໔໕໐. ພິລາຣໂກສິຍຊາຕກໍ (໑໒)

໑໒໕. ອປຈນ຺ຕາປິ ທິຈ຺ຉນ຺ຕິ, ສນ຺ໂຕ ລທ຺ຘານ ໂຠຊນໍ;

ກິເມວ ຕ຺ວໍ ປຈມາໂນ, ຍໍ ນ ທຊ຺ຊາ ນ ຕໍ ສມໍ.

໑໒໖. ມຈ຺ເຉຣາ ຈ ປມາທາ ຈ, ເອວໍ ທານໍ ນ ທິຍ຺ຍຕິ;

ປຸຎ຺ຎໍ ອາກງ຺ຂມາເນນ, ເທຍ຺ຍໍ ໂຫຕິ ວິຊານຕາ.

໑໒໗. ຍສ຺ເສວ ຠີໂຕ ນ ທທາຕິ ມຈ຺ຉຣີ, ຕເທວາທທໂຕ ຠຍໍ;

ຊິຆຈ຺ຉາ ຈ ປິປາສາ ຈ, ຍສ຺ສ ຠາຍຕິ ມຈ຺ຉຣີ;

ຕເມວ ພາລໍ ຜຸສຕິ, ອສ຺ມິໍ ໂລເກ ປຣມ຺ຫິ ຈ.

໑໒໘. ຕສ຺ມາ ວິເນຍ຺ຍ ມຈ຺ເຉຣໍ, ທຊ຺ຊາ ທານໍ ມລາຠິຠູ;

ປຸຎ຺ຎານິ ປຣໂລກສ຺ມິໍ, ປຕິຏ຺ຐາ ໂຫນ຺ຕິ ປາຓິນໍ.

໑໒໙. ທຸທ຺ທທໍ ທທມານານໍ, ທຸກ຺ກຣໍ ກມ຺ມ ກຸພ຺ພຕໍ;

ອສນ຺ໂຕ ນານຸກຸພ຺ພນ຺ຕິ, ສຕໍ ຘມ຺ໂມ ທຸຣນ຺ນໂຍ.

໑໓໐. ຕສ຺ມາ ສຕຎ຺ຈ ອສຕໍ [ອສຕຎ຺ຈ (ສີ. ສ຺ຍາ. ປີ.)], ນານາ ໂຫຕິ ອິໂຕ ຄຕິ;

ອສນ຺ໂຕ ນິຣຍໍ ຍນ຺ຕິ, ສນ຺ໂຕ ສຄ຺ຄປຣາຍນາ.

໑໓໑. ອປ຺ປສ຺ເມເກ [ອປ຺ປມ຺ເປເກ (ສ຺ຍາ.)] ປເວຈ຺ຉນ຺ຕິ, ພຫຸເນເກ ນ ທິຈ຺ຉເຣ;

ອປ຺ປສ຺ມາ ທກ຺ຂິຓາ ທິນ຺ນາ, ສຫສ຺ເສນ ສມໍ ມິຕາ.

໑໓໒. ຘມ຺ມໍ ຈເຣ ໂຍປິ ສມຸຎ຺ຉກໍ ຈເຣ, ທາຣຎ຺ຈ ໂປສໍ ທທມປ຺ປກສ຺ມິໍ [ທທໍ ອປ຺ປກສ຺ມິປິ (ປີ.)];

ສຕໍ ສຫສ຺ສານໍ ສຫສ຺ສຍາຄິນໍ, ກລມ຺ປິ ນາຄ຺ຆນ຺ຕິ ຕຖາວິຘສ຺ສ ເຕ.

໑໓໓. ເກເນສ ຍຎ຺ໂຎ ວິປຸໂລ ມຫຄ຺ຆໂຕ [ມຫຄ຺ຄໂຕ (ສໍ. ນິ. ໑.໓໒)], ສເມນ ທິນ຺ນສ຺ສ ນ ອຄ຺ຆເມຕິ;

ກຖໍ ສຕໍ ສຫສ຺ສານໍ [ກຖໍ ສຫສ຺ສານໍ (ສີ. ສ຺ຍາ. ປີ.)] ສຫສ຺ສຍາຄິນໍ, ກລມ຺ປິ ນາຄ຺ຆນ຺ຕິ ຕຖາວິຘສ຺ສ ເຕ.

໑໓໔. ທທນ຺ຕິ ເຫເກ ວິສເມ ນິວິຏ຺ຐາ, ເຉຕ຺ວາ [ຌຕ຺ວາ (ສີ. ປີ.), ຆຕ຺ວາ (ສ຺ຍາ.)] ວຘິຕ຺ວາ ອຖ ໂສຈຍິຕ຺ວາ;

ສາ ທກ຺ຂິຓາ ອສ຺ສຸມຸຂາ ສທຓ຺ຑາ, ສເມນ ທິນ຺ນສ຺ສ ນ ອຄ຺ຆເມຕິ;

ເອວໍ ສຕໍ ສຫສ຺ສານໍ [ເອວໍ ສຫສ຺ສານໍ (ສີ. ສ຺ຍາ. ປີ.)] ສຫສ຺ສຍາຄິນໍ, ກລມ຺ປິ ນາຄ຺ຆນ຺ຕິ ຕຖາວິຘສ຺ສ ເຕຕິ.

ພິລາຣໂກສິຍຊາຕກໍ ທ຺ວາທສມໍ.