໒. ອຸທ຺ເທສວາໂຣ

໑. ຕຕ຺ຖ ກຕເມ ໂສຬສ ຫາຣາ? ເທສນາ ວິຈໂຍ ຍຸຕ຺ຕິ ປທຏ຺ຐາໂນ ລກ຺ຂໂຓ ຈຕຸພ຺ຍູໂຫ ອາວຏ຺ໂຏ ວິຠຕ຺ຕິ ປຣິວຕ຺ຕໂນ ເວວຈໂນ ປຎ຺ຎຕ຺ຕິ ໂອຕຣໂຓ ໂສຘໂນ ອຘິຏ຺ຐາໂນ ປຣິກ຺ຂາໂຣ ສມາໂຣປໂນ ອິຕິ.

ຕສ຺ສານຸຄີຕິ

ເທສນາ ວິຈໂຍ ຍຸຕ຺ຕິ, ປທຏ຺ຐາໂນ ຈ ລກ຺ຂໂຓ;

ຈຕຸພ຺ຍູໂຫ ຈ ອາວຏ຺ໂຏ, ວິຠຕ຺ຕິ ປຣິວຕ຺ຕໂນ.

ເວວຈໂນ ຈ ປຎ຺ຎຕ຺ຕິ, ໂອຕຣໂຓ ຈ ໂສຘໂນ;

ອຘິຏ຺ຐາໂນ ປຣິກ຺ຂາໂຣ, ສມາໂຣປໂນ ໂສຬໂສ [ໂສຬສ (ສີ.)].

ເອເຕ ໂສຬສ ຫາຣາ, ປກິຕ຺ຕິຕາ ອຕ຺ຖໂຕ ອສໍກິຓ຺ຓາ;

ເອເຕສຎ຺ເຈວ ຠວຕິ, ວິຕ຺ຖາຣຕຍາ ນຍວິຠຕ຺ຕີຕິ.

໒. ຕຕ຺ຖ ກຕເມ ປຎ຺ຈ ນຍາ? ນນ຺ທິຍາວຏ຺ໂຏ ຕິປຸກ຺ຂໂລ ສີຫວິກ຺ກີຬິໂຕ ທິສາໂລຈໂນ ອງ຺ກຸໂສ ອິຕິ.

ຕສ຺ສານຸຄີຕິ

ປຐໂມ ນນ຺ທິຍາວຏ຺ໂຏ, ທຸຕິໂຍ ຈ ຕິປຸກ຺ຂໂລ;

ສີຫວິກ຺ກີຬິໂຕ ນາມ, ຕຕິໂຍ ນຍລຎ຺ຊໂກ [ນຍລຎ຺ຉໂກ (ສີ.)].

ທິສາໂລຈນມາຫໍສຸ, ຈຕຸຕ຺ຖໍ ນຍມຸຕ຺ຕມໍ;

ປຎ຺ຈໂມ ອງ຺ກຸໂສ ນາມ, ສພ຺ເພ ປຎ຺ຈ ນຍາ ຄຕາຕິ.

໓. ຕຕ຺ຖ ກຕມານິ ອຏ຺ຐາຣສ ມູລປທານິ? ນວ ປທານິ ກຸສລານິ ນວ ປທານິ ອກຸສລານິ. ຕຕ຺ຖ ກຕມານິ ນວ ປທານິ ອກຸສລານິ, ຕຓ຺ຫາ ອວິຊ຺ຊາ ໂລໂຠ ໂທໂສ ໂມໂຫ ສຸຠສຎ຺ຎາ ສຸຂສຎ຺ຎາ ນິຈ຺ຈສຎ຺ຎາ ອຕ຺ຕສຎ຺ຎາຕິ, ອິມານິ ນວ ປທານິ ອກຸສລານິ, ຍຕ຺ຖ ສພ຺ໂພ ອກຸສລປກ຺ໂຂ ສງ຺ຄຫໍ ສໂມສຣຓໍ ຄຈ຺ຉຕິ.

ຕຕ຺ຖ ກຕມານິ ນວ ປທານິ ກຸສລານິ? ສມໂຖ ວິປສ຺ສນາ ອໂລໂຠ ອໂທໂສ ອໂມໂຫ ອສຸຠສຎ຺ຎາ ທຸກ຺ຂສຎ຺ຎາ ອນິຈ຺ຈສຎ຺ຎາ ອນຕ຺ຕສຎ຺ຎາຕິ, ອິມານິ ນວ ປທານິ ກຸສລານິ, ຍຕ຺ຖ ສພ຺ໂພ ກຸສລປກ຺ໂຂ ສງ຺ຄຫໍ ສໂມສຣຓໍ ຄຈ຺ຉຕິ.

ຕຕ຺ຣິທໍ ອຸທ຺ທານໍ

ຕຓ຺ຫາ ຈ ອວິຊ຺ຊາປິ ຈ, ໂລໂຠ ໂທໂສ ຕເຖວ ໂມໂຫ ຈ;

ຈຕຸໂຣ ຈ ວິປລ຺ລາສາ, ກິເລສຠູມີ ນວ ປທານິ.

ສມໂຖ ຈ ວິປສ຺ສນາ ຈ, ກຸສລານິ ຈ ຍານິ ຕີຓິ ມູລານິ;

ຈຕຸໂຣ ສຕິປຏ຺ຐານາ, ອິນ຺ທ຺ຣິຍຠູມີ ນວ ປທານິ.

ນວຫິ ຈ ປເທຫິ ກຸສລາ, ນວຫິ ຈ ຍຸຊ຺ຊນ຺ຕິ ອກຸສລປກ຺ຂາ;

ເອເຕ ໂຂ ມູລປທາ, ຠວນ຺ຕິ ອຏ຺ຐາຣສ ປທານີຕິ.

ອຸທ຺ເທສວາໂຣ.