໓. ອຸທປານວຄ຺ໂຄ

໒໗໑. ອຸທປານທູສກຊາຕກໍ (໓-໓-໑)

໖໑. ອາຣຎ຺ຎິກສ຺ສ ອິສິໂນ, ຈິຣຣຕ຺ຕໍ ຕປສ຺ສິໂນ;

ກິຈ຺ຉາກຕໍ ອຸທປານໍ, ກຖໍ ສມ຺ມ ອວາຫສິ [ອວາຫຍິ (ສີ. ປີ.), ອປາຫສິ (ສ຺ຍາ.)].

໖໒. ເອສ ຘມ຺ໂມ ສິງ຺ຄາລານໍ, ຍໍ ປິຕ຺ວາ ໂອຫທາມເສ;

ປິຕຸປິຕາມຫໍ ຘມ຺ໂມ, ນ ຕໍ [ນ ນໍ (ສີ. ປີ.)] ອຸຊ຺ຌາຕຸມຣຫສິ.

໖໓. ເຍສໍ ໂວ ເອທິໂສ ຘມ຺ໂມ, ອຘມ຺ໂມ ປນ ກີທິໂສ;

ມາ ໂວ ຘມ຺ມໍ ອຘມ຺ມໍ ວາ, ອທ຺ທສາມ ກຸທາຈນນ຺ຕິ.

ອຸທປານທູສກຊາຕກໍ ປຐມໍ.

໒໗໒. ພ຺ຍຄ຺ຆຊາຕກໍ (໓-໓-໒)

໖໔. ເຍນ ມິຕ຺ເຕນ ສໍສຄ຺ຄາ, ໂຍຄກ຺ເຂໂມ ວິຫິຍ຺ຍຕິ;

ປຸພ຺ເພວຊ຺ຌາຠວໍ ຕສ຺ສ, ຣຸກ຺ເຂ ອກ຺ຂີວ ປຓ຺ຑິໂຕ.

໖໕. ເຍນ ມິຕ຺ເຕນ ສໍສຄ຺ຄາ, ໂຍຄກ຺ເຂໂມ ປວຑ຺ຒຕິ;

ກເຣຍ຺ຍຕ຺ຕສມໍ ວຸຕ຺ຕິໍ, ສພ຺ພກິຈ຺ເຈສຸ ປຓ຺ຑິໂຕ.

໖໖. ເອຖ ພ຺ຍຄ຺ຆາ ນິວຕ຺ຕວ຺ໂຫ, ປຈ຺ຈຸເປຖ [ປຈ຺ຈເມຖ (ສີ. ປີ.)] ມຫາວນໍ;

ມາ ວນໍ ຉິນ຺ທິ ນິພ຺ຍຄ຺ຆໍ, ພ຺ຍຄ຺ຆາ ມາເຫສຸ ນິພ຺ພນາຕິ.

ພ຺ຍຄ຺ຆຊາຕກໍ ທຸຕິຍໍ.

໒໗໓. ກຈ຺ຉປຊາຕກໍ (໓-໓-໓)

໖໗. ໂກ ນຸ ອຸທ຺ຘິຕຠຕ຺ໂຕວ [ອຸທ຺ທິຕຠຕ຺ໂຕວ (ສີ.), ວຑ຺ຒິຕຠຕ຺ໂຕວ (ສ຺ຍາ.)], ປູຣຫຕ຺ໂຖວ ພ຺ຣາຫ຺ມໂຓ;

ກຫໍ ນຸ ຠິກ຺ຂໍ ອຈຣິ, ກໍ ສທ຺ຘໍ ອຸປສງ຺ກມິ.

໖໘. ອຫໍ ກປິສ຺ມິ ທຸມ຺ເມໂຘ, ອນາມາສານິ ອາມສິໍ;

ຕ຺ວໍ ມໍ ໂມຈຍ ຠທ຺ທນ຺ເຕ, ມຸຕ຺ໂຕ ຄຈ຺ເຉຍ຺ຍ ປພ຺ພຕໍ.

