໑. ມຓິກຸຓ຺ຑລວຄ຺ໂຄ

໓໕໑. ມຓິກຸຓ຺ຑລຊາຕກໍ (໕-໑-໑)

໑. ຊີໂນ ຣຖສ຺ສໍ ມຓິກຸຓ຺ຑເລ ຈ, ປຸຕ຺ເຕ ຈ ທາເຣ ຈ ຕເຖວ ຊີໂນ;

ສພ຺ເພສຸ ໂຠເຄສຸ ອເສສເກສຸ [ອເສສິເຕສຸ (ສີ. ປີ.), ອເສສິເກສຸ (ກ.)], ກສ຺ມາ ນ ສນ຺ຕປ຺ປສິ ໂສກກາເລ.

໒. ປຸພ຺ເພວ ມຈ຺ຈໍ ວິຊຫນ຺ຕິ ໂຠຄາ, ມຈ຺ໂຈ ວາ ເຕ [ຈ ເນ (ປີ.), ຘເນ (ກ.)] ປຸພ຺ພຕຣໍ ຊຫາຕິ;

ອສສ຺ສຕາ ໂຠຄິໂນ ກາມກາມິ, ຕສ຺ມາ ນ ໂສຈາມຫໍ ໂສກກາເລ.

໓. ອຸເທຕິ ອາປູຣຕິ ເວຕິ [ປູເຣຕິ ຂີຍຕິ (ສ຺ຍາ.)] ຈນ຺ໂທ, ອຕ຺ຖໍ ຕເປຕ຺ວານ [ອນ຺ຘໍ ຕເປຕ຺ວານ (ກ.), ອຕ຺ຖງ຺ຄເມຕ຺ວານ (ສ຺ຍາ.), ເອຕ຺ຖ ‘‘ຕເປຕ຺ວານ ອຕ຺ຖໍ ປເລຕີ’’ຕິ ສມ຺ພນ຺ໂຘ] ປເລຕິ ສູຣິໂຍ;

ວິທິຕາ [ວິຊິຕາ (ສ຺ຍາ.)] ມຍາ ສຕ຺ຕຸກ ໂລກຘມ຺ມາ, ຕສ຺ມາ ນ ໂສຈາມຫໍ ໂສກກາເລ.

໔. ອລໂສ ຄິຫີ ກາມໂຠຄີ ນ ສາຘຸ, ອສຎ຺ຎໂຕ ປພ຺ພຊິໂຕ ນ ສາຘຸ;

ຣາຊາ ນ ສາຘຸ ອນິສມ຺ມກາຣີ, ໂຍ ປຓ຺ຑິໂຕ ໂກຘໂນ ຕໍ ນ ສາຘຸ.

໕. ນິສມ຺ມ ຂຕ຺ຕິໂຍ ກຍິຣາ, ນານິສມ຺ມ ທິສມ຺ປຕິ;

ນິສມ຺ມກາຣິໂນ ຣາຊ [ຣຎ຺ໂຎ (ສີ. ສ຺ຍາ.)], ຍໂສ ກິຕ຺ຕິ ຈ ວຑ຺ຒຕີຕິ.

ມຓິກຸຓ຺ຑລຊາຕກໍ ປຐມໍ.

໓໕໒. ສຸຊາຕຊາຕກໍ (໕-໑-໒)

໖. ກິໍ ນຸ ສນ຺ຕຣມາໂນວ, ລາຍິຕ຺ວາ ຫຣິຕໍ ຕິຓໍ;

ຂາທ ຂາທາຕິ ລປສິ, ຄຕສຕ຺ຕໍ ຊຣຄ຺ຄວໍ.

໗. ນ ຫິ ອນ຺ເນນ ປາເນນ, ມໂຕ ໂຄໂຓ ສມຸຏ຺ຐເຫ;

ຕ຺ວຎ຺ຈ ຕຸຈ຺ຉໍ ວິລປສິ, ຍຖາ ຕໍ ທຸມ຺ມຕີ ຕຖາ.

