໔໑໕. ກຸມ຺ມາສປິຓ຺ຑິຊາຕກໍ (໗-໒-໑໐)

໑໔໒. ນ ກິຣຕ຺ຖິ ອໂນມທສ຺ສິສຸ, ປາຣິຈຣິຍາ ພຸທ຺ເຘສຸ ອປ຺ປິກາ [ອປ຺ປກາ (ກ.)];

ສຸກ຺ຂາຍ ອໂລຓິກາຍ ຈ, ປສ຺ສຜລໍ ກຸມ຺ມາສປິຓ຺ຑິຍາ.

໑໔໓. ຫຕ຺ຖິຄວສ຺ສາ ຈິເມ ພຫູ [ຫຕ຺ຖິຄວາສ຺ສາ ຈ ເມ ພຫູ (ສີ.), ຫຕ຺ຖີ ຄວາສ຺ສາ ຈິເມ ພຫູ (ສ຺ຍາ.), ຫຕ຺ຖີ ຄວາສ຺ສາ ຈ ເມ ພຫູ (ປີ.)], ຘນຘຎ຺ຎໍ ປຖວີ ຈ ເກວລາ;

ນາຣິໂຍ ຈິມາ ອຈ຺ຉຣູປມາ, ປສ຺ສຜລໍ ກຸມ຺ມາສປິຓ຺ຑິຍາ.

໑໔໔. ອຠິກ຺ຂຓໍ ຣາຊກຸຎ຺ຊຣ, ຄາຖາ ຠາສສິ ໂກສລາຘິປ;

ປຸຈ຺ຉາມິ ຕໍ ຣຏ຺ຐວຑ຺ຒນ, ພາຬ຺ຫໍ ປີຕິມໂນ ປຠາສສິ.

໑໔໕. ອິມສ຺ມິຎ຺ເຎວ ນຄເຣ, ກຸເລ ອຎ຺ຎຕເຣ ອຫຸໍ;

ປຣກມ຺ມກໂຣ ອາສິໍ, ຠຕໂກ ສີລສໍວຸໂຕ.

໑໔໖. ກມ຺ມາຍ ນິກ຺ຂມນ຺ໂຕຫໍ, ຈຕຸໂຣ ສມເຓທ຺ທສໍ;

ອາຈາຣສີລສມ຺ປນ຺ເນ, ສີຕິຠູເຕ ອນາສເວ.

໑໔໗. ເຕສຸ ຈິຕ຺ຕໍ ປສາເທຕ຺ວາ, ນິສີເທຕ຺ວາ [ນິສາເທຕ຺ວາ (?)] ປຓ຺ຓສນ຺ຖເຕ;

ອທໍ ພຸທ຺ຘານ ກຸມ຺ມາສໍ, ປສນ຺ໂນ ເສຫິ ປາຓິຠິ.

໑໔໘. ຕສ຺ສ ກມ຺ມສ຺ສ ກຸສລສ຺ສ, ອິທໍ ເມ ເອທິສໍ ຜລໍ;

ອນຸໂຠມິ ອິທໍ ຣຊ຺ຊໍ, ຜີຕໍ ຘຣຓິມຸຕ຺ຕມໍ.

໑໔໙. ທທໍ ຠຸຎ຺ຊ ມາ ຈ ປມາໂທ [ທທ ຠຸຎ຺ຊ ຈ ມາ ຈ ປມາໂທ (ສີ. ປີ.)], ຈກ຺ກໍ ວຕ຺ຕຍ ໂກສລາຘິປ;

ມາ ຣາຊ ອຘມ຺ມິໂກ ອຫຸ, ຘມ຺ມໍ ປາລຍ ໂກສລາຘິປ.

໑໕໐. ໂສຫໍ ຕເທວ ປຸນປ຺ປຸນໍ, ວຏຸມໍ ອາຈຣິສ຺ສາມິ ໂສຠເນ;

ອຣິຍາຈຣິຕໍ ສຸໂກສເລ, ອຣຫນ຺ໂຕ ເມ ມນາປາວ ປສ຺ສິຕຸໍ.

໑໕໑. ເທວີ ວິຍ ອຈ຺ຉຣູປມາ, ມຊ຺ເຌ ນາຣິຄຓສ຺ສ ໂສຠສິ;

ກິໍ ກມ຺ມມກາສິ ຠທ຺ທກໍ, ເກນາສິ ວຓ຺ຓວຕີ ສຸໂກສເລ.

໑໕໒. ອມ຺ພຏ຺ຐກຸລສ຺ສ ຂຕ຺ຕິຍ, ທາສ຺ຍາຫໍ ປຣເປສິຍາ ອຫຸໍ;

ສຎ຺ຎຕາ ຈ [ສຎ຺ຎຕາ (ສີ. ປີ.)] ຘມ຺ມຊີວິນີ, ສີລວຕີ ຈ ອປາປທສ຺ສນາ.

໑໕໓. ອຸທ຺ຘຏຠຕ຺ຕໍ ອຫໍ ຕທາ, ຈຣມານສ຺ສ ອທາສິ ຠິກ຺ຂຸໂນ;

ວິຕ຺ຕາ ສຸມນາ ສຍໍ ອຫໍ, ຕສ຺ສ ກມ຺ມສ຺ສ ຜລໍ ມເມທິສນ຺ຕິ.

ກຸມ຺ມາສປິຓ຺ຑິຊາຕກໍ ທສມໍ.