໓. ມຫາປຸຣິສລກ຺ຂຓປຎ຺ໂຫ

໓. ຣາຊາ ອາຫ ‘‘ຠນ຺ເຕ ນາຄເສນ, ພຸທ຺ໂຘ ທ຺ວຕ຺ຕິໍສມຫາປຸຣິສລກ຺ຂເຓຫິ ສມນ຺ນາຄໂຕ ອສີຕິຍາ ຈ ອນຸພ຺ຍຎ຺ຊເນຫິ ປຣິຣຎ຺ຊິໂຕ ສຸວຓ຺ຓວຓ຺ໂຓ ກຎ຺ຈນສນ຺ນິຠຕ຺ຕໂຈ ພ຺ຍາມປ຺ປໂຠ’’ຕິ? ‘‘ອາມ, ມຫາຣາຊ, ຠຄວາ ທ຺ວຕ຺ຕິໍສມຫາປຸຣິສລກ຺ຂເຓຫິ ສມນ຺ນາຄໂຕ ອສີຕິຍາ ຈ ອນຸພ຺ຍຎ຺ຊເນຫິ ປຣິຣຎ຺ຊິໂຕ ສຸວຓ຺ຓວຓ຺ໂຓ ກຎ຺ຈນສນ຺ນິຠຕ຺ຕໂຈ ພ຺ຍາມປ຺ປໂຠ’’ຕິ.

‘‘ກິໍ ປນສ຺ສ, ຠນ຺ເຕ, ມາຕາປິຕໂຣປິ ທ຺ວຕ຺ຕິໍສມຫາປຸຣິສລກ຺ຂເຓຫິ ສມນ຺ນາຄຕາ ອສີຕິຍາ ຈ ອນຸພ຺ຍຎ຺ຊເນຫິ ປຣິຣຎ຺ຊິຕາ ສຸວຓ຺ຓວຓ຺ຓາ ກຎ຺ຈນສນ຺ນິຠຕ຺ຕຈາ ພ຺ຍາມປ຺ປຠາ’’ຕິ? ‘‘ໂນ ຈສ຺ສ, ມຫາຣາຊ, ມາຕາປິຕໂຣ ທ຺ວຕ຺ຕິໍສມຫາປຸຣິສລກ຺ຂເຓຫິ ສມນ຺ນາຄຕາ ອສີຕິຍາ ຈ ອນຸພ຺ຍຎ຺ຊເນຫິ ປຣິຣຎ຺ຊິຕາ ສຸວຓ຺ຓວຓ຺ຓາ ກຎ຺ຈນສນ຺ນິຠຕ຺ຕຈາ ພ຺ຍາມປ຺ປຠາ’’ຕິ.

‘‘ເອວໍ ສນ຺ເຕ ໂຂ, ຠນ຺ເຕ ນາຄເສນ, ນ ອຸປ຺ປຊ຺ຊຕິ ພຸທ຺ໂຘ ທ຺ວຕ຺ຕິໍສມຫາປຸຣິສລກ຺ຂເຓຫິ ສມນ຺ນາຄໂຕ ອສີຕິຍາ ຈ ອນຸພ຺ຍຎ຺ຊເນຫິ ປຣິຣຎ຺ຊິໂຕ ສຸວຓ຺ຓວຓ຺ໂຓ ກຎ຺ຈນສນ຺ນິຠຕ຺ຕໂຈ ພ຺ຍາມປ຺ປໂຠຕິ, ອປິ ຈ ມາຕຸສທິໂສ ວາ ປຸຕ຺ໂຕ ໂຫຕິ ມາຕຸປກ຺ໂຂ ວາ, ປິຕຸສທິໂສ ວາ ປຸຕ຺ໂຕ ໂຫຕິ ປິຕຸປກ຺ໂຂ ວາ’’ຕິ. ເຖໂຣ ອາຫ ‘‘ອຕ຺ຖິ ປນ, ມຫາຣາຊ, ກິຎ຺ຈິ ປທຸມໍ ສຕປຕ຺ຕ’’ນ຺ຕິ? ‘‘ອາມ, ຠນ຺ເຕ, ອຕ຺ຖີ’’ຕິ. ‘‘ຕສ຺ສ ປນ ກຸຫິໍ ສມ຺ຠໂວ’’ຕິ? ‘‘ກທ຺ທເມ ຊາຍຕິ ອຸທເກ ອາສີຍຕີ’’ຕິ. ‘‘ກິໍນຸ ໂຂ, ມຫາຣາຊ, ປທຸມໍ ກທ຺ທເມນ ສທິສໍ ວຓ຺ເຓນ ວາ ຄນ຺ເຘນ ວາ ຣເສນ ວາ’’ຕິ? ‘‘ນ ຫິ, ຠນ຺ເຕ’’ຕິ. ‘‘ອຖ ອຸທເກນ ວາ ຄນ຺ເຘນ ວາ ຣເສນ ວາ’’ຕິ? ‘‘ນ ຫິ, ຠນ຺ເຕ’’ຕິ. ‘‘ເອວເມວ ໂຂ, ມຫາຣາຊ, ຠຄວາ ທ຺ວຕ຺ຕິໍສມຫາປຸຣິສລກ຺ຂເຓຫິ ສມນ຺ນາຄໂຕ ອສີຕິຍາ ຈ ອນຸພ຺ຍຎ຺ຊເນຫິ ປຣິຣຎ຺ຊິໂຕ ສຸວຓ຺ຓວຓ຺ໂຓ ກຎ຺ຈນສນ຺ນິຠຕ຺ຕໂຈ ພ຺ຍາມປ຺ປໂຠ, ໂນ ຈສ຺ສ ມາຕາປິຕໂຣ ທ຺ວຕ຺ຕິໍສມຫາປຸຣິສລກ຺ຂເຓຫິ ສມນ຺ນາຄຕາ ອສີຕິຍາ ຈ ອນຸພ຺ຍຎ຺ຊເນຫິ ປຣິຣຎ຺ຊິຕາ ສຸວຓ຺ຓວຓ຺ຓາ ກຎ຺ຈນສນ຺ນິຠຕ຺ຕຈາ ພ຺ຍາມປ຺ປຠາ’’ຕິ.

‘‘ກລ຺ໂລສິ, ຠນ຺ເຕ ນາຄເສນາ’’ຕິ.

ມຫາປຸຣິສລກ຺ຂຓປຎ຺ໂຫ ຕຕິໂຍ.