໘. ຕເຖວ ຕິຏ຺ຐຕິ ສີສໍ, ຫຕ຺ຖປາທາ ຈ ວາລຘິ;

ໂສຕາ ຕເຖວ ຕິຏ຺ຐນ຺ຕິ [ໂສ ຕາຕ ຕເຖວ ຕິຏ຺ຐຕິ (ກ.)], ມຎ຺ເຎ ໂຄໂຓ ສມຸຏ຺ຐເຫ.

໙. ເນວຍ຺ຍກສ຺ສ ສີສຎ຺ຈ [ສີສໍ ວາ (ສີ. ສ຺ຍາ. ປີ.)], ຫຕ຺ຖປາທາ ຈ ທິສ຺ສເຣ;

ຣຸທໍ ມຕ຺ຕິກຖູປສ຺ມິໍ, ນນຸ ຕ຺ວຎ຺ເຎວ ທຸມ຺ມຕິ.

໑໐. ອາທິຕ຺ຕໍ ວຕ ມໍ ສນ຺ຕໍ, ຆຕສິຕ຺ຕໍວ ປາວກໍ;

ວາຣິນາ ວິຍ ໂອສິຎ຺ຈໍ [ໂອສິຎ຺ຈິ (ກ.)], ສພ຺ພໍ ນິພ຺ພາປເຍ ທຣໍ.

໑໑. ອພ຺ພຫີ [ອພ຺ພູຬ຺ຫໍ (ສີ. ສ຺ຍາ.), ອພ຺ຠູຬ຺ຫໍ (ກ.)] ວຕ ເມ ສລ຺ລໍ, ຍມາສິ ຫທຍສ຺ສິຕໍ [ໂສກໍ ຫທຍນິສ຺ສິຕໍ (ສີ. ສ຺ຍາ.)];

ໂຍ ເມ ໂສກປເຣຕສ຺ສ, ປິຕຸ ໂສກໍ ອປານຸທິ.

໑໒. ໂສຫໍ ອພ຺ພູຬ຺ຫສລ຺ໂລສ຺ມິ, ວີຕໂສໂກ ອນາວິໂລ;

ນ ໂສຈາມິ ນ ໂຣທາມິ, ຕວ ສຸຕ຺ວານ ມາຓວ.

໑໓. ເອວໍ ກໂຣນ຺ຕິ ສປ຺ປຎ຺ຎາ, ເຍ ໂຫນ຺ຕິ ອນຸກມ຺ປກາ;

ວິນິວຕ຺ເຕນ຺ຕິ ໂສກມ຺ຫາ, ສຸຊາໂຕ ປິຕຣໍ ຍຖາຕິ.

ສຸຊາຕຊາຕກໍ ທຸຕິຍໍ.

໓໕໓. ເວນສາຂຊາຕກໍ (໕-໑-໓)

໑໔. ນຍິທໍ ນິຈ຺ຈໍ ຠວິຕພ຺ພໍ ພ຺ຣຫ຺ມທຕ຺ຕ, ເຂມໍ ສຸຠິກ຺ຂໍ ສຸຂຕາ ຈ ກາເຍ;

ອຕ຺ຖຈ຺ຈເຍ ມາ ອຫຸ ສມ຺ປມູຬ຺ໂຫ, ຠິນ຺ນປ຺ລໂວ ສາຄຣສ຺ເສວ ມຊ຺ເຌ.

໑໕. ຍານິ ກໂຣຕິ ປຸຣິໂສ, ຕານິ ອຕ຺ຕນິ ປສ຺ສຕິ;

ກລ຺ຍາຓກາຣີ ກລ຺ຍາຓໍ, ປາປກາຣີ ຈ ປາປກໍ;

ຍາທິສໍ ວປເຕ ພີຊໍ, ຕາທິສໍ ຫຣເຕ ຜລໍ.

໑໖. ອິທໍ ຕທາຈຣິຍວໂຈ, ປາຣາສຣິໂຍ ຍທພ຺ຣວິ;

ມາ ສຸ [ມາ ສ຺ສຸ (ສີ. ສ຺ຍາ. ປີ.)] ຕ຺ວໍ ອກຣິ ປາປໍ, ຍໍ ຕ຺ວໍ ປຈ຺ຉາ ກຕໍ ຕເປ.

