອຘິຏ຺ຐານໍ ປຣິປູເຣຕິ, ປຐມໍ ອຘິຏ຺ຐານໍ ປຣິປຸຓ຺ຓໍ ຉນ຺ທສມາຘິໍ ປຣິປູເຣຕິ, ຉນ຺ທສມາຘິ ປຣິປຸຓ຺ໂຓ ອິນ຺ທ຺ຣິຍສໍວຣໍ ປຣິປູເຣຕິ, ອິນ຺ທ຺ຣິຍສໍວໂຣ ປຣິປຸຓ຺ໂຓ ປຐມໍ ເມຕ຺ຕາອປ຺ປມາຓໍ ປຣິປູເຣຕິ. ເອວໍ ຍາວ ສພ຺ພນິສ຺ສຄ຺ໂຄ ຈຕຸຕ຺ຖໍ ອປ຺ປມາຓໍ ປຣິປູເຣຕິ.

ຕຕ຺ຖ ປຐມາ ຈ ປຏິປທາ ປຐມຎ຺ຈ ຌານໍ ປຐມຎ຺ຈ ສຕິປຏ຺ຐານໍ ປຐໂມ ຈ ວິຫາໂຣ ປຐມຎ຺ຈ ສມ຺ມປ຺ປຘານໍ ປຐໂມ ຈ ອຈ຺ຉຣິໂຍ ອພ຺ຠຸໂຕ ຘມ຺ໂມ ສຈ຺ຈາຘິຏ຺ຐານຎ຺ຈ ຉນ຺ທສມາຘິ ຈ ອິນ຺ທ຺ຣິຍສໍວໂຣ ຈ ເມຕ຺ຕາ ຈ ອປ຺ປມາຓໍ. ອຍໍ ປຐມາ ທິສາ.

ທຸກ຺ຂາ ຈ [ທຸຕິຍາ ຈ (ກ.)] ປຏິປທາ ຂິປ຺ປາຠິຎ຺ຎາ ທຸຕິຍໍ ຌານໍ ທຸຕິຍຎ຺ຈ ສຕິປຏ຺ຐານໍ ທຸຕິໂຍ ຈ ວິຫາໂຣ ທຸຕິຍຎ຺ຈ ສມ຺ມປ຺ປຘານໍ ທຸຕິໂຍ ຈ ອຈ຺ຉຣິໂຍ ອພ຺ຠຸໂຕ ຘມ຺ໂມ ຈາຄາຘິຏ຺ຐານໍ ຈິຕ຺ຕສມາຘິ ຈຕ຺ຕາໂຣ ອິທ຺ຘິປາທາ ກຣຸຓາ ຈ ອປ຺ປມາຓໍ, ອຍໍ ທຸຕິຍາ ທິສາ.

ສຸຂາ ຈ [ຕຕິຍາ ຈ (ກ.)] ປຏິປທາ ທນ຺ຘາຠິຎ຺ຎາ ຕຕິຍຎ຺ຈ ຌານໍ ຕຕິຍຎ຺ຈ ສຕິປຏ຺ຐານໍ ຕຕິໂຍ ຈ ວິຫາໂຣ ຕຕິຍຎ຺ຈ ສມ຺ມປ຺ປຘານໍ ຕຕິໂຍ ຈ ອຈ຺ຉຣິໂຍ ອພ຺ຠຸໂຕ ຘມ຺ໂມ ປຎ຺ຎາຘິຏ຺ຐານຎ຺ຈ ວີຣິຍສມາຘິ ຈ ໂພຊ຺ຌງ຺ຄາ ຈ ມຸທິຕາ ຈ ອປ຺ປມາຓໍ. ອຍໍ ຕຕິຍາ ທິສາ.

ສຸຂາ ຈ [ຈຕຸຕ຺ຖີ ຈ (ກ.)] ປຏິປທາ ຂິປ຺ປາຠິຎ຺ຎາ ຈຕຸຕ຺ຖໍ ຌານໍ ຈຕຸຕ຺ຖຎ຺ຈ ສຕິປຏ຺ຐານໍ ຈຕຸຕ຺ໂຖ ຈ ວິຫາໂຣ ຈຕຸຕ຺ຖຎ຺ຈ ສມ຺ມປ຺ປຘານໍ ຈຕຸຕ຺ໂຖ ຈ ອຈ຺ຉຣິໂຍ ອພ຺ຠຸໂຕ ຘມ຺ໂມ ອຸປສມາຘິຏ຺ຐານຎ຺ຈ ວີມໍສາສມາຘິ ຈ ສພ຺ພນິສ຺ສຄ຺ໂຄ ຈ ອຸເປກ຺ຂາ ອປ຺ປມາຓຎ຺ຈ. ອຍໍ ຈຕຸຕ຺ຖີ ທິສາ. ອິມາສໍ ຈຕສ຺ສນ຺ນໍ ທິສານໍ ອາໂລກນາ. ອຍໍ ວຸຈ຺ຈຕິ ທິສາໂລກໂນ ນາມ ນໂຍ.

ຕຕ຺ຖາຍໍ ໂຍຊນາ. ຈຕ຺ຕາໂຣ ຈ ອາຫາຣາ ຈຕສ຺ໂສ ຈ ປຏິປທາ, ຈຕ຺ຕາໂຣ ຈ ວິປລ຺ລາສາ ຈຕ຺ຕາໂຣ ຈ ສຕິປຏ຺ຐານາ, ຈຕ຺ຕາຣິ ຈ ອຸປາທານານິ ຈຕ຺ຕາຣິ ຈ ຌານານິ ຈຕ຺ຕາໂຣ ຈ ໂຍຄາ ວິຫາຣາ ຈ, ຄນ຺ຖາ ຈ ສມ຺ມປ຺ປຘານາ ຈ, ອາສວາ ຈ ອຈ຺ຉຣິຍາ ອພ຺ຠຸຕຘມ຺ມາ ຈ, ໂອຆາ ຈ ອຘິຏ຺ຐານານິ ຈ, ສລ຺ລາ ຈ ສມາຘໂຍ, ວິຎ຺ຎາຓຏ຺ຐິຕິໂຍ ຈຕ຺ຕາໂຣ ຈ ສຸຂຠາຄິຍາ ຘມ຺ມາ, ຈຕ຺ຕາຣິ ຈ ອຄຕິຄມນານິ ຈຕ຺ຕາຣິ ຈ ອປ຺ປມາຓານິ ອິຕິ ກຸສລາກຸສລານໍ ປຏິປກ຺ຂວເສນ ໂຍຊນາ, ອຍໍ ວຸຈ຺ຈຕິ ທິສາໂລກໂນ ນໂຍ.

