໔໔໑. ຈຕຸໂປສຖິຍຊາຕກໍ (໓)

໒໔. ໂຍ ໂກປເນຍ຺ເຍ ນ ກໂຣຕິ ໂກປໍ, ນ ກຸຊ຺ຌຕິ ສປ຺ປຸຣິໂສ ກທາຈິ;

ກຸທ຺ໂຘປິ ໂສ ນາວິກໂຣຕິ ໂກປໍ, ຕໍ ເວ ນຣໍ ສມຓມາຫຸ [ສມຓໍ ອາຫຸ (ສີ.)] ໂລເກ.

໒໕. ອູນູທໂຣ ໂຍ ສຫເຕ ຊິຆຈ຺ຉໍ, ທນ຺ໂຕ ຕປສ຺ສີ ມິຕປານໂຠຊໂນ;

ອາຫາຣເຫຕຸ ນ ກໂຣຕິ ປາປໍ, ຕໍ ເວ ນຣໍ ສມຓມາຫຸ ໂລເກ.

໒໖. ຂິຑ຺ຑໍ ຣຕິໍ ວິປ຺ປຊຫິຕ຺ວານ ສພ຺ພໍ, ນ ຈາລິກໍ ຠາສສິ ກິຎ຺ຈິ ໂລເກ;

ວິຠູສຏ຺ຐານາ ວິຣໂຕ ເມຖຸນສ຺ມາ, ຕໍ ເວ ນຣໍ ສມຓມາຫຸ ໂລເກ.

໒໗. ປຣິຄ຺ຄຫໍ ໂລຠຘມ຺ມຎ຺ຈ ສພ຺ພໍ, ໂຍ ເວ ປຣິຎ຺ຎາຍ ປຣິຈ຺ຈເຊຕິ;

ທນ຺ຕໍ ຐິຕຕ຺ຕໍ ອມມໍ ນິຣາສໍ, ຕໍ ເວ ນຣໍ ສມຓມາຫຸ ໂລເກ.

໒໘. ປຸຈ຺ຉາມ ກຕ຺ຕາຣມໂນມປຎ຺ຎໍ [ມໂນມປຎ຺ຎ (ສ຺ຍາ. ກ.)], ກຖາສຸ ໂນ ວິຄ຺ຄໂຫ ອຕ຺ຖິ ຊາໂຕ;

ຉິນ຺ທຊ຺ຊ ກງ຺ຂໍ ວິຈິກິຈ຺ຉິຕານິ, ຕທຊ຺ຊ [ຕຍາຊ຺ຊ (ສີ.)] ກງ຺ຂໍ ວິຕເຣມຸ ສພ຺ເພ.

໒໙. ເຍ ປຓ຺ຑິຕາ ອຕ຺ຖທສາ ຠວນ຺ຕິ, ຠາສນ຺ຕິ ເຕ ໂຍນິໂສ ຕຕ຺ຖ ກາເລ;

ກຖໍ ນຸ ກຖານໍ ອຠາສິຕານໍ, ອຕ຺ຖໍ ນເຍຍ຺ຍຸໍ ກຸສລາ ຊນິນ຺ທາ.

໓໐. ກຖໍ ຫເວ ຠາສຕິ ນາຄຣາຊາ, ຄຣຸໂຬ ປນ ເວນເຕຍ຺ໂຍ ກິມາຫ;

ຄນ຺ຘພ຺ພຣາຊາ ປນ ກິໍ ວເທສິ, ກຖໍ ປນ ກຸຣູນໍ ຣາຊເສຏ຺ໂຐ.

໓໑. ຂນ຺ຕິໍ ຫເວ ຠາສຕິ ນາຄຣາຊາ, ອປ຺ປາຫາຣໍ ຄຣຸໂຬ ເວນເຕຍ຺ໂຍ;

ຄນ຺ຘພ຺ພຣາຊາ ຣຕິວິປ຺ປຫານໍ, ອກິຎ຺ຈນໍ ກຸຣູນໍ ຣາຊເສຏ຺ໂຐ.