໖໙. ກຈ຺ຉປາ ກສ຺ສປາ ໂຫນ຺ຕິ, ໂກຓ຺ຑຎ຺ຎາ ໂຫນ຺ຕິ ມກ຺ກຏາ;

ມຸຎ຺ຈ ກສ຺ສປ ໂກຓ຺ຑຎ຺ຎໍ, ກຕໍ ເມຖຸນກໍ ຕຍາຕິ.

ກຈ຺ຉປຊາຕກໍ ຕຕິຍໍ.

໒໗໔. ໂລລຊາຕກໍ (໓-໓-໔)

໗໐. ກາຍໍ ພລາກາ ສິຂິນີ, ໂຈຣີ ລງ຺ຆິປິຕາມຫາ;

ໂອຣໍ ພລາເກ ອາຄຈ຺ຉ, ຈຓ຺ໂຑ ເມ ວາຍໂສ ສຂາ.

໗໑. ນາຫໍ ພລາກາ ສິຂິນີ, ອຫໍ ໂລໂລສ຺ມິ ວາຍໂສ;

ອກຕ຺ວາ ວຈນໍ ຕຸຍ຺ຫໍ, ປສ຺ສ ລູໂນສ຺ມິ ອາຄໂຕ.

໗໒. ປຸນປາປຊ຺ຊສີ ສມ຺ມ, ສີລຎ຺ຫິ ຕວ ຕາທິສໍ;

ນ ຫິ ມານຸສກາ ໂຠຄາ, ສຸຠຸຎ຺ຊາ ໂຫນ຺ຕິ ປກ຺ຂິນາຕິ.

ໂລລຊາຕກໍ ຈຕຸຕ຺ຖໍ.

໒໗໕. ຣຸຈິຣຊາຕກໍ (໓-໓-໕)

໗໓. ກາຍໍ ພລາກາ ຣຸຈິຣາ, ກາກນີຬສ຺ມິມຈ຺ຉຕິ;

ຈຓ຺ໂຑ ກາໂກ ສຂາ ມຍ຺ຫໍ, ຍສ຺ສ [ຕສ຺ສ (ສີ. ປີ.)] ເຈຕໍ ກຸລາວກໍ.

໗໔. ນນຸ ມໍ ສມ຺ມ ຊານາສິ, ທິຊ ສາມາກໂຠຊນ;

ອກຕ຺ວາ ວຈນໍ ຕຸຍ຺ຫໍ, ປສ຺ສ ລູໂນສ຺ມິ ອາຄໂຕ.

໗໕. ປຸນປາປຊ຺ຊສີ ສມ຺ມ, ສີລຎ຺ຫິ ຕວ ຕາທິສໍ;

ນ ຫິ ມານຸສກາ ໂຠຄາ, ສຸຠຸຎ຺ຊາ ໂຫນ຺ຕິ ປກ຺ຂິນາຕິ.

ຣຸຈິຣຊາຕກໍ ປຎ຺ຈມໍ.

໒໗໖. ກຸຣຸຘມ຺ມຊາຕກໍ (໓-໓-໖)

໗໖. ຕວ ສທ຺ຘຎ຺ຈ ສີລຎ຺ຈ, ວິທິຕ຺ວານ ຊນາຘິປ;

ວຓ຺ຓໍ ອຎ຺ຊນວຓ຺ເຓນ, ກາລິງ຺ຄສ຺ມິໍ ນິມິມ຺ຫເສ [ວິນິມ຺ຫເສ (ສ຺ຍາ.), ວນິມ຺ຫເສ (ກ.)].

໗໗. ອນ຺ນຠຈ຺ຈາ ຈຠຈ຺ຈາ ຈ, ໂຍຘ ອຸທ຺ທິສ຺ສ ຄຈ຺ຉຕິ;

ສພ຺ເພ ເຕ ອປ຺ປຏິກ຺ຂິປ຺ປາ, ປຸພ຺ພາຈຣິຍວໂຈ ອິທໍ.