ຕສ຺ສ ຈຕ຺ຕາຣິ ສາມຎ຺ຎຜລານິ ປຣິໂຍສານໍ, ໂຍ ຈ ຘມ຺ໂມ ກຸສລາກຸສລນິທ຺ເທເສ ປຐໂມ ທິສານິທ຺ເທໂສ, ອິມສ຺ສ ໂສຕາປຕ຺ຕິຜລໍ ປຣິໂຍສານໍ ທຸຕິຍໍ ສກທາຄາມິຜລໍ, ຕຕິຍໍ ອນາຄາມິຜລໍ, ຈຕຸຕ຺ຖໍ ອຣຫຕ຺ຕຜລໍ.

ຕຕ຺ຖ ກຕໂມ ຕິປຸກ຺ຂໂລ ນໂຍ? ເຍ ຈ ທຸກ຺ຂາຍ ປຏິປທາຍ ທນ຺ຘາຠິຎ຺ຎາຍ ຂິປ຺ປາຠິຎ຺ຎາຍ ຈ ນິຍ຺ຍນ຺ຕິ ທ຺ເວ ປຸຄ຺ຄລາ, ເຍ ຈ ສຸຂາຍ ປຏິປທາຍ ທນ຺ຘາຠິຎ຺ຎາຍ ຂິປ຺ປາຠິຎ຺ຎາຍ ຈ ນິຍ຺ຍນ຺ຕິ ທ຺ເວ ປຸຄ຺ຄລາ.

ອິເມສໍ ຈຕຸນ຺ນໍ ປຸຄ຺ຄລານໍ ໂຍ ປຸຄ຺ຄໂລ ສຸຂາຍ ປຏິປທາຍ ທນ຺ຘາຠິຎ຺ຎາຍ ນິຍ຺ຍາຕິ, ໂຍ ຈ ປຸຄ຺ຄໂລ ທຸກ຺ຂາຍ ປຏິປທາຍ ຂິປ຺ປາຠິຎ຺ຎາຍ ນິຍ຺ຍາຕິ. ອິເມ ທ຺ເວ ປຸຄ຺ຄລາ ຠວນ຺ຕິ. ຕຕ຺ຖ ໂຍ ສຸຂາຍ ປຏິປທາຍ ຂິປ຺ປາຠິຎ຺ຎາຍ ນິຍ຺ຍາຕິ, ອຍໍ ອຸຄ຺ຆຏິຕຎ຺ຎູ. ໂຍ ປຈ຺ຉິໂມ ປຸຄ຺ຄໂລ ສາຘາຣໂຓ, ອຍໍ ວິປຎ຺ຈິຕຎ຺ຎູ. ໂຍ ປຸຄ຺ຄໂລ ທນ຺ຘາຠິຎ຺ຎາຍ ທຸກ຺ຂາຍ ປຏິປທາຍ ນິຍ຺ຍາຕິ, ອຍໍ ເນຍ຺ໂຍ. ອິເມ ຈຕ຺ຕາໂຣ ຠວິຕ຺ວາ ຕີຓິ ໂຫນ຺ຕິ, ຕຕ຺ຖ ອຸຄ຺ຆຏິຕຎ຺ຎຸສ຺ສ ສມຖປຸພ຺ພງ຺ຄມາ ວິປສ຺ສນາ, ເນຍ຺ຍສ຺ສ ວິປສ຺ສນາປຸພ຺ພງ຺ຄໂມ ສມໂຖ, ວິປຎ຺ຈິຕຎ຺ຎຸສ຺ສ ສມຖວິປສ຺ສນາ ຍຸຄນທ຺ຘາ. ອຸຄ຺ຆຏິຕຎ຺ຎຸສ຺ສ ມຸທຸກາ ເທສນາ, ເນຍ຺ຍສ຺ສ ຕິກ຺ຂາ ເທສນາ, ວິປຎ຺ຈິຕຎ຺ຎຸສ຺ສ ຕິກ຺ຂມຸທຸກາ ເທສນາ.

ອຸຄ຺ຆຏິຕຎ຺ຎຸສ຺ສ ອຘິປຎ຺ຎາສິກ຺ຂາ, ເນຍ຺ຍສ຺ສ ອຘິຈິຕ຺ຕສິກ຺ຂາ, ວິປຎ຺ຈິຕຎ຺ຎຸສ຺ສ ອຘິສີລສິກ຺ຂາ. ອິຕິ ອິເມສໍ ປຸຄ຺ຄລານໍ ຈຕູຫິ ປຏິປທາຫິ ນິຍ຺ຍານໍ.

ຕຕ຺ຖ ອຍໍ ສໍກິເລໂສ, ຕີຓິ ອກຸສລມູລານິ ຕໂຍ ຜສ຺ສາ ຕິສ຺ໂສ ເວທນາ ຕໂຍ ອຸປວິຈາຣາ ຕໂຍ ສໍກິເລສາ ຕໂຍ ວິຕກ຺ກາ ຕໂຍ ປຣິຬາຫາ ຕີຓິ ສງ຺ຂຕລກ຺ຂຓານິ ຕິສ຺ໂສ ທຸກ຺ຂຕາຕິ.

ຕີຓິ ອກຸສລມູລານີຕິ ໂລໂຠ ອກຸສລມູລໍ, ໂທໂສ ອກຸສລມູລໍ, ໂມໂຫ ອກຸສລມູລໍ. ຕໂຍ ຜສ຺ສາຕິ ສຸຂເວທນີໂຍ ຜສ຺ໂສ, ທຸກ຺ຂເວທນີໂຍ ຜສ຺ໂສ, ອທຸກ຺ຂມສຸຂເວທນີໂຍ ຜສ຺ໂສ. ຕິສ຺ໂສ ເວທນາຕິ ສຸຂາ ເວທນາ ທຸກ຺ຂາ ເວທນາ ອທຸກ຺ຂມສຸຂາ ເວທນາ. ຕໂຍ ອຸປວິຈາຣາຕິ ໂສມນສ຺ໂສປວິຈາໂຣ ໂທມນສ຺ໂສປວິຈາໂຣ ອຸເປກ຺ໂຂປວິຈາໂຣ. ຕໂຍ ສໍກິເລສາຕິ ຣາໂຄ ໂທໂສ ໂມໂຫ. ຕໂຍ ວິຕກ຺ກາຕິ ກາມວິຕກ຺ໂກ ພ຺ຍາປາທວິຕກ຺ໂກ ວິຫິໍສາວິຕກ຺ໂກ. ຕໂຍ ປຣິຬາຫາຕິ ຣາຄໂຊ ໂທສໂຊ ໂມຫໂຊ. ຕີຓິ ສງ຺ຂຕລກ຺ຂຓານີຕິ ອຸປ຺ປາໂທ ຐິຕິ ວໂຍ. ຕິສ຺ໂສ ທຸກ຺ຂຕາຕິ ທຸກ຺ຂທຸກ຺ຂຕາ ວິປຣິຓາມທຸກ຺ຂຕາ ສງ຺ຂຕທຸກ຺ຂຕາ.

