໑໔. ອສມ຺ປທານວຄ຺ໂຄ

໑໓໑. ອສມ຺ປທາເນນິຕຣີຕຣສ຺ສ, ພາລສ຺ສ ມິຕ຺ຕານິ ກລີ ຠວນ຺ຕິ;

ຕສ຺ມາ ຫຣາມິ ຠຸສໍ ອຑ຺ຒມານໍ, ມາ ເມ ມິຕ຺ຕິ ຊີຍິຕ຺ຖ ສສ຺ສຕາຍນ຺ຕິ.

ອສມ຺ປທານຊາຕກໍ ປຐມໍ.

໑໓໒. ກຸສລູປເທເສ ຘິຕິຍາ ທຬ຺ຫາຍ ຈ, ອນິວຕ຺ຕິຕຕ຺ຕາຠຍຠີຣຸຕາຍ [ອວຕ຺ຖິຕຕ຺ຕາຠຍຠີຣຸຕາຍ (ສີ. ສ຺ຍາ. ປີ.)] ຈ;

ນ ຣກ຺ຂສີນໍ ວສມາຄມິມ຺ຫເສ, ສ ໂສຕ຺ຖິຠາໂວ ມຫຕາ ຠເຍນ ເມຕິ.

ຠີຣຸກ [ປຎ຺ຈຄຣຸກ (ສີ. ປີ.), ປຎ຺ຈຠີຣຸກ (ສ຺ຍາ.), ອຠຍຠີຣຸຕ§(?)] ຊາຕກໍ ທຸຕິຍໍ.

໑໓໓. ເຂມໍ ຍຫິໍ ຕຕ຺ຖ ອຣີ ອຸທີຣິໂຕ [ອຣິ ອຸທ຺ຘຣິໂຕ (ກ.)], ທກສ຺ສ ມຊ຺ເຌ ຊລເຕ ຆຕາສໂນ;

ນ ອຊ຺ຊ ວາໂສ ມຫິຍາ ມຫີຣຸເຫ, ທິສາ ຠຊວ຺ໂຫ ສຣຓາຊ຺ຊ ໂນ ຠຍນ຺ຕິ.

ຆຕາສນຊາຕກໍ ຕຕິຍໍ.

໑໓໔. ເຍ ສຎ຺ຎິໂນ ເຕປິ ທຸຄ຺ຄຕາ, ເຍປິ ອສຎ຺ຎິໂນ ເຕປິ ທຸຄ຺ຄຕາ;

ເອຕໍ ອຸຠຍໍ ວິວຊ຺ຊຍ, ຕໍ ສມາປຕ຺ຕິສຸຂໍ ອນງ຺ຄຓນ຺ຕິ.

ຌານໂສຘນຊາຕກໍ ຈຕຸຕ຺ຖໍ.

໑໓໕. ຈນ຺ທາຠໍ ສູຣິຍາຠຎ຺ຈ, ໂຍຘ ປຎ຺ຎາຍ ຄາຘຕິ.

ອວິຕກ຺ເກນ ຌາເນນ, ໂຫຕິ ອາຠສ຺ສຣູປໂຄຕິ.

ຈນ຺ທາຠຊາຕກໍ ປຎ຺ຈມໍ.

໑໓໖. ຍໍ ລທ຺ຘໍ ເຕນ ຕຸຏ຺ຐພ຺ພໍ, ອຕິໂລໂຠ ຫິ ປາປໂກ;

ຫໍສຣາຊໍ ຄເຫຕ຺ວານ, ສຸວຓ຺ຓາ ປຣິຫາຍຖາຕິ.

ສຸວຓ຺ຓຫໍສຊາຕກໍ ຉຏ຺ຐໍ.

໑໓໗. ຍຕ຺ເຖໂກ ລຠເຕ ພພ຺ພຸ, ທຸຕິໂຍ ຕຕ຺ຖ ຊາຍຕິ;

ຕຕິໂຍ ຈ ຈຕຸຕ຺ໂຖ ຈ, ອິທໍ ເຕ ພພ຺ພຸກາ ພິລນ຺ຕິ.

ພພ຺ພຸຊາຕກໍ ສຕ຺ຕມໍ.

໑໓໘. ກິໍ ເຕ ຊຏາຫິ ທຸມ຺ເມຘ, ກິໍ ເຕ ອຊິນສາຏິຍາ;

ອພ຺ຠນ຺ຕຣໍ ເຕ ຄຫນໍ, ພາຫິຣໍ ປຣິມຊ຺ຊສີຕິ.

ໂຄຘຊາຕກໍ ອຏ຺ຐມໍ.

໑໓໙. ອກ຺ຂີ ຠິນ຺ນາ ປໂຏ ນຏ຺ໂຐ, ສຂິເຄເຫ ຈ ຠຓ຺ຑນໍ;

ອຸຠໂຕ ປທຸຏ຺ຐາ ກມ຺ມນ຺ຕາ [ປທຸຏ຺ຐກມ຺ມນ຺ໂຕ (ສີ.), ປທຸຏ຺ໂຐ ກມ຺ມນ຺ໂຕ (ປີ.)], ອຸທກມ຺ຫິ ຖລມ຺ຫິ ຈາຕິ.

ອຸຠໂຕຠຏ຺ຐຊາຕກໍ ນວມໍ.

໑໔໐. ນິຈ຺ຈໍ ອຸພ຺ພິຄ຺ຄຫທຍາ, ສພ຺ພໂລກວິເຫສກາ;

ຕສ຺ມາ ເນສໍ ວສາ ນຕ຺ຖິ, ກາການມ຺ຫາກ [ກາການສ຺ມາກ (ສີ. ສ຺ຍາ. ປີ.)] ຎາຕິນນ຺ຕິ.

ກາກຊາຕກໍ ທສມໍ.

ອສມ຺ປທານວຄ຺ໂຄ ຈຸທ຺ທສໂມ.

ຕສ຺ສຸທ຺ທານໍ –

ອິຕຣີຕຣ ຣກ຺ຂສິ ເຂມິໂຍ ຈ, ປໂຣສຕປຎ຺ເຫນ ອາຠສ຺ສໂຣ ປຸນ;

ອຖ ຫໍສວຣຸຕ຺ຕມພພ຺ພຸຊຏໍ, ປຏນຏ຺ຐກ ກາກວເຣນ ທສາຕິ.