໔໗໔. ອມ຺ພຊາຕກໍ (໑)

໑. ອຫາສິ [ອາຫາສິ (?)] ເມ ອມ຺ພຜລານິ ປຸພ຺ເພ, ອຓູນິ ຖູລານິ ຈ ພ຺ຣຫ຺ມຈາຣິ;

ເຕເຫວ ມນ຺ເຕຫິ ນ ທານິ ຕຸຍ຺ຫໍ, ທຸມປ຺ຜລາ ປາຕຸຠວນ຺ຕິ ພ຺ຣຫ຺ເມ.

໒. ນກ຺ຂຕ຺ຕໂຍຄໍ ປຏິມານຍາມິ, ຂຓໍ ມຸຫຸຕ຺ຕຎ຺ຈ ມນ຺ເຕ ນ ປສ຺ສໍ [ຂຓໍ ມຸຫຸຕ຺ຕໍ ນ ມໍ ໂຕສຍນ຺ຕິ (ສີ. ປີ.)];

ນກ຺ຂຕ຺ຕໂຍຄຎ຺ຈ ຂຓຎ຺ຈ ລທ຺ຘາ, ອທ຺ຘາຫຣິສ຺ສມ຺ພຜລໍ [ອຖາຫຣິສ຺ສມ຺ພຜລໍ (ສີ. ປີ.)] ປຫູຕໍ.

໓. ນກ຺ຂຕ຺ຕໂຍຄໍ ນ ປຸເຣ ອຠາຓິ, ຂຓໍ ມຸຫຸຕ຺ຕໍ ນ ປຸເຣ ອສໍສິ;

ສຍໍ ຫຣີ [ອຖາຫຣີ (ສີ. ສ຺ຍາ. ປີ.)] ອມ຺ພຜລໍ ປຫູຕໍ, ວຓ຺ເຓນ ຄນ຺ເຘນ ຣເສນຸເປຕໍ.

໔. ມນ຺ຕາຠິຊປ຺ເປນ ປຸເຣ ຫິ [ປຸຣ’ສ຺ສ (ສີ. ປີ.), ປຸເຣປິ (ສ຺ຍາ.)] ຕຸຍ຺ຫໍ, ທຸມປ຺ຜລາ ປາຕຸຠວນ຺ຕິ ພ຺ຣຫ຺ເມ;

ສ຺ວາຊ຺ຊ ນ ປາເຣສິ ຊປ຺ປມ຺ປິ ມນ຺ຕໍ [ຊປມ຺ປິ ມນ຺ເຕ (ສີ. ປີ.)], ອຍໍ ໂສ ໂກ ນາມ ຕວຊ຺ຊ ຘມ຺ໂມ.

໕. ຈຓ຺ຑາລປຸຕ຺ໂຕ ມມ ສມ຺ປທາສິ, ຘມ຺ເມນ ມນ຺ເຕ ປກຕິຎ຺ຈ ສໍສິ;

ມາ ຈສ຺ສຸ ເມ ປຸຈ຺ຉິໂຕ ນາມໂຄຕ຺ຕໍ, ຄຸຍ຺ຫິຕ຺ໂຖ ອຕ຺ຖໍ [ມາ ຕໍ (ສີ. ສ຺ຍາ. ປີ.)] ວິຊເຫຍ຺ຍ ມນ຺ໂຕ [ວິຊເຫຍ຺ຍຸມນ຺ຕາ (ສ຺ຍາ.)].

໖. ໂສຫໍ ຊນິນ຺ເທນ ຊນມ຺ຫິ ປຸຏ຺ໂຐ, ມກ຺ຂາຠິຠູໂຕ ອລິກໍ ອຠາຓິໍ;

‘‘ມນ຺ຕາ ອິເມ ພ຺ຣາຫ຺ມຓສ຺ສາ’’ຕິ ມິຈ຺ຉາ, ປຫີນມນ຺ໂຕ ກປໂຓ ຣຸທາມິ.

໗. ເອຣຓ຺ຑາ ປຸຈິມນ຺ທາ ວາ, ອຖ ວາ ປາລິຠທ຺ທກາ;

ມຘຸໍ ມຘຸຕ຺ຖິໂກ ວິນ຺ເທ, ໂສ ຫິ ຕສ຺ສ ທຸມຸຕ຺ຕໂມ.