໗໘. ທທາມິ ໂວ ພ຺ຣາຫ຺ມຓາ ນາຄເມຕໍ, ຣາຊາຣຫໍ ຣາຊໂຠຄ຺ຄໍ ຍສສ຺ສິນໍ;

ອລງ຺ກຕໍ ເຫມຊາລາຠິຉນ຺ນໍ, ສສາຣຖິໍ ຄຈ຺ຉຖ ເຍນ ກາມນ຺ຕິ.

ກຸຣຸຘມ຺ມຊາຕກໍ [ກຸຣຸຘມ຺ມຊາຕກໍ (ສີ. ສ຺ຍາ. ປີ.)] ຉຏ຺ຐໍ.

໒໗໗. ໂຣມກຊາຕກໍ (໓-໓-໗)

໗໙. ວສ຺ສານິ ປຎ຺ຎາສ ສມາຘິການິ, ວສິມ຺ຫ ເສລສ຺ສ ຄຸຫາຍ ໂຣມກ;

ອສງ຺ກມານາ ອຠິນິພ຺ພຸຕຕ຺ຕາ [ອຠິນິພ຺ພຸຕຈິຕ຺ຕາ (ສ຺ຍາ. ກ.)], ຫຕ຺ຖຕ຺ຕ [ຫຕ຺ຖຕ຺ຖ (ສ຺ຍາ.)] ມາຍນ຺ຕິ ມມຓ຺ຑຊາ ປຸເຣ.

໘໐. ເຕ ທານິ ວກ຺ກງ຺ຄ ກິມຕ຺ຖມຸສ຺ສຸກາ, ຠຊນ຺ຕິ ອຎ຺ຎໍ ຄິຣິກນ຺ທຣໍ ທິຊາ;

ນ ນູນ ມຎ຺ຎນ຺ຕິ ມມໍ ຍຖາ ປຸເຣ, ຈິຣປ຺ປວຸຕ຺ຖາ ອຖ ວາ ນ ເຕ ອິເມ.

໘໑. ຊານາມ ຕໍ ນ ມຍໍ ສມ຺ປມູຬ຺ຫາ [ນ ມຍ’ມສ຺ມ ມູຬ຺ຫາ (ສີ. ປີ.)], ໂສເຍວ ຕ຺ວໍ ເຕ ມຍມສ຺ມ ນາຎ຺ເຎ;

ຈິຕ຺ຕຎ຺ຈ ເຕ ອສ຺ມິໍ ຊເນ ປທຸຏ຺ຐໍ, ອາຊີວິກາ [ອາຊີວກ (ສີ. ສ຺ຍາ.), ອາຊີວິກ (ປີ.)] ເຕນ ຕມຸຕ຺ຕສາມາຕິ.

ໂຣມກຊາຕກໍ ສຕ຺ຕມໍ.

໒໗໘. ມຫິໍສຣາຊຊາຕກໍ (໓-໓-໘)

໘໒. ກິມຕ຺ຖ [ກມຕ຺ຖ (ສີ. ປີ.)] ມຠິສນ຺ຘາຍ, ລຫຸຈິຕ຺ຕສ຺ສ ທຸພ຺ຠິໂນ [ທູຠິໂນ (ສີ. ປີ.)];

ສພ຺ພກາມທທສ຺ເສວ [ທຸຫສ຺ເສວ (ສີ. ສ຺ຍາ. ປີ.), ຣຫສ຺ເສວ (ກ.)], ອິມໍ ທຸກ຺ຂໍ ຕິຕິກ຺ຂສິ.

໘໓. ສິງ຺ເຄນ ນິຫນາເຫຕໍ, ປທສາ ຈ ອຘິຏ຺ຐຫ;

ຠິຍ຺ໂຍ [ຠີໂຍ (ສີ.)] ພາລາ ປກຸຊ຺ເຌຍ຺ຍຸໍ, ໂນ ຈສ຺ສ ປຏິເສຘໂກ.

