໖. ຣຕນສຸຕ຺ຕໍ

໑. ຍານີຘ ຠູຕານິ ສມາຄຕານິ, ຠຸມ຺ມານິ [ຠູມານິ (ກ.)] ວາ ຍານິ ວ ອນ຺ຕລິກ຺ເຂ;

ສພ຺ເພວ ຠູຕາ ສຸມນາ ຠວນ຺ຕຸ, ອໂຖປິ ສກ຺ກຈ຺ຈ ສຸຓນ຺ຕຸ ຠາສິຕໍ.

໒. ຕສ຺ມາ ຫິ ຠູຕາ ນິສາເມຖ ສພ຺ເພ, ເມຕ຺ຕໍ ກໂຣຖ ມານຸສິຍາ ປຊາຍ;

ທິວາ ຈ ຣຕ຺ໂຕ ຈ ຫຣນ຺ຕິ ເຍ ພລິໍ, ຕສ຺ມາ ຫິ ເນ ຣກ຺ຂຖ ອປ຺ປມຕ຺ຕາ.

໓. ຍໍ ກິຎ຺ຈິ ວິຕ຺ຕໍ ອິຘ ວາ ຫຸຣໍ ວາ, ສຄ຺ເຄສຸ ວາ ຍໍ ຣຕນໍ ປຓີຕໍ;

ນ ໂນ ສມໍ ອຕ຺ຖິ ຕຖາຄເຕນ, ອິທມ຺ປິ ພຸທ຺ເຘ ຣຕນໍ ປຓີຕໍ;

ເອເຕນ ສຈ຺ເຈນ ສຸວຕ຺ຖິ ໂຫຕຸ.

໔. ຂຍໍ ວິຣາຄໍ ອມຕໍ ປຓີຕໍ, ຍທຊ຺ຌຄາ ສກ຺ຍມຸນີ ສມາຫິໂຕ;

ນ ເຕນ ຘມ຺ເມນ ສມຕ຺ຖິ ກິຎ຺ຈິ, ອິທມ຺ປິ ຘມ຺ເມ ຣຕນໍ ປຓີຕໍ;

ເອເຕນ ສຈ຺ເຈນ ສຸວຕ຺ຖິ ໂຫຕຸ.

໕. ຍໍ ພຸທ຺ຘເສຏ຺ໂຐ ປຣິວຓ຺ຓຍີ ສຸຈິໍ, ສມາຘິມານນ຺ຕຣິກຎ຺ຎມາຫຸ;

ສມາຘິນາ ເຕນ ສໂມ ນ ວິຊ຺ຊຕິ, ອິທມ຺ປິ ຘມ຺ເມ ຣຕນໍ ປຓີຕໍ;

ເອເຕນ ສຈ຺ເຈນ ສຸວຕ຺ຖິ ໂຫຕຸ.

໖. ເຍ ປຸຄ຺ຄລາ ອຏ຺ຐ ສຕໍ ປສຕ຺ຖາ, ຈຕ຺ຕາຣິ ເອຕານິ ຍຸຄານິ ໂຫນ຺ຕິ;

ເຕ ທກ຺ຂິເຓຍ຺ຍາ ສຸຄຕສ຺ສ ສາວກາ, ເອເຕສຸ ທິນ຺ນານິ ມຫປ຺ຜລານິ;

ອິທມ຺ປິ ສງ຺ເຆ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໗. ເຍ ສຸປ຺ປຍຸຕ຺ຕາ ມນສາ ທຬ຺ເຫນ, ນິກ຺ກາມິໂນ ໂຄຕມສາສນມ຺ຫິ;

ເຕ ປຕ຺ຕິປຕ຺ຕາ ອມຕໍ ວິຄຍ຺ຫ, ລທ຺ຘາ ມຸຘາ ນິພ຺ພຸຕິໍ [ນິພ຺ພຸຕິ (ກ.)] ຠຸຎ຺ຊມານາ;

ອິທມ຺ປິ ສງ຺ເຆ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໘. ຍຖິນ຺ທຂີໂລ ປຖວິສ຺ສິໂຕ [ປຐວິສ຺ສິໂຕ (ກ. ສີ.), ປຖວິໍສິໂຕ (ກ. ສິ. ສ຺ຍາ. ກໍ. ປີ.)] ສິຍາ, ຈຕຸພ຺ຠິ ວາເຕຫິ ອສມ຺ປກມ຺ປິໂຍ;

ຕຖູປມໍ ສປ຺ປຸຣິສໍ ວທາມິ, ໂຍ ອຣິຍສຈ຺ຈານິ ອເວຈ຺ຈ ປສ຺ສຕິ;

ອິທມ຺ປິ ສງ຺ເຆ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໙. ເຍ ອຣິຍສຈ຺ຈານິ ວິຠາວຍນ຺ຕິ, ຄມ຺ຠີຣປຎ຺ເຎນ ສຸເທສິຕານິ;

ກິຎ຺ຈາປິ ເຕ ໂຫນ຺ຕິ ຠຸສໍ ປມຕ຺ຕາ, ນ ເຕ ຠວໍ ອຏ຺ຐມມາທິຍນ຺ຕິ;

ອິທມ຺ປິ ສງ຺ເຆ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໑໐. ສຫາວສ຺ສ ທສ຺ສນສມ຺ປທາຍ [ສຫາວສທ຺ທສ຺ສນສມ຺ປທາຍ (ກ.)], ຕຍສ຺ສຸ ຘມ຺ມາ ຊຫິຕາ ຠວນ຺ຕິ;

ສກ຺ກາຍທິຏ຺ຐີ ວິຈິກິຈ຺ຉິຕຎ຺ຈ, ສີລພ຺ພຕໍ ວາປິ ຍທຕ຺ຖິ ກິຎ຺ຈິ.

