໒. ສີລວຄ຺ໂຄ

໑໑. ໂຫຕິ ສີລວຕໍ ອຕ຺ໂຖ, ປຏິສນ຺ຖາຣ [ປຏິສນ຺ຘາຣ (ກ.)] ວຸຕ຺ຕິນໍ;

ລກ຺ຂຓໍ ປສ຺ສ ອາຍນ຺ຕໍ, ຎາຕິສງ຺ຆປຸຣກ຺ຂຕໍ [ປຸຣກ຺ຂິຕໍ (ສ຺ຍາ.), ປຸເຣກ຺ຂິຕໍ (ກ.)];

ອຖ ປສ຺ສສິມໍ ກາຬໍ, ສຸວິຫີນໍວ ຎາຕິຠີຕິ.

ລກ຺ຂຓມິຄຊາຕກໍ ປຐມໍ.

໑໒. ນິຄ຺ໂຣຘເມວ ເສເວຍ຺ຍ, ນ ສາຂມຸປສໍວເສ;

ນິຄ຺ໂຣຘສ຺ມິໍ ມຕໍ ເສຍ຺ໂຍ, ຍຎ຺ເຈ ສາຂສ຺ມິ [ສາຂສ຺ມິໍ (ສີ. ປີ.)] ຊີວິຕນ຺ຕິ.

ນິຄ຺ໂຣຘມິຄຊາຕກໍ ທຸຕິຍໍ.

໑໓. ຘິຣຕ຺ຖຸ ກຓ຺ຑິນໍ ສລ຺ລໍ, ປຸຣິສໍ ຄາຬ຺ຫເວຘິນໍ;

ຘິຣຕ຺ຖຸ ຕໍ ຊນປທໍ, ຍຕ຺ຖິຕ຺ຖີ ປຣິຓາຍິກາ;

ເຕ ຈາປິ ຘິກ຺ກິຕາ [ຘິກ຺ກຕາ (?)] ສຕ຺ຕາ, ເຍ ອິຕ຺ຖີນໍ ວສໍຄຕາຕິ.

ກຓ຺ຑິຊາຕກໍ ຕຕິຍໍ.

໑໔. ນ ກິຣຕ຺ຖິ ຣເສຫິ ປາປິໂຍ, ອາວາເສຫິ ວ [ວາ (ສພ຺ພຕ຺ຖ)] ສນ຺ຖເວຫິ ວາ;

ວາຕມິຄໍ ຄຫນນິສ຺ສິຕໍ [ເຄຫນິສ຺ສິຕໍ (ສີ. ປີ.)], ວສມາເນສິ ຣເສຫິ ສຎ຺ຊໂຍຕິ.

ວາຕມິຄຊາຕກໍ ຈຕຸຕ຺ຖໍ.

໑໕. ອຏ຺ຐກ຺ຂຸຣໍ ຂຣາທິເຍ, ມິຄໍ ວງ຺ກາຕິວງ຺ກິນໍ;

ສຕ຺ຕຫິ ກາລາຕິກ຺ກນ຺ຕໍ [ສຕ຺ຕຫິ ກລາຫ’ຕິກ຺ກນ຺ຕໍ (ສີ.), ສຕ຺ຕກາເລຫ’ຕິກ຺ກນ຺ຕໍ (ສ຺ຍາ.), ສຕ຺ຕຫິ ກາລາຫ’ຕິກ຺ກນ຺ຕໍ (ປີ.)], ນ ນໍ ໂອວທິຕຸສ຺ສເຫຕິ.

ຂຣາທິຍຊາຕກໍ ປຎ຺ຈມໍ.

໑໖. ມິຄໍ ຕິປລ຺ລຕ຺ຖ [ຕິປລ຺ລຕ຺ຕ (ກ.)] ມເນກມາຍໍ, ອຏ຺ຐກ຺ຂຸຣໍ ອຑ຺ຒຣຕ຺ຕາປປາຍິໍ [ອຑ຺ຒຣຕ຺ຕາວປາຍິໍ (ສີ. ປີ.)];

ເອເກນ ໂສເຕນ ຉມາສ຺ສສນ຺ໂຕ, ຉຫິ ກລາຫິຕິໂຠຕິ [ກລາຫຕິໂຠຕິ (ສີ. ສ຺ຍາ. ປີ.)] ຠາຄິເນຍ຺ໂຍຕິ.

ຕິປລ຺ລຕ຺ຖມິຄຊາຕກໍ ຉຏ຺ຐໍ.

໑໗. ກາເຬ ວາ ຍທິ ວາ ຊຸຓ຺ເຫ, ຍທາ ວາຍຕິ ມາລຸໂຕ;

ວາຕຊານິ ຫິ ສີຕານິ, ອຸໂຠຕ຺ຖມປຣາຊິຕາຕິ.

ມາລຸຕຊາຕກໍ ສຕ຺ຕມໍ.

໑໘. ເອວໍ ເຈ ສຕ຺ຕາ ຊາເນຍ຺ຍຸໍ, ທຸກ຺ຂາຍໍ ຊາຕິສມ຺ຠໂວ;

ນ ປາໂຓ ປາຓິນໍ ຫຎ຺ເຎ, ປາຓຆາຕີ ຫິ ໂສຈຕີຕິ.

ມຕກຠຕ຺ຕຊາຕກໍ ອຏ຺ຐມໍ.

໑໙. ສເຈ ມຸຈ຺ເຈ [ມຸຎ຺ເຈ (ສີ. ສ຺ຍາ. ປີ.)] ເປຈ຺ຈ ມຸຈ຺ເຈ [ມຸຎ຺ເຈ (ສີ. ສ຺ຍາ. ປີ.)], ມຸຈ຺ຈມາໂນ ຫິ ພຊ຺ຌຕິ;

ນ ເຫວໍ ຘີຣາ ມຸຈ຺ຈນ຺ຕິ, ມຸຕ຺ຕິ ພາລສ຺ສ ພນ຺ຘນນ຺ຕິ.

ອາຍາຈິຕຠຕ຺ຕຊາຕກໍ ນວມໍ.

໒໐. ທິສ຺ວາ ປທມນຸຕ຺ຕິຓ຺ຓໍ, ທິສ຺ວາໂນຕຣິຕໍ ປທໍ;

ນເຬນ ວາຣິໍ ປິສ຺ສາມ [ປິວິສ຺ສາມ (ສີ. ສ຺ຍາ. ປີ.)], ເນວ [ນ ຈ (ກ.)] ມໍ ຕ຺ວໍ ວຘິສ຺ສສີຕິ.

ນຬປານຊາຕກໍ ທສມໍ.

ສີລວຄ຺ໂຄ ທຸຕິໂຍ.

ຕສ຺ສຸທ຺ທານໍ –

ອຖ ລກ຺ຂຓ ສາຂ ຘິຣຕ຺ຖຸ ປຸນ, ນ ກິຣຕ຺ຖິ ຣເສຫິ ຂຣາທິຍາ;

ອຕິໂຠຕິ ວຣ [ຣສ (ສພ຺ພຕ຺ຖ)] ມາລຸຕ ປາຓ, ມຸຈ຺ເຈນ ນຬອວ຺ຫຍເນນ ຠວນ຺ຕິ ທສາຕິ.