໘໔. ມເມວາຍໍ ມຎ຺ຎມາໂນ, ອຎ຺ເຎເປວໍ [ອຎ຺ຎມ຺ເປວໍ (ສີ. ສ຺ຍາ. ປີ.)] ກຣິສ຺ສຕິ;

ເຕ ນໍ ຕຕ຺ຖ ວຘິສ຺ສນ຺ຕິ, ສາ ເມ ມຸຕ຺ຕິ ຠວິສ຺ສຕີຕິ.

ມຫິໍສຣາຊຊາຕກໍ [ມຫິສຊາຕກໍ (ສີ. ສ຺ຍາ. ປີ.)] ອຏ຺ຐມໍ.

໒໗໙. ສຕປຕ຺ຕຊາຕກໍ (໓-໓-໙)

໘໕. ຍຖາ ມາຓວໂກ ປນ຺ເຖ, ສິງ຺ຄາລິໍ ວນໂຄຈຣິໍ;

ອຕ຺ຖກາມໍ ປເວເທນ຺ຕິໍ [ປວທນ຺ຕິໍ (ປີ.)], ອນຕ຺ຖກາມາຕິ ມຎ຺ຎຕິ;

ອນຕ຺ຖກາມໍ ສຕປຕ຺ຕໍ, ອຕ຺ຖກາໂມຕິ ມຎ຺ຎຕິ.

໘໖. ເອວເມວ ອິເຘກຈ຺ໂຈ, ປຸຄ຺ຄໂລ ໂຫຕິ ຕາທິໂສ;

ຫິເຕຫິ ວຈນໍ ວຸຕ຺ໂຕ, ປຏິຄຓ຺ຫາຕິ ວາມໂຕ.

໘໗. ເຍ ຈ ໂຂ ນໍ ປສໍສນ຺ຕິ, ຠຍາ ອຸກ຺ກໍສຍນ຺ຕິ ວາ [ຈ (ສີ. ປີ.)];

ຕຎ຺ຫິ ໂສ ມຎ຺ຎເຕ ມິຕ຺ຕໍ, ສຕປຕ຺ຕໍວ ມາຓໂວຕິ.

ສຕປຕ຺ຕຊາຕກໍ ນວມໍ.

໒໘໐. ປຸຏທູສກຊາຕກໍ (໓-໓-໑໐)

໘໘. ອທ຺ຘາ ຫິ ນູນ ມິຄຣາຊາ, ປຸຏກມ຺ມສ຺ສ ໂກວິໂທ;

ຕຖາ ຫິ ປຸຏໍ ທູເສຕິ, ອຎ຺ຎໍ ນູນ ກຣິສ຺ສຕິ.

໘໙. ນ ເມ ມາຕາ ວາ ປິຕາ ວາ, ປຸຏກມ຺ມສ຺ສ ໂກວິໂທ;

ກຕໍ ກຕໍ ໂຂ ທູເສມ, ເອວໍ ຘມ຺ມມິທໍ ກຸລໍ.

໙໐. ເຍສໍ ໂວ ເອທິໂສ ຘມ຺ໂມ, ອຘມ຺ໂມ ປນ ກີທິໂສ;

ມາ ໂວ ຘມ຺ມໍ ອຘມ຺ມໍ ວາ, ອທ຺ທສາມ ກຸທາຈນນ຺ຕິ.

ປຸຏທູສກຊາຕກໍ ທສມໍ.

ອຸທປານວຄ຺ໂຄ [ອຣຎ຺ຎວຄ຺ໂຄ (ສີ. ປີ. ກ.)] ຕຕິໂຍ.

ຕສ຺ສຸທ຺ທານໍ –

ອຸທປານວຣໍ ວນພ຺ຍຄ຺ຆ ກປິ, ສິຂິນີ ຈ ພລາກ ຣຸຈິຣວໂຣ;

ສຸຊນາຘິປໂຣມກທູສ ປຸນ, ສຕປຕ຺ຕວໂຣ ປຸຏກມ຺ມ ທສາຕິ.