ຕຕ຺ຖ ໂລໂຠ ອກຸສລມູລໍ ກຸໂຕ ສມຸຏ຺ຐິຕໍ? ຕິວິຘໍ ອາຣມ຺ມຓໍ ມນາປິກໍ ອມນາປິກໍ ອຸເປກ຺ຂາຐານິຍຎ຺ຈ. ຕຕ຺ຖ ມນາປິເກນ ອາຣມ຺ມເຓນ ໂລໂຠ ອກຸສລມູລໍ ສມຸຏ຺ຐຫຕິ. ອິຕິ ມນາປິກາ ອາຣມ຺ມຓາ ສຸຂເວທນີໂຍ ຜສ຺ໂສ, ສຸຂເວທນີຍໍ ຜສ຺ສໍ ປຏິຈ຺ຈ ອຸປ຺ປຊ຺ຊເຕ ສຸຂເວທນາ, ສຸຂເວທນໍ ປຏິຈ຺ຈ ອຸປ຺ປຊ຺ຊເຕ ໂສມນສ຺ສູປວິຈາໂຣ, ໂສມນສ຺ສູປວິຈາຣໍ ປຏິຈ຺ຈ ອຸປ຺ປຊ຺ຊເຕ ຣາໂຄ, ຣາຄໍ ປຏິຈ຺ຈ ອຸປ຺ປຊ຺ຊເຕ ກາມວິຕກ຺ໂກ, ກາມວິຕກ຺ກໍ ປຏິຈ຺ຈ ອຸປ຺ປຊ຺ຊເຕ ຣາຄໂຊ ປຣິຬາໂຫ ຣາຄຊໍ ປຣິຬາຫໍ ປຏິຈ຺ຈ ອຸປ຺ປຊ຺ຊເຕ ອຸປ຺ປາໂທ ສງ຺ຂຕລກ຺ຂໂຓ, ອຸປ຺ປາທໍ ສງ຺ຂຕລກ຺ຂຓໍ ປຏິຈ຺ຈ ອຸປ຺ປຊ຺ຊເຕ ວິປຣິຓາມທຸກ຺ຂຕາ.

ໂທໂສ ອກຸສລມູລໍ ກຸໂຕ ສມຸຏ຺ຐິຕໍ? ອມນາປິເກນ ອາຣມ຺ມເຓນ ໂທໂສ ອກຸສລມູລໍ ສມຸຏ຺ຐິຕໍ. ອິຕິ ອມນາປິກາ ອາຣມ຺ມຓາ ທຸກ຺ຂເວທນີໂຍ ຜສ຺ໂສ, ທຸກ຺ຂເວທນີຍໍ ຜສ຺ສໍ ປຏິຈ຺ຈ ອຸປ຺ປຊ຺ຊເຕ ທຸກ຺ຂເວທນາ, ທຸກ຺ຂເວທນໍ ປຏິຈ຺ຈ ອຸປ຺ປຊ຺ຊເຕ ໂທມນສ຺ສູປວິຈາໂຣ, ໂທມນສ຺ສູປວິຈາຣໍ ປຏິຈ຺ຈ ອຸປ຺ປຊ຺ຊເຕ ໂທໂສ, ໂທສໍ ປຏິຈ຺ຈ ອຸປ຺ປຊ຺ຊເຕ ພ຺ຍາປາທວິຕກ຺ໂກ, ພ຺ຍາປາທວິຕກ຺ກໍ ປຏິຈ຺ຈ ອຸປ຺ປຊ຺ຊເຕ ໂທສໂຊ ປຣິຬາໂຫ, ໂທສຊໍ ປຣິຬາຫໍ ປຏິຈ຺ຈ ອຸປ຺ປຊ຺ຊເຕ ຐິຕສ຺ສ ອຎ຺ຎຖຕ຺ຕໍ ສງ຺ຂຕລກ຺ຂຓໍ, ຐິຕສ຺ສ ອຎ຺ຎຖຕ຺ຕໍ ສງ຺ຂຕລກ຺ຂຓໍ ປຏິຈ຺ຈ ອຸປ຺ປຊ຺ຊເຕ ທຸກ຺ຂທຸກ຺ຂຕາ ເວທນາ.

ໂມໂຫ ອກຸສລມູລໍ ກຸໂຕ ສມຸຏ຺ຐິຕໍ? ອຸເປກ຺ຂາຐານິເຍນ ອາຣມ຺ມເຓນ ໂມໂຫ ອກຸສລມູລໍ ສມຸຏ຺ຐິຕໍ. ອິຕິ ອຸເປກ຺ຂາຐານິຍາ ອາຣມ຺ມຓາ ອທຸກ຺ຂມສຸຂເວທນີໂຍ ຜສ຺ໂສ, ອທຸກ຺ຂມສຸຂເວທນີຍໍ ຜສ຺ສໍ ປຏິຈ຺ຈ ອຸປ຺ປຊ຺ຊເຕ ອທຸກ຺ຂມສຸຂາ ເວທນາ, ອທຸກ຺ຂມສຸຂເວທນໍ ປຏິຈ຺ຈ ອຸປ຺ປຊ຺ຊເຕ ອຸເປກ຺ຂູປວິຈາໂຣ, ອຸເປກ຺ຂູປວິຈາຣໍ ປຏິຈ຺ຈ ອຸປ຺ປຊ຺ຊເຕ ໂມໂຫ, ໂມຫໍ ປຏິຈ຺ຈ ອຸປ຺ປຊ຺ຊເຕ ວິຫິໍສາວິຕກ຺ໂກ, ວິຫິໍສາວິຕກ຺ກໍ ປຏິຈ຺ຈ ອຸປ຺ປຊ຺ຊເຕ ໂມຫໂຊ ປຣິຬາໂຫ, ໂມຫຊໍ ປຣິຬາຫໍ ປຏິຈ຺ຈ ອຸປ຺ປຊ຺ຊເຕ ວໂຍ ສງ຺ຂຕລກ຺ຂຓໍ, ວຍໍ ສງ຺ຂຕລກ຺ຂຓໍ ປຏິຈ຺ຈ ອຸປ຺ປຊ຺ຊເຕ ສງ຺ຂຕທຸກ຺ຂຕາ, ອິຕິ ອຍໍ ຕິຓ຺ຓໍ ກິເລສານໍ ນິທ຺ເທໂສ, ອຍໍ ວຸຈ຺ຈເຕ ກຸສລປກ຺ເຂ ຕິປຸກ຺ຂໂລ ນໂຍ.

ອິຕິ ຕີຓິ ອກຸສລມູລານິ ນ ຈຕຸຕ຺ຖານິ ນ ປຎ຺ຈມານິ, ຕໂຍ ຜສ຺ສາຕິ ຕິສ຺ໂສ ເວທນາ ຍາວ ສງ຺ຂຕທຸກ຺ຂຕາຕິ, ໂຍ ໂກຈິ ອກຸສລປກ຺ໂຂ, ສພ຺ໂພ ໂສ ຕີສຸ ອກຸສລມູເລສຸ ສໂມສຣຕິ.