໑໗. ອຍເມວ ໂສ ປິງ຺ຄິຍ [ໂສ ປິງ຺ຄິໂຍ (ສ຺ຍາ.), ໂສປິ ຠິຍ຺ໂຍ (ກ.)] ເວນສາໂຂ, [ໂຘນສາໂຂ (ກ. ສີ. ປີ.)] ຍມ຺ຫິ ຆາຕຍິໍ ຂຕ຺ຕິຍານໍ ສຫສ຺ສໍ;

ອລງ຺ກເຕ ຈນ຺ທນສາຣານຸລິຕ຺ເຕ, ຕເມວ ທຸກ຺ຂໍ ປຈ຺ຈາຄຕໍ ມມໍ.

໑໘. ສາມາ ຈ [ສາມາປິ (ສີ. ສ຺ຍາ.)] ໂຂ ຈນ຺ທນລິຕ຺ຕຄຕ຺ຕາ [ຄຕ຺ຕີ (ກ. ສີ. ສ຺ຍາ. ປີ.)], ລຏ຺ຐີວ ໂສຠຎ຺ຊນກສ຺ສ ອຸຄ຺ຄຕາ;

ອທິສ຺ວາ [ອທິສ຺ວາວ (ສີ.)] ກາລໍ ກຣິສ຺ສາມິ ອຸພ຺ພຣິໍ, ຕໍ ເມ ອິໂຕ ທຸກ຺ຂຕຣໍ ຠວິສ຺ສຕີຕິ.

ເວນສາຂຊາຕກໍ [ໂຘນສາຂຊາຕກໍ (ກ. ສີ. ປີ.)] ຕຕິຍໍ.

໓໕໔. ອຸຣຄຊາຕກໍ (໕-໑-໔)

໑໙. ອຸຣໂຄວ ຕຈໍ ຊິຓ຺ຓໍ, ຫິຕ຺ວາ ຄຈ຺ຉຕິ ສໍ ຕນຸໍ;

ເອວໍ ສຣີເຣ ນິພ຺ໂຠເຄ, ເປເຕ ກາລງ຺ກເຕ ສຕິ.

໒໐. ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂສຈາມິ, ຄໂຕ ໂສ ຕສ຺ສ ຍາ ຄຕິ.

໒໑. ອນວ຺ຫິໂຕ ຕໂຕ ອາຄາ, ອນນຸຎ຺ຎາໂຕ [ນານຸຎ຺ຎາໂຕ (ກ.)] ອິໂຕ ຄໂຕ;

ຍຖາຄໂຕ ຕຖາ ຄໂຕ, ຕຕ຺ຖ ກາ ປຣິເທວນາ.

໒໒. ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂສຈາມິ, ຄໂຕ ໂສ ຕສ຺ສ ຍາ ຄຕິ.

໒໓. ສເຈ ໂຣເທ ກິສາ [ກິສີ (ປີ.)] ອສ຺ສໍ, ຕສ຺ສາ ເມ ກິໍ ຜລໍ ສິຍາ;

ຎາຕິມິຕ຺ຕສຸຫຊ຺ຊານໍ, ຠິຍ຺ໂຍ ໂນ ອຣຕີ ສິຍາ.

໒໔. ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂສຈາມິ, ຄໂຕ ໂສ ຕສ຺ສ ຍາ ຄຕິ.

໒໕. ຍຖາປິ ທາຣໂກ ຈນ຺ທໍ, ຄຈ຺ຉນ຺ຕມນຸໂຣທຕິ;

ເອວໍ ສມ຺ປທເມເວຕໍ, ໂຍ ເປຕມນຸໂສຈຕິ.

໒໖. ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂສຈາມິ, ຄໂຕ ໂສ ຕສ຺ສ ຍາ ຄຕິ.

໒໗. ຍຖາປິ ອຸທກກຸມ຺ໂຠ, ຠິນ຺ໂນ ອປ຺ປຏິສນ຺ຘິໂຍ;

ເອວໍ ສມ຺ປທເມເວຕໍ, ໂຍ ເປຕມນຸໂສຈຕິ.