໑໑. ຈຕູຫປາເຍຫິ ຈ ວິປ຺ປມຸຕ຺ໂຕ, ຉຈ຺ຈາຠິຐານານິ [ຉ ຈາຠິຐານານິ (ສີ. ສ຺ຍາ.)] ອຠພ຺ພ ກາຕຸໍ [ອຠພ຺ໂພ ກາຕຸໍ (ສີ.)];

ອິທມ຺ປິ ສງ຺ເຆ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໑໒. ກິຎ຺ຈາປິ ໂສ ກມ຺ມ [ກມ຺ມໍ (ສີ. ສ຺ຍາ. ກໍ. ປີ.)] ກໂຣຕິ ປາປກໍ, ກາເຍນ ວາຈາ ອຸທ ເຈຕສາ ວາ;

ອຠພ຺ພ [ອຠພ຺ໂພ (ພຫູສຸ)] ໂສ ຕສ຺ສ ປຏິຈ຺ຉທາຍ [ປຏິຈ຺ຉາທາຍ (ສີ.)], ອຠພ຺ພຕາ ທິຏ຺ຐປທສ຺ສ ວຸຕ຺ຕາ;

ອິທມ຺ປິ ສງ຺ເຆ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໑໓. ວນປ຺ປຄຸມ຺ເພ ຍຖ [ຍຖາ (ສີ. ສ຺ຍາ.)] ຜຸສ຺ສິຕຄ຺ເຄ, ຄິມ຺ຫານມາເສ ປຐມສ຺ມິໍ [ປຐມສ຺ມິ (?)] ຄິມ຺ເຫ;

ຕຖູປມໍ ຘມ຺ມວຣໍ ອເທສຍິ [ອເທສຍີ (ສີ.)], ນິພ຺ພານຄາມິໍ ປຣມໍ ຫິຕາຍ;

ອິທມ຺ປິ ພຸທ຺ເຘ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໑໔. ວໂຣ ວຣຎ຺ຎູ ວຣໂທ ວຣາຫໂຣ, ອນຸຕ຺ຕໂຣ ຘມ຺ມວຣໍ ອເທສຍິ;

ອິທມ຺ປິ ພຸທ຺ເຘ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໑໕. ຂີຓໍ ປຸຣາຓໍ ນວ ນຕ຺ຖິ ສມ຺ຠວໍ, ວິຣຕ຺ຕຈິຕ຺ຕາຍຕິເກ ຠວສ຺ມິໍ;

ເຕ ຂີຓພີຊາ ອວິຣູຬ຺ຫິຉນ຺ທາ, ນິພ຺ພນ຺ຕິ ຘີຣາ ຍຖາຍໍ [ຍຖຍໍ (ກ.)] ປທີໂປ;

ອິທມ຺ປິ ສງ຺ເຆ ຣຕນໍ ປຓີຕໍ, ເອເຕນ ສຈ຺ເຈນ ສຸວຕ຺ຖິ ໂຫຕຸ.

໑໖. ຍານີຘ ຠູຕານິ ສມາຄຕານິ, ຠຸມ຺ມານິ ວາ ຍານິ ວ ອນ຺ຕລິກ຺ເຂ;

ຕຖາຄຕໍ ເທວມນຸສ຺ສປູຊິຕໍ, ພຸທ຺ຘໍ ນມສ຺ສາມ ສຸວຕ຺ຖິ ໂຫຕຸ.

໑໗. ຍານີຘ ຠູຕານິ ສມາຄຕານິ, ຠຸມ຺ມານິ ວາ ຍານິ ວ ອນ຺ຕລິກ຺ເຂ;

ຕຖາຄຕໍ ເທວມນຸສ຺ສປູຊິຕໍ, ຘມ຺ມໍ ນມສ຺ສາມ ສຸວຕ຺ຖິ ໂຫຕຸ.

໑໘. ຍານີຘ ຠູຕານິ ສມາຄຕານິ, ຠຸມ຺ມານິ ວາ ຍານິ ວ ອນ຺ຕລິກ຺ເຂ;

ຕຖາຄຕໍ ເທວມນຸສ຺ສປູຊິຕໍ, ສງ຺ຆໍ ນມສ຺ສາມ ສຸວຕ຺ຖິ ໂຫຕູຕິ.

ຣຕນສຸຕ຺ຕໍ ນິຏ຺ຐິຕໍ.