ຕຕ຺ຖ ກຕໂມ ກຸສລປກ຺ໂຂ? ຕີຓິ ກຸສລມູລານິ, ຕິສ຺ໂສ ປຎ຺ຎາ ສຸຕມຍີ ປຎ຺ຎາ ຈິນ຺ຕາມຍີ ປຎ຺ຎາ ຠາວນາມຍີ ປຎ຺ຎາ. ຕໂຍ ສມາຘີ ສວິຕກ຺ກສວິຈາໂຣ…ເປ… ຕິສ຺ໂສ ສິກ຺ຂາ ອຘິສີລສິກ຺ຂາ…ເປ… ສິກ຺ຂາ. ຕີຓິ ນິມິຕ຺ຕານິ ສມຖນິມິຕ຺ຕໍ ປຄ຺ຄຫນິມິຕ຺ຕໍ ອຸເປກ຺ຂານິມິຕ຺ຕໍ. ຕໂຍ ວິຕກ຺ກາ ເນກ຺ຂມ຺ມວິຕກ຺ໂກ…ເປ… ອວິຫິໍສາວິຕກ຺ໂກ. ຕີຓິ ອິນ຺ທ຺ຣິຍານິ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍນ຺ຕິ ວິຕ຺ຖາໂຣ. ຕໂຍ ອຸປວິຈາຣາ ເນກ຺ຂມ຺ມູປວິຈາໂຣ ອພ຺ຍາປາທູປວິຈາໂຣ ອວິຫິໍສູປວິຈາໂຣ. ຕິສ຺ໂສ ເອສນາ ກາເມສນາ ຠເວສນາ ພ຺ຣຫ຺ມຈຣິເຍສນາ. ຕໂຍ ຂນ຺ຘາ ສີລກ຺ຂນ຺ໂຘ ສມາຘິກ຺ຂນ຺ໂຘ ປຎ຺ຎາກ຺ຂນ຺ໂຘ.

ຕຕ຺ຖ ຍໍ ອໂລໂຠ ກຸສລມູລໍ, ຕໍ ສຸຕມຍິປຎ຺ຎໍ ປຣິປູເຣຕິ, ສຸຕມຍີ ປຎ຺ຎາ ປຣິປຸຓ຺ຓາ ສວິຕກ຺ກໍ ສວິຈາຣໍ ສມາຘິໍ ປຣິປູເຣຕິ, ສວິຕກ຺ໂກ ສວິຈາໂຣ ສມາຘິ ປຣິປຸຓ຺ໂຓ ອຘິຈິຕ຺ຕສິກ຺ຂໍ ປຣິປູເຣຕິ, ອຘິຈິຕ຺ຕສິກ຺ຂາ ປຣິປຸຓ຺ຓາ ສມຖນິມິຕ຺ຕໍ ປຣິປູເຣຕິ, ສມຖນິມິຕ຺ຕໍ ປຣິປຸຓ຺ຓໍ ເນກ຺ຂມ຺ມວິຕກ຺ກໍ ປຣິປູເຣຕິ, ເນກ຺ຂມ຺ມວິຕກ຺ໂກ ປຣິປຸຓ຺ໂຓ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ປຣິປູເຣຕິ, ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ປຣິປຸຓ຺ຓໍ ເນກ຺ຂມ຺ມູປວິຈາຣໍ ປຣິປູເຣຕິ, ເນກ຺ຂມ຺ມູປວິຈາໂຣ ປຣິປຸຓ຺ໂຓ ກາເມສນໍ ປຊຫຕິ, ກາເມສນປ຺ປຫານໍ ສມາຘິກ຺ຂນ຺ຘໍ ປຣິປູເຣຕິ.

ອໂທໂສ ກຸສລມູລໍ ຈິນ຺ຕາມຍິປຎ຺ຎໍ ປຣິປູເຣຕິ, ຈິນ຺ຕາມຍີ ປຎ຺ຎາ ປຣິປຸຓ຺ຓາ ອວິຕກ຺ກວິຈາຣມຕ຺ຕໍ ສມາຘິໍ ປຣິປູເຣຕິ. ອວິຕກ຺ກວິຈາຣມຕ຺ໂຕ ສມາຘິ ປຣິປຸຓ຺ໂຓ ອຘິສີລສິກ຺ຂໍ ປຣິປູເຣຕິ, ອຘິສີລສິກ຺ຂາ ປຣິປຸຓ຺ຓາ ອຸເປກ຺ຂານິມິຕ຺ຕໍ ປຣິປູເຣຕິ, ອຸເປກ຺ຂານິມິຕ຺ຕໍ ປຣິປຸຓ຺ຓໍ ອພ຺ຍາປາທວິຕກ຺ກໍ ປຣິປູເຣຕິ, ອພ຺ຍາປາທວິຕກ຺ໂກ ປຣິປຸຓ຺ໂຓ ອຎ຺ຎິນ຺ທ຺ຣິຍໍ ປຣິປູເຣຕິ, ອຎ຺ຎິນ຺ທ຺ຣິຍໍ ປຣິປຸຓ຺ຓໍ ອພ຺ຍາປາທູປວິຈາຣໍ ປຣິປູເຣຕິ, ອພ຺ຍາປາທູປວິຈາໂຣ ປຣິປຸຓ຺ໂຓ ຠເວສນໍ ປຊຫຕິ, ຠເວສນປ຺ປຫານໍ ສີລກ຺ຂນ຺ຘໍ ປຣິປູເຣຕິ.

ອໂມໂຫ ກຸສລມູລໍ ຠາວນາມຍິປຎ຺ຎໍ ປຣິປູເຣຕິ, ຠາວນາມຍີປຎ຺ຎາ ປຣິປຸຓ຺ຓາ ອວິຕກ຺ກອວິຈາຣໍ ສມາຘິໍ ປຣິປູເຣຕິ, ອວິຕກ຺ໂກ ອວິຈາໂຣ ສມາຘິ ປຣິປຸຓ຺ໂຓ ອຘິປຎ຺ຎາສິກ຺ຂໍ ປຣິປູເຣຕິ, ອຘິປຎ຺ຎາສິກ຺ຂາ ປຣິປຸຓ຺ຓາ ປຄ຺ຄຫນິມິຕ຺ຕໍ ປຣິປູເຣຕິ, ປຄ຺ຄຫນິມິຕ຺ຕໍ ປຣິປຸຓ຺ຓໍ ອຎ຺ຎາຕາວິໂນ ອິນ຺ທ຺ຣິຍໍ ປຣິປູເຣຕິ, ອຎ຺ຎາຕາວິໂນ ອິນ຺ທ຺ຣິຍໍ ປຣິປຸຓ຺ຓໍ ອວິຫິໍສູປວິຈາຣໍ ປຣິປູເຣຕິ, ອວິຫິໍສູປວິຈາໂຣ ປຣິປຸຓ຺ໂຓ ພ຺ຣຫ຺ມຈຣິເຍສນໍ ປຣິປູເຣຕິ, ພ຺ຣຫ຺ມຈຣິເຍສນາ ປຣິປຸຓ຺ຓາ ປຎ຺ຎາກ຺ຂນ຺ຘໍ ປຣິປູເຣຕິ.

