໗. ອິຕ຺ຖິວຄ຺ໂຄ

໖໑. ອສາ ໂລກິຕ຺ຖິໂຍ ນາມ, ເວລາ ຕາສໍ ນ ວິຊ຺ຊຕິ;

ສາຣຕ຺ຕາ ຈ ປຄພ຺ຠາ ຈ, ສິຂີ ສພ຺ພຆໂສ ຍຖາ;

ຕາ ຫິຕ຺ວາ ປພ຺ພຊິສ຺ສາມິ, ວິເວກມນຸພ຺ຣູຫຍນ຺ຕິ.

ອສາຕມນ຺ຕຊາຕກໍ ປຐມໍ.

໖໒. ຍໍ ພ຺ຣາຫ຺ມໂຓ ອວາເທສິ, ວີຓໍ ສມຸຂເວຐິໂຕ;

ອຓ຺ຑຠູຕາ ຠຕາ ຠຣິຍາ, ຕາສຸ ໂກ ຊາຕຸ ວິສ຺ສເສຕິ.

ອຓ຺ຑຠູຕຊາຕກໍ ທຸຕິຍໍ.

໖໓. ໂກຘນາ ອກຕຎ຺ຎູ ຈ, ປິສຸຓາ ມິຕ຺ຕເຠທິກາ [ປິສຸຓາ ຈ ວິເຠທິກາ (ສີ. ສ຺ຍາ. ປີ.)];

ພ຺ຣຫ຺ມຈຣິຍໍ ຈຣ ຠິກ຺ຂຸ, ໂສ ສຸຂໍ ນ ວິຫາຫສີຕິ [ປິຫາຫິສີຕິ (ສີ. ສ຺ຍາ. ປີ.), ວິຫາຍສິ (ກ.)].

ຕກ຺ກປຓ຺ຑິຕຊາຕກໍ [ຕກ຺ກຊາຕກໍ (ສີ. ສ຺ຍາ. ປີ. ອຏ຺ຐ.)] ຕຕິຍໍ.

໖໔. ມາ ສຸ ນນ຺ທິ ອິຈ຺ຉຕິ ມໍ, ມາ ສຸ ໂສຈິ ນ ມິຈ຺ຉຕິ [ນ ອິຈ຺ຉຕິ (ສີ. ສ຺ຍາ. ປີ.)];

ຖີນໍ ຠາໂວ ທຸຣາຊາໂນ, ມຈ຺ຉສ຺ເສໂວທເກ ຄຕນ຺ຕິ.

ທຸຣາຊານຊາຕກໍ ຈຕຸຕ຺ຖໍ.

໖໕. ຍຖາ ນທີ ຈ ປນ຺ໂຖ ຈ, ປານາຄາຣໍ ສຠາ ປປາ;

ເອວໍ ໂລກິຕ຺ຖິໂຍ ນາມ, ນາສໍ ກຸຊ຺ຌນ຺ຕິ ປຓ຺ຑິຕາຕິ.

ອນຠິຣຕິຊາຕກໍ ປຎ຺ຈມໍ.

໖໖. ເອກາ ອິຈ຺ຉາ ປຸເຣ ອາສິ, ອລທ຺ຘາ ມຸທຸລກ຺ຂຓໍ;

ຍໂຕ ລທ຺ຘາ ອຬາຣກ຺ຂີ, ອິຈ຺ຉາ ອິຈ຺ຉໍ ວິຊາຍຖາຕິ.

ມຸທຸລກ຺ຂຓຊາຕກໍ ຉຏ຺ຐໍ.

໖໗. ອຸຈ຺ຉງ຺ເຄ ເທວ ເມ ປຸຕ຺ໂຕ, ປເຖ ຘາວນ຺ຕິຍາ ປຕິ;

ຕຎ຺ຈ ເທສໍ ນ ປສ຺ສາມິ, ຍໂຕ ໂສທຣິຍມານເຍຕິ [ໂສທຣິຍໍ ນເຍ (ກ.)].

ອຸຈ຺ຉງ຺ຄຊາຕກໍ ສຕ຺ຕມໍ.

໖໘. ຍສ຺ມິໍ ມໂນ ນິວິສຕິ, ຈິຕ຺ຕຎ຺ຈາປິ [ຈິຕ຺ຕໍ ວາປິ (ກຕ຺ຖຈິ)] ປສີທຕິ;

ອທິຏ຺ຐປຸພ຺ພເກ ໂປເສ, ກາມໍ ຕສ຺ມິມ຺ປິ ວິສ຺ສເສຕິ.

ສາເກຕຊາຕກໍ ອຏ຺ຐມໍ.

໖໙. ຘິຣຕ຺ຖຸ ຕໍ ວິສໍ ວນ຺ຕໍ, ຍມຫໍ ຊີວິຕກາຣຓາ;

ວນ຺ຕໍ ປຈ຺ຈາວມິສ຺ສາມິ [ປຈ຺ຈາຫຣິສ຺ສາມິ (ກ.)], ມຕໍ ເມ ຊີວິຕາ ວຣນ຺ຕິ.

ວິສວນ຺ຕຊາຕກໍ ນວມໍ.

໗໐. ນ ຕໍ ຊິຕໍ ສາຘຸ ຊິຕໍ, ຍໍ ຊິຕໍ ອວຊີຍຕິ;

ຕໍ ໂຂ ຊິຕໍ ສາຘຸ ຊິຕໍ, ຍໍ ຊິຕໍ ນາວຊີຍຕີຕິ.

ກຸທ຺ທາລຊາຕກໍ ທສມໍ.

ອິຕ຺ຖິວຄ຺ໂຄ ສຕ຺ຕໂມ.

ຕສ຺ສຸທ຺ທານໍ –

ສິຂີສພ຺ພຆໂສປິ ຈ ວີຓວໂຣ, ປິສຸຓາ ມິຕ຺ຕເຠທິກາ ນນ຺ທີ ນທີ;

ມຸທຸລກ຺ຂຓ ໂສທຣິຍາ ຈ ມໂນ, ວິສ ສາຘຸຊິເຕນ ຠວນ຺ຕິ ທສາຕິ.