໓໒. ສພ຺ພານິ ເອຕານິ ສຸຠາສິຕານິ, ນ ເຫຕ຺ຖ ທຸພ຺ຠາສິຕມຕ຺ຖິ ກິຎ຺ຈິ;

ຍສ຺ມິຎ຺ຈ ເອຕານິ ປຕິຏ຺ຐິຕານິ, ອຣາວ ນາຠ຺ຍາ ສຸສໂມຫິຕານິ;

ຈຕຸພ຺ຠິ ຘມ຺ເມຫິ ສມງ຺ຄິຠູຕໍ, ຕໍ ເວ ນຣໍ ສມຓມາຫຸ ໂລເກ.

໓໓. ຕຸວຎ຺ຫິ [ຕຸວໍ ນຸ (ສີ. ປີ.)] ເສຏ຺ໂຐ ຕ຺ວມນຸຕ຺ຕໂຣສິ, ຕ຺ວໍ ຘມ຺ມຄູ ຘມ຺ມວິທູ ສຸເມໂຘ;

ປຎ຺ຎາຍ ປຎ຺ຫໍ ສມຘິຄ຺ຄເຫຕ຺ວາ, ອຈ຺ເຉຈ຺ຉິ ຘີໂຣ ວິຈິກິຈ຺ຉິຕານິ;

ອຈ຺ເຉຈ຺ຉິ ກງ຺ຂໍ ວິຈິກິຈ຺ຉິຕານິ, ຈຸນ຺ໂທ ຍຖາ ນາຄທນ຺ຕໍ ຂເຣນ.

໓໔. ນີລຸປ຺ປລາຠໍ ວິມລໍ ອນຄ຺ຆໍ, ວຕ຺ຖໍ ອິທໍ ຘູມສມານວຓ຺ຓໍ;

ປຎ຺ຫສ຺ສ ເວຍ຺ຍາກຣເຓນ ຕຸຏ຺ໂຐ, ທທາມິ ເຕ ຘມ຺ມປູຊາຍ ຘີຣ.

໓໕. ສຸວຓ຺ຓມາລໍ ສຕປຕ຺ຕຜຸລ຺ລິຕໍ, ສເກສຣໍ ຣຕ຺ນສຫສ຺ສມຓ຺ຑິຕໍ;

ປຎ຺ຫສ຺ສ ເວຍ຺ຍາກຣເຓນ ຕຸຏ຺ໂຐ, ທທາມິ ເຕ ຘມ຺ມປູຊາຍ ຘີຣ.

໓໖. ມຓິໍ ອນຄ຺ຆໍ ຣຸຈິຣໍ ປຠສ຺ສຣໍ, ກຓ຺ຐາວສຕ຺ຕໍ [ວສິຕໍ (ກ.)] ມຓິຠູສິຕໍ ເມ;

ປຎ຺ຫສ຺ສ ເວຍ຺ຍາກຣເຓນ ຕຸຏ຺ໂຐ, ທທາມິ ເຕ ຘມ຺ມປູຊາຍ ຘີຣ.

໓໗. ຄວໍ ສຫສ຺ສໍ ອຸສຠຎ຺ຈ ນາຄໍ, ອາຊຎ຺ຎຍຸຕ຺ເຕ ຈ ຣເຖ ທສ ອິເມ;

ປຎ຺ຫສ຺ສ ເວຍ຺ຍາກຣເຓນ ຕຸຏ຺ໂຐ, ທທາມິ ເຕ ຄາມວຣານິ ໂສຬສ.

໓໘. ສາຣິປຸຕ຺ໂຕ ຕທາ ນາໂຄ, ສຸປຓ຺ໂຓ ປນ ໂກລິໂຕ;

ຄນ຺ຘພ຺ພຣາຊາ ອນຸຣຸທ຺ໂຘ, ຣາຊາ ອານນ຺ທ ປຓ຺ຑິໂຕ;

ວິຘຸໂຣ ໂພຘິສຕ຺ໂຕ ຈ, ເອວໍ ຘາເຣຖ ຊາຕກນ຺ຕິ.

ຈຕຸໂປສຖິຍຊາຕກໍ ຕຕິຍໍ.