໔໐໒. ສຕ຺ຕຸຠສ຺ຕຊາຕກໍ (໗-໑-໗)

໔໖. ວິພ຺ຠນ຺ຕຈິຕ຺ໂຕ ກຸປິຕິນ຺ທ຺ຣິໂຍສິ, ເນຕ຺ເຕຫິ ເຕ ວາຣິຄຓາ ສວນ຺ຕິ;

ກິໍ ເຕ ນຏ຺ຐໍ ກິໍ ປນ ປຕ຺ຖຍາໂນ, ອິຘາຄມາ ພ຺ຣຫ຺ເມ ຕທິງ຺ຆ [ພ຺ຣາຫ຺ມຓ ອິງ຺ຆ (ສີ. ສ຺ຍາ.)] ພ຺ຣູຫິ.

໔໗. ມິຍ຺ເຍຖ ຠຣິຍາ ວຊໂຕ ມມຊ຺ຊ, ອຄຈ຺ຉໂຕ ມຣຓມາຫ ຍກ຺ໂຂ;

ເອເຕນ ທຸກ຺ເຂນ ປເວຘິໂຕສ຺ມິ, ອກ຺ຂາຫິ ເມ ເສນກ ເອຕມຕ຺ຖໍ.

໔໘. ພຫູນິ ຐານານິ ວິຈິນ຺ຕຍິຕ຺ວາ, ຍເມຕ຺ຖ ວກ຺ຂາມິ ຕເທວ ສຈ຺ຈໍ;

ມຎ຺ຎາມິ ເຕ ພ຺ຣາຫ຺ມຓ ສຕ຺ຕຸຠສ຺ຕໍ, ອຊານໂຕ ກຓ຺ຫສປ຺ໂປ ປວິຏ຺ໂຐ.

໔໙. ອາທາຍ ທຓ຺ຑໍ ປຣິສຸມ຺ຠ ຠສ຺ຕໍ, ປສ຺ເສຬມູຄໍ ອຸຣຄໍ ທຸຊິວ຺ຫໍ [ທິຊິວ຺ຫໍ (ສີ. ປີ.)];

ຉິນ຺ທຊ຺ຊ ກງ຺ຂໍ ວິຈິກິຈ຺ຉິຕານິ, ຠຸຊງ຺ຄມໍ ປສ຺ສ ປມຸຎ຺ຈ ຠສ຺ຕໍ.

໕໐. ສໍວິຄ຺ຄຣູໂປ ປຣິສາຍ ມຊ຺ເຌ, ໂສ ພ຺ຣາຫ຺ມໂຓ ສຕ຺ຕຸຠສ຺ຕໍ ປມຸຎ຺ຈິ;

ອຖ ນິກ຺ຂມິ ອຸຣໂຄ ອຸຄ຺ຄເຕໂຊ, ອາສີວິໂສ ສປ຺ໂປ ຜຓໍ ກຣິຕ຺ວາ.

໕໑. ສຸລທ຺ຘລາຠາ ຊນກສ຺ສ ຣຎ຺ໂຎ, ໂຍ ປສ຺ສຕີ ເສນກໍ ສາຘຸປຎ຺ຎໍ;

ວິວຏ຺ຏຉທ຺ໂທ [ວິວຕ຺ຕຈ຺ຉທ຺ໂທ (ສີ.), ວິວຏ຺ຏຈ຺ຉໂທ (ສ຺ຍາ.), ວິວຏ຺ຏຈ຺ຉທ຺ທາ (ປີ.)] ນຸສິ ສພ຺ພທສ຺ສີ, ຎາຓໍ ນຸ ເຕ ພ຺ຣາຫ຺ມຓ ຠິໍສຣູປໍ.

໕໒. ອິມານິ ເມ ສຕ຺ຕສຕານິ ອຕ຺ຖິ, ຄຓ຺ຫາຫິ ສພ຺ພານິ ທທາມິ ຕຸຍ຺ຫໍ;

ຕຍາ ຫິ ເມ ຊີວິຕມຊ຺ຊ ລທ຺ຘໍ, ອໂຖປິ ຠຣິຍາຍ ມກາສິ ໂສຕ຺ຖິໍ.

໕໓. ນ ປຓ຺ຑິຕາ ເວຕນມາທິຍນ຺ຕິ, ຈິຕ຺ຣາຫິ ຄາຖາຫິ ສຸຠາສິຕາຫິ;

ອິໂຕປິ ເຕ ພ຺ຣຫ຺ເມ ທທນ຺ຕຸ ວິຕ຺ຕໍ, ອາທາຍ ຕ຺ວໍ ຄຈ຺ຉ ສກໍ ນິເກຕນ຺ຕິ.

ສຕ຺ຕຸຠສ຺ຕຊາຕກໍ [ເສນກຊາຕກໍ (ສ຺ຍາ.)] ສຕ຺ຕມໍ.