ອິຕິ ອິເມ ຕໂຍ ຘມ຺ມາ ກຸສລປກ຺ຂິກາ ສພ຺ເພ ກຸສລາ ຘມ຺ມາ ຕີຫິ ຕິກນິທ຺ເທເສຫິ ນິທ຺ທິສິຍນ຺ຕິ ຕີຓິ ວິໂມກ຺ຂມຸຂານິ ຕສ຺ສ ປຣິໂຍສານໍ. ຕຕ຺ຖ ປຐເມນ ອປ຺ປຓິຫິຕໍ, ທຸຕິເຍນ ສຸຎ຺ຎຕໍ, ຕຕິເຍນ ອນິມິຕ຺ຕໍ. ອຍໍ ວຸຈ຺ຈຕິ ທຸຕິໂຍ ຕິປຸກ຺ຂໂລ ນາມ ນໂຍ.

ຕຕ຺ຖ ເຍ ອິເມ ຕໂຍ ປຸຄ຺ຄລາ ອຸຄ຺ຆຏິຕຎ຺ຎູ ວິປຎ຺ຈິຕຎ຺ຎູ ເນຍ຺ໂຍຕິ. ອິເມສໍ ຕິຓ຺ຓໍ ປຸຄ຺ຄລານໍ ເຍ ຈ ປຸຄ຺ຄລາ ສຸຂາຍ ປຏິປທາຍ ຂິປ຺ປາຠິຎ຺ຎາຍ, ສຸຂາຍ ປຏິປທາຍ ທນ຺ຘາຠິຎ຺ຎາຍ ຈ ນິຍ຺ຍນ຺ຕິ, ເຕ ທ຺ເວ ປຸຄ຺ຄລາ. ເຍ ຈ ທ຺ເວ ປຸຄ຺ຄລາ ທຸກ຺ຂາຍ ປຏິປທາຍ ຂິປ຺ປາຠິຎ຺ຎາຍ, ທຸກ຺ຂາຍ ປຏິປທາຍ ທນ຺ຘາຠິຎ຺ຎາຍ ຈ ນິຍ຺ຍນ຺ຕິ, ອິເມ ຈຕ຺ຕາໂຣ ເຕນ ວິເສເສນ ທ຺ເວ ຠວນ຺ຕິ ທິຏ຺ຐິຈຣິໂຕ ຈ ຕຓ຺ຫາຈຣິໂຕ ຈ. ອິເມ ຈຕ຺ຕາໂຣ ຠວິຕ຺ວາ ຕໂຍ ຠວນ຺ຕິ, ຕໂຍ ຠວິຕ຺ວາ ທ຺ເວ ຠວນ຺ຕິ. ອິເມສໍ ທ຺ວິນ຺ນໍ ປຸຄ຺ຄລານໍ ອຍໍ ສໍກິເລໂສ, ອວິຊ຺ຊາ ຈ ຕຓ຺ຫາ ຈ, ອຫິຣິກຎ຺ຈ ອໂນຕ຺ຕປ຺ປຎ຺ຈ, ອສ຺ສຕິ ຈ ອສມ຺ປຊຎ຺ຎຎ຺ຈ, ນີວຣຓານິ ຈ ສໍໂຍຊນານິ ຈ, ອຊ຺ໂຌສານຎ຺ຈ ອຠິນິເວໂສ ຈ, ອຫໍກາໂຣ ຈ ມມໍກາໂຣ ຈ, ອສ຺ສທ຺ຘິຍຎ຺ຈ ໂທວຈສ຺ສຎ຺ຈ, ໂກສຊ຺ຊຎ຺ຈ ອໂຍນິໂສ ຈ ມນສິກາໂຣ, ວິຈິກິຈ຺ຉາ ຈ ອຠິຊ຺ຌາ ຈ, ອສທ຺ຘມ຺ມສ຺ສວນຎ຺ຈ ອສມາປຕ຺ຕິ ຈ.

ຕຕ຺ຖ ອວິຊ຺ຊາ ຈ ອຫິຣິກຎ຺ຈ ອສ຺ສຕິ ຈ ນີວຣຓານິ ຈ ອຊ຺ໂຌສານຎ຺ຈ ອຫໍກາໂຣ ຈ ອສ຺ສທ຺ຘິຍຎ຺ຈ ໂກສຊ຺ຊຎ຺ຈ ວິຈິກິຈ຺ຉາ ຈ ອສທ຺ຘມ຺ມສ຺ສວນຎ຺ຈ, ອຍໍ ເອກາ ທິສາ.

ຕຓ຺ຫາ ຈ ອໂນຕ຺ຕປ຺ປຎ຺ຈ ອສມ຺ປຊຎ຺ຎຎ຺ຈ ສໍໂຍຊນານິ ຈ ອຠິນິເວໂສ ຈ ມມໍກາໂຣ ຈ ໂທວຈສ຺ສຕາ ຈ ອໂຍນິໂສ ມນສິກາໂຣ ຈ ອຠິຊ຺ຌາ ຈ ອສມາປຕ຺ຕິ ຈ, ອຍໍ ທຸຕິຍາ ທິສາ. ທສນ຺ນໍ ທຸການໍ ທສ ປທານິ ປຐມານິ ກາຕພ຺ພານິ. ສໍຂິຕ຺ເຕນ ອຕ຺ຖໍ ຎາເປນ຺ຕິ ປຏິປກ຺ເຂ ກຓ຺ຫປກ຺ຂສ຺ສ ສພ຺ເພສໍ ທຸການໍ ທສ ປທານິ ທຸຕິຍການິ, ອຍໍ ທຸຕິຍາ ທິສາ.

ອິຕິ ອກຸສລານໍ ຘມ຺ມານໍ ທຸກ຺ຂນິທ຺ເທໂສ, ອຍໍ ສມຸທໂຍ. ຍໍ ຕໍ ຘມ຺ມໍ ອຊ຺ຌາວສຕິ ນາມຎ຺ຈ ຣູປຎ຺ຈ ອິທໍ ທຸກ຺ຂໍ ອິຕິ ອຍຎ຺ຈ ສມຸທໂຍ, ອິທຎ຺ຈ ທຸກ຺ຂໍ, ອິມານິ ທ຺ເວ ສຈ຺ຈານິ ທຸກ຺ຂຎ຺ຈ ສມຸທໂຍ ຈ ນນ຺ທິຍາວຏ຺ຏສ຺ສ ນຍສ຺ສ ປຐມນິທ຺ເທໂສ.

