໓໙໖. ກຸກ຺ກຸຊາຕກໍ (໗-໑-໑)

໑. ທິຍຑ຺ຒກຸກ຺ກູ ອຸທເຍນ ກຓ຺ຓິກາ, ວິທຕ຺ຖິໂຍ ອຏ຺ຐ ປຣິກ຺ຂິປນ຺ຕິ ນໍ;

ສາ ສິໍສປາ [ສສິໍສປາ (ສີ. ປີ.), ສາ ສີສປາ (ສ຺ຍາ.), ຍາ ສິໍສປາ (ກ. ສີ. ນິຍ຺ຍ)] ສາຣມຍາ ອເຜຄ຺ຄຸກາ, ກຸຫິໍ ຐິຕາ ອຸປ຺ປຣິໂຕ [ອຸປຣິໂຕ (ສີ. ສ຺ຍາ. ປີ.)] ນ ຘໍສຕິ.

໒. ຍາ ຕິໍສຕິ ສາຣມຍາ ອນຸຊ຺ຊຸກາ, ປຣິກິຣິຍ [ປກິຣິຍາ (ກ.)] ໂຄປາຓສິໂຍ ສມໍ ຐິຕາ [ສມຏ຺ຐິຕາ (ສີ. ສ຺ຍາ.)];

ຕາຫິ ສຸສງ຺ຄຫິຕາ ພລສາ ປີຬິຕາ [ຕາ ສງ຺ຄຫິຕາ ພລສາ ຈ ປີຬິຕາ (ສີ.), ຕາຫິ ສຸສງ຺ຄຫິຕາ ພລສາ ຈ ປີຬິຕາ (ສ຺ຍາ.), ຕາຫິ ສງ຺ຄຫີຕາ ພລສາ ຈ ປີຬິຕາ (ປີ.)], ສມໍ ຐິຕາ ອຸປ຺ປຣິໂຕ ນ ຘໍສຕິ.

໓. ເອວມ຺ປິ ມິຕ຺ເຕຫິ ທຬ຺ເຫຫິ ປຓ຺ຑິໂຕ, ອເຠຊ຺ຊຣູເປຫິ ສຸຈີຫິ ມນ຺ຕິຠິ;

ສຸສງ຺ຄຫີໂຕ ສິຣິຍາ ນ ຘໍສຕິ, ໂຄປາຓສີ ຠາຣວຫາວ ກຓ຺ຓິກາ.

໔. ຂຣຕ຺ຕຈໍ ເພລ຺ລໍ ຍຖາປິ ສຕ຺ຖວາ, ອນາມສນ຺ໂຕປິ ກໂຣຕິ ຕິຕ຺ຕກໍ;

ສມາຫຣໍ ສາທຸໍ ກໂຣຕິ ປຕ຺ຖິວ, ອສາທຸໍ ກຍິຣາ ຕນຸພນ຺ຘມຸທ຺ຘຣໍ [ຕນຸວຏ຺ຏມຸທ຺ຘຣໍ (ສີ. ປີ.)].

໕. ເອວມ຺ປິ ຄາມນິຄເມສຸ ປຓ຺ຑິໂຕ, ອສາຫສໍ ຣາຊຘນານິ ສງ຺ຆຣໍ;

ຘມ຺ມານຸວຕ຺ຕີ ປຏິປຊ຺ຊມາໂນ, ສ ຜາຕິ ກຍິຣາ ອວິເຫຐຍໍ ປຣໍ.

໖. ໂອທາຕມູລໍ ສຸຈິວາຣິສມ຺ຠວໍ, ຊາຕໍ ຍຖາ ໂປກ຺ຂຣຓີສຸ ອມ຺ພຸຊໍ;

ປທຸມໍ ຍຖາ ອຄ຺ຄິນິກາສິຜາລິມໍ, ນ ກທ຺ທໂມ ນ ຣໂຊ ນ ວາຣິ ລິມ຺ປຕິ.

໗. ເອວມ຺ປິ ໂວຫາຣສຸຈິໍ ອສາຫສໍ, ວິສຸທ຺ຘກມ຺ມນ຺ຕມເປຕປາປກໍ;

ນ ລິມ຺ປຕິ ກມ຺ມກິເລສ ຕາທິໂສ, ຊາຕໍ ຍຖາ ໂປກ຺ຂຣຓີສຸ ອມ຺ພຸຊນ຺ຕິ.

ກຸກ຺ກຸຊາຕກໍ ປຐມໍ.