໒໘. ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂສຈາມິ, ຄໂຕ ໂສ ຕສ຺ສ ຍາ ຄຕີຕິ.

ອຸຣຄຊາຕກໍ ຈຕຸຕ຺ຖໍ.

໓໕໕. ຆຏຊາຕກໍ (໕-໑-໕)

໒໙. ອຎ຺ເຎ ໂສຈນ຺ຕິ ໂຣທນ຺ຕິ, ອຎ຺ເຎ ອສ຺ສຸມຸຂາ ຊນາ;

ປສນ຺ນມຸຂວຓ຺ໂຓສິ, ກສ຺ມາ ຆຏ [ຆຕ (ສີ. ປີ.)] ນ ໂສຈສິ.

໓໐. ນາພ຺ຠຕີຕຫໂຣ ໂສໂກ, ນານາຄຕສຸຂາວໂຫ;

ຕສ຺ມາ ຘງ຺ກ [ວໍກ (ປີ.)] ນ ໂສຈາມິ, ນຕ຺ຖິ ໂສເກ ທຸຕີຍຕາ [ໂສໂກ ທຸຕີຍກາ (ກ.)].

໓໑. ໂສຈໍ ປຓ຺ຑຸ ກິໂສ ໂຫຕິ, ຠຕ຺ຕຎ຺ຈສ຺ສ ນ ຣຸຈ຺ຈຕິ;

ອມິຕ຺ຕາ ສຸມນາ ໂຫນ຺ຕິ, ສລ຺ລວິທ຺ຘສ຺ສ ຣຸປ຺ປໂຕ.

໓໒. ຄາເມ ວາ ຍທິ ວາຣຎ຺ເຎ, ນິນ຺ເນ ວາ ຍທິ ວາ ຖເລ;

ຐິຕໍ ມໍ ນາຄມິສ຺ສຕິ, ເອວໍ ທິຏ຺ຐປໂທ ອຫໍ.

໓໓. ຍສ຺ສຕ຺ຕາ ນາລເມໂກວ, ສພ຺ພກາມຣສາຫໂຣ;

ສພ຺ພາປິ ປຖວີ ຕສ຺ສ, ນ ສຸຂໍ ອາວຫິສ຺ສຕີຕິ.

ຆຏຊາຕກໍ ປຎ຺ຈມໍ.

໓໕໖. ໂກຣຓ຺ຑິຍຊາຕກໍ (໕-໑-໖)

໓໔. ເອໂກ ອຣຎ຺ເຎ ຄິຣິກນ຺ທຣາຍໍ, ປຄ຺ຄຍ຺ຫ ປຄ຺ຄຍ຺ຫ ສິລໍ ປເວຈ຺ຉສິ [ປເວຊ຺ຌສິ (ສ຺ຍາ. ສີ. ອຏ຺ຐ.)];

ປຸນປ຺ປຸນໍ ສນ຺ຕຣມານຣູໂປ, ໂກຣຓ຺ຑິຍ [ກາຣຓ຺ຑິຍ (ສີ. ສ຺ຍາ. ປີ.)] ໂກ ນຸ ຕວ ຍິຘຕ຺ໂຖ.

໓໕. ອຫຎ຺ຫິມໍ ສາຄຣ ເສວິຕນ຺ຕໍ, ສມໍ ກຣິສ຺ສາມິ ຍຖາປິ ປາຓິ;

ວິກິຣິຍ ສານູນິ ຈ ປພ຺ພຕານິ ຈ, ຕສ຺ມາ ສິລໍ ທຣິຍາ ປກ຺ຂິປາມິ.

໓໖. ນຍິມໍ ມຫິໍ ອຣຫຕິ ປາຓິກປ຺ປໍ, ສມໍ ມນຸສ຺ໂສ ກຣຓາຍ ເມໂກ;

ມຎ຺ຎາມິມຎ຺ເຎວ ທຣິໍ ຊິຄີສໍ [ຊິຄິໍສໍ (ສີ. ສ຺ຍາ. ປີ.)], ໂກຣຓ຺ຑິຍ ຫາຫສິ [ຫາຍສິ (ສ຺ຍາ. ກ.)] ຊີວໂລກໍ.

