໔໗໓. ມິຕ຺ຕາມິຕ຺ຕຊາຕກໍ (໑໐)

໑໒໑. ການິ ກມ຺ມານິ ກຸພ຺ພານໍ, ກຖໍ ວິຎ຺ຎູ ປຣກ຺ກເມ;

ອມິຕ຺ຕໍ ຊາເນຍ຺ຍ ເມຘາວີ, ທິສ຺ວາ ສຸຕ຺ວາ ຈ ປຓ຺ຑິໂຕ.

໑໒໒. ນ ນໍ ອຸມ຺ຫຍເຕ ທິສ຺ວາ, ນ ຈ ນໍ ປຏິນນ຺ທຕິ;

ຈກ຺ຂູນິ ຈສ຺ສ [ຈກ຺ຂູນິສ຺ສ (ສ຺ຍາ. ກ.)] ນ ທທາຕິ, ປຏິໂລມຎ຺ຈ ວຕ຺ຕຕິ.

໑໒໓. ອມິຕ຺ເຕ ຕສ຺ສ ຠຊຕິ, ມິຕ຺ເຕ ຕສ຺ສ ນ ເສວຕິ;

ວຓ຺ຓກາເມ ນິວາເຣຕິ, ອກ຺ໂກສນ຺ເຕ ປສໍສຕິ.

໑໒໔. ຄຸຍ຺ຫຎ຺ຈ ຕສ຺ສ ນກ຺ຂາຕິ, ຕສ຺ສ ຄຸຍ຺ຫໍ ນ ຄູຫຕິ;

ກມ຺ມໍ ຕສ຺ສ ນ ວຓ຺ເຓຕິ, ປຎ຺ຎສ຺ສ ນປ຺ປສໍສຕິ.

໑໒໕. ອຠເວ ນນ຺ທຕິ ຕສ຺ສ, ຠເວ ຕສ຺ສ ນ ນນ຺ທຕິ;

ອຈ຺ເຉຣໍ [ອຈ຺ຉຣິຍໍ (ສີ. ສ຺ຍາ. ປີ.)] ໂຠຊນໍ ລທ຺ຘາ, ຕສ຺ສ ນຸປ຺ປຊ຺ຊເຕ ສຕິ;

ຕໂຕ ນໍ ນານຸກມ຺ປຕິ, ອໂຫ ໂສປິ [ອຫາໂສປິ (ກ. ສີ. ສ຺ຍາ. ກ.)] ລເຠຍ຺ຍິໂຕ.

໑໒໖. ອິຈ຺ເຈເຕ ໂສຬສາກາຣາ, ອມິຕ຺ຕສ຺ມິໍ ປຕິຏ຺ຐິຕາ;

ເຍຫິ ອມິຕ຺ຕໍ ຊາເນຍ຺ຍ, ທິສ຺ວາ ສຸຕ຺ວາ ຈ ປຓ຺ຑິໂຕ.

໑໒໗. ການິ ກມ຺ມານິ ກຸພ຺ພານໍ, ກຖໍ ວິຎ຺ຎູ ປຣກ຺ກເມ;

ມິຕ຺ຕໍ ຊາເນຍ຺ຍ ເມຘາວີ, ທິສ຺ວາ ສຸຕ຺ວາ ຈ ປຓ຺ຑິໂຕ.

໑໒໘. ປວຸຕ຺ຖໍ ຕສ຺ສ ສຣຕິ, ອາຄຕໍ ອຠິນນ຺ທຕິ;

ຕໂຕ ເກລາຍິໂຕ ໂຫຕິ, ວາຈາຍ ປຏິນນ຺ທຕິ.

໑໒໙. ມິຕ຺ເຕ ຕສ຺ເສວ ຠຊຕິ, ອມິຕ຺ເຕ ຕສ຺ສ ນ ເສວຕິ;

ອກ຺ໂກສນ຺ເຕ ນິວາເຣຕິ, ວຓ຺ຓກາເມ ປສໍສຕິ.

໑໓໐. ຄຸຍ຺ຫຎ຺ຈ ຕສ຺ສ ອກ຺ຂາຕິ, ຕສ຺ສ ຄຸຍ຺ຫຎ຺ຈ ຄູຫຕິ;

ກມ຺ມຎ຺ຈ ຕສ຺ສ ວຓ຺ເຓຕິ, ປຎ຺ຎໍ ຕສ຺ສ [ປຎ຺ຎມສ຺ສ (ສ຺ຍາ. ກ.)] ປສໍສຕິ.

໑໓໑. ຠເວ ຈ ນນ຺ທຕິ ຕສ຺ສ [ຠເວ ນນ຺ທຕິ ຕສ຺ສ ຈ (ກ.)], ອຠເວ ຕສ຺ສ ນ ນນ຺ທຕິ;

ອຈ຺ເຉຣໍ [ອຈ຺ຉຣິຍໍ (ສີ. ສ຺ຍາ. ປີ.)] ໂຠຊນໍ ລທ຺ຘາ, ຕສ຺ສ ອຸປ຺ປຊ຺ຊເຕ ສຕິ;

ຕໂຕ ນໍ ອນຸກມ຺ປຕິ, ອໂຫ ໂສປິ [ປຫາໂສປິ (ກ. ສີ. ສ຺ຍາ. ກ.)] ລເຠຍ຺ຍິໂຕ.

໑໓໒. ອິຈ຺ເຈເຕ ໂສຬສາກາຣາ, ມິຕ຺ຕສ຺ມິໍ ສຸປ຺ປຕິຏ຺ຐິຕາ;

ເຍຫິ ມິຕ຺ຕຎ຺ຈ ຊາເນຍ຺ຍ [ມິຕ຺ຕໍ ສຸຊາເນຍ຺ຍ (ປີ. ກ.)], ທິສ຺ວາ ສຸຕ຺ວາ ຈ ປຓ຺ຑິໂຕຕິ.

ມິຕ຺ຕາມິຕ຺ຕຊາຕກໍ ທສມໍ.

ທ຺ວາທສກນິປາຕໍ ນິຏ຺ຐິຕໍ.