ຕຕ຺ຖ ກຕໂມ ກຸສລປກ຺ໂຂ? ສມໂຖ ຈ ວິປສ຺ສນາ ຈ, ວິຊ຺ຊາ ຈ ຈຣຓຎ຺ຈ, ສຕິ ຈ ສມ຺ປຊຎ຺ຎຎ຺ຈ, ຫິຣີ ຈ ໂອຕ຺ຕປ຺ປຎ຺ຈ, ອຫໍກາຣປ຺ປຫານຎ຺ຈ ມມໍກາຣປ຺ປຫານຎ຺ຈ, ສມ຺ມາວາຍາໂມ ຈ ໂຍນິໂສ ຈ ມນສິກາໂຣ, ສມ຺ມາສຕິ ຈ ສມ຺ມາສມາຘິ ຈ, ປຎ຺ຎາ ຈ ນິພ຺ພິທາ ຈ, ສມາປຕ຺ຕິ ຈ ສທ຺ຘມ຺ມສ຺ສວນຎ຺ຈ, ໂສມນສ຺ສຎ຺ຈ ຘມ຺ມານຸຘມ຺ມປ຺ປຏິປຕ຺ຕິ ຈ.

ຕຕ຺ຖ ສມໂຖ ຈ ວິຊ຺ຊາ ຈ ສຕິ ຈ ຫິຣີ ຈ ອຫໍກາຣປ຺ປຫານຎ຺ຈ ສມ຺ມາວາຍາໂມ ຈ ສມ຺ມາສຕິ ຈ ປຎ຺ຎາ ຈ ສມາປຕ຺ຕິ ຈ ໂສມນສ຺ສຎ຺ຈ, ອິເມ ຘມ຺ມາ ເອກາ ທິສາ. ວິປສ຺ສນາ ຈ ຈຣຓຎ຺ຈ ສມ຺ປຊຎ຺ຎຎ຺ຈ ໂອຕ຺ຕປ຺ປຎ຺ຈ ມມໍກາຣປ຺ປຫານຎ຺ຈ ໂຍນິໂສ ມນສິກາໂຣ ຈ ສມ຺ມາສມາຘິ ຈ ນິພ຺ພິທາ ຈ ສທ຺ຘມ຺ມສ຺ສວນຎ຺ຈ ຘມ຺ມານຸຘມ຺ມປ຺ປຏິປຕ຺ຕິ ຈ, ອຍໍ ທຸຕິຍາ ທິສາ. ອິຕິ ກຸສລປກ຺ເຂ ຈ ອກຸສລປກ຺ເຂ ຈ ນນ຺ທິຍາວຏ຺ຏສ຺ສ ປນ ນຍສ຺ສ ຈຕສ຺ໂສ ທິສາ.

ຕາສຸ ຍານິ ອກຸສລປກ຺ຂສ຺ສ ປຐມານິ ປທານິ ອກຸສລານິ ກຸສເລຫິ ປຫານໍ ຄຈ຺ຉນ຺ຕິ, ຕານິ ກຸສລປກ຺ເຂ ທຸຕິເຍຫິ ປເທຫິ ປຫານໍ ຄຈ຺ຉນ຺ຕິ. ເຕສໍ ປຫານາ ຣາຄວິຣາຄາ ເຈໂຕວິມຸຕ຺ຕິ ຍານິ ອກຸສລປກ຺ຂສ຺ສ ທຸຕິຍານິ ອກຸສລປທານິ ປຫານໍ ຄຈ຺ຉນ຺ຕິ, ຕານິ ກຸສລປກ຺ຂສ຺ສ ປຐເມຫິ ປເທຫິ ປຫານໍ ຄຈ຺ຉນ຺ຕິ. ເຕສໍ ປຫານາ ອວິຊ຺ຊາວິຣາຄາ ປຎ຺ຎາວິມຸຕ຺ຕິ ປຣິໂຍສານໍ. ອິເມສໍ ຕິຓ຺ຓໍ ນຍານໍ ປຐໂມ ນໂຍ ສີຫວິກ຺ກີຬິໂຕ ນາມ. ອຏ຺ຐ ປທານິ ຈຕ຺ຕາຣິ ຈ ກຸສລານິ ຈຕ຺ຕາຣິ ຈ ອກຸສລານິ ອິມານິ ອຏ຺ຐ ປທານິ ມູລປທານິ, ອຕ຺ຖນເຍນ ທຸຕິໂຍ ຕິປຸກ຺ຂໂລ. ໂສ ຉຫິ ຘມ຺ເມຫິ ເນຕິ ກຸສລມູລານິ ຈ ເນຕິ ອກຸສລມູລານິ ຈ, ອິຕິ ອິມານິ ຉ ປທານິ ປຸຣິມການິ ຈ ອຏ຺ຐ ມູລປທານິ ອິມານິ ຈຸທ຺ທສ ປທານິ ອຏ຺ຐາຣສນ຺ນໍ ມູລປທານໍ. ຕຕ຺ຖ ໂຍ ປຈ຺ຉິມໂກ ນໂຍ ນນ຺ທິຍາວຏ຺ໂຏ, ໂສ ຈຕູຫິ ຘມ຺ເມຫິ ເນຕິ. ອວິຊ຺ຊາຍ ຈ ຕຓ຺ຫາຍ ຈ ສມເຖນ ຈ ວິປສ຺ສນາຍ ຈ, ອິເມ ຈຕ຺ຕາໂຣ ຘມ຺ມາ ອິມານິ ອຏ຺ຐາຣສ ມູລປທານິ ຕີສຸ ນເຍສຸ ນິທ຺ທິຏ຺ຐານິ.

ຕຕ຺ຖ ຍານິ ນວ ປທານິ ກຸສລານິ, ຕຕ຺ຖ ສພ຺ພໍ ກຸສລໍ ສໂມສຣຕິ. ເຕສຎ຺ຈ ນວນ຺ນໍ ມູລານໍ ຈຕ຺ຕາຣິ ປທານິ ສີຫວິກ຺ກີຬິຕນເຍ ຕີຓິ ຕິປຸກ຺ຂເລ ທ຺ເວ ນນ຺ທິຍາວຏ຺ເຏ, ອິຈ຺ເຈເຕ ກຸສລສ຺ສ ປກ຺ຂາ. ຕຕ຺ຖ ຍານິ ນວ ປທານິ ກຸສລານິ, ຕຕ຺ຖ ສພ຺ພໍ ກຸສລໍ ຍຸຊ຺ຊຕິ. ຕຕ຺ຖ ສີຫວິກ຺ກີຬິເຕ ນເຍ ຈຕ຺ຕາຣິ ປທານິ ຕີຓິ ຕິປຸກ຺ຂເລ ທ຺ເວ ນນ຺ທິຍາວຏ຺ເຏ ອິມານິ ນວ ປທານິ ກຸສລານິ ນິທ຺ທິຏ຺ຐານິ.