໓໗. ສເຈ ອຫໍ [ອຍໍ (ສີ. ສ຺ຍາ. ປີ.)] ຠູຕຘຣໍ ນ ສກ຺ກາ [ສກ຺ໂກ (ສ຺ຍາ. ກ.)], ສມໍ ມນຸສ຺ໂສ ກຣຓາຍ ເມໂກ;

ເອວເມວ ຕ຺ວໍ ພ຺ຣຫ຺ເມ ອິເມ ມນຸສ຺ເສ, ນານາທິຏ຺ຐິເກ ນານຍິສ຺ສສິ ເຕ [ເນ (ກ.)].

໓໘. ສງ຺ຂິຕ຺ຕຣູເປນ ຠວໍ ມມຕ຺ຖໍ, ອກ຺ຂາສິ ໂກຣຓ຺ຑິຍ ເອວເມຕໍ;

ຍຖາ ນ ສກ຺ກາ ປຖວີ ສມາຍໍ, ກຕ຺ຕຸໍ ມນຸສ຺ເສນ ຕຖາ ມນຸສ຺ສາຕິ.

ໂກຣຓ຺ຑິຍຊາຕກໍ ຉຏ຺ຐໍ.

໓໕໗. ລຏຸກິກຊາຕກໍ (໕-໑-໗)

໓໙. ວນ຺ທາມິ ຕໍ ກຸຎ຺ຊຣ ສຏ຺ຐິຫາຍນໍ, ອາຣຎ຺ຎກໍ ຍູຖປຕິໍ ຍສສ຺ສິໍ;

ປກ຺ເຂຫິ ຕໍ ປຎ຺ຊລິກໍ ກໂຣມິ, ມາ ເມ ວຘີ ປຸຕ຺ຕເກ ທຸພ຺ພລາຍ.

໔໐. ວນ຺ທາມິ ຕໍ ກຸຎ຺ຊຣ ເອກຈາຣິໍ, ອາຣຎ຺ຎກໍ ປພ຺ພຕສານຸໂຄຈຣໍ;

ປກ຺ເຂຫິ ຕໍ ປຎ຺ຊລິກໍ ກໂຣມິ, ມາ ເມ ວຘີ ປຸຕ຺ຕເກ ທຸພ຺ພລາຍ;

໔໑. ວມິສ຺ສາມິ ເຕ ລຏຸກິເກ ປຸຕ຺ຕການິ, ກິໍ ເມ ຕຸວໍ ກາຫສິ ທຸພ຺ພລາສິ;

ສຕໍ ສຫສ຺ສານິປິ ຕາທິສີນໍ, ວາເມນ ປາເທນ ປໂປຖເຍຍ຺ຍໍ.

໔໒. ນ ເຫວ ສພ຺ພຕ຺ຖ ພເລນ ກິຈ຺ຈໍ, ພລຎ຺ຫິ ພາລສ຺ສ ວຘາຍ ໂຫຕິ;

ກຣິສ຺ສາມິ ເຕ ນາຄຣາຊາ ອນຕ຺ຖໍ, ໂຍ ເມ ວຘີ ປຸຕ຺ຕເກ ທຸພ຺ພລາຍ.

໔໓. ກາກຎ຺ຈ ປສ຺ສ ລຏຸກິກໍ, ມຓ຺ຑູກໍ ນີລມກ຺ຂິກໍ;

ເອເຕ ນາຄໍ ອຆາເຕສຸໍ, ປສ຺ສ ເວຣສ຺ສ ເວຣິນໍ;

ຕສ຺ມາ ຫິ ເວຣໍ ນ ກຍິຣາຖ, ອປ຺ປິເຍນປິ ເກນຈີຕິ.

ລຏຸກິກຊາຕກໍ ສຕ຺ຕມໍ.