໘. ຂຕ຺ຕິຍາ ພ຺ຣາຫ຺ມຓາ ເວສ຺ສາ, ສຸທ຺ທາ ຈຓ຺ຑາລປຸກ຺ກຸສາ;

ຍມ຺ຫາ ຘມ຺ມໍ ວິຊາເນຍ຺ຍ, ໂສ ຫິ ຕສ຺ສ ນຣຸຕ຺ຕໂມ.

໙. ອິມສ຺ສ ທຓ຺ຑຎ຺ຈ ວຘຎ຺ຈ ທຕ຺ວາ, ຄເລ ຄເຫຕ຺ວາ ຂລຍາຖ [ພລຍາຖ (ສ຺ຍາ.), ຄລຍາຖ (ກ.)] ຊມ຺ມໍ;

ໂຍ ອຸຕ຺ຕມຕ຺ຖໍ ກສິເຣນ ລທ຺ຘໍ, ມານາຕິມາເນນ ວິນາສຍິຕ຺ຖ.

໑໐. ຍຖາ ສມໍ ມຎ຺ຎມາໂນ ປເຕຍ຺ຍ, ໂສພ຺ຠໍ ຄຸຫໍ ນຣກໍ ປູຕິປາທໍ;

ຣຊ຺ຊູຕິ ວາ ອກ຺ກເມ ກຓ຺ຫສປ຺ປໍ, ອນ຺ໂຘ ຍຖາ ໂຊຕິມຘິຏ຺ຐເຫຍ຺ຍ;

ເອວມ຺ປິ ມໍ ຕ຺ວໍ ຂລິຕໍ ສປຎ຺ຎ [ສປຎ຺ຎາ (ປີ.)], ປຫີນມນ຺ຕສ຺ສ ປຸນປ຺ປທາຫິ [ປຸນ ສມ຺ປທາຫິ (ສ຺ຍາ.), ປຸນປ຺ປສີທ (ສີ. ປີ.)].

໑໑. ຘມ຺ເມນ ມນ຺ຕໍ [ມນ຺ເຕ (ສີ. ສ຺ຍາ. ປີ.)] ຕວ ສມ຺ປທາສິໍ, ຕຸວມ຺ປິ ຘມ຺ເມນ [ຕ຺ວມ຺ປິ ຘມ຺ເມເນວ (ກ.)] ປຣິຄ຺ຄເຫສິ;

ປກຕິມ຺ປິ ເຕ ອຕ຺ຕມໂນ ອສໍສິໍ, ຘມ຺ເມ ຐິຕໍ ຕໍ [ປຕິຏ຺ຐໍ (ກ.)] ນ ຊເຫຍ຺ຍ ມນ຺ໂຕ.

໑໒. ໂຍ ພາລ ມນ຺ຕໍ [ພລມນ຺ຕໍ (ກ.)] ກສິເຣນ ລທ຺ຘໍ, ຍໍ ທຸລ຺ລຠໍ ອຊ຺ຊ ມນຸສ຺ສໂລເກ;

ກິຎ຺ຈາປິ ລທ຺ຘາ ຊີວິຕຸໍ ອປ຺ປປຎ຺ໂຎ [ກິຈ຺ຉາ ລທ຺ຘໍ ຊີວິກໍ ອປ຺ປປຎ຺ໂຎ (ສີ. ສ຺ຍາ.), ກຈ຺ຉາປິ ລທ຺ຘາ ຊີວິກໍ ອປ຺ປຎ຺ຎ (ປີ.)], ວິນາສຍີ ອລິກໍ ຠາສມາໂນ.

໑໓. ພາລສ຺ສ ມູຬ຺ຫສ຺ສ ອກຕຎ຺ຎຸໂນ ຈ, ມຸສາ ຠຓນ຺ຕສ຺ສ ອສຎ຺ຎຕສ຺ສ;

ມນ຺ເຕ ມຍໍ ຕາທິສເກ ນ ເທມ, ກຸໂຕ ມນ຺ຕາ ຄຈ຺ຉ ນ ມຍ຺ຫ ຣຸຈ຺ຈສີຕິ.

ອມ຺ພຊາຕກໍ ປຐມໍ.