ຕຕ຺ຖ ຍານິ ນນ຺ທິຍາວຏ຺ເຏ ນເຍ ຈຕ຺ຕາຣິ ປທານິ, ຕຕ຺ຖ ອຏ຺ຐາຣສ ມູລປທານິ ສໂມສຣນ຺ຕິ. ຍຖາ ກຖໍ, ສມໂຖ ຈ ອໂລໂຠ ຈ ອໂທໂສ ຈ ອສຸຠສຎ຺ຎາ ຈ ທຸກ຺ຂສຎ຺ຎາ ຈ ອິມານິ ກຸສລປກ຺ເຂ ປຎ຺ຈ ປທານິ ສມຖໍ ຠຊນ຺ຕິ. ວິປສ຺ສນາ ຈ ອໂມໂຫ ຈ ອນິຈ຺ຈສຎ຺ຎາ ຈ ອນຕ຺ຕສຎ຺ຎາ ຈ ອິມານິ ຈຕ຺ຕາຣິ ປທານິ ວິປສ຺ສນໍ ຠຊນ຺ຕິ. ອິມານິ ນວ ປທານິ ກຸສລານິ ທ຺ວີສຸ ປເທສຸ ໂຍຊິຕານິ, ຕຕ຺ຖ ອກຸສລປກ຺ເຂ ນວນ຺ນໍ ອກຸສລມູລປທານໍ ຍາ ຈ ຕຓ຺ຫາ ໂຍ ຈ ໂລໂຠ ໂຍ ຈ ໂທໂສ ຍາ ຈ ສຸຠສຎ຺ຎາ ຍາ ຈ ສຸຂສຎ຺ຎາ, ອິມານິ ປຎ຺ຈ ປທານິ ຕຓ຺ຫໍ ຠຊນ຺ຕິ. ຍາ ຈ ອວິຊ຺ຊາ ໂຍ ຈ ໂມໂຫ ຍາ ຈ ນິຈ຺ຈສຎ຺ຎາ ຍາ ຈ ອຕ຺ຕສຎ຺ຎາ, ອິມານິ ຈຕ຺ຕາຣິ ປທານິ ອວິຊ຺ຊໍ ຠຊນ຺ຕິ. ເອຕານິ ນວ ປທານິ ອກຸສລານິ ສຸສໍຂິຕ຺ຕານິ. ອິຕິ ຕໂຍ ນຍາ ເອກໍ ນຍໍ ນ ປວິຏ຺ຐາ. ເອວໍ ອຏ຺ຐາຣສ ມູລປທານິ ນນ຺ທິຍາວຏ຺ຏນເຍ ນິທ຺ທິສິຕພ຺ພານິ.

ກຖໍ ອຏ຺ຐາຣສ ມູລປທານິ, ຕິປຸກ຺ຂເລ ນເຍ ຍຸຊ຺ຊນ຺ຕິ? ນວນ຺ນໍ ປທານໍ ກຸສລານໍ, ວິປສ຺ສນາ ຈ ອໂມໂຫ ຈ ອນິຈ຺ຈສຎ຺ຎາ ຈ ອນຕ຺ຕສຎ຺ຎາ ຈ, ອິມານິ ຈຕ຺ຕາຣິ ປທານິ; ອໂມໂຫ ຈ ສມໂຖ ຈ ອໂລໂຠ ຈ ອສຸຠສຎ຺ຎາ ຈ, ອິມານິ ຈຕ຺ຕາຣິ ປທານິ; ໂລໂຠ ຈ ໂທໂສ ຈ, ເອວໍ ອິມານິ ນວ ປທານິ ຕີສຸ ກຸສເລສຸ ໂຍເຊຕພ຺ພານິ. ຕຕ຺ຖ ນວນ຺ນໍ ປທານໍ ອກຸສລານໍ ຕຓ຺ຫາ ຈ ໂລໂຠ ຈ ສຸຠສຎ຺ຎາ ຈ ສຸຂສຎ຺ຎາ ຈ, ອິມານິ ຈຕ຺ຕາຣິ ປທານິ ໂລໂຠ ອກຸສລມູລໍ; ອວິຊ຺ຊາ ຈ ໂມໂຫ ຈ ນິຈ຺ຈສຎ຺ຎາ ຈ ອຕ຺ຕສຎ຺ຎາ ຈ ອຍໍ ໂມໂຫ ອຍໍ ໂທໂສ, ເຍ ຈ ອິມານິ ນວ ປທານິ ຕີສຸ ອກຸສເລສຸ ໂຍຊິຕານິ. ເອວໍ ອຏ຺ຐາຣສ ມູລປທານິ ກຸສລມູເລສຸ ຈ ໂຍເຊຕ຺ວາ ຕິປຸກ຺ຂເລນ ນເຍນ ນິທ຺ທິສິຕພ຺ພານິ.