໓໕໘. ຈູຬຘມ຺ມປາລຊາຕກໍ (໕-໑-໘)

໔໔. ອຫເມວ ທູສິຍາ ຠູນຫຕາ, ຣຎ຺ໂຎ ມຫາປຕາປສ຺ສ;

ເອຕໍ ມຸຎ຺ຈຕຸ ຘມ຺ມປາລໍ, ຫຕ຺ເຖ ເມ ເທວ ເຉເທຫິ.

໔໕. ອຫເມວ ທູສິຍາ ຠູນຫຕາ, ຣຎ຺ໂຎ ມຫາປຕາປສ຺ສ;

ເອຕໍ ມຸຎ຺ຈຕຸ ຘມ຺ມປາລໍ, ປາເທ ເມ ເທວ ເຉເທຫິ.

໔໖. ອຫເມວ ທູສິຍາ ຠູນຫຕາ, ຣຎ຺ໂຎ ມຫາປຕາປສ຺ສ;

ເອຕໍ ມຸຎ຺ຈຕຸ ຘມ຺ມປາລໍ, ສີສໍ ເມ ເທວ ເຉເທຫິ.

໔໗. ນ ຫິ [ນຫ (ສີ. ສ຺ຍາ. ປີ.) ເອຕ຺ຖ ຫ-ກາໂຣ ເຂເທ] ນູນິມສ຺ສ ຣຎ຺ໂຎ, ມິຕ຺ຕາມຈ຺ຈາ ຈ ວິຊ຺ຊເຣ ສຸຫທາ;

ເຍ ນ ວທນ຺ຕິ ຣາຊານໍ, ມາ ຆາຕຍິ ໂອຣສໍ ປຸຕ຺ຕໍ.

໔໘. ນ ຫິ [ນຫ (ສີ. ສ຺ຍາ. ປີ.) ເອຕ຺ຖ ຫ-ກາໂຣ ເຂເທ] ນູນິມສ຺ສ ຣຎ຺ໂຎ, ຎາຕີ ມິຕ຺ຕາ ຈ ວິຊ຺ຊເຣ ສຸຫທາ;

ເຍ ນ ວທນ຺ຕິ ຣາຊານໍ, ມາ ຆາຕຍິ ອຕ຺ຣຊໍ ປຸຕ຺ຕໍ.

໔໙. ຈນ຺ທນສາຣານຸລິຕ຺ຕາ, ພາຫາ ຉິຊ຺ຊນ຺ຕິ ຘມ຺ມປາລສ຺ສ;

ທາຍາທສ຺ສ ປຖພ຺ຍາ, ປາຓາ ເມ ເທວ ຣຸຊ຺ຌນ຺ຕີຕິ.

ຈູຬຘມ຺ມປາລຊາຕກໍ ອຏ຺ຐມໍ.

໓໕໙. ສຸວຓ຺ຓມິຄຊາຕກໍ (໕-໑-໙)

໕໐. ວິກ຺ກມ ເຣ ຫຣິປາທ [ມຫາມິຄ (ສີ. ສ຺ຍາ. ປີ.)], ວິກ຺ກມ ເຣ ມຫາມິຄ [ຫຣີປທ (ສີ. ສ຺ຍາ. ປີ.)];

ຉິນ຺ທ ວາຣຕ຺ຕິກໍ ປາສໍ, ນາຫໍ ເອກາ ວເນ ຣເມ.

໕໑. ວິກ຺ກມາມິ ນ ປາເຣມິ, ຠູມິໍ ສຸມ຺ຠາມິ ເວຄສາ;

ທຬ຺ໂຫ ວາຣຕ຺ຕິໂກ ປາໂສ, ປາທໍ ເມ ປຣິກນ຺ຕຕິ.

໕໒. ອຕ຺ຖຣສ຺ສຸ ປລາສານິ, ອສິໍ ນິພ຺ພາຫ ລຸທ຺ທກ;

ປຐມໍ ມໍ ວຘິຕ຺ວານ, ຫນ ປຈ຺ຉາ ມຫາມິຄໍ.

໕໓. ນ ເມ ສຸຕໍ ວາ ທິຏ຺ຐໍ ວາ, ຠາສນ຺ຕິໍ ມານຸສິໍ ມິຄິໍ [ນ ເມ ສຸຕາ ວາ ທິຏ຺ຐາ ວາ, ຠາສນ຺ຕີ ມານຸສິໍ ມິຄີ (ຏີກາ)];

ຕ຺ວຎ຺ຈ ຠທ຺ເທ ສຸຂີ ໂຫຫິ, ເອໂສ ຈາປິ ມຫາມິໂຄ.

໕໔. ເອວໍ ລຸທ຺ທກ ນນ຺ທສ຺ສຸ, ສຫ ສພ຺ເພຫິ ຎາຕິຠິ;

ຍຖາຫມຊ຺ຊ ນນ຺ທາມິ, ມຸຕ຺ຕໍ ທິສ຺ວາ ມຫາມິຄນ຺ຕິ.

ສຸວຓ຺ຓມິຄຊາຕກໍ ນວມໍ.

໓໖໐. ສຸໂຍນນ຺ທີຊາຕກໍ (໕-໑-໑໐)

໕໕. ວາຕິ ຄນ຺ໂຘ ຕິມິຣານໍ, ກຸສມຸທ຺ໂທ ຈ [ວ (ສ຺ຍາ. ປີ.)] ໂຆສວາ;

ທູເຣ ອິໂຕ ສຸໂຍນນ຺ທີ [ອິໂຕ ຫິ ສຸສນ຺ທີ (ສີ. ສ຺ຍາ.), ອິໂຕປິ ສຸສ຺ໂສນ຺ທີ (ປີ.)], ຕມ຺ພກາມາ ຕຸທນ຺ຕິ ມໍ.

໕໖. ກຖໍ ສມຸທ຺ທມຕຣິ, ກຖໍ ອທ຺ທກ຺ຂິ ເສທຸມໍ [ເສຣຸມໍ (ສີ. ສ຺ຍາ. ປີ.)];

ກຖໍ ຕສ຺ສາ ຈ ຕຸຍ຺ຫຎ຺ຈ, ອຫຸ ສຄ຺ຄ [ອຄ຺ຄ (ສີ. ສ຺ຍາ.)] ສມາຄໂມ.

໕໗. ກຸຣຸກຈ຺ຉາ [ຠຣຸກຈ຺ຉາ (ສີ. ສ຺ຍາ. ປີ.)] ປຍາຕານໍ, ວາຓິຊານໍ ຘເນສິນໍ;

ມກເຣຫິ ອຠິທາ [ມກເຣຫິພ຺ຠິທາ (ສີ.), ມກເຣຫິ’ຠິທາ (ສ຺ຍາ.), ມກເຣຫິ ຠິນ຺ນາ (ປີ.)] ນາວາ, ຜລເກນາຫມປ຺ລວິໍ.

໕໘. ສາ ມໍ ສຓ຺ເຫນ ມຸທຸນາ, ນິຈ຺ຈໍ ຈນ຺ທນຄນ຺ຘິນີ;

ອງ຺ເຄນ [ອງ຺ເກນ (ປີ. ກ.)] ອຸທ຺ຘຣີ ຠທ຺ທາ, ມາຕາ ປຸຕ຺ຕໍວ ໂອຣສໍ.

໕໙. ສາ ມໍ ອນ຺ເນນ ປາເນນ, ວຕ຺ເຖນ ສຍເນນ ຈ;

ອຕ຺ຕນາປິ ຈ ມນ຺ທກ຺ຂີ, ເອວໍ ຕມ຺ພ ວິຊານາຫີຕິ.

ສຸໂຍນນ຺ທີຊາຕກໍ ທສມໍ.

ມຓິກຸຓ຺ຑລວຄ຺ໂຄ ປຐໂມ.

ຕສ຺ສຸທ຺ທານໍ –

ອຖ ຊິນວໂຣ ຫຣິຕໍ ຕິຓໂກ, ອຖ ຠິນ຺ນປ຺ລໂວ ອຸຣໂຄວ ຆໂຏ;

ທຣິຍາ ປຸນ ກຸຎ຺ຊຣ ຠູນຫຕາ, ມິຄມຸຕ຺ຕມສຄ຺ຄວເຣນ ທສາຕິ.