ກຖໍ ອຏ຺ຐາຣສ ມູລປທານິ ສີຫວິກ຺ກີຬິເຕ ນເຍ ຍຸຊ຺ຊນ຺ຕິ? ຕຓ຺ຫາ ຈ ສຸຠສຎ຺ຎາ ຈ, ອຍໍ ປຐໂມ ວິປລ຺ລາໂສ. ໂລໂຠ ຈ ສຸຂສຎ຺ຎາ ຈ, ອຍໍ ທຸຕິໂຍ ວິປລ຺ລາໂສ. ອວິຊ຺ຊາ ຈ ນິຈ຺ຈສຎ຺ຎາ ຈ, ອຍໍ ຕຕິໂຍ ວິປລ຺ລາໂສ. ໂມໂຫ ຈ ອຕ຺ຕສຎ຺ຎາ ຈ, ອຍໍ ຈຕຸຕ຺ໂຖ ວິປລ຺ລາໂສ. ອິຕິ ນວ ປທານິ ອກຸສລມູລານິ ຈຕູສຸ ປເທສຸ ໂຍຊິຕານິ. ຕຕ຺ຖ ນວນ຺ນໍ ມູລປທານໍ ກຸສລານໍ ສມໂຖ ຈ ອສຸຠສຎ຺ຎາ ຈ, ອິທໍ ປຐມໍ ສຕິປຏ຺ຐານໍ. ອໂລໂຠ ຈ ທຸກ຺ຂສຎ຺ຎາ ຈ, ອິທໍ ທຸຕິຍໍ ສຕິປຏ຺ຐານໍ. ວິປສ຺ສນາ ຈ ອນິຈ຺ຈສຎ຺ຎາ ຈ, ອິທໍ ຕຕິຍໍ ສຕິປຏ຺ຐານໍ. ອໂມໂຫ ຈ ອນຕ຺ຕສຎ຺ຎາ ຈ, ອິທໍ ຈຕຸຕ຺ຖໍ ສຕິປຏ຺ຐານໍ. ອິມານິ ອຏ຺ຐາຣສ ມູລປທານິ ສີຫວິກ຺ກີຬິຕນຍໍ ອນຸປວິຏ຺ຐານິ. ອິເມສໍ ຕິຓ຺ຓໍ ນຍານໍ ຍາ ຠູມິ ຈ ໂຍ ຣາໂຄ ຈ ໂຍ ໂທໂສ ຈ ເອກໍ ນຍໍ ປວິສຕິ. ເອກສ຺ສ ນຍສ຺ສ ອກຸສເລ ວາ ຘມ຺ເມ ກຸສເລ ວາ ຘມ຺ເມ ວິຎ຺ຎາເຕ ປຏິປກ຺ໂຂ ອນ຺ເວສິຕພ຺ໂພ, ປຏິປກ຺ເຂ ອນ຺ເວສິຕ຺ວາ ໂສ ນໂຍ ນິທ຺ທິສິຕພ຺ໂພ, ຕມ຺ຫິ ນເຍ ນິທ຺ທິຏ຺ໂຐ. ຍຖາ ເອກມ຺ຫິ ນເຍ ສພ຺ເພ ນຍາ ປວິຏ຺ຐາ ຕຖາ ນິທ຺ທິສິຕພ຺ພາ. ເອກມ຺ຫິ ຈ ນເຍ ອຏ຺ຐາຣສ ມູລປທານິ ປວິຏ຺ຐານິ, ຕມ຺ຫິ ຘມ຺ເມ ວິຎ຺ຎາເຕ ສພ຺ເພ ຘມ຺ມາ ວິຎ຺ຎາຕາ ໂຫນ຺ຕິ. ອິເມສໍ ຕິຓ຺ຓໍ ນຍານໍ ສີຫວິກ຺ກີຬິຕນຍສ຺ສ ຈຕ຺ຕາຣິ ຜລານິ ປຣິໂຍສານໍ. ປຐມາຍ ທິສາຍ ປຐມໍ ຜລໍ, ທຸຕິຍາຍ ທິສາຍ ທຸຕິຍໍ ຜລໍ, ຕຕິຍາຍ ທິສາຍ ຕຕິຍໍ ຜລໍ, ຈຕຸຕ຺ຖາຍ ທິສາຍ ຈຕຸຕ຺ຖໍ ຜລໍ. ຕິປຸກ຺ຂລສ຺ສ ນຍສ຺ສ ຕີຓິ ວິໂມກ຺ຂມຸຂານິ ປຣິໂຍສານໍ. ປຐມາຍ ທິສາຍ ອປ຺ປຓິຫິຕໍ, ທຸຕິຍາຍ ທິສາຍ ສຸຎ຺ຎຕໍ, ຕຕິຍາຍ ທິສາຍ ອນິມິຕ຺ຕໍ. ນນ຺ທິຍາວຏ຺ຏສ຺ສ ນຍສ຺ສ ຣາຄວິຣາຄາ ເຈໂຕວິມຸຕ຺ຕິ ອວິຊ຺ຊາວິຣາຄາ ຈ ປຎ຺ຎາວິມຸຕ຺ຕິ ປຣິໂຍສານໍ. ປຐມາຍ ທິສາຍ ຣາຄວິຣາຄາ ເຈໂຕວິມຸຕ຺ຕິ, ທຸຕິຍາຍ ທິສາຍ ອວິຊ຺ຊາວິຣາຄາ ປຎ຺ຎາວິມຸຕ຺ຕິ. ອິເມ ຕໂຍ ນຍາ ອິເມສໍ ຕິຓ຺ຓໍ ນຍານໍ ອຏ຺ຐາຣສນ຺ນໍ ມູລປທານໍ ອາໂລກນາ, ອຍໍ ວຸຈ຺ຈຕິ ທິສາໂລກໂນ [ທິສາໂລຈໂນ (ກ.)] ນໂຍ. ອາໂລເກຕ຺ວານ ຊານາຕິ ‘‘ອຍໍ ຘມ຺ໂມ ອິມໍ ຘມ຺ມໍ ຠຊຕີ’’ຕິ ສມ຺ມາ ໂຍຊນາ. ກຸສລປກ຺ເຂ ອກຸສລປກ຺ເຂ ຈ ອຍໍ ນໂຍ ອງ຺ກຸໂສ ນາມ. ອິເມ ປຎ຺ຈ ນຍາ.

ຕຕ຺ຖິມາ ອຸທ຺ທານຄາຖາ

ຕຓ຺ຫາ ຈ ອວິຊ຺ຊາປິ ຈ, ໂລໂຠ ໂທໂສ ຕເຖວ ໂມໂຫ ຈ;

ຈຕ຺ຕາໂຣ ຈ ວິປລ຺ລາສາ, ກິເລສຠູມີ ນວ ປທານິ.

ເຍ ຈ ສຕິປຏ຺ຐານາ, ສມໂຖ ຈ ວິປສ຺ສນາ ກຸສລມູລາ;

ເອຕໍ ສພ຺ພໍ ກຸສລໍ, ອິນ຺ທ຺ຣິຍຠູມີ ນວ ປທານິ.

ສພ຺ພກຸສລໍ ນວຫິ ປເທຫິ ຍຸຊ຺ຊຕິ, ນວຫິ ເຈວ ອກຸສລໍ;

ເອເຕ ເຕ ມູລປທາ, ອຸຠໂຕ ອຏ຺ຐາຣສ ປທານິ.

ຕຓ຺ຫາ ເຈວ ອວິຊ຺ຊາ ຈ, ສມໂຖ ຈ ວິປສ຺ສນາ;

ໂຍ ເນຕິ ສພ຺ເພສຸ ໂຍຄຍຸຕ຺ໂຕ, ອຍໍ ນໂຍ ນນ຺ທິຍາວຏ຺ໂຏ.

ຍໍ ກຸສລມູເລຫິ, ນຍຕິ ກຸສລອກຸສລມູເລຫິ;

ຠູຕໍ ຕຖໍ ອວິຕຖໍ, ຕິປຸກ຺ຂລໍ ຕໍ ນຍໍ ອາຫຸ.

ໂສ ເນຕິ ວິປລ຺ລາເສຫິ, ກິເລສອິນ຺ທ຺ຣິເຍຫິ ຈ;

ຘມ຺ເມ ຕໍ ນຍໍ ວິນຍມາຫຸ, ສີຫວິກ຺ກີຬິຕໍ ນາມ.

ເວຍ຺ຍາກຣເຓ ວຸຕ຺ເຕ, ກຸສລຕາຫິ ອກຸສລຕາຫິ ຈ;

ຕໂຍ ອາໂລກຍຕິ, ອຍໍ ນໂຍ ທິສາໂລຈໂນ ນາມ.

ໂອໂລເກຕ຺ວາ ທິສາໂລຈເນນ, ອຸກ຺ຂິປິຍ ຍໍ ສມາເນຕິ;

ສພ຺ເພ ກຸສລາກຸສເລ, ອຍໍ ນໂຍ ອງ຺ກຸໂສ ນາມ.

ນຍສມຸຏ຺ຐານໍ.

ເປຏໂກປເທເສ ມຫາກຈ຺ຈາຍນສ຺ສ ເຖຣສ຺ສ ສຸຕ຺ຕວິຠງ຺